Amarhanzi oku Bakorinto 14:1-40
14 Muchihangane loshi yi mugwarha obuzigire, mugenderere kulonza n’obushiru empaano zirhengere emwa Mungu, aliko ahanene ey’obulebi.
2 Bulala onaderha omu lwindi lulimi arhaba ali aderha n’abantu, s’anaba eyi ali aderha na Mungu, bulala ntaye onaba ali amuyunva, aliko anaba eyi ali aderha esiri zichesibwa kugerera eroho.
3 Chiro akaba ntyo, omuntu onaleba anayumbaka abantu, anabaheba omurhima, n’okubarhuliriza kugerera eby’ali aderha.
4 Omuntu onaderha omu lwindi lulimi anachiyumbaka yenyine, aliko onaleba anayumbaka echibaga.
5 Nakalonzeze mweshi muderhe omu zindi ndimi, s’ahubwe nsimire mulebe. Kweri, oli waleba aba alushire oli waderha omu lwindi lulimi olekere nk’alutafusirire, omu kuntu echibaga chiyumbakwe.
6 Bobola bene-berhu, nka nyinjire eyi ndi naderha omu zindi ndimi nakaba eyi bichi mbamalire? Akaba ndonzeze kubarhabala, nkwanene kubabwira ebi Mungu ambishulire, obumenyi, obulebi, changwa enyigirizo.
7 Intyo kon’okola oku bilolere ebintu birhayisa aliko binakula omulenge, gube mulizi changwa olunanga. Gurhe abantu bakamenya ebili byazihwa omu mulizi changwa omu lunanga nk’omulenge gurhali gwahindamulwa?
8 Nk’omulenge guli gwarhenga omu mpanda* gurhayunvikene bwinja bichi guderhere, inde wakachirheganya kuja oku vita?
9 Intyo kon’okola, nka murhakoleseze olulimi lwenyu omu kuderha ebinwa biyorohere kuyunva, gurhe abantu bakamenya ebili byaderhwa? Kweri, mwaba eyi muli mwaderhera omu muyaga.
10 Haba ndimi zinene zinaderhwa omu gulu na zoshi zinayunvikana oku banaziderha.
11 Bulala nka ntali nayunva olulimi luli lwaderhwa nanaba mwinjiira ok’oli waluderha, n’oyola oli waluderha anaba mwinjiira emwani.
12 Bunola nenyu muli mwachifija bwenene okupata empaano z’eroho, mulonze okuntu mwakagwarha mpaano zinene zakayumbaka echibaga.
13 Che chirhumire oli waderha omu lwindi lulimi, asalire y’agala kutafusiri.
14 Bulala amango ndi nasalira omu lwindi lulimi, empaano yani y’eroho y’enaba eli yasalira, aliko obwenge bwani bunaba eyi ntacho buli bwakola.
15 Bobuno bichi nkwanene kukola? Nasalira eju y’empano yani y’eroho, aliko kandi nasalira omu kukolesa obwenge bwani. Nayimpa enyimpo z’okusingiza Mungu n’empano yani y’eroho, aliko kandi nayimpa enyimpo z’okusingiza Mungu omu kukolesa obwenge bwani.
16 Nka wamakolesa obuhashe wahaabirwe n’eroho lichesibwa amango wamasalira omu kubwira Mungu koko n’okumusingiza, gurhe omuntu oli haguma nawe akaderha “Ame” nobo arhayunvirhe eby’oli waderha?
17 Okuderha okuli oli wasalira esala likwirire ly’okubwira Mungu koko, aliko lirhali lyayumbaka owindi.
18 Imbwirire Mungu koko okubona nyinji ndimi zinene kubalusha mweshi.
19 Chiro akaba ntyo, nakasima nderhe chiro ahubwe binwa birhano omu kukolesa obwenge bwani yi nyigiriza abandi omu chibaga, ahali h’okuderha binwa 10 000 omu lwindi lulimi.
20 Bene-berhu, murhabaga nka bana badorho oku bilolere okuyunva ebintu, s’ahubwe mube nka bana badorho oku bilolere amabi; munabe nka bantu bakulu oku bilolere okuyunva ebintu.
21 Biyandikirwe omu Marhegeko: “Yehova aderhere ntya, ‘Nakolesa abantu banaderha ezindi ndimi n’abenjiira omu kuganira n’abala bantu chiro akaba oku barhanyunva.’”
22 Bobuno, okuderha omu zindi ndimi chirhali chimenyeso oku bemezi si chili chimenyeso oku barhali bemezi, obulebi nabo burhaba bw’abarhali bemezi si bw’abemezi.
23 Bobuno nk’echibaga choshi chamabuganana haguma n’abantu boshi bakarhondera kuderha omu zindi ndimi, abageni changwa abarhali bemezi bakayinja, barhaderha oku mwasirehere si?
24 Aliko akaba mweshi muli mwahaana obulebi n’omuntu orhali mwemezi changwa omugeni anayinja, eby’ayunva byarhuma achigalukako n’okuchisuzuma.
25 Nantyo anamenya bwinja esiri z’omurhima gwage, omu kuntu anafukama n’okuyunama kugera ahashi n’okuharamya Mungu ey’ali aderha ntya: “Kweri Mungu ali haguma nenyu.”
26 Bobola bene-berhu, bichi bikwanene kukolwa? Amango mwamabuganana, muguma ayimpe enyimpo, owindi ayigirize, owindi aderhe ebi Mungu amubishulire, owindi aderhe omu lwindi lulimi, n’owindi atafusiri. Byoshi bikolwe omu kuyumbaka echibaga.
27 Na hakaba omuntu waderha omu lwindi lulimi, barharhalukaga babiri changwa basharhu. Baleme baderha muguma-muguma, hakwanene kuba n’owindi muntu w’okutafusiri.
28 Aliko akaba nta muntu w’okutafusiri, abola bantu barhaderheraga ezindi ndimi omu chibaga, si baganire na Mungu omu mirhima yabo.
29 Oku bilolere abalebi, babiri changwa basharhu baderhe, n’abandi bayunvirize yi barhegera eby’aderherwe.
30 Aliko hakaba owabishulirwa anayikere omola, owaliri aderha asire.
31 Bulala mweshi mwakaleba muguma-muguma, omu kuntu abantu boshi bayige n’okuhirwa omurhima.
32 Abalebi bakwanene balole bwinja okuntu banakolesa empano bahaabirwe n’eroho.
33 Bulala Mungu arhali Mungu w’entabange* s’ahubwe ali w’omurhula.
Nka kulala binaba omu bibaga byoshi by’abachesibwa,
34 abakazi bayorhe basirire omu chibaga, bulala barhayemererwe okuderha. Ahubwe bachiche bufi nka kulala Amarhegeko namo maderhere.
35 Akaba hali echi balonzeze kumenya bwinja, baje kubaziza b’eba emwababo, bulala zili shoni omukazi okuderha omu chibaga.
36 Mwe mwalerhaga echinwa cha Mungu si? Changwa mwenyine mu chahikireko?
37 Akaba hali owazize oku ali mulebi changwa agwerhe empaano y’eroho, akwanene kuyemera oku ebi nabayandikire lili rhegeko lya Waliha.
38 Aliko hakajira owalisuzagura, naye nj’asuzagurwa.*
39 Bobola bene-behu, muchihangane kugenderera kuhaana obulebi, aliko murhabuzaga okuderha omu zindi ndimi.
40 S’aliko ebintu byoshi bikolwe omu njira ekwanene enapangirwe bwinja.
