EHONGWA 01
Hapo Ombeibela mai yenene okukuvatera vi?
Atuhe tu vanga okutjiwa ovingi ohunga nehupo, okumuna omauzeu, onḓiro noruyaveze. Eṱe wina tu kara nozongendo eyuva nga keyuva, ohunga nokurihupisa poo okukara nouṋingandu meṱunḓu. Ovandu ovengi va muna kutja Ombeibela kai ve vatere okuzira omapuriro omengi ngu ve na wo ohunga nehupo uriri, nungwari i ve pa ounongo mbu mave ungurire ko mehupo rawo. Hapo mo munu kutja Ombeibela mai yenene okuvatera omundu warwe ngu mo tjiwa?
1. Omapuriro yeṋe tjiva Ombeibela ngu i zira?
Ombeibela i zira omapuriro omananḓengu tjimuna inga: Hapo ehupo ra uta vi? Ondando yokuhupa oyatjike? Ongwaye ovandu mbe hi nondjo tji ve muna omauzeu? Pe tjitwa tjike indu omundu tja koka? Ndoovazu ovandu ovengi ve zera ohange, ongwaye ovita tji vya takavara nao? Hapo maku katjitwa tjike kombanda yehi moruyaveze? Ombeibela i tu tunduuza okupaha omaziriro komapuriro ngo, nu omangete wovandu va muna kutja oyo i nomaziriro nge ri wo.
2. Hapo Ombeibela mai tu vatere vi okuyorokera ehupo retu reyuva arihe?
Ombeibela i tu pa ondunge ndji ri yo. Otjotjihorera, i honga omaṱunḓu omuano wokukara nondjoroka yatjiri. I tu raera kutja matu sokutjita vi indu tji tu ri kehi yombameno, nomuano mu matu yenene okuyorokera oviungura vyetu. Mo kerihonga imbi Ombeibela mbi i honga ohunga nomapu nga, na vyarwe ovingi indu tji matu kahungirira komapu nga pamwe. Ove mo keya koumune umwe mbu mau tja: “Omatjangwa aehe . . . ye nonḓengu onene.”—2 Timoteus 3:16.
Embo ndi kari nokupingena Ombeibela. Nungwari, mari ku tunduuza kutja u konḓonone Ombeibela omuini. Ku nao, matu ku tunduuza kutja u lese omatjangwa nge ri mehongwa arihe nu u ye sasaneke ku na imbi mbi mo rihongo.
KONḒONONA OUKOTO
Ripurira komuano Ombeibela mu ya vatera ovandu, nomuano mu mo kara nondjoroka tji mo i lese, nokutja ongwaye tje ri ohepero okupaha ombatero kutja u i zuve nawa.
3. Ombeibela mai yenene okutuvatera okutoora omikambo omisemba
Ombeibela i ri tjimuna ondjerera onamasa. Eṱe matu yenene okuungurisa Ombeibela kutja i tu vatere okutoora omikambo omisemba nokutuvatera kutja tu mune imbi mbi mavi katjitwa moruyaveze.
Lesa Epsalme 119:105, nu u hungirire komapuriro nga:
-
Omutjange wepsalme ndi, wa ri noumune uṋe ohunga nOmbeibela?
-
Ove u noumune uṋe ohunga nOmbeibela?
4. Ombeibela mai yenene okuzira omapuriro wetu
Omukazendu umwe wa muna kutja Ombeibela ya zira omapuriro ngee ripura na wo oure wozombura ozengi. Nyanda OKAVIDIO, nu okuzambo hungirira komapuriro ngu maye kongorere mba.
-
Mokavidio nga, omapuriro yeṋe omukazendu ngwi nga ri na wo?
-
Omerihongero wOmbeibela ye mu vatera vi?
Ombeibela i tu tunduuza kutja tu pure omapuriro. Lesa Mateus 7:7, nu okuzambo hungirira ku imbi mbi mavi kongorere mba:
-
Omapuriro yeṋe ngamwa ayehe ngu u na wo Ombeibela ngu mai yenene okuzira?
5. Ove mo yenene okukara nondjoroka indu tji mo lese Ombeibela
Ovandu ovengi ve kara nondjoroka indu tji mave lese Ombeibela nu ve muna mo ouwa. Nyanda OKAVIDIO, nu okuzambo hungirira komapuriro ngu maye kongorere mba.
-
Mokavidio nga, hapo omitanda vi noumune uṋe ohunga nokulesa?
-
Ongwaye nai tji vi noumune warwe ohunga nokulesa Ombeibela?
Ombeibela mai yenene okutupa omahongero ngu maye tu yanḓiparisa nokutupa omaundjiro. Lesa Ovaroma 15:4, nu okuzambo hungirira kepuriro ndi:
-
Hapo omakwizikiro wOmbeibela ohunga nomayanḓiparisiro nomaundjiro maye ku nana ombango poo indee?
6. Varwe mave yenene okutuvatera okuzuva Ombeibela nawa
Pendje nokulesa Ombeibela ku wo oveni, ovengi ve muna kutja okuhungira ohunga nOmbeibela kuna varwe ku ve vatera tjinene. Lesa Oviungura 8:26-31, nu okuzambo hungirira kepuriro ndi:
-
Hapo matu yenene vi okuzuva Ombeibela nawa?—Tara kezeva 30 no 31.
Omurumendu Omuetiopi aa hepa ombatero okuzuva Omatjangwa nawa. Ovandu ovengi ndino ve muna ounahepero wokukonḓonona Ombeibela ku na varwe
OVANDU TJIVA VE TJA: “Okurihonga Ombeibela okumorosa oruveze.”
-
Hapo ove otjo tja vi? Omena raye tji mo tja nao?
OKUYARUKIRA PO OUSUPI
Ombeibela i tu pa ounongo mehupo, i zira omapuriro omananḓengu, nu i yanḓiparisa nokuyandja omaundjiro kovandu.
Okurizemburukisa
-
Ounongo uṋe mbu matu yenene okuisa mOmbeibela?
-
Omapuriro yeṋe Ombeibela ngu i yenena okuzira?
-
Ove mo vanga okurihonga tjike okuza mOmbeibela?
RIHONGA OVINGI
Ripurira komuano Ombeibela mu i tu pa ounongo mbu matu yenene okuungurisa ndino.
“Omahongero wOmbeibela—Ounongo wapeke” (Oruhungu No. 1 2018)
Tara komuano Ombeibela mu ya vatera omurumendu ngwa ri nouzeu momuinyo okuza kouṱiṱi.
Konḓonona ounongo wOmbeibela mbu mo yenene okuungurisa meṱunḓu.
“Oviundikwa 12 mbi yeta ouṋingandu meṱunḓu” (Penduka! No. 2 2018)
Tjiwa omuano Ombeibela mu i ṱuna omeripura woposyo ohunga nokutja ouṋe ngu honaparera po ouye.
Ongwaye tji mo sokurihonga Ombeibela?—Okavidio Akehe (3:14)
Mo yenene okutara ku imbi wina
OMAPURIRO NGE PURWA i yovandu OVENGI
Ovahongonone va Jehova ve yandja omerihongero wOmbeibela momuano uṋe?
Ove mo yenene okuungurisa Ombeibela ngamwa aihe indu tji mo rihongo Ombeibela otjari pu nOvahongonone va Jehova. Mo yenene okuṋanga eṱunḓu roye arihe poo omapanga woye okukara pomerihongero woye wOmbeibela.
