Hapo Ouhona wa Mukuru otjiṋa tji tji ri momutima woye?
Eziriro okuza mOmbeibela
Kako, Ouhona wa Mukuru katjiṋa tji tji ri momitima vyOvakriste. a Ombeibela i tjiukisa ouatjiri kutja Ouhona mbwo u ri pi, indu tji mai tja “Ouhona womayuru.” (Mateus 4:17) Tara komuano Ombeibela mu i raisa kutja oyo ohoromende yatjiri ndji honaparera okuza meyuru.
Ouhona wa Mukuru u novanane, ovananwa, ozoveta, nouvara okuzikamisa ombango ya Mukuru meyuru na kombanda yehi.—Mateus 6:10; Omavandururiro 5:10.
Ohoromende ya Mukuru poo Ouhona we, mau honaparere po “ovandu voviwaṋa novomihoko avihe nowomaraka aehe” kombanda yehi. (Daniel 7:13, 14) Ouhonapare wokunana kau nokuza movananwa, nungwari mau zu ku Mukuru omuini.—Epsalme 2:4-6; Jesaja 9:7.
Jesus wa raera ovaapostele ve ovaṱakame kutja mave kakara pu na ye mOuhona womayuru okukahonapara “kovihavero vyouhona.”—Lukas 22:28, 30.
Ouhona u novanavita, nu owo mau keveyandeka.—Epsalme 2:1, 2, 8, 9; 110:1, 2; 1 Ovakorinte 15:25, 26.
Ombeibela kai hongo kutja Ouhona womeyuru u ri momutima womundu nu u honaparera okupitira mu wo. Nungwari, oyo i raisa kutja “embo rOuhona” poo “Ombuze Ombwa yOuhona” mai yenene nu mai sokuṱuna komitima vyetu.—Mateus 13:19; 24:14.
Omambo nga “Ouhona wa Mukuru u ri mourekoto woye” ye heya tjike?
Ovandu tjiva ve pambauka kutja Ouhona u ri pi indu tji mave lese mu Lukas 17:21 otja komatorokero wOzombeibela tjiva. Otjotjihorera, Ombeibela ndji o-King James Version i tja: “Ouhona wa Mukuru u ri mourekoto woye.” Kokutja tu zuve nawa ezeva ndi, matu sokuripurira kutja omutjange ngo aa hungirire ku ye.
Ouhona wa Mukuru kawa ri momitima vyovapirukire ovarunde novazepe va Jesus
Jesus aa hungire kOvafarisei, tji tja ri otjimbumba tjovanane vyozongamburiro mbaave mu pirukire nu mba tandere okumuzepa. (Mateus 12:14; Lukas 17:20) Hapo onawa okuripura kutja Ouhona wa Mukuru otjiṋa tji tja ri momitima vyawo omirunde? Jesus we ve raera kutja: “Moukoto eṋe mwe ura notjavivi nourunde.”—Mateus 23:27, 28.
Ozombeibela tjiva za toroka omambo wa Jesus nge ri mu Lukas 17:21 momuano omusemba kutja: “Ouhona wa Mukuru u ri mba pu na eṋe.” (Contemporary English Version) “Ouhona wa Mukuru u ri mokati keṋu.” (New World Translation) Ouhona womeyuru wa ri “pu na” poo “mokati” kOvafarisei, mena rokutja Jesus ngwa toororwa i Mukuru otjOmbara yOuhona wa Mukuru wa ri mokati kawo.—Lukas 1:32, 33.
a Ozokereka ozengi ze honga kutja Ouhona wa Mukuru u ri momundu poo u ri momutima womundu. Otjotjihorera, moUnited States ongamburiro ndji Southern Baptist Convention ya tja Ouhona wa Mukuru “u honaparera momutima na mehupo romundu.” Momuano tjingewo, Pope Benedict omutja-16 ngwa tjanga embo ndi Jesus of Nazareth wa tja nai mu ro: “Ouhona wa Mukuru mau ya indu tji matu yandja ombango ku Mukuru nomitima vyetu avihe.”
Mo yenene okutara ku imbi wina
ESSENTIAL BIBLE TEACHINGS
Ouhona waMukuru otjikeṋa?
Motjiungura tje tjokuzuvarisa kombanda yehi, Jesus aa hongo ohunga nOuhona waMukuru okukapita omapu warwe. Momaserewondo omengi, ovandu ve kumbira ouhona mbo okuya.
ORUHUNGU
Ouṋe ngu ri Ombara yOuhona wa Mukuru?
Ovatjange tjiva vOmbeibela va tjanga ovikaṋena mbi mavi tjiukisa Ombara yOuhona wa Mukuru. Momakuruhungi wovandu, omundu umwe uriri ngu ma hitasana novikaṋena mbyo.
OMAHONGERO WOMBEIBELA
Rora omerihongero wetu wOmbeibela
Muna omerihongero wOmbeibela wotjari pu nomundu ngu me ku hongo.