Twende kovidio oini

Twende komurya

Ovahongonone vaJehova

Toorora eraka Otjiherero

Omahongero wOmbeibela​—Ounongo wapeke

Omahongero wOmbeibela​—Ounongo wapeke

RIPURIRA KU IMBI: Ngatu tje wa hiti mondjuwo mu mu ṱizirwa oviṋa ovikuru. Nu mu yo mu noviṋa tjiva mbya kurupa, na tjiva mbya riwa i omatoto nu mbya hara omureru. Nungwari pe notjiṋa tjimwe otjikuru, posi yokutja tji matji munika oupe. Nove opura kutja, “Hapo ongwaye ihi tji matji munika oupe ngunda vyarwe avya kurupa?” Nu omuini wondjuwo e ku raere kutja, “Ihi tji matji munika oupe, ootjikurukuru mu avihe.” Okuzambo omupura kutja, “Nu aatji ṱizirwa pu ye?” Eye e ku ziri kutja, “Kako tja ri pu novikwao, nu nandarire ovandu ovengi va kondjisa okutjihahaura.” Nove ohimwa kutja, ‘Nu hapo tja ungurwa pu ye?’

Momuano otjingewo, Ombeibela i ri tjimuna otjiṋa otjikuru ho. Oyo embo ekuru tjinene pomambo omengi. Otjiperi kutja pe nomambo warwe omakuru. Posi yokutja, tjimuna tji pe kara noviṋa ovikuru momakuruhungi, omambo omengi omakuru wina ye kurupa otja oruveze tji maru kayenda. Otjotjihorera, oviṋa mbi ri momambo ohunga nounongo wovimemwa, vya rundururwa mena rondjiviro ombe, noviraisiro ovikahu. Ondjivisiro ohunga nomapangero, ndji ri momambo nga, kai nombatero. Nu omambo omakuru omengi ya rira otupa uriri, orondu otupa tjiva twa pandjara poo twa zunḓaka.

Nungwari, Ombeibela ya panguka komambo warwe. Oyo ya uta okutjangwa momaserewondo wokombanda 35 nga kapita, posi yokutja oviṋa avihe mOmbeibela ngamba omu vi ri. Nandarire kutja Ombeibela ya muna omapirukiro omengi oure wozombura ozengi, tjimuna okunyosiwa, okutjaerwa, nokuisakewa onḓengu, oyo ya tuurunga oviṋa avihe mbi. Nu nandarire kutja ovengi ve muna kutja Ombeibela embo ekuru ndi tu hina okuyenena okuungurisa, oyo i hungira ohunga noviṋa oviwa  mbi mavi katjitwa moruyavaze.—Lesa okaongo nga “Ombeibela onguru, poo i hungira oviṋa mbya kapita oruveze rwayo?

OMIRARI MBI TU HEPA NDINO

Mape ya oripura kutja, ‘Hapo matu yenene okuungurisa omahongero wOmbeibela ndino?’ Okuzira epuriro ndo, ripura omuini kutja, ‘Omauzeu yeṋe omanene ovandu ngu ve muna ndino? Ooyeṋe nge ri omatirise tjinene?’ Mape ya oripura ohunga novita, omanyoneno wehi, ozondjito zoutwe, poo omauhasemba wovanane. Nambano tara komirari tjiva Ombeibela mbi i honga. Otja tji mo tjiti nao, ripura omuini kutja, ‘Andakuzu ovandu ve ṱakamisa omirari mbi, hapo ouye atja u rira oruveze ndwa sana pi?’

OKUSUVERA OHANGE

“Ovaṋingandu imba mbe hangana, Ndjambi tjinga ame ve isa po ovanatje ve!” (Mateus 5:9) “Tji mape sorwa, kareye nohange novandu avehe.”—Ovaroma 12:18.

OTJARI NONDJESIRO

“Ovaṋingandu imba mbe notjari, owo tjinga amave ṱirwa otjari!” (Mateus 5:7) “Tjindasaneye nu mu isirasane umwe tje nombiri nomukwao. Nu mamu sokuisirasana otja Muhona punga e mu isira.”—Ovakolose 3:13.

OHANGE POKATI KOMIHOKO

“Pomundu umwe Eye wa utire po omihoko avihe vyovandu, nu e vi turisa mouye auhe.” (Oviungura 17:26) “Ndjambi u vara ovandu avehe pu pe ṱeki pamwe. Eye u yakura omundu auhe ngu nondira ku Ye, nu ngu tjita ousemba, nangarire kutja eye owotjiwaṋa kaaṋi ho.”—Oviungura 10:34, 35.

ONDENGERO KEHI

“Muhona Ndjambi arire tja toora ingwi omundu, ne mu twa motjikunino tja Eden okutjiungura nokutjitjevera.” (Genesis 2:15) Mukuru ma ‘yandeke imba mbe nyona ehi!’—Omavandururiro 11:18.

OKUNAKAURA OUKOROKOPE NORUVAKIRO

“Ṱakamiseye nu ritjevereye koukorokope ngamwa auhe, orondu ehupiro romundu kari zu menyangato rouini mbwe na wo.” (Lukas 12:15) “Nu tjinga amu ri otjiwaṋa tja Ndjambi, ombakirasaneno nouhakohoke noukorokope au ha tamunwa mokati keṋu.”—Ovaefese 5:3.

OUATJIRI NOKUUNGURA OUKUKUTU

“Tjinga atu vanga okutjita ihi tji tji ri otjisemba oruveze aruhe.” (Ovaheberi 13:18) “Omundu nguya vaka, a ha vaka rukwao; nu nga ute okuungura e rimwine omuini ondjambi ombwa.”—Ovaefese 4:28.

OUNANḒENGU WOKUVATERA IMBA MBE NOUHEPE

‘Yanḓipariseye imba vomitima omitarazu, mu vatere ovingundi nu mu kare nomuretima novandu avehe.’ (1 Ovatesalonika 5:14) ‘Varureye ozosewa novahepundu mouzeu wawo.’—Jakobus 1:27.

Ombeibela kai tamuna omirari mbi uriri. Nungwari oyo i tu honga ounanḓengu womirari mbi, nu wina i tu raera omuano wokuviṱakamisa. Indu ovandu tji va ṱakamisa omirari mbi twa tara ko, kamu nakukara omauzeu omengi mouye. Okutja tjiri, matu yenene okuungurisa omirari vyOmbeibela ndino, novyo kavi nomaandero! Nu hapo omahongero wOmbeibela maye ku vatere vi ndino?

OMAHONGERO WOMBEIBELA MAYE KU VATERE VI NDINO?

Omurumendu onongo tjinene wa tjere: “Oviungura vye ombi raisa kutja imbwi ounongo owo ouatjiri.”  (Mateus 11:19) Mo itavere kutja imbwi ouatjiri? Ounongo watjiri mo yenene okuumuna indu tji mo ṱakamisa imbi mbi mo rihongo. Kunao, mape ya oripura kutja: ‘Tjinangara Ombeibela embo ndi vatera tjiri, okutja varwe mave sokumuna mehupo randje kutja pe ri nao nu? Ombeibela mai yenene vi okundjivatera nomauzeu ngu mbi muna nai?’ Ngatu tare kotjihorera.

Omukazendu wena Elizabeth, * wa ri nehupo ewa rondjoroka. Posi yokutja ngunda e hiya undjira ko, eye wa muna omauzeu omengi. Omuatje we omukazona wa ṱa. Orukupo rwe rwa teka. Nu eye wina wa ri nouzeu wotjimariva. Eye wa tja: “Ami hina pu mba ri nomuhunga, nokuhina omuatje, nokuhina omurumendu, nokuhina ondjuwo. Ami ee munu kutja hi nondando mehupo rukwao.”

Elizabeth wa muna ouatjiri womambo nga: “Oure womuinyo wetu u vaza kozombura omirongo hambombari; nu tji tu nomasa tjinene, u vaza kozombura omirongo hambondatu; nungwari imbi mbi ze tu etera, ovyo orukondjo nomaputi. Tjiri, avihe vi kapita tjimanga, neṱe matu zengi hakahana.”—Epsalme 90:10.

Elizabeth wa ṱaṱera kOmbeibela moruveze rwouzeu. Oyo tjiri ye mu vatera momuano omuhimise.  Otja tji matu kamuna motupa tu matu kongorereko, ovandu ovengi varwe va muna ombatero mOmbeibela indu tji va ṱakamisa omaronga wayo mehupo rawo. Owo va muna kutja Ombeibela i ri tjimuna otjiṋa otjikuru momakuruhungi, tji twa hungirire ko pomautiro worupa ndwi. Oyo ya panguka komambo warwe omengi, nge kurupa nga tji ye hina okuyenena okuungurisiwa rukwao. Nu hapo omena rokutja Ombeibela ya ungurwa poviṋa mbya panguka komambo warwe? Poo hapo omena rokutja i nomeripura wa Mukuru, nu kawonga owovandu?—1 Ovatesalonika 2:13.

Mape ya kutja ove wina wa muna kutja omuinyo womundu mouye mbwi omusupi, nu we ura nomauzeu. Hapo ove u ṱaṱera ku uṋe okumuna omahuhumiṋino, nombatero, nomaronga omasemba, indu tji u nomauzeu?

Ngatu katare komiano vitatu Ombeibela mu mai yenene okutuvatera mehupo retu. Oyo mai ku hongo

  1. okuyepa omauzeu pu mo yenene.

  2. okuzengurura omauzeu indu tji ya kara po.

  3. okutjinda omauzeu ngu u hina okuyenena okurundurura.

Otupa tu matu kongorere ko, matu kakahurura nawa omiano 3 mbi.

^ par. 24 Morupa ndwi, na tutatu tu matu kongorere ko, omana wovandu tjiva ya rundururwa.