Amarhanzi oku Bakorinto 8:1-13
8 Bobuno, oku bilolere ebilyo byahaanirwe nterekero oku sanamu, rhumenyere oku rhweshi rhuherhe obumenyi. Aliko obumenyi bunalerha echiburi s’obuzigire bunayumbaka abandi.
2 Nk’omuntu ali awaza oku amenyere chintu chilebe, anaba eyi arhaza kuchimenya nk’oku alikwanene kuchimenya.
3 Aliko nk’omuntu azigiire Mungu, Mungu anamumenya.
4 Oku bilolere okulya ebilyo byahaanirwe nterekero oku sanamu, rhumenyere oku esanamu ntacho emalire, n’oku haba Mungu muguma.
5 Bulala chiro akaba oku hali abanayirikwa bamungu, habe omu mbingu changwa oku gulu, omu bukweri haba “bamungu” banene na “bawaliha” banene.
6 Okuderha okuli, rhujira Mungu muguma, yekala Darha, ey’ebintu byoshi byarhengaga emwage nerhu rhulamire eju yage; hali na Waliha muguma yekala Yesu Kristu, ey’ebintu byoshi byabagaho kumugererako nerhu rhuliho kumugererako.
7 Chiro akaba ntyo, arhali boshi babagwerhe obola bumenyi. Aliko abandi, bulala mira bagendaga baharamya esanamu, bali balya ebilyo nka chintu chahaanirwe nterekero oku sanamu, n’ezamiri zabo zili zazinga bulala zizambire.
8 Aliko arhali ebilyo bye byakarhuma rhwaba bera ba Mungu. Rhukaleka kulya ntacho rhwaba rhwahezeze, na rhukalya ntacho rhwayunguka.
9 Aliko mugenderere kuchilanga omu kuntu ehaki yenyu y’okuchishoga erharhumaga balala bazambire bagoma.
10 Bulala nk’omuntu akubwene oli walira ebilyo omu hekalu ly’esanamu woyo muntu oherhe obumenyi, ezamiri y’oyola muntu ozambire erhamushunika alye ebilyo byahaanirwe nterekero oku sanamu si?
11 Nantyo, eju y’obumenyi bwawe omuntu ozambire, k’okuderha mwene-wenyu Kristu afaga eju yage aharabiswa.
12 Amango mwamajirira bene-benyu echaha omu njira eli nk’eyola n’okukoromesa ezamiri zabo zizambire, mwanaba eyi mwamakolera Kristu echaha.
13 Che chirhumire, akaba ebilyo byarhuma mwene-werhu agoma, nyono ntachilya nyama haba n’akatyu yi ntarhuma mwene-werhu agoma.
