Sarang Masalbar ang Planeta nga Duta!

MAATHAG nga ginapakita sang nagligad nga mga artikulo nga ang tawo indi makapadayon sa paggamit sang mga manggad sang duta suno sa karon nga kadasigon. Matuod, may dalayawon nga mga panikasog ang mga lider sa kalibutan agod buhinan ang polusyon, pagpapas sang kagulangan,  kag iban pa nga mga problema sa palibot. Sugod sa UN Conference on Human Environment sang 1972, kag ginsundan sang iban pa nga mga komperensia, mga 163 ka pungsod na ang nagtipon agod ipabutyag ang ila pagsakdag sa pila ka buhat agod matigayon ang isa ka tulumuron. Apang ano ang resulta? “Makapasubo nga ining tuman kadamo nga mga kasugtanan, mga plano, kag ang iban pa nga mga dokumento wala makapugong sa pagkaguba sang palibot sa bug-os nga duta,” siling ni David Hunter, pangulo nga direktor sang Center for International Environmental Law. Ang matuod, si Hunter nagdugang, “maathag nga mas malain pa karon ang mga kahimtangan sangsa tion sang 1992 nga UN Conference.”

Ngaa kahinay gid sang proseso pagkatapos sang 30 ka tuig nga pagtalupangod sang mga problema sa palibot? Ang isa ka rason amo nga kinahanglan ang pag-uswag sa ekonomiya. Ang ekonomiya sang mga pungsod nasandig sa bumalakal. Nagakinahanglan ini sing mga negosyo agod may mapatubas nga mga produkto, kag bangod sini, kinahanglan ang galamiton nga mga materyales. Mapintas ini nga siklo nga ang nagakaguba amo ang palibot. Busa, ano ang solusyon?

Sayop nga mga Tikang

Ginapaathag sang Biblia kon ngaa napaslawan gid ang mga panikasog sang tawo nga gamhan ang iya kaugalingon. Si manalagna Jeremias nagsiling: “Nahibaluan ko, O Jehova, nga ang dalanon sang tawo wala sa iya kaugalingon. Wala sa tawo nga nagalakat bisan ang pagtuytoy sa iya tikang.” (Jeremias 10:23) Nangin matuod gid ining mga pinamulong!

Nakaduaw ka na bala sa isa ka hardin ukon parke? Nalipay gid kita sa matahom, nanarisari nga mga kahoy, mga tanom, kag mga bulak! Apang, ang naareglar sing maayo nga hardin wala lamang natabuan. Ang sangkol nga mga hardinero nagahinguyang sing madamo nga inoras agod patahumon ang mga kahoy, mga hilamon, kag mga kabulakan agod mangin presentable ini. Hunahunaa kon daw ano ang hitsura sang aton bug-os nga duta kon atipanon man ini subong sang isa ka hardin.

Ang matuod, tuyo sang aton Manunuga nga mangin amo sini ang aton planeta. Suno sa kasaysayan sang pagpanuga sa inspirado nga Pulong sang Dios, “ginkuha ni Jehova nga Dios ang tawo kag ginbutang sia sa hardin sang Eden agod pangumahon ini kag atipanon ini.” (Genesis 2:15) Dugang pa, wala lamang ginsugo ang tawhanon nga pamilya nga atipanon ang Eden kundi pasangkaron ining orihinal nga Paraiso tubtob mahil-ob ang bug-os nga duta.​—⁠Genesis 1:28.

Sing makapasubo, nangin di-himpit sanday Adan kag Eva bangod sang ila paglapas kag nawasi nila ang kahigayunan sa pag-atipan kag pagpasangkad sang Paraiso. (Genesis 3:​1-6, 23) Subong kaanakan sang una nga mag-asawa, napanubli naton ang ila sala kag pagkadihimpit. (Roma 5:12) Ang pag-abuso sa duna nga mga manggad sang duta isa lang ka halimbawa sang di-maayo nga pagdumala sang tawo sa iya kaugalingon. Maathag nga ang problema indi masarangan solbaron sang katawhan. Kinahanglan nila ang bulig.

Ang Dalan Padulong sa Pagpasag-uli

Sang yari pa sa duta, gintudluan ni Jesus ang iya mga disipulo nga mangamuyo: “Magkari ang imo ginharian. Paghimuon ang imo kabubut-on sa duta, subong sang sa langit.” (Mateo 6:10) Ginatudlo sang Biblia nga sa langitnon nga Ginharian sang Dios, mangin paraiso ang duta. (Salmo 37:​10, 11) Sa sina nga tion ang mga kahoy kag mga tanom mangin mabungahon gid sa isa ka matinlo nga palibot. (Salmo 72:16) Sa idalom sang pagtuytoy sang Dios ang duta wala na sing polusyon, kag matun-an sang mga tawo kon paano magkabuhi nga nahisanto gid sa palibot. Paano naton ini mapat-od?

Nagsiling ang Biblia nga ang duta “indi mationg tubtob sa tion nga di-napat-od, ukon sing dayon.” (Salmo 104:5) Sa gintalana nga tion sang Dios, ang tanan nga nagakabuhi magatigayon sing walay katapusan nga mga pagpakamaayo, lakip na ang maayong panglawas, bugana nga pagkaon, kag maayong puluy-an. Luyag mo bala mahibaluan ang dugang pa tuhoy sa mga katuyuan sang Dios? Makigsugilanon sa isa sa mga Saksi ni Jehova. Malipay sila sa pagbulig nga mahangpan mo paagi sa Biblia kon paano ang planeta nga Duta masalbar!

[Mga retrato sa pahina 10]

Sa idalom sang pagtuytoy sang Dios, dumalahan na sing maayo sang tawo ang palibot

[Credit Line]

Girl and farmer: ©Jeremy Horner/Panos Pictures