Amarhanzi oku Bakorinto 10:1-33
10 Bobola bene-berhu, ndonzeze mumenye oku bashokuliza boshi balilambagire omu shi w’echichu, na boshi baligerere omu nyanja,
2 boshi babatizwa mu Musa kugerera echichu n’enyanja,
3 boshi baliri balya ebilyo Mungu aliri abaha
4 na boshi baliri banywa amenji Mungu aliri abaha. Bulala baliri banywa amenji marhengere omu lubale lwa Mungu lwaliri lwabakulikira, n’olola lubale aliri Kristu.
5 Chiro akaba ntyo, banene mubo balifirire omu rungu bulala Mungu arhalisimisizwe nabo.
6 Eyola ngani yakarhuyigiriza binene, omu kuntu rhurhachifijaga ebintu bibi kuguma n’oku bajiraga.
7 Rhurhaharamyaga esanamu nk’oku baguma mubo bajiraga. Nka kulala Amandiko maderhere: “Abantu bayikala yi balya n’okunywa. Na buzinda bayimanga yi bachisimisa.”
8 Rhurhajiraga obubaraga nk’oku baguma mubo bajiraga, nantyo bantu 23 000 mubo bafira lusiku luguma.
9 Rhurhageregezaga Yehova nk’oku baguma mubo bamugeregezaga, nantyo bayirhwa kugerera enjoka.
10 Rhurhanalundumaga nk’oku baguma mubo bajiraga, na malayika w’okulimbula abayirha.
11 Ebyola bintu byabahikiraga yi birhuyigiriza. Byanayandikwaga yi guba mukonge ku rhwabo rhulamire omu chihe chizinda cha linola gulu.
12 Che chirhumire oli wawaza oku ayimangire achilange arhahena.*
13 Nta chigeregezo chabahikiire chirhahikira abandi bantu. Aliko Mungu aba mwimana, arhakabalekerera mugeregezwe kuchubusa oku mwakagala kulembera, aliko n’amango echigeregezo chamarhengerera, arheganya okuntu byakaba yi mugala kuchilembera.
14 Che chirhumire bazigirwa, muchiyase obuharamye bw’esanamu.
15 Indi naderha nk’oli w’aganira n’abantu bakachirhegereza; mwenyine muchishoge akaba ebi naderhere buli bukweri changwa nanga.
16 Amango rhwamanywa echikombe ch’edivayi rhwagishaga, erhaba eyi shagama ya Kristu yirhwamasangira si? Amango rhwamachagulanga omugati, gurhaba eyi mubiri gwa Kristu gu rhwamasangira?
17 Bulala haba mugati muguma, chiro akaba oku rhwabo rhulugire, rhuba mubiri muguma, bulala rhweshi rhunalya k’ogola mugati muguma gon’ogola.
18 Muwaze oku by’Abaizraeli banajira: Amango bamalya ebilyo byahaanirwe nterekero, barhaba eyi bali basangira na Mungu onahaabwa enterekero z’oku mazabahu si?
19 Bichi ndi naderha? Oku esanamu changwa ebintu byahaanirwe nterekero oku sanamu ntacho bimalire si?
20 Nanga, si ndonzeze kuderha oku ebintu amashanja manahaana nterekero, manabihaana emw’abazimu s’arhali emwa Mungu; ntanalonzeze mukasangira n’abazimu.
21 Murhakalema mwanywa echikombe cha Yehova mukanywa n’echikombe ch’abazimu. Murhakalema mwaliira oku meza ma Yehova mukaliira n’oku meza m’abazimu.
22 Changwa ‘mulonzeze rhuzuse Yehova m’obongwa’? Rhurhagwerhe emisi kumulusha. Arhali ntyo si?
23 Ebintu byoshi biyemererwe, aliko arhali ebintu byoshi bye bigwerhe enyungu. Ebintu byoshi biyemererwe, aliko arhali byoshi bye byakayumbaka.
24 Buli muntu agenderere kulonza, arhali enyungu yage yewe yenyine, s’enyungu y’owindi.
25 Mulye buli nyama banaguza omu soko buzira kushiba mwabaza-baza ebibazo eju y’ezamiri zenyu,
26 bulala “egulu na byoshi bilimo bili bya Yehova.”
27 Nk’omuntu orhali mwemezi abahamagere emwage mukanayemera kujayo, mulye byoshi abaha buzira kushiba mwabaza-baza ebibazo eju y’ezamiri zenyu.
28 Aliko nk’omuntu ababwirire: “Eyila nyama yalihaanirwe nterekero oku sanamu,” murhayilyaga bulala oyola muntu ababwirire, n’eju y’ezamiri.
29 Intalonzeze kuderha eju y’ezamiri yawe s’eju y’ezamiri y’owindi muntu. Bulagurhe ezamiri y’owindi muntu echire obuhuru bwani olubanja?
30 Na chiro nalya nkanabwira Mungu koko, kuli kwinja okujira ntyo akaba ebyola byarhuma abandi banderha kubi si?
31 Che chirhumire, mube muli mwalya changwa muli mwanywa changwa muli mwakola echindi chintu choshi-choshi, mujire ebintu byoshi oku bukuuze bwa Mungu.
32 Muchilange murhabaga chintu ch’okusirhaza oku Bayahudi, oku Bagiriki n’oku chibaga cha Mungu,
33 nka kulala nanchihangana kusimisa abantu boshi omu bintu byoshi, arhali omu kulonza enyungu yani nyenyine, s’ahubwe enyungu ya banene omu kuntu nji bahikire kuchungulwa.
Mahugulo m'efo
^ Ao “arhachikuba; arhagwa ahashi; arhakumbagala.”
