1. Poukisa Jéova koumansé kréyé ?

O KOUMANSMAN, Jéova té li rounso. Mé i pa té ka santi so kò tousèl ! I pa té bézwen anyen ni pésonn pou pyès bagaj. Mé magré sa, i té lé bay ròt moun lavi pou yé té viv ké tchò kontan. A lanmou ki fè Jéova koumansé kréyé (Ps. 36:9 ; 1 Jean 4:19).

2. Kisa Jézi ké zanj-ya rousanti lò Jéova koumansé kréyé ?

² Pou koumansé Jéova kréyé Jézi é i travay ké li. I sèrvi sa prémyé Pitit-a pou kréyé « tout ròt bagaj-ya », é annan, i té gen roun patché zanj (Col. 1:16). Jézi té kontan travay ké so Papa (Prov. 8:30). Zanj-ya osi té pouvé gen tchò kontan paské a yé ki té la an prémyé pou wè Jéova ké Jézi fè syèl-a ké latè-a. Kouman yé réyaji douvan sa bèl bagaj-ya ? Yé koumansé ‘rélé ké bat lanmen’. Asiré pa pitèt yé kontinyé montré kouman yé té kontan chak kou Jéova té ka fè ròt bagaj, é èspésyalman dèrnyé bèl bagaj i kréyé : moun-yan (Job 38:7 ; Prov. 8:31, nòt). Chak bagaj Jéova fè ka montré kouman i gen lanmou ké sajès (Ps. 104:24 ; Rom. 1:20).

3. Dapré 1 Corinthiens 15:21, 22, kisa ranson-an ka pèrmèt nou gen ?

³ Jéova té lé moun-yan viv pou tout-tan asou bèl latè i té fè-a. Mé lò Adan ké Èv tounen do bay yé bon Papa, péché ké lanmò-a anpéché yé, ké tout sa ki té ké vini apré yé, gen sa bèl lavi-a (Rom. 5:12). Kouman Jéova réyaji ? Lanmenm i di kouman i té ké sové moun-yan (Gen. 3:15). Jéova té ké bay roun ranson pou libéré pitit Adan ké Èv di péché-a ké lanmò-a. Konsa, i té ké pouvé bay chak  moun ki té ké désidé fè so volonté, lavi pou tout-tan (Jean 3:16 ; Rom. 6:23 ; li 1 Corinthiens 15:21, 22).

4. Asou ki késyon nou ké bay répons annan sa artik-a ?

⁴ Promès Jéova bay di fè moun mouri-ya rouviv ka fè nou pozé nou kò roun patché késyon. Parèkzanp, ès nou savé kouman rézirèksyon-an ké pasé ? Ès nou ké rékonnèt sa nou té pédi lò yé ké rouvin ? Kouman rézirèksyon-an ké bay nou tchò kontan ? É kisa èspwar rézirèksyon-an ka anprann nou asou lanmou, sajès ké pasyans Jéova ? Annou wè répons asou sa kat késyon-yan.

5. Poukisa nou pouvé di ki rézirèksyon-an ké fèt piti piti é pa nenpòrt kouman ?

⁵ Pannan rézirèksyon-an, Jéova ké fè milyon menm milyar moun rouviv gras a so Pitit. Mé ès yé tout ké résisité an menm tan ? Nou pouvé di non. Poukisa ? Paské, si i té ka vin gen roun patché moun asou latè-a rounsèl kou, a té ké rounsèl dézòrd. É tousa Jéova ka fè, i ka fè l’ byen. I byen savé ki lapè pa ka maché ké dézòrd (1 Cor. 14:33). Jéova montré i té gen sajès ké pasyans lò i travay ké Jézi pou préparé latè-a piti piti anvan i fè moun-yan. Pannan sé 1 000 lannen Jézi ké dirijé latè-a, i ké montré sa menm kalité-ya lò i ké travay ké sa-ya ki ké janbé Armagédon, pou préparé latè-a pou rousouvwè sa-ya ki ké résisité.

6. Dapré Actes 24:15, ès a sa ki jis rounso Jéova ké résisité ?

⁶ Mé nou ké gen roun travay ankò pi enpòrtan pou fè. Adoratèr Jéova-ya ki ké janbé Armagédon ké divèt anprann sa-ya ki ké résisité a kisa ki Rwayonm-an é sa Jéova lé yé fè. Poukisa ? Paské  près tout sa ki ké résisité ké annan sa-ya ki « enjis » (li Actes 24:15). Sa enjis-ya ké divèt chanjé bokou bagaj annan yé konpòrtman pou yé pouvé profité di ranson-an. Nou ké divèt anprann roun patché moun lavérité asou Bondjé paské yé pa konnèt li. Imajiné, a pa ti travay nou ké gen pou fè ! Ès chak moun ké pouvé gen sopa léson, kou nou ka fè jòdla ? Ès chak moun ki ké résisité ké divèt alé annan roun asanblé lokal pou i fòrmé yé é pou yé anprann ròt-ya ki ké résisité sa yé menm anprann ? Nou pòkò savé. Sa nou savé, a ki lò sé 1 000 lannen-yan ké près fini, « latè-a ké plen ké konésans asou Jéova » (Is. 11:9). Nou ké gen bokou bagaj pou fè pannan sa 1 000 lannen-yan, mé sa lépòk-a ké bèl toubonnman !

7. Poukisa adoratèr Jéova-ya ké divèt pran pasyans ké sa-ya ki ké résisité lò yé ké ansényé yé ?

⁷ Pannan sa 1 000 lannen-yan, sa-ya ki ké adoré Jéova ké divèt yé menm osi kontinyé fè chanjman annan yé lavi pou Jéova asèpté yé. A pou sa yé ké divèt pran pasyans ké sa-ya ki ké résisité pou idé yé briga ké péché-a é swiv prensip Jéova annan yé lavi (1 Pierre 3:8). Asiré pa pitèt tchò sa-ya ki ké résisité ké touché lò yé ké wè imilité sèrvitèr Jéova-ya, ki ké travay yé menm osi pou ‘sové yé lavi’ (Phil. 2:12).

8. Poukisa nou pouvé di ki sa-ya ki ké rousouvwè moun-yan ki ké résisité ké rékonnèt moun-yan yé té pédi ?

⁸ Plizyèr bagaj ka fè nou di ki moun-yan ki ké rousouvwè sa-ya ki ké résisité ké rékonnèt moun-yan yé té pédi. Parèkzanp, lò nou ka gadé rézirèksyon ki fèt anvan, nou pouvé di ki Jéova ké roufè moun-yan i ké résisité-ya menm fason yé té fika anvan yé té mouri. A ké menm moun-yan, ké menm fason réfléchi ké menm fason palé. Sonjé ki Jézi té di ki lanmò, a kou lò nou ka dronmi é ki rézirèksyon-an a kou lò nou ka lévé (Mat. 9:18, 24 ; Jean 11:11-13). Lò roun moun ki té ka dronmi ka lévé, a menm moun-an, i ka palé menm fason i té ka palé anvan i té alé dronmi. É dronmi-a pa fè l’ bliyé pyès bagaj. Annou pran èkzanp Lazar. I té mouri dépi 4 jou, é so kò té koumansé pouri. Mé magré sa, lò Jézi résisité li, so sò Mart ké Mari rékonnèt li lanmenm, é Lazar pa té bliyé yé non plis (Jean 11:38-44 ; 12:1, 2).

9. Poukisa sa-ya ki ké résisité pa ké rouvin ké roun kò ké roun lèspri parfè ?

⁹ Jéova promèt ki pannan Jézi ké dirijé latè-a, pyès moun pa ké di ankò : « Mo malad » (Is. 33:24 ; Rom. 6:7). Sa lé di ki sa-ya ki ké résisité ké gen roun kò san maladi. Mé a pa lanmenm yé ké parfè. Si a té sa, yé fanmi ké yé zanmi pa té ké rékonnèt yé. Dapré sa nou konprann, a piti piti tout moun ké divini parfè pannan sé 1 000 lannen-yan. A sèlman lò sé 1 000 lannen-yan ké fini ki Jézi ké roubay so Papa Rwayonm-an. A sa moman-an Rwayonm-an ké fini roun di sé bagaj i té divèt fè : fè tout moun divini parfè (1 Cor. 15:25-28 ; Rév. 20:1-3).

10. Dapré to, kisa to ké rousanti lò rézirèksyon-an ké fèt ?

¹⁰ Sonjé jou to ké rousouvwè to zanmi ké to fanmi to té kontan. Kisa to ké rousanti ? Ès to ké ari ouben pléré fòrs to  ké kontan ? Ès to ké chanté louwanj pou Jéova ? Asiré pa pitèt to tchò ké plen ké lanmou pou Jéova ké Jézi, ki fè to sa kado-a, rézirèksyon-an, paské yé kontan to.

11. Dapré sa Jézi ka di annan Jean 5:28, 29, kisa sa ki ka rèspèkté prensip Jéova ké gen ?

¹¹ Imajiné kouman sa ki ké résisité ké kontan lò yé ké jité piti piti yé vyé pèrsonalité é yé ké anprann viv dapré prensip Jéova-ya. Sa ki ké fè sa chanjman-yan ké gen roun « rézirèksyon pou lavi » : Yé ké pouvé viv annan paradi-a pou tout-tan. Mé Bondjé pa ké lésé sa-ya ki kont li gaté lapè nou ké gen annan paradi-a (Is. 65:20 ; li Jean 5:28, 29).

12. Ki bénédiksyon Jéova ké bay moun-yan asou latè-a ?

¹² Lò Rwayonm-an ké dirijé latè-a, tout sa ki adoré Bondjé ké wè ki ‘bénédiksyon Jéova-a’ ka fè nou divini rich é i pa ka « mennen pyès dézagréman ké li » (Prov. 10:22). Gras a lèspri sen Jéova-a, yé ké divini rich annan domenn èspirityèl, sa lé di ki pi tan-an ké pasé pi yé ké sanblé ké Jézi pi yé ké divini parfè (Jean 13:15-17 ; Éph. 4:23, 24). Chak jou yé ké gen roun pi bon lasanté, é yé ké divini pi bon moun. Lavi-a ké chwit toubonnman ! (Job 33:25). Mé aprézan, annou wè sa ròt késyon-an : kisa èspwar rézirèksyon-an ka anprann nou asou lanmou, sajès ké pasyans Jéova ?

13. Kou nou ka wè l’ annan Psaume 139:1-4, kouman rézirèksyon-an ka montré ki Jéova konnèt nou byen ?

¹³ Kou nou ja wè l’, lò Jéova ké résisité roun moun, i ké roufè l’ ké tout so pèrsonalité ké tousa i té gen annan so mémwè. Mé pran tan réfléchi asou sa sa lé di. Tèlman Jéova kontan to i ka wè é i ka tchenbé tousa to ka pansé, tousa to ka santi, tousa to ka di é tousa to ka fè. Rwa David té konprann ki Jéova ka pran tan chaché byen konnèt nou chak (li Psaume 139:1-4). Jéova konnèt nou byen. Atò, poukisa sa enpòrtan pou nou konprann sa é poukisa sa ka konsolé nou ?

14. Poukisa nou pa divèt enkyèt lò nou ka sonjé ki Jéova konnèt tout bagaj asou nou ?

¹⁴ Ès nou divèt enkyèt paské Jéova konnèt tout bagaj asou nou ? Non, paské Jéova ka pran swen di nou ké bokou tandrès. Nou chak nou gen valò pou li. I ka pran tan gadé tousa ki ka rivé nou annan nou lavi é sa ki ka aji anlè nou. Ès a pa roun bèl bagaj ? Nou pa janmen divèt krè ki nou tousèl. Jéova toujou la òbò nou, i toujou ka chaché idé nou. (2 Chron. 16:9).

15. Poukisa rézirèksyon-an ka montré nou sajès Jéova-a ?

¹⁵ Lò roun moun pè mouri yé pouvé fè li fè nenpòrt ki bagaj. Ké Satan dèyè, sèrten ka sèrvi sa zafè pè lanmò-a pou fòrsé moun trayi yé zanmi ouben anbandonnen sa yé ka krè. Mé sa kalité ménas-a pa ka maché ké nou paské nou savé ki si nou lèlmi ka tchwé nou, Jéova ké roubay nou lavi (Rév. 2:10). Yé pouvé fè sa yé lé mé yé pa ké janmen fè nou arété sèrvi Bondjé (Rom. 8:35-39). Èspwar rézirèksyon-an ka vréman montré nou sajès Jéova ! Gras a èspwar rézirèksyon-an i ka anpéché Satan sèrvi sa zafè pè lanmò-a kont nou é i ka bay nou plis kouraj.

16. a) Kisa to divèt doumandé to kò ? b) Kisa sa to ké réponn asou sa késyon-yan pouvé anprann to ?

 ¹⁶ Si roun jou nou lèlmi té ka ménasé tchwé to, ès to té ké paré lésé to lavi annan lanmen Jéova ? Kouman to pouvé savé si to té ké paré pou fè sa ? Parèkzanp doumandé to kò : « Ès ti désizyon mo ka pran chak jou ka montré ki mo ka fè Jéova konfyans ? » (Luc 16:10). Épi, kou Jéova ka promèt bay to sa to bézwen pou viv si to ka mété so rwayonm an prémyé annan to lavi, to pouvé doumandé to kò : « Ès fason mo ka viv ka montré ki mo ka krè annan sa promès Bondjé-a ? » (Mat. 6:31-33). Si to pouvé réponn wi asou sa dé késyon-yan sa ka montré ki to ka fè Jéova konfyans é ki to paré pou tchenbé anba nenpòrt ki kalité éprèv (Prov. 3:5, 6).

17. a) Kisa rézirèksyon-an ka anprann nou asou pasyans Jéova ? b) Kouman nou pouvé montré nou rékonésans pou pasyans Jéova ?

¹⁷ Jéova ja désidé ki jou é ki lèr i ké fini ké sa monn-an (Mat. 24:36). I pa ké las antann épi aji anvan jou-a rivé. A vré i présé résisité moun mouri-ya, mé i ka pran pasyans (Job 14:14, 15). I ka antann bon moman-an pou roubay yé lavi (Jean 5:28). A pa ti rézon nou gen pou di Jéova mèrsi pou so pasyans, paské a so pasyans ki fè si roun patché moun, nou menm osi annan, rivé gen tan ‘répanti yé kò’ (2 Pierre 3:9). Jéova lé ki toujou plis moun trapé posibilité viv pou tout-tan. Kouman nou pouvé di Jéova mèrsi pou so pasyans ? A pou nou chaché « tout sa ki gen létadèspri ki fo pou gen lavi pou tout-tan » é a pou nou anprann yé kontan Jéova é fè sa i lé (Actes 13:48). A sa moman-an, sa moun-yan ké pouvé profité di pasyans Jéova-a kou nou menm.

18. Poukisa nou divèt pran pasyans ké ròt moun-yan ?

¹⁸ Jéova pa ké doumandé pou nou parfè anvan 1 000 lannen-yan fini ; i ké pran pasyans ké nou. Anvan sa jou-a rivé i paré pardonnen nou péché. Asiré pa pitèt sa divèt pousé nou wè sa ki bon koté ròt moun-yan épi pran pasyans ké yé. Annou palé di èkzanp roun sò. So mari pa té ka alé lasal ankò, paské maladi i té gen annan so tèt té ka fè l’ pè bokou bagaj é i pa té pouvé kontrolé so kò. I ka di : « Bagaj-ya té vini rèd toubonnman pou  mo, tousa nou té prévwè pou fè tonbé a dlo. » Mé sa sò-a montré lanmou ké pasyans pou so mari. I apiyé asou Jéova é i pa janmen moli. Kou Jéova, i gadé pi lwen ki maladi-a é i kontinyé gadé sa ki té bon koté so mari. I ka di : « Mo mari gen bèl kalité, i ka fè tousa i pouvé pou briga ké so maladi. » Sa enpòrtan pou nou pran pasyans ké nou fanmi, nou zanmi ouben moun annan nou asanblé ki ka briga pou soti annan sitiasyon ki rèd.

19. Kisa nou divèt byen désidé fè ?

¹⁹ Jézi ké zanj-ya té kontan lò Jéova fè latè-a. Mé imajiné kouman yé ké kontan lò yé ké wè latè-a plen ké moun parfè ki ka fè volonté Jéova é ki kontan l’. Imajiné osi kouman sa-ya ki ké dirijé annan syèl-a ké Jézi ké kontan lò yé ké wè bénédiksyon moun-yan asou latè-a ka trapé gras a sa yé ka fè annan syèl-a (Rév. 4:4, 9-11 ; 5:9, 10). É imajiné kouman lavi-a ké fika lò nou pa ké pléré paské nou gen chagren mé paské nou kontan é lò maladi, lanpenn ké lanmò ké disparèt pou tout-tan (Rév. 21:4). Anvan sa jou-a rivé, a pou to byen désidé fè kou Jéova ki plen ké pasyans, lanmou ké sajès. Sa ké idé to toujou gen tchò kontan annan nenpòrt ki kalité éprèv (Jacq. 1:2-4). Asiré pa pitèt, « i ké gen roun rézirèksyon » ! (Actes 24:15). Annou di Jéova mèrsi pou sa bèl promès-a !