Amarhanzi oku Bakorinto 4:1-21
4 Abantu bakwanene kurhubona oku rhuli bakozi ba Kristu na nka bantu Mungu ashingiize esiri zage zichesibwa.
2 Kandi, omukulu w’akasi aba alonzeze omuntu ashingiize akasi kage abe mwimana.
3 Ku nyono birhali by’akamaro bwenene munsuzume changwa etribinale y’abantu ensuzume. Kweri chiro nani nyenyine intachisuzuma.
4 Bulala nta gosa n’eliguma nchibweneko. Aliko echola chirhayerekene oku ndi munyakunali; onansuzuma ali Yehova.
5 Che chirhumire, nta chintu muchirage olubanja embere w’akasanzi kakwanene, kugera amango Waliha ayinja. Nj’ayerekana omu mwangaza ebintu by’esiri binakolwa omu mwizimya, nj’ayerekana ebili omu murhima gwa buli muntu, na Mungu nj’asingiza buli muguma omu kukulikiza eby’akolere.
6 Bene-berhu wee, naderhere ebila bintu oku bindolere n’oku bilolere Apolo oku nyungu yenyu, omu kuntu muyige akala kanuni kugerera rhwabo: “Murhachubukaga ebiyandikirwe,” yi murhayunjula mw’echiburi, mukabona muntu mulebe nk’alushire owindi.
7 Bulala, inde okujirire orhabaga kuguma n’owindi? Bichi ojira orhahaabwaga? N’akaba wabihaabwaga bulagurhe yi waja wachitapa* wamenya nk’orhabihaabwaga?
8 Mukala mugwerhe byoshi mukenere si? Mukala muchirire? Mwarhondere kurhegeka nka bami buzira rhwabo si? Kweri nakasimire mube eyi mwarhondere kurhegeka nka bami, omu kuntu nerhu rhurhegeke haguma nenyu nka bami.
9 Ku nyono, bishushire nka rhwabo ntumwa rhwe b’obuzinda Mungu ahebere embere z’abantu, nka bantu bachirirwe echihano ch’olufu, bulala egulu, bamalayika, n’abantu boshi bali barhuhenera.
10 Rhuli bihwinja eju ya Kristu, aliko mwabo muli bengehe mu Kristu; rhuli bazamba, aliko mwabo muherhe emisi; mwabo muli mwahaabwa olukengo, aliko rhwabo rhuli rhwasuzagurwa.
11 Kugera kw’enola sa, rhuli rhwagenderera kuba nzara, okuyunva enyorha, okubula emyambaro, okushurhwa, okubula aha rhwakalama,
12 n’okuyuha echuka eyi rhuli rhwakola n’efune zerhu. Eyi barhudukanga,* rhwabo rhunagisha; eyi barhulibuza, rhunagenderera kulembera;
13 eyi barhubeshera, rhunashubiza oku bwirhonzi. Na kugera zene rhwabere nka zinga ly’egulu, nka buchafu bw’ebintu byoshi.
14 Indi nayandika ebila bintu, arhali y’imbakoza eshoni, si y’imbahanula nka bana bani bazigirwa.
15 Bulala chiro mwagwarha balembi 10 000 mu Kristu, kweri murhagwerhe bayisho banene; bulala nabere yisho mu Kristu Yesu kugerera emyazi minja.
16 Aliko, mbahemere mube bantu bananyiganya.
17 Che chirhumire namabarhumira Timoteyo bulala ali mwana wani muzigirwa mu Waliha. Abayibusa okuntu nyono nankolera Kristu Yesu, nk’oku nanyigiriza buli hoshi omu bibaga byoshi.
18 Omu kuwaza oku ntachiyinja emunda muli, baguma bayunjwire echiburi.
19 Aliko Yehova akalonza, nayinja emunda muli hanola hofi, nanamenya bwinja emisi y’abola bantu bayunjwire echiburi s’arhali ebinwa byabo.
20 Bulala arhali ebinwa bye binayerekana oku rhuli rhwayerekezwa n’Obwami bwa Mungu, s’ebijiro bye binayerekana oku rhuherhe emisi erhengere emwa Mungu.
21 Bichi mwakasima? Inyinje emwenyu n’enkoni changwa nyinje n’obuzigire, n’omurhima g’obwirhonzi?
