Հիսուսը բացատրել էր, թե ինչից էինք իմանալու, որ «Աստծու թագավորությունը մոտ է» (Ղուկաս 21։31)։ Նա մարգարեացել էր, որ լինելու էին մեծ պատերազմներ, ուժգին երկրաշարժեր, սովեր, համաճարակներ և այլ բաներ, որոնց ականատես ենք լինում մեր օրերում (Ղուկաս 21։10–17)։

Աստվածաշունչը ցույց է տալիս, որ մարդկային իշխանության «վերջին օրերը» բնորոշվելու էին նաև մարդկանց վատ վարվելակերպով և մտածելակերպով։ Այդ ամենը նկարագրվում է 2 Տիմոթեոս 3։1–5-ում։ Տեսնելով ներկայիս աշխարհի վարքուբարքը՝ անկասկած կհամաձայնեք, որ Աստվածաշնչի այս մարգարեությունը ճիշտ և ճիշտ համապատասխանում է այսօրվա իրականությանը։

Իսկ ինչի՞ մասին է վկայում այս ամենը։ Այն մասին, որ մոտ է ժամանակը, երբ Աստծու Թագավորությունը մեծ փոփոխություններ կիրականացնի, որոնք անհամեմատ կբարելավեն կյանքը երկրի վրա (Ղուկաս 21։36)։ Աստվածաշնչում գրված է, թե Աստված ինչ հիանալի բաներ է խոստացել երկրագնդի և ողջ մարդկության համար։ Ահա դրանցից մի քանիսը։

«Եվ նրան [Հիսուսին] տրվեց իշխանություն, պատիվ ու թագավորություն, որպեսզի բոլոր ժողովուրդները, ազգություններն ու լեզուները ծառայեն նրան։ Նրա իշխանությունը հավիտենական իշխանություն է, որը չի անցնի, և նրա թագավորությունը չի ավերվի» (ԴԱՆԻԵԼ 7։14)։

Ինչ է դա նշանակում։ Դուք կվայելեք կյանքը Աստծու հիմնած լավագույն համաշխարհային կառավարության ներքո, որի թագավորը նրա Որդին է։

«Ոչ մի բնակիչ չի ասի. «Ես հիվանդ եմ» » (ԵՍԱՅԻԱ 33։24)։

Ինչ է դա նշանակում։ Դուք այլևս երբեք չեք ունենա ոչ մի հիվանդություն կամ տկարություն, կկարողանաք անվերջ վայելել կյանքը առանց երբևէ մահ ճաշակելու։

«Նա դադարեցնում է պատերազմները մինչև երկրի ծայրերը» (ՍԱՂՄՈՍ 46։9)։

Ինչ է դա նշանակում։ Պատերազմներն ու դրանց բերած ցավալի հետևանքներն առհավետ անցյալի գիրկը կանցնեն։

«Ամբարիշտն այլևս չի լինի.... Հեզերը կժառանգեն երկիրը» (ՍԱՂՄՈՍ 37։10, 11)։

Ինչ է դա նշանակում։ Այլևս չեն լինի չար մարդիկ։ Կմնան միայն նրանք, ովքեր սրտանց ցանկանում են հնազանդվել Աստծուն։

«Նրանք տներ կշինեն ու կբնակվեն դրանցում, խաղողի այգիներ կտնկեն ու դրանց պտուղը կուտեն» (ԵՍԱՅԻԱ 65։21, 22)։

Ինչ է դա նշանակում։ Մեր մոլորակը ամբողջությամբ գեղատեսիլ վայր կդառնա։ Եվ Աստված կկատարի այն, ինչ այսքան ժամանակ խնդրել ենք նրան մեր աղոթքներում՝ «թող կատարվի քո կամքը.... երկրի վրա» (Մատթեոս 6։10)։