Amarhanzi oku Bakorinto 12:1-31
12 Bene-berhu, oku bilolere empaano Mungu anahaana, ntalonzeze mukayorha eyi ntacho mumenyere.
2 Mumenyere oku amango murhaliza kuba bemezi, baliri babashumika n’okubahabusa mwanashimba esanamu zirhaderha, mwanaliri mwaja emunda banabahekere.
3 Aliko ndonzeze mumenye oku nta muntu wakayerekezwa n’eroho lya Mungu akaderha: “Yesu ali muntu wavumirwe!”* na nta muntu wakaderha: “Yesu ali Waliha!” nk’arhali kugerera eroho lichesibwa.
4 Haba empaano zirhali kuguma aliko eroho lichesibwa liba liguma;
5 hali binene by’okukola omu kasi ka Mungu, aliko Waliha ali muguma;
6 hali n’amakasi marhali kuguma, aliko Mungu yenamayeneza mu buli muguma.
7 Aliko eroho lichesibwa linabonekana oku lili lyakola mu buli muguma oku nyungu ya boshi.
8 Nantyo kugerera eroho lichesibwa muguma anahaabwa ebinwa* by’obwengehe, na kugerera elyola roho lyen’elyo owindi anahaabwa ebinwa by’obumenyi,
9 owindi anahaabwa obwemere kugerera elyola roho, n’owindi anahaabwa empaano y’okufumya kugerera elyola roho lyen’elyo,
10 aliko owindi anahaabwa empaano y’okukola ebisomerene, owindi empaano y’okuleba, owindi empano y’okurhegera ebinwa bifuhererwe, owindi empaano y’okuderha endimi zirhali kuguma, n’owindi empaano y’okutafusiri endimi.
11 Aliko ebyola byoshi binayenezwa kugerera elyola roho lyen’elyo linaha buli muguma eyage-yage mpaano nk’oku linalonzeze.
12 Nka kulala omubiri guba muguma aliko gujira birumbu binene, na chiro akaba oku ebyola birumbu bili binene, byoshi gunali mubiri muguma, ntyo ku Kristu naye ali.
13 Bulala rhube Bayahudi changwa Bagiriki, baja changwa rhwarhengere omu buja, rhweshi rhwabatizwe mu mubiri muguma kugerera elyola roho lyen’elyo, rhwanahaabirwe elyola roho lichesibwa.
14 Bulala kweri, omubiri gurhakolerwe na chirumbu chiguma, si gukolerwe na birumbu binene.
15 Nk’okugulu kwamaderha, “Bulala ntali kuboko, ntali chirumbu ch’omubiri,” okuderha ntyo kurhakarhuma chirhachiba chirumbu ch’omubiri.
16 Nk’okurhwiri nako kwamaderha, “Bulala ntali lisho, intali chirumbu ch’omubiri,” okuderha ntyo kurhakarhuma chirhachiba chirumbu ch’omubiri.
17 Nk’omubiri goshi lyaliri lisho, ngahe omuntu akajire ayunvira? Nk’omubiri goshi gwaliri kurhwiri, ngahe omuntu akajire ahuniriziza?
18 Aliko Mungu apangire buli chirumbu ch’omubiri nk’oku analisimire.
19 Nka byoshi byaliri chirumbu chiguma, ngahe omubiri gwakabere?
20 Aliko lero hali birumbu binene s’omubiri guli muguma.
21 Elisho lirhakabwira okuboko mpu “Ntakukenere,” changwa kandi erhwe lirhakabwira amagulu mpu “Ntakukenere.”
22 Ahubwe, ebirumbu by’omubiri binabonekana nka bili bizamba biba bya bulagirire,
23 n’ebirumbu by’omubiri rhunawaza oku birhakengerwe bwenene rhunabiha lukengo lunene, omu kuntu ebirumbu byerhu bishushire nka birhakwirire rhunabikolera oku bukenge bwenene,
24 aliko ebirumbu byerhu binabonekana oku bikwirire, ntacho biba bikenere. Chiro akaba ntyo, Mungu alikolere omubiri omu kukengesa ebirumbu bibonekene nka hali echi bibulire,
25 omu kuntu harhabaga okurhayunvikana omu mubiri, s’ebirumbu byoshi bilaganeko.
26 Nka hali echirumbu chili chababala, ebindi byoshi binababala haguma nacho; changwa nka hali echirumbu chili chasingizwa, ebindi byoshi binasima haguma nacho.
27 Bobuno, muli mubiri gwa Kristu na buli muguma wenyu ali chirumbu ch’ogola mubiri.
28 Intya ku Mungu apangire abantu omu chibaga: ab’oburhanzi, entumwa; abakabiri, abalebi; abakasharhu, abalimu; naho abanakola ebisomerene; abaherhe empaano z’okufumya; abanakola akasi k’okurhabala abandi; abaherhe obuhashe b’okuyerekeza; n’abanaderha omu ndimi zirhali kuguma.
29 Boshi bali ntumwa si? Boshi bali balebi si? Boshi bali balimu si? Boshi banakola ebisomerene si?
30 Boshi baherhe empaano z’okufumya si? Boshi banaderha omu ndimi zirhali kuguma si? Boshi banatafusiri si?
31 Mugenderere kulonza n’obushiru empaano zikulu bwenene. Aliko nkala kubayereka enjira nyinja kulusha zoshi.
