Amarhanzi oku Bakorinto 11:1-34
11 Munyiganye nk’oku nani nanyiganya Kristu.
2 Imbabwirire koko bulala omu bintu byoshi munanyibuka n’okukulikiza bwinja-bwinja byoshi nababwiraga.
3 Aliko ndonzeze mumenye oku shefu wa buli mulume ali Kristu; shefu w’omukazi ali mulume; na shefu wa Kristu ali Mungu.
4 Buli mulume wasalira changwa akahaana obulebi anashukulire erhwe lyage aba ey’amakoza shefu wage eshoni;
5 na buli mukazi wasalira changwa akahaana obulebi buzira kushukulira erhwe lyage aba ey’amakoza shefu wage eshoni, bulala aba nka mukazi ogwerhe erhwe ligemberwe.
6 Bulala akaba omukazi arhashukulire erhwe, akwanene kucha enviri; aliko akaba zili shoni omukazi okucha enviri changwa okugembesa akwanene achishukulire erhwe.
7 Omulume arhakwanene kushukulira erhwe lyage, bulala ali shusho na bukuuze bwa Mungu, aliko omukazi ali bukuuze b’omulume.
8 Bulala omulume arharhengaga omu mukazi s’omukazi yi warhengaga omu mulume.
9 N’echindi, omulume arhalemwaga eju y’omukazi, s’omukazi yi walemwaga eju y’omulume.
10 Eju y’echola n’eju ya bamalayika, omukazi akwanene kuyambala echintu omu rhwe lyage nka chimenyeso chiyerekene oku akengere obukulu.
11 Omu chibaga cha Waliha, omulume akenere omukazi n’omukazi akenere omulume.
12 Nka kulala omukazi arhengaga omu mulume, ntyo kon’okola omulume naye anaburhwa n’omukazi; aliko ebintu byoshi byarhengaga emwa Mungu.
13 Mwenyine muche olubanja: Kuli kwinja omukazi asalire emwa Mungu buzira kuchishukulira erhwe si?
14 Ebi Mungu alemere byonyine birhabayigirize si oku zili shoni oku mulume okugwarha enviri zilehere,
15 aliko nk’omukazi agwerhe enviri zilehere buli bukuuze bwage? Bulala ahaabirwe enviri chibe chintu ch’okushukulira erhwe lyage.
16 Nka hali omuntu olonzeze kujira obuhaka omu kulerha eyindi-yindi micho, rhwabo n’echibaga cha Mungu nta yindi micho rhugwerhe.
17 Omu kubaha obula bwerekezi ntali na basingiza, bulala murhabuganana eju y’okukola ebinja s’ebibi.
18 Ech’oburhanzi, nayunvirhe oku amango mwamabuganana omu chibaga, hali haba okurhayunvikana ahakagarhi kenyu, inanyemerere oku biguma omu binayunvirhe bili by’okuli.
19 Bulala kweri, harhengerera n’ebigusho-bigusho ahakagarhi kenyu, omu kuntu abayemererwe na Mungu bamenyikane bwinja.
20 Amango mwamabuganana haguma yi mulya Ebilyo by’Egolo bya Waliha, murhabikola omu njira ekwanene.
21 Bulala eyi mubilya, buli muguma anaba alya ebyage bilyo by’egolo, na ntyo muguma anaba ali nzara owindi eyi alalukire.
22 Nta nju mugwerhe mwakaliramo n’okunyweramo si? Changwa muli mwasuzagura echibaga cha Mungu n’okukoza eshoni abarhagwerhe chintu? Bichi mbabwirage? Imbasingize si? Ntakabasingiza oku bili nk’ebyola.
23 Bulala ebi nahaabwaga na Waliha bi nani nabahere: Obudufu Waliha Yesu alikwanene kulenganywa alirholere omugati,
24 n’enyuma w’okusalira omu kubwira Mungu koko, aguchagulanga aderha: “Ogula gushushanyize omubiri gwani gwahaanwa eju yenyu, mugenderere kujira ntya omu kunyibuka.”
25 Ajira ntyo kon’okola n’oku chikombe eyi bamamala kulya ebilyo by’egolo aderha: “Echila chikombe chishushanyize endagano mpyahya yayenezwa kugerera eshagama yani. Mugenderere kujira ntya amango moshi mwachinywa omu kunyibuka.”
26 Bulala amango moshi mwamalya ogula mugati n’okunywa echila chikombe, munagenderera kutangaza olufu lwa Waliha kuhika amango ayinja.
27 Bobola omuntu yeshi-yeshi walya omugati n’okunywa echikombe cha Waliha arhanakwanene, aba ey’amajira echaha bulala asuzagwire omubiri n’eshagama ya Waliha.
28 Buli muntu arhange achije emurhima y’amenya akaba akwanene, naho analya omugati n’okunywa echikombe.
29 Bulala buli muntu walya n’okunywa buzira kurhegera bichi omubiri gushushanyize, ey’amalya n’okunywa olubanja lwage yewe yenyine.
30 Che chirhumire, banene mu mwabo bali bazamba na balwala, hali na banene bafire.*
31 Aliko nka rhuchisuzumire bwinja rhukamenya rhuli bande, rhurhakachirwa olubanja.
32 Aliko amango rhwamachirwa olubanja, Yehova anaba eyi amarhugorora, omu kuntu nji rhurhahanwaga haguma n’egulu.
33 Che chirhumire bene-berhu, amango mwamabuganana yi mulya ebyola bilyo, mulindirane.
34 Akaba hali oli nzara, alire emwage, omu kuntu hanola mubuganana murhakolaga echaha chikarhuma Mungu abachira olubanja. Oku bilolere ebibazo bisigere, nabigeramo hanola mpika eyola munda.
Mahugulo m'efo
^ Kurhali kuderha lufu nyalufu, si kuli kuderha oku bahezeze obwira bwabo baligwerhe haguma na Mungu.
