Amarhanzi oku Bakorinto 1:1-31
1 Nyono Paulo, wahamagerwe y’aba ntumwa ya Kristu Yesu kugerera obulonza bwa Mungu, na Sostene mwene-werhu,
2 oku chibaga cha Mungu chili omu Korinto, ku mwabo mwachesezwe omu buguma na Kristu Yesu mwahamagalwa yi muba bachesibwa, n’oku bali buli hoshi, bali bahamagala ezino lya Waliha Yesu Kristu Nahamwabo nerhu Nahamwerhu:
3 Mugwarhe olukogo rhurhakwanene n’omurhula birhengere emwa Mungu Darha n’emwa Waliha Yesu Kristu.
4 Esiku zoshi nambwira Mungu wani koko oku bibalolere eju y’olukogo lwa Mungu rhurhakwanene mwahaabirwe mu Kristu Yesu;
5 bulala abahere migisho minene omu buguma na Kristu, abahere obuhashe buyenere b’okuderha, n’obumenyi buyenere,
6 bulala mwachizerere bwenene obuhamirizi oku bilolere Kristu,
7 omu kuntu murhabulaga empaano yoshi-yoshi oku munali mwalindira oku nyorha nene okubishulwa kwa Waliha Yesu Kristu.
8 Abajira musere kugera oku buzinda yi nji harhaba omuntu yeshi-yeshi wabasidaka echintu oku lusiku lwa Waliha Yesu Kristu.
9 Mungu wabahamagalaga yi muba omu buguma n’Omugala Yesu Kristu Nahamwerhu, aba mwimana.
10 Imbahemere bene-berhu, omu zino lya Waliha Yesu Kristu, muganire omu bunvikane, murhayinjaga mwachikula oku benyu, si mube omu buguma loshi omu kuwaza kuguma n’okubona ebintu kuguma.
11 Bulala bantu baguma b’omu mwa Kulowe bambwirire emyazi oku bibalolere, oku hali okurhayunvikana aha kagarhi kenyu bene-berhu.
12 Yinalonza kuderha oku buli muguma mu mwabo ali aderha: “Nyono ndi wa Paulo,” owindi mpu “Nyono ndi wa Apolo,” owindi mpu “Nyono ndi wa Kefa,”* aliko owindi mpu “Nyono ndi wa Kristu.”
13 Yesu abere mw’ebigabi-bigabi si? Paulo ye wamanikwaga oku murhi eju yenyu si? Changwa si, mwabatizwaga omu zino lya Paulo?
14 Imbwirire Mungu koko okubona ntaye mu mwabo nabatize olekere Krispo na Gayo,
15 che chirhumire ntaye wakaderha oku mwabatizwaga omu zino lyani.
16 Nechi, nalibatize na Stefana n’abantu b’omu mwage. Olekere abola, ntenji akaba hali owindi nabatize.
17 Bulala Kristu arhantumaga kubatiza, s’antumaga kuhubiri emyazi minja; arhali omu kukolesa enderho z’abasomi, y’omurhi gw’amateso gwa Kristu gurhabonekana nka ntacho gumalire.
18 Bulala enyigirizo oku bilolere omurhi gw’amateso buba buhwinja ku balala baharabiswa, aliko ku rhwabo rhwachungulwa, eba misi ya Mungu.
19 Bulala Amandiko maderhere: “Nji naheza obwengehe bw’abengehe, n’obwenge bw’abanyabwenge nji nabulahira.”
20 Ngahe omwengehe ali, ngahe omwandisi ali? Ngahe abantu banawaza bwenene* ba mw’elila gulu bali? Mungu arhahindamulaga obwengehe bw’egulu bwaba buhwinja si?
21 Egulu lirhahikiraga kumenya Mungu kugerera obwengehe bwalyo. Aliko Mungu omu bwengehe bwage, abwene oku kuli kwinja achungule balala bayemerere emyazi minja rhuli rhwahubiri, ey’abandi banabona oku buli buhwinja.
22 Bulala Abayahudi banahema ebimenyeso, n’Abagiriki banalonza obwengehe;
23 aliko rhuli rhwahubiri Kristu wamanikwaga oku murhi. Oku Bayahudi echola chili chintu ch’okurhuma basirhala, s’aliko oku bantu b’amashanja buli buhwinja.
24 Aliko ku balala bahamagerwe, babe Bayahudi changwa Bagiriki, Kristu ali misi ya Mungu anali bwengehe bwa Mungu.
25 Bulala ebintu birhengere e mwa Mungu abantu banabona nka buhwinja, biba by’obwengehe kulusha abantu. N’ebintu birhengere emwa Mungu abantu banabona nka bizambire, bijira emisi kulusha abantu.
26 Bulala mubwene bene-berhu, oku mu mwewe Mungu ahamagere murhali bengehe banene oku mubiri, nta bakulu banene, na nta banene barhengere omu milala ekengerwe,
27 aliko Mungu achishogere abantu egulu linabona oku bihwinja y’akoza abengehe eshoni, achishogere abantu egulu linabona oku bali bazamba y’akoza abaherhe emisi eshoni;
28 achishogere n’ebintu abantu banabona nka ntacho bimalire, ebintu abantu banasuzagura, n’ebintu birhabaho, y’ajira ebintu bibaho bibe eyi ntacho bimalire,
29 omu kuntu harhabaga omuntu wachitapa* embere za Mungu.
30 Mungu ye warhumire mwaba omu buguma na Kristu Yesu wayerekene obwengehe bwa Mungu n’okunali kwage. Kugerera yewe abantu bakaba bachesibwa, n’okulikulwa kugerera enchungu.
31 Yi biba kulala Amandiko manaderhere: “Olala wachitapa,* achitapire Yehova.”
