Amarhanzi oku Bakorinto 13:1-13
-
Obuzigire—bulushire byoshi (1-13)
13 Nka nderhere omu ndimi z’abantu n’eza bamalayika aliko eyi ntagwerhe obuzigire, ndi nka mudende guli gwalaka changwa nka byuma bibiri bali babandanako byanakongola.
2 Na nka ngwerhe empaano y’okuleba n’ey’okuyunva esiri zichesibwa zoshi n’obumenyi boshi, n’akaba ngwerhe obwemere bunene bwakahamisa emisozi, aliko eyi nta buzigire ngwerhe, ndi wabusha.
3 Nka mpaanire ebintu byani byoshi yi ndisa abandi, nkachitapa* bulala nahaanire omubiri gwani aliko eyi nta buzigire ngwerhe, nta nyungu yoshi-yoshi bimperhere.
4 Obuzigire bunalindira bunaba mu n’obwinja. Obuzigire burhayongwa. Burhachitapa,* burhaba mu chiburi,
5 burhachigendesa buzira bukenge, burhachikaziza, burhagayira busha, burhabika oluganjo lw’amagosa.
6 Burhasiimira ebirhali by’okunali si bunasiimira eby’okuli.
7 Bunakomerera ebintu byoshi, bunachizera ebintu byoshi, bunalangalira ebintu byoshi, bunalembera ebintu byoshi.
8 Obuzigire burhakafa bwahwere chiro. Aliko akaba hali empaano y’okuleba, nji yahwa; akaba hali endimi,* nji zahwa; akaba hali obumenyi, nji bwakulwaho.
9 Bulala rhugwerhe obumenyi burhayenere rhunali rhwaleba ebirhayenere,
10 aliko amango ebiyenere nji byayinja, ebirhayenere byanakulwaho.
11 Amango nalichili mwana, naliri naderha nka mwana, naliri nawaza nka mwana, naliri nakengera nka mwana; aliko bulala nkala mulume, nalekene n’engeso z’elyana-lyana.
12 Zene rhuli rhwabona ebiroliroli kugerera echiyo ch’echuma, aliko hagera amango rhwabona bwinja. Zene ebi menyere birhayenere, aliko agola mango napata obumenyi buyenere, bulala Mungu anyinji bwinja.
13 Chiro akaba ntyo, zene hachili ebila bintu bisharhu: obwemere, obulangalire n’obuzigire; aliko echikulu mu byoshi buli buzigire.
