Amarhanzi oku Bakorinto 9:1-27
9 Intaherhe obuhuru b’okukola ebi ndonzeze si? Intali ntumwa si? Nyono ntabonaga Yesu Nahamwerhu si? Mwabo, murhali kasi kani mu Waliha?
2 Chiro akaba oku ntali ntumwa oku bandi, kweri ndi ntumwa emwenyu! Bulala mwabo muli kashe kayemezeze oku ndi ntumwa ya Waliha.
3 Ku balala bali bansuzuma, namachifasiriya ntya:
4 Rhuherhe ehaki y’okulya n’okunywa. Arhali ntyo si?
5 Nerhu rhuherhe ehaki y’okushaba omukazi oli mwemezi w’okurhuherekeza, kuguma n’ezindi ntumwa, bene-babo Waliha, na Kefa.* Arhali ntyo si?
6 Changwa nyono na Barnaba rhwe rhurhaherhe ehaki y’okuleka akasi k’okuchihahira?
7 Musoda ohe onakola akasi k’okuchihahira? Inde wakahinga eshwa ly’emizabibu akafunda kulya oku matunda mayo? Inde onayabula echishumba akafunda kunywa oku marha m’echola chishumba?
8 Ebi ndi naderha mali mawazo m’abantu konyine si? Amarhegeko namo marhaderhere ebyola byen’ebyo?
9 Bulala Amarhegeko ma Musa maderhere ntya: “Orhakwanene kufunga obunu bw’empanzi amango eli yahuula emburho.” Empanzi zi Mungu analagako,
10 changwa si aderhere ntyo eju yerhu? Kweri Amarhegeko maderhere ntyo eju yerhu, bulala omuntu oli wahinga n’omuntu oli wahuula bakwanene kujira ntyo eyi balangalire oku bapata echabo chigabi.
11 Akaba rhwabo rhwabahere ebintu birhengere emwa Mungu, kuli kubi si nka nenyu murhurhabere omu kurhuha ebi rhukenere?
12 Akaba abandi bagwerhe ehaki y’okupata echintu chirhengere emwenyu, arhali rhwe rhwakaja rhwayigwarha na kulusha? Chiro akaba ntyo, rhurhakolesaga eyola haki si rhuli rhwalembera ebintu byoshi omu kuntu rhurhajiraga echintu chakarhuma emyazi minja oku bilolere Kristu erhagenderera.
13 Murhenji oku abantu banakola amakasi m’omu hekalu banalya oku bintu by’omu hekalu, n’abantu banakola esiku zoshi oku mazabahu banapata echabo chigabi chirhengere oku mazabahu?
14 Intyo kon’okola, Waliha ahaanire erhegeko oku abantu banatangaza emyazi minja balama oku myazi minja.
15 Aliko nyono ntayungukaga chiro na muguma mw’eyola mipango. Kweri, ntayandikire ebila bintu mpu yi munjirira ntyo, bulala mbwene oku kuli kwinja ahubwe nfe ahali h’okuderha k’omuntu anyege echila chintu ndi nachitapira!*
16 Akaba ndi natangaza emyazi minja, erhali mpanvu yakarhuma nachitapa,* bulala lili rhegeko nahaabirwe. Kweri, buli buhanya bwani akaba ntatangazize emyazi minja!
17 Akaba ndi najira ntyo oku bulonza, napata oluhembo; aliko akaba ndi najira ntyo bulala bansezeze, omu bukweri kachili kasi nahaabirwe.
18 Bobuno oluhembo lwani luli luhe? Amango ndi natangaza emyazi minja, ndonzeze njire ntyo buzira kulipisa yi ntakolesa kubi ehaki yani nyono nka muhubiri w’emyazi minja.
19 Bulala chiro akaba oku ndi huru oku bilolere abantu boshi, nachijirire muja wa boshi, y’impata bantu banene nk’oku byakashobokana koshi.
20 Oku Bayahudi nabere nka Muyahudi, y’impata Abayahudi; oku bali eshishi w’amarhegeko nabere nk’oli eshishi w’amarhegeko y’impata abali eshishi w’amarhegeko chiro akaba oku nyono ntali eshishi w’amarhegeko.
21 Ku balala barhaherhe marhegeko nabere nka ntaherhe marhegeko, y’impata abarhaherhe marhegeko; chiro akaba oku ntali buzira marhegeko oku bilolere Mungu, aliko ndi eshishi w’amarhegeko oku bilolere Kristu.
22 Oku bazamba nabere muzamba y’impata abazamba. Nabere buli chintu oku bantu ba buli lubero, omu kuntu njire byoshi byakashobokana y’inchungula baguma mubo.
23 Aliko nankola buli choshi eju y’emyazi minja y’inyibwira oku bandi.
24 Murhenji oku abantu banalibirha omu mulindi, banalibirha boshi aliko muguma yenapata oluhembo? Mulibirhe omu kuntu mupate oluhembo.
25 Buli yeshi onasharha omu masharha m’okuhimana anachikoomeza gurhe akachigalula omu bintu byoshi. Kweri, banajira ntyo yi bahaabwa echishema chakaharabika, aliko rhwabo rhunajira ntyo yi rhuhaabwa echishema chirhakaharabika.
26 Che chirhumire, okuntu ndi nalibirha, ntali nafa chakulibirha buzira muhigo; okuntu yinashurha engumi zani, yi naziyerekeza omu kuntu ntashurhaga omuyaga;
27 aliko ndi naha omubiri gwani obuhane n’okuguyerekeza nka muja, omu kuntu enyuma y’okuhubiri abandi, ntachibuganaga eyi hali oku byabere yi nyono ndahirwa.
