Amarhanzi oku Bakorinto 6:1-20
6 Hali omuntu ahakagarhi kenyu ogwerhe obuhaka n’owabo wakapima aja kumusidaka oku tribinale y’abarhali banyakunali ahali h’okumusidaka embere z’abachesibwa si?
2 Changwa murhenji oku abachesibwa nji bachira egulu olubanja? N’akaba mwabo mwe nji mwachira egulu olubanja, mwakaja mwagambwa kumala ebibazo bigekegeke si?
3 Murhenji oku nji rhwachira bamalayika olubanja si? Lero si gurhe rhwakaja rhwagambwa kucha olubanja omu bibazo bya kanola kalamo?
4 Bobola, amango mugwerhe ebibazo bya mu kanola kalamo bikwanene kuchirwa olubanja, bulagurhe mwakachishoga abantu b’embuga w’echibaga bababachirage olubanja?
5 Indi naderha ntyo yi muchifira eshoni. Nta mwengehe ahakagarhi kenyu wakagala kuchira bene-babo olubanja si?
6 Aliko, omuntu ali aja kusidaka mwene-wabo, chiro n’embere z’abarhali bemezi?
7 Kweri, amango mwamasidakana munaba eyi mwamachikoza eshoni. Ahali h’okujira ntyo, chakarhuma murhayemera abandi babagoseza? Chakarhuma murhayemera babanyega?
8 Ahali h’okujira ntyo, munagosezana n’okunyegana; na bene-benyu bamunajira ntyo!
9 Changwa nkabaga murhenji oku abarhali banyakunali barhakashokola Obwami bwa Mungu si? Murharhebekwaga, abanajira obubaraga, abanaharamya esanamu, abanajira obugonyi, abalume banayemera ebijiro by’okulalwa n’ababo balume, abalume banalala n’ababo balume,
10 abezi, abantu bajira obuhugu, abalalu, abanadukangana,* n’abananyegana, barhakashokola Obwami bwa Mungu.
11 N’obola ntyo ku baguma mu mwabo baliri. Aliko mwayozezwe, mwachesezwe; mwatangazizwe oku muli banyakunali omu zino lya Waliha Yesu Kristu na kugerera eroho lya Mungu werhu.
12 Ebintu byoshi biyemererwe emwani, aliko arhali ebintu byoshi bye biherhe enyungu. Ebintu byoshi biyemererwe emwani, aliko ntakayemera echintu choshi-choshi chintegeke.
13 Ebilyo biba by’enda, n’enda eba y’ebilyo, aliko byombi Mungu nj’abijira bya busha. Omubiri gurhali g’okujira obubaraga, si guli g’okukola akasi ka Waliha, na Waliha anaguha ebigukenere.
14 Obola Mungu alifulire Waliha, nerhu nj’arhufula kugerera emisi yage.
15 Murhenji si oku emibiri yenyu bili birumbu by’omubiri gwa Kristu? Nakaja narhola ebirumbu bya Kristu nanabijira birumbu by’embaraga si? Nanga haba n’akatyu!
16 Murhenji oku owalere n’omukazi w’embaraga ey’amaba mubiri muguma naye? Bulala Mungu aderhere “baba mubiri muguma.”
17 Aliko buli yeshi wachishwekere ku Kristu ali omu buguma naye omu roho.
18 Mulibirhe obubaraga! Echindi chaha choshi omuntu akakola chiba embuga w’omubiri gwage, aliko owajirire obubaraga anaba eyi akoleere omubiri gwage echaha.
19 Murhenji oku emibiri yenyu eba hekalu ly’eroho lichesibwa libalimo Mungu abahere? N’omubiri mugwerhe gurhali gwenyu,
20 bulala Mungu abagulaga beyi linene. Bobola mukwanene kukolesa emibiri yenyu omu kukuuza Mungu.
Mahugulo m'efo
^ Ao “banajachirana.”
