Amarhanzi oku Bakorinto 3:1-23
3 Bobola bene-berhu, ntagalire kuganira nenyu nka bantu bali bayerekezwa n’eroho si nka bantu bali bayerekezwa n’omubiri, nka bana badorho mu Kristu.
2 Nalibahere amarha s’arhali ebilyo bikomere, bulala murhaliza kukomera nk’oku bihemere. Omu bukweri, na zene murhaza kukomera nk’oku bihemere,
3 bulala muchili mwayerekezwa n’omubiri. Amango moshi hali omujinya, n’entambala ahakagarhi kenyu, ahola eyi murhali mwayerekezwa n’omubiri n’okuchigendesa nka bantu b’elila gulu si?
4 Bulala amango muguma amaderha, “Nyono ndi wa Paulo,” owindi mpu “Nyono ndi wa Apolo,” eyi murhali mwajira nka bantu b’elila gulu si?
5 Apolo ali nde? Na Paulo ali nde? Rhuli bakozi konyine barhumire mwaba bemezi, nk’oku Waliha arhabalaga buli muguma werhu.
6 Nyono nabyalaga,* Apolo amimira, aliko Mungu agenderera kukuza,
7 nantyo owabyalaga* n’owamimiraga, barhali chintu, si Mungu onakuza.
8 Omuntu onabyala* n’omuntu onamimira bajira muhigo muguma, aliko buli muguma nj’apata oluhembo omu kukulikiza akasi kage.
9 Bulala rhuli rhwakola na Mungu. Muli shwa lya Mungu lihingirwe, muli nju Mungu ayumbakaga.
10 Kugerera olukogo lwa Mungu rhurhakwanene nahaabirwe, nayumbakire omusinji eyi ndi nka fundi mukulu,* si hali owindi oli wayumbaka k’ogola musinji. Aliko buli muntu achilange n’okuntu ali aguyumbakako.
11 Bulala nta windi muntu wakayumbaka ogwindi musinji olekere ogwaheberweho, k’okuderha Yesu Kristu.
12 Nk’omuntu oyumbakire k’ogola musinji omu kukolesa e oro, e arja, amabale m’akachiro, emirhi, ebirhi biyumire changwa obukere,
13 akasi ka buli muguma nji kabonekana bwinja-bwinja. Olola lusiku nji lwakayerekana bulala nji kabishulwa kugerera omuliro, n’ogola muliro gonyine nji gwayerekana kasi nyabachi buli muntu akolere.
14 Eby’omuntu ayumbakire k’ogola musinji bikayorha, nj’ahaabwa oluhembo,
15 eby’omuntu ayumbakire k’ogola musinji bikahya, eyi amahomba, aliko yewe anachungulwa. Chiro akaba ntyo, nj’aba nk’owagerere omu muliro.
16 Murhenji oku muli hekalu lya Mungu n’eroho lya Mungu libalimo?
17 Nk’omuntu yeshi-yeshi amaharabisa ehekalu lya Mungu, Mungu nj’amuharabisa; bulala ehekalu lya Mungu liba lichesibwa n’elyola hekalu ali mwabo.
18 Nta muntu ochirhebekage. Nka hali omuntu ahakagarhi kenyu oli wawaza oku ali mwengehe mw’elila gulu, arhange abe chihwinja y’aba mwengehe.
19 Obwengehe bw’elila gulu buba buhwinja emwa Mungu, bulala Amandiko maderhere: “Anafarhira abengehe omu mayeri mabo mabi.”
20 Kandi: “Yehova ayinji oku amawazo m’abengehe maba ma busha.”
21 Bobola ntaye ochitapage* eju y’eby’abantu bakakola, bulala Mungu ye wabahere ebintu byoshi mugwerhe,
22 abe Paulo, Apolo, Kefa* changwa libe gulu, kabe kalamo, lube lufu, bibe ebili zene changwa ebyayinja, byoshi bili byenyu;
23 nenyu muli bantu ba Kristu, na Kristu ali wa Mungu.
