Սաղմոս 23։4. «Եթե նույնիսկ թանձր խավարի հովտում քայլեմ, ոչ մի չար բանից ես չեմ վախենա»։

 Նշանակությունը։ Եթե աղոթես Աստծուն և առաջնորդության համար նրա Խոսքին դիմես, կարող ես քաջությամբ հաղթահարել դժվարությունները։

 Ժողովող 9։10. «Գերեզմանում, ուր գնալու ես, ոչ աշխատանք կա, ոչ ծրագրեր, ոչ գիտելիքներ, ոչ էլ իմաստություն»։

 Նշանակությունը։ Մահացած մարդիկ չեն տանջվում և չեն կարող վնասել մեզ։ Նրանք գտնվում են անգիտակից վիճակում։

 Սաղմոս 86։5. «Ո՛վ Եհովա, a դու բարի ես ու ներելու պատրաստ, և մեծ է քո սիրառատ բարությունը բոլոր նրանց հանդեպ, ովքեր կանչում են քեզ»։

 Նշանակությունը։ Աստված ներում է նրանց, ովքեր անկեղծորեն զղջում են իրենց կատարած սխալների համար և վճռել են այլևս չկրկնել դրանք։

 Սաղմոս 31։7. «Դու տեսար իմ տառապանքը, իմացար հոգուս վիշտը»։

 Նշանակությունը։ Աստված լավատեղյակ է, թե ինչերի միջով ես անցնում։ Նա հասկանում է քո խոր զգացումները անգամ այն ժամանակ, երբ ուրիշները չեն հասկանում դրանք։

 Սաղմոս 41։3. «Եհովան կօգնի նրան հիվանդության մահճում»։

 Նշանակությունը։ Աստված կարող է օգնել քեզ, որ հաղթահարես առողջական լուրջ խնդիրներդ։ Նա քեզ կտա ներքին խաղաղություն, ուժ, դիմացկունություն և իմաստություն՝ ճիշտ որոշումներ կայացնելու համար։

 Սաղմոս 94։19. «Երբ ինձ անհանգստացնող մտքերը շատացան իմ ներսում, քո մխիթարությունները սկսեցին փաղաքշել հոգիս»։

 Նշանակությունը։ Եթե սթրեսային իրավիճակներում մոտ լինենք Աստծուն, նա կօգնի անդորր գտնել։

 Սաղմոս 46։9. «Նա դադարեցնում է պատերազմները մինչև երկրի ծայրերը»։

 Նշանակությունը։ Աստծու Թագավորությունը շուտով վերջ կդնի բոլոր պատերազմներին։

 Երեմիա 29։11. «Ես գիտեմ, թե ինչ եմ մտադրել ձեզ համար,— ասում է Եհովան։— Խաղաղություն եմ մտադրել և ոչ աղետ, որպեսզի ձեզ ապագա և հույս տամ»։

 Նշանակությունը։ Աստված հավաստիացնում է, որ իր ժողովուրդը հիասքանչ ապագա է ունենալու։