Amarhanzi oku Bakorinto 7:1-40
7 Bobola oku bilolere ebi mwanyandikiraga, echishubizo echila: Kuli kwinja omulume arhahumaga* oku mukazi;
2 aliko bulala obubaraga bwalugire, buli mulume agwarhe owage mukazi na buli mukazi agwarhe owage mulume.
3 Omulume ahe mukage ehaki yage n’omukazi ajirire eba okola kon’oko.
4 Omukazi arhagwerhe oburhegesi oku mubiri gwage s’eba yebugwerhe, intyo kon’okola omulume arhagwerhe oburhegesi oku mubiri gwage si mukage yebugwerhe.
5 Murhalemaga mwayimana, olekere nka muyunvikene ntyo eju y’akasanzi mwapangire, omu kuntu muyinje mwapata ebisanzi by’okusalira na buzinda mwanashuba kuba haguma, yi Shetani arhagenderera kubageregeza eju y’okufunda kuchigala kwenyu.
6 Aliko nderhere ntyo yi mumenya ebi mwakajira si lirhali rhegeko.
7 Nakasimire abantu boshi babe kuguma nani. Chiro akaba ntyo, buli muntu agwerhe eyage mpaano Mungu amuhere, hali abanashaba hali n’abanayorha balamba.
8 Bobola ndi nabwira abalamba n’abashumbakazi oku kuli kwinja bwenene bayorhe kuguma nani.
9 Aliko akaba barhagalire kuchigala, bashabe changwa bashabwe, bulala kuli kwinja okushaba changwa okushabwa ahali h’okugwarha enyifinjo z’echijiro ch’obuhya zirhakagalulwa.
10 Oku bantu bashabene, mbahere obula bwerekezi, aliko arhali nyono si Waliha: Omukazi arhakwanene kulekana n’eba.
11 Aliko nka bamalekana ayorhe buzira kushabwa, akaba arhali ntyo agalukire eba; n’omulume arhakwanene kuleka mukage.
12 Aliko abandi mbabwirire ntya, nyono s’arhali Waliha: Akaba hali mwene-werhu ogwerhe omukazi orhali mwemezi n’oyola mukazi ayemerere kubera naye, arhamulekaga;
13 n’akaba hali omukazi ogwerhe omulume orhali mwemezi, n’oyola mulume ayemerere kubera naye, arhalekaga eba.
14 Bulala omulume orhali mwemezi anacheswa kugerera mukage n’omukazi orhali mwemezi anacheswa kugerera eba; oku bwindi abana benyu bakabere eyi barhachere, aliko bakala bali bachesibwa.
15 Aliko olala orhali mwemezi akabona oku balekane, balekane. Omu hali eli nk’eyola mwene-werhu changwa mwali-werhu arhashwekerwe. Bulala Mungu abahamagere mube omu murhula.
16 Woyo mukazi, bichi byakakubwira akaba nji wachungula balo? Changwa woyo mulume, bichi byakakubwira akaba nji wachungula mukawe?
17 Aliko nka kulala Yehova ahere buli muguma echage chigabi, buli muntu ayorhe nk’oku analiri amango Mungu amuhamagalaga. Obula bwerekezi mbuhaanire omu bibaga byoshi.
18 Hali omuntu Mungu ahamagalaga eyi akatirwe* si? Arhahindamulaga okukatwa kwage. Hali omuntu Mungu ahamagalaga eyi arhakatirwe si? Ayorhe buzira kukatwa.
19 Okukatwa* n’okurhakatwa ntacho bimalire; ech’akamaro kuli kukenga amarhegeko ma Mungu.
20 Buli muntu ayorhe nk’oku analiri amango ahamagalwaga.
21 Wahamagalwaga eyi oli muja? Echola chirhakulazaga; aliko akaba byakashobokana orhenge omu buja, okolese orozo wapatire y’orhengamo.
22 Bulala buli muntu wahamagalwaga mu Waliha eyi ali muja, ali muntu wa Waliha warhengere omu buja; intyo kon’okola owahamagalwaga eyi arhali omu buja, ali muja wa Kristu.
23 Mwagulwaga oku beyi; muleke okuba baja b’abantu.
24 Bene-berhu, buli muntu ayorhe embere za Mungu nk’oku analiri amango ahamagalwaga.
25 Oku bilolere abarhasaga kushabwa, nta rhegeko lirhengere emwa Waliha ngwerhe, aliko nahaana amani mawazo nka muntu oli mwimana kugerera olukogo Waliha anyerekere.
26 Che chirhumire, mbwazize oku kuli kwinja omuntu agenderere kuyorha nk’oku anali eju y’ebibazo bya mu ganola mango.
27 Ogwerhe omukazi si? Orhalonzaga kuchikula kuye. Orhagwerhe omukazi? Leka okulonza omukazi.
28 Aliko na chiro washaba, nta chaha waba wajirire. N’omunyere akashabwa nta chaha aba ajirire. Chiro akaba ntyo, abashabene bahurana ebibazo.* Aliko ndi nalonza kubayasa ebyola bibazo.
29 Echindi mbabwirire bene-berhu, akasanzi kayorhere kagehere. Kurhangira bunola, abagwerhe abakazi babe nk’abarhabagwerhe,
30 abali balaka babe nk’abarhali balaka, abali omu busime babe nk’abarhali omu busime, abali bagula babe nk’abarhagwerhe chintu,
31 n’abali bakolesa ebintu bya mu linola gulu, babe nk’abarhali babikolesa loshi-loshi; bulala ebintu bili byahindamuka mu linola gulu.
32 Kweri ndonzeze murhachilazaga. Omusole orhashabire analaga bwenene oku bintu bya Waliha, okuntu akasimisa Waliha.
33 Aliko omulume oshabire yewe analaga oku bintu by’egulu, okuntu akasimisa mukage,
34 anaba eyi ali eyi, ali n’eyi. Olekere na ntyo, omukazi orhashabirwe n’ochili munyere,* analaga oku bintu bya Waliha y’aba muchesibwa omu mubiri n’omu roho. Aliko omukazi oshabirwe anachilaza oku bintu by’egulu, okuntu akasimisa eba.
35 Aliko nderhere ntyo oku nyungu yenyu, arhali yi mbaseza ebi mwakola, si yi mbaheba omurhima mujire ebikwanene, munakolere Waliha esiku zoshi buzira chintu ch’okubahugisa.
36 Aliko nk’omuntu awazize oku ali achigendesa kubi eju y’okuyorha mulamba, n’akaba arhalukire emyaka y’okubiruka, intya kubikwanene kuba: Ajire oku alonzeze; arhaba eyi ajirire echaha. Ashabe changwa ashabwe.
37 Aliko nk’omuntu arhulerere omu murhima anabwene oku akabera ntyo buzira chibazo, s’agwerhe obuhashe b’okurhegeka enyifinjo zage, anarholere esimikiro omu murhima gwage oku ayorha mulamba, aba eyi ajirire bwinja.
38 Kandi, omuntu washaba changwa washabwa aba eyi ajirire bwinja, aliko owayorha mulamba aba eyi ajirire bwinja bwenene.
39 Omukazi ashwekerwe amango moshi eba arhaza kufa. Aliko nk’eba amafa,* ey’akala ali huru kushabwa n’eyi alonzeze, aliko abe eyi mukozi wa Waliha yenyine.
40 Oku bwani, mbwazize oku oyola mukazi agwarha obusime kulusha nk’ayorhere oku anali; nambwazize oku kweri nani ngwerhe eroho lya Mungu.
