Pagbantala sing Maayong Balita sa Maduagon nga Haiti

ANG Haiti kag Dominican Republic pareho nga masapwan sa tropikal nga isla sang Hispaniola, nga nahamtangan sang pinakamataas nga mga kabukiran sa Caribbean. Ang iban sining mga bukid kapin sa 2,400 metros ang kataason. Sa tion sang “matugnaw” nga mga binulan, ang nagyelo nga tun-og kag manipis nga yelo makita sa mga linawlinaw sa kabukiran.

Ang kabukiran kag mga nalupyakan sa bagatnan sang Haiti ginatabunan sang malagtom nga kagulangan. Sa iban nga duog, ang mga kabukiran halos nakalbo na bangod sa pagkaingin. Apang, kon maglakbay ka sa aminhan ukon bagatnan makita mo ang tuman katahom nga mga talan-awon sa Haiti. Sa pila ka makitid, nagalikoliko nga mga dalan sa kabukiran, makita mo ang dalayawon kag nanarisari nga matahom nga mga talan-awon sa duta kag dagat. Makita mo ang nanuhaytuhay nga kabulakan kag masili nga mga kolor bisan diin.

Ang 8.3 milyones ka pumuluyo sa sining maduagon nga isla kadamuan taga-uma nga gikan sa Aprika. Bisan pa ang kalabanan imol, mainayuhon sila kag maabiabihon. Sa sulod sang mga 60 ka tuig, malipayon nga ginpaambit sa ila sang mga Saksi ni Jehova ang maayong balita sang Ginharian sang Dios kag mainit sila nga gin-abiabi.—Mateo 24:14.

Pagbantala sa Isa ka Banwa sa Kaumhan

Kinaandan ang eksperiensia sang isa ka misyonera sa una niya nga pagduaw sa isa ka banwa sa kaumhan. Sia nagsulat:

“Isa ka adlaw sang Marso 2003, nagbantala kami sa Casale, isa ka gamay nga banwa nga mga tunga sa oras gikan sa amon puluy-an misyonero sa Cabaret, nga nahamtang mga 30 kilometros sa aminhan sang kapital nga Port-au-Prince. Sang 1999 pa ulihi nga nabantalaan sang mga Saksi ang Casale, gani may kalangkag kami nga naglakat sang alas 7:00 sang aga. Beinte-dos kami—halos ang bug-os nga kongregasyon—sakay sa duha ka van. Ang tanan nagaistoryahanay kag nagakinadlaw samtang nagataklad kami sa indi sementado nga mga dalan kag nakalab-ot sa nalupyakan nga madamo sing dalagku nga kakahuyan. May suba nga nagailig sa nalupyakan, kag nagaagi ini sa tunga mismo sang banwa sang Casale.

“Ang maragtas sining malinong nga banwa nagsugod sang maaga nga bahin sang katuigan 1800 sang ang pila ka Polaco nga soldado, nga nagkadto sa Haiti agod magbulig nga matigayon sang mga ulipon ang kahilwayan, nagpuyo sa sining mauyahon nga nalupyakan upod sa ila taga-Haiti nga mga asawa. Nagresulta ini sa matahom nga pagsamo sang mga tawo. Makawiwili tan-awon ang tumandok nga mga pumuluyo nga may pamanit nga maputi, mapulapula, ukon kaki, may mga mata nga duag berde, madukot nga kaki, kag madamo pa.

“Ang tawo nga nagbukas sang puertahan sa una namon nga pagpanuktok indi interesado. Sang maglakat kami, may tawo nga nagsugata sa amon sa dalan. Luyag niya mahibaluan kon bala nagapati kami nga may kinatuhayan si Jesus kag ang Dios. Sang ginpangabay namon sia, ginkuha niya ang iya Biblia, kag ang amon paghambalanay sa Biblia nagkumbinse sa iya nga si Jesus Anak sang Dios kag si Jehova ‘ang lamang matuod nga Dios.’ (Juan 17:3) Madamo ang nag-agda sa amon nga magpungko kag makighambal sa ila. Ang iban namangkot, ‘San-o kamo mabalik kag tun-an kami sing Biblia?’

“Sang udto, nakakita kami sing mahandong nga duog kag naghimos nga manyaga. Ang duha  ka utod nga babayi nagluto sing isda nga isa gid ka kaldero nga daku. Manamit gid ini! Samtang nagapahuwayhuway kami, nagakaon kag nagaistoryahanay, ginbantalaan man namon ang mga nagalabay. Pagkatapos, nagtabok kami sa suba pakadto sa pihak nga bahin sang banwa. Nalipay kami makighambal sa sining mainabyanon nga mga tawo nga nagapungko sa idalom sang kahoy malapit sa ila simple nga mga puluy-an. Kanami pamatian ang gahod sang nagahinampang nga kabataan, sang mga babayi nga nagapanglaba sa suba, kag sang may edad na nga mga babayi nga nagagaling sing liso sang kape!

“Wala madugay, alas kuatro na, kag ang amon malipayon nga grupo nagbalik na sa mga van agod magpauli sa Cabaret. Kami sang akon bana nalipay gid sa amon una nga pagduaw sa Casale, nga may maabiabihon kag mainabyanon nga mga tawo.”

Sugod sang mag-abot sa Haiti ang Saksi nga mga misyonero sang 1945, ang mga manugbantala sang Ginharian sa Haiti padayon nga nag-uswag, amo nga karon 14,000 na ang manugbantala kag nagadumala sila sing kapin sa 22,000 ka pagtuon sing Biblia sa puluy-an. Naimpluwensiahan nila ang kabuhi sang 59,372 ka tawo nga nagtambong sa Memoryal sang Marso 2005 kag padayon nila nga ginabantala sing dayag ang maayong balita sang Ginharian sang Dios. Binagbinaga ang madamo nga paagi nga naapektuhan sang pagbantala sang mga Saksi ni Jehova ang mga tawo.

Ang Maayong Balita sa Maduagon nga Taliambong

Ang kalabanan nga taga-Haiti mahuyugon sa masili nga kolor. Makita ini sa ila panapton, sa ila napinturahan nga mga balay, sa kabulakan sa ila mga hardin, kag sa ila taliambong. Sa mga kalye sa bug-os nga Port-au-Prince may ginadispley nga mga painting sang lokal nga mga desinyo nga masili ang kolor nga kon tawgon L’Art Haitien. Ang mga manugbakal sini naggikan pa sa lainlain nga bahin sang kalibutan.

Indi lamang sa kanbas makita ang masili nga mga kolor. Ang mga kalye sa Port-au-Prince puno sang de-pasahero nga mga salakyan nga ginatawag camionette, ukon tap-taps, nga mauti nga ginpinturahan sang mapahituon nga mga desinyo. Masami nga makita sa sining mga desinyo ang mga laragway pasad sa Biblia.

Samtang nagalakatlakat ka sa sining mga kalye, ang isa ka pamilyar nga laragway—subong nanday Adan kag Eva sa Eden—mahimo nga hinali mo nga makita. Huo, makita mo ini sa bintana sa likod sang isa ka camionette nga bag-o lang naglabay. Ang mga teksto ukon islogan nga may ngalan nga  Jehova masami nga makita sa sining mga salakyan ukon yara sa ngalan sang mga balaligyaan.

Pagbantala sing Maayong Balita sa Eskwelahan

Ang lamharon nga mga Saksi sa Haiti may maayo nga kahigayunan nga buligan ang ila masigkaestudyante nga matun-an ang Biblia. Isa ka halimbawa sini ang masunod nga panugiron sang isa ka 17-anyos nga dalagita.

“Isa ka adlaw ginpalapitan ako sang akon klasmeyt kag ginpamangkot kon ano ang ‘pagpakighilawas.’ Abi ko nagapakiat lang sia, gani wala ko sia ginsapak. Apang, sang amo gihapon ang iya pamangkot sa isa ka lalaki nga estudyante, nangin interesado sa sini ang bug-os nga klase. Gani, pagkadason nga semana, sang makapanalawsaw ako sa sini nga topiko, ginpresentar ko ini sa klase kag ginpaathag kon ngaa ang mga Saksi ni Jehova nagapanikasog nga mangin matinlo sa moral, espirituwal, kag pisikal.

“Madamo sing pamangkot ang mga estudyante kag ugyon sila sa akon sabat gikan sa Biblia. Bisan ang prinsipal, nga sang primero daw nagaduhaduha, madamo man sing pamangkot, kag naghimo sia sing kahimusan agod makapresentar man ako sa iban pa nga klase. Ginpakita ko sa ila ang libro nga Questions Young People Ask—Answers That Work, * kag madamo ang interesado sa sini. Pagkaaga, nakapahamtang ako sing 45 ka libro sa akon mga kabutho. Gilayon nga gin-ubos basa sang madamo ang ila kopya, kag ang pila nagatuon na karon sing Biblia upod sa mga Saksi nga nagapuyo malapit sa ila. Ang isa ka estudyante nga kaingod ko nagatambong na karon sa tanan nga miting.”

Paggamit sing Creole nga Lenguahe

Ang pungsod kag ang pumuluyo sini maduagon kag makawiwili, kag subong man ang lenguahe nga Haitian Creole, nga nagasamo sang Pranses nga mga tinaga sa gramatika sang Bagatnan nga Aprika. Amo ini ang lenguahe sang mga taga-Haiti, ang lenguahe nga nahangpan gid nila. Amo ini ang lenguahe nga pirme gid ginagamit sang mga Saksi ni Jehova sa ila ministeryo, kag may mga kahimusan na agod mabadbad ang iban pa nga literatura sa Biblia sa Haitian Creole.

Sang 1987 ang brosyur nga Agoma ang Kabuhi sa Duta Sing Dayon! ginbadbad sa Haitian Creole, nga ginsundan sang libro nga Ang Ihibalo nga Nagadul-ong sa Kabuhi nga Walay Katapusan kag sang brosyur nga Ano ang Ginapatuman Sang Dios sa Aton? Ini nga mga publikasyon daku gid nga bulig sa bag-o nga mga estudyante sa Biblia nga luyag magtigayon sing sadsaran nga paghangop sa Pulong sang Dios. Sugod sang Septiembre 1, 2002, Ang Lalantawan ginbalhag man sa Haitian Creole. Ginagamit nila gihapon ang Pranses nga mga literatura, apang madamo ang naluyag magbasa sining mga publikasyon sa ila mismo lenguahe.

Pagdala sing Maayong Balita sa mga Priso

Sining karon lang, gindala sang mga Saksi ni Jehova ang maayong balita sa mga lalaki kag babayi sa mga prisuhan. Ang mga Saksi nga nagahimo sini nalipay nga magdala sing mensahe sang paumpaw sa mga yara sa sining masubo nga kahimtangan. Ang isa ka Cristianong ministro nagsaysay:

“Sa una namon nga pagduaw sa isa ka prisuhan, ang mga priso gindala sa isa ka daku nga hulot agod makigkita sa amon. Ginhunahuna namon kon ano ang ila reaksion. Sang ginpaathag namon nga nagkadto kami didto agod buligan sila nga mahangpan ang Biblia, sila nga 50 nag-abiabi sa amon. Ginpresentar namon ang Creole nga edisyon sang mga brosyur nga Apply Yourself to Reading and Writing kag Agoma ang Kabuhi sa Duta Sing Dayon! kag 26 sa ila ang nasugdan sing pagtuon sa Biblia. Dies porsiento ang indi kabalo magbasa kag magsulat, apang interesado sila sang ginpakita namon kon paano gamiton ang mga ilustrasyon sa brosyur subong bulig agod mahangpan ang mga tinaga.”

Sang magbalik ang mga Saksi, ang isa ka lalaki nagsiling: “Ginsulitsulit ko basa ang brosyur. Ginapamensar ko pirme ang ginasiling sini, kag ginahulat ko ang inyo pagbalik.” Ang tawo nga gindakop bangod sa pagpanghold-ap nagsiling nga luyag niya magbag-o, kag nangabay sia nga kuntani duawon man kag tun-an sing Biblia ang iya asawa. Amo man sini ang pangabay sang isa ka priso, nga amay sang duha ka bata, agod makita sang iya asawa  ang kinatuhayan sang matuod kag butig nga pagtuluuhan. Ang isa ka klero nga Protestante nga nangdaya sing daku nga kantidad sang kuarta sa katapo sang iya simbahan nagsiling nga nasapwan na niya karon ang kamatuoran kag kon matapos niya ang iya sentensia, buligan niya ang mga katapo sang iya simbahan nga mangin mga Saksi ni Jehova.

Ang isa pa ka priso, bangod wala sing iya kopya sang Ginapatuman nga brosyur sa Creole, nagkopya sang bug-os nga brosyur gikan sa iya kaupod sa selda kag ginsaulo ini. Ang isa ka babayi nga priso nagpaambit sang iya natun-an sa siam niya ka kaupod sa selda, kag ginatudluan pa gani niya sila. Natapos sang isa ka lalaki nga priso ini nga brosyur, kag sang gintun-an na niya ang Ihibalo nga libro, nagbantala na sia sa iban nga mga priso. Wala madugay, apat sa ila ang gintun-an niya sing Biblia.

Si Mercony * nagatuon anay sing Biblia kag may mga paryente pa sia nga Saksi ni Jehova. Ginpalig-on niya ang iban nga priso nga basahon ang mga literatura sa Biblia nga dala sang iya mga paryente. Nagsiling sia: “Kon ginatanyag ko ang literatura sa mga priso, ginatawag nila ako nga Saksi ni Jehova. Ginasilingan ko sila nga indi ako Saksi kay nahibaluan ko kon ano ang kahulugan sang mangin Saksi. Luyag ko karon nga tun-an sing maayo ang Biblia kag magpabawtismo. Kon ginsunod ko lang ang akon mga magulang nga lalaki sang lamharon pa ako, wala kuntani ako mapriso.”

Ang isa ka priso nga nakabaton sing literatura gikan kay Mercony nagsiling sa Saksi nga nagduaw sa iya: “Antes ka nagkadto sang nagligad nga Lunes, ginapung-awan ako kag mahikog na ako kuntani. Apang sang mabasa ko ang mga magasin, nangamuyo ako sa Dios nga patawaron ako sa malaut nga mga butang nga nahimo ko kag nga magpadala sia sing matudlo sa akon sang husto nga dalanon. Daku gid ang akon kalipay sang nagkadto ka pagkaaga agod magtanyag nga tun-an sing Biblia ang mga priso! Luyag ko nga tudluan mo ako kon paano alagaron si Jehova.”

Madamo ang Nakabaton sing Maayong Balita Bangod sa Magmata!

Ang Nobiembre 8, 2000 nga gua sang Magmata! tuhoy sa mga nars. Isa ka babayi ang nagkuha sing 2,000 ka kopya kag ginpanagtag ini sa mga nars nga nagatambong sa isa ka seminar sa Port-au-Prince. Ang Hulyo 8, 2002, nga gua sang Magmata! nga may mga artikulo tuhoy sa pulis kag sa ila obra ginpanagtag man sa mga pulis sa Port-au-Prince. Nanamian gid sila sining magasin, kag bisan karon, ginapadulog sang pila sa ila ang mga Saksi agod mangabay sing dugang pa nga kopya sining magasin.

Sining karon lang, isa ka opisyal sang World Health Organization ang nag-organisar sing programa agod tudluan ang mga tawo tuhoy sa balatian nga AIDS. Gin-agda sia sa sanga talatapan sang mga Saksi ni Jehova, kag ginpakita sa iya ang mga impormasyon nga nabalhag sa Magmata! tuhoy sa sining topiko. Nalipay sia sang makita niya ang mga artikulo nga nagahinun-anon tuhoy sa pinakamaayo nga paagi suno sa Biblia agod malikawan ang AIDS kag kon paano buligan ang mga nalatnan sini nga malandas ang ila kahimtangan. Suno sa iya ang Magmata! amo ang nagapanguna sa pag-aman sing impormasyon sa sini nga topiko.

Huo, sa madamo nga paagi ginabantala sang mga Saksi ni Jehova ang maayong balita sa maduagon nga Haiti, subong amo man ang ginahimo nila sa 234 ka pungsod sa bug-os nga kalibutan. Madamo ang nagabaton sining mensahe sang paglaum kag sa pihak sang mabudlay nga kahimtangan sang kabuhi karon nabuligan sila nga maglaum sa isa ka bag-ong kalibutan, nga ang tanan nga nagasimba sa matuod nga Dios, nga si Jehova, magakalipay sing himpit nga kabuhi sa kabuganaan.—Bugna 21:4.

[Mga nota]

[Credit Line sang retrato sa pahina 9]

Background: ©Adalberto Rios Szalay/photodisc/age fotostock