Amarhanzi oku Bakorinto 16:1-24
16 Oku bilolere enshololo z’okurhabala abachesibwa, mukulikire obwerekezi nahaaga ebibaga by’omu Galatiya.
2 Olusiku lurhanzi lwa buli boso, buli muguma wenyu ayinje abika echintu eburhambi nk’oku akanagala, omu kuntu nji murhajiraga enshololo hanola nyinja.
3 Aliko amango nahika eyola munda, abantu nji mwayandika omu maruba oku mwabayemerere, nji nabarhuma baheke entulo yenyu erhengere oku murhima e Yerusalemu.
4 Chiro akaba ntyo, nji bikabonekana oku kuli kwinja nani njeyo, nji bamperekeza.
5 Aliko nayinja hanola ntenga e Makedoniya, bulala kweri nagera omu Makedoniya;
6 nkabaga nji nabera nenyu siku zilebe chiro n’okugeza echihe ch’emboho haguma nenyu, omu kuntu nji mube nka mwamperekeza emunda naja.
7 Intalonzeze nkababona mu ganola mango eyi ndi nagera konyine, bulala nihire oku Yehova akalonza nageza esiku haguma nenyu.
8 Aliko nabera omu Efeso kugera oku lusiku lukulu lwe Pentekoste,
9 bulala omulyango guzibuzibu g’okuja omu kasi gwanchingulirwe, aliko hali bapinzani banene.
10 Timoteyo akagera eyola munda, muchihangane harhabaga echintu ch’okumuyubahisa ahakagarhi kenyu, bulala ali akola akasi ka Yehova kuguma nani.
11 Aliko ntaye omubonererage. Mumurhume omu murhula ayinje emunda ndi, bulala nyono n’abandi bene-berhu rhuli rhwamulindira.
12 Oku bilolere mwene-werhu Apolo, namurhebereze bwenene ayinje n’abandi bene-berhu emunda muli. Arhalonzeze ayinje mu zinola siku, aliko ayinja hanola anapata orozo.
13 Muyorhe muzene, musere omu bwemere, mugenderere kukola ebintu nka balume, mugwarhe emisi.
14 Ebintu byoshi mwakola, mubikole omu buzigire.
15 Mumenyere oku Stefana n’abantu b’omu mwage babarhanzi bayemeraga okuli omu Akaya, banachihaanire yi bakolera abachesibwa. Bobola mbahemere bene-berhu:
16 Mugenderere nenyu kuchicha bufi oku bantu bali nk’abola na ku boshi bali bakola n’obushiru omu buguma.
17 Aliko ngwerhe obusime okubona Stefana, Fortinato na Akayiko bali hanola, bulala bantabere ahali henyu.
18 Bulala barhulezeze omurhima gwani n’ogwenyu. Bobola, muyerekane oku musimisizwe n’abantu bali nk’abola.
19 Ebibaga by’omu Aziya byabarhumiire endamuso. Akila na Priska haguma n’echibaga chinajirira embuganano omu mwabo babalamuzise n’omurhima goshi mu Waliha.
20 Bene-berhu boshi babalamwise. Mulamusane mweshi n’ebize nchesibwa.
21 Endamuso yani enola, nyono Paulo nayandikaga nyenyine n’efune yani.
22 Nk’omuntu arhazigiire Waliha, avumwe.* Nahamwerhu wee, oyinje!
23 Olukogo rhurhakwanene lwa Waliha Yesu lube haguma nenyu.
24 Obuzigire bwani bube haguma nenyu mweshi muli omu buguma na Kristu Yesu.
Mahugulo m'efo
^ Ao “akomwe.”
