Amarhanzi oku Bakorinto 5:1-13
5 Kweri nayunvirhe oku mu mwabo hali abali bajira obubaraga, obubaraga burhakolwa chiro n’omu bantu b’amashanja. Oku hali omulume warholere muk’eshe.
2 Muli mwachishingira ebili nk’ebyola si? Obola si, murhalikwanene kubabala yi mukula omuntu wajirire ebili nk’ebyola ahakagarhi kenyu?
3 Chiro akaba oku ntali haguma nenyu omu mubiri, indi haguma nenyu omu roho. Mira nachiraga olubanja oyola muntu oli wajira ebili ntyo nk’oku nakanajirire nka naliri haguma nenyu.
4 Amango moshi mwamabuganana haguma omu zino lya Waliha Yesu, eyi munamenyere oku indi haguma nenyu omu roho n’emisi ya Waliha Yesu,
5 mukwanene kuha Shetani omuntu oli nk’oyola yi muharabisa amashumi m’echaha m’oyola muntu, omu kuntu echibaga chigenderere kugwarha amawazo makwanene kugera oku lusiku lwa Waliha.*
6 Ntacho muli mwashiba mwachihalira. Murhenji ku levire* ngeke yonyine enarhundisa epate yoshi yaponderwe si?
7 Muchikule mw’elevire eshajire yi muba pate mpyahya, bulala mwabo murhali mu levire.* Bulala kweri Kristu, entama* yerhu ye Pasaka ahaanirwe nterekero.
8 Bobola, rhujirage olusiku lukulu, arhali omu kukolesa elevire* eshajire, changwa elevire eshushanyize echaha n’obubi. Aliko rhukwanene kulya omugati gurhali mu levire gonyine, gushushanyize ebinja n’okuli.
9 Omu maruba mani nalibayandikire oku muleke kukomerana n’embaraga.
10 Ntaliri naderha oku bilolere embaraga za mw’elila gulu, abantu b’obuhugu, ebishambo, changwa abanaharamya esanamu. Nka ntyo ku byaliri, byakabahemere murhenge omu gulu.
11 Aliko lero namabayandikira, muleke kukomerana n’omuntu oyirikirwe mpu ali mwene-werhu aliko eyi ali mbaraga, ajira obuhugu, anaharamya esanamu, anadukangana,* aba mulalu, changwa aba chishambo. Murhalyaga ebilyo chiro n’omuntu oli nk’oyola.
12 Okuchira olubanja abantu bali embuga w’echibaga karhali kasi kani. Mwabo muchire olubanja abali omu chibaga,
13 Mungu naye achira olubanja abali embuga. “Mukule omuntu mubi ahakagarhi kenyu.”
