Bɔ Ni Yesu Ha Nyɔŋmɔ Jalɛ Lɛ Fee Faŋŋ

“[Kristo] ji mɔ ni Nyɔŋmɔ jie to akɛ kpatamɔ nɔ̃ kɛtsɔ elá lɛ nɔ hemɔkɛyeli nɔ, koni ejie ejalɛ lɛ kpo.”—ROM. 3:25.

1, 2. (a) Mɛɛ anɔkwa sane Biblia lɛ haa wɔleɔ yɛ adesai ahe? (b) Mɛɛ sanebimɔi abaasusu he yɛ nikasemɔ nɛɛ mli?

ALE atuatsemɔ ni tee nɔ yɛ Eden abɔɔ lɛ mli ni Biblia lɛ wie he lɛ jogbaŋŋ. Esha ni Adam fee lɛ saa wɔ fɛɛ wɔhe taakɛ atsɔɔ mli yɛ wiemɔi ni nyiɛ sɛɛ nɛɛ mli lɛ akɛ: “Gbɔmɔ kome nɔ esha tsɔ kɛba je lɛŋ, ni gbele tsɔ esha nɔ kɛba, ni no ha gbele lɛ tsɛŋe gbɔmɛi fɛɛ, ejaakɛ amɛ fɛɛ amɛfee esha.” (Rom. 5:12) Yɛ mɔdɛŋ ni wɔbɔɔ koni wɔfee nɔ ni ja lɛ fɛɛ sɛɛ lɛ, wɔtɔ̃ɔ, ni no hewɔ lɛ Nyɔŋmɔ dɛŋ eshaifaa he miihia wɔ. Bɔfo Paulo po ye ŋkɔmɔ akɛ: “Ekpakpa ni misumɔɔ lɛ mifeee; shi efɔŋ ni misumɔɔɔ lɛ, no moŋ mifeɔ. Gbɔmɔ ni nii yɔɔ mɔbɔ ji mi.”—Rom. 7:19, 24.

² Akɛni afɔ́ wɔ yɛ esha mli hewɔ lɛ, nilee yɛ mli akɛ wɔɔbi akɛ: Te fee tɛŋŋ ni afɔ́ Yesu ni jɛ Nazaret lɛ akɛ mɔ ko ni esha bɛ ehe, ni mɛni hewɔ abaptisi lɛ lɛ? Mɛɛ gbɛ nɔ bɔ ni Yesu hi shi eha lɛ ha Yehowa jalɛ lɛ fee faŋŋ? Nɔ ni fe fɛɛ lɛ, mɛni Kristo gbele lɛ tsu?

Awie Ashi Nyɔŋmɔ Jalɛ Lɛ

3. Mɛɛ gbɛ nɔ Satan tsɔ elaka Hawa?

³ Adam kɛ Hawa ni ji wɔ-klɛŋklɛŋ fɔlɔi lɛ eyafeee amɛnii yɛ nilee mli, amɛkpoo Nyɔŋmɔ nɔyeli lɛ ni amɛha “blema onufu lɛ ni atsɛɔ lɛ Abonsam loo Satan” lɛ ye amɛnɔ. (Kpoj. 12:9, Ga Biblia hee) Susumɔ bɔ ni fee ni eba lɛ nakai lɛ he okwɛ. Satan wie eshi gbɛ nɔ ni Yehowa Nyɔŋmɔ tsɔɔ eyeɔ nɔ lɛ akɛ ejaaa. Efee nakai kɛtsɔ sane ni ebi Hawa lɛ nɔ akɛ: “Lɛɛlɛŋ, Nyɔŋmɔ kɛɛ akɛ: Nyɛkaye trom lɛ mli tsei ayibii lɛ fɛɛ eko lɛ?” Hawa tĩ Nyɔŋmɔ kita ni mli kã shi faŋŋ ni tsɔɔ akɛ esaaa akɛ amɛtaa tso pɔtɛɛ ko he koni amɛkagboi lɛ mli. Kɛkɛ ni Satan folɔ Nyɔŋmɔ naa akɛ eji amalelɔ. Abonsam kɛɛ akɛ: “Jeee gboimɔ nyɛaagboi.” Etee nɔ elaka Hawa koni ehe eye akɛ Nyɔŋmɔ kɛ nɔ̃ kpakpa ko miitee amɛ, ni ákɛ kɛ́ eye tso lɛ yibii lɛ ebaatsɔ tamɔ Nyɔŋmɔ, ni lɛ ebaawo mla yɛ ekpakpa kɛ efɔŋ he eha ehe.—1 Mose 3:1-5.

4. Te fee tɛŋŋ ni adesai yaje Satan nɔyeli ni teɔ shi ewoɔ Nyɔŋmɔ nɔ̃ lɛ shishi?

⁴ Nɔ ni Satan tsɔɔ lɛ tuuntu ji akɛ, kɛ́ adesai tse amɛhe kɛjɛ Nyɔŋmɔ he lɛ, miishɛɛ ni amɛyɔɔ lɛ baateke nɔ. Yɛ nɔ najiaŋ ni Adam baafĩ Nyɔŋmɔ sɛɛ akɛ enɔyeli lɛ ja lɛ, ebo eŋa toi ni efata ehe kɛye tso ni agu enɔ yibii yeli lɛ. No hewɔ lɛ shidaamɔ kpakpa ni Adam yɔɔ yɛ Yehowa hiɛ lɛ ŋmɛɛ lɛ, ni eha wɔyaje esha kɛ gbele nyɔŋyeli shishi. Yɛ nakai beaŋ nɔŋŋ lɛ, adesai yaje Satan ni ji “je nɛŋ nyɔŋmɔ” lɛ nɔyeli ni teɔ shi ewoɔ Nyɔŋmɔ nɔ̃ lɛ shishi.—2 Kor. 4:4; Rom. 7:14.

5. (a) Mɛɛ gbɛ nɔ Yehowa ha nɔ ni ewie lɛ ba mli? (b) Mɛɛ hiɛnɔkamɔ Nyɔŋmɔ kɛha Adam kɛ Hawa shwiei lɛ?

⁵ Yehowa bu Adam kɛ Hawa gbele fɔ, ni ekɛtsɔɔ akɛ eyeɔ ewiemɔ nɔ. (1 Mose 3:16-19) Shi no etsɔɔɔ akɛ Nyɔŋmɔ yiŋtoo lɛ baŋ mli. Ebaaba mli kɛ̃! Beni Yehowa buɔ Adam kɛ Hawa fɔ lɛ, ekɛ hiɛnɔkamɔ kpakpa ko ha shwiei ni amɛbaawo yɛ sɛɛ mli lɛ. Efee nakai kɛtsɔ eyiŋtoo akɛ ebaatee ‘seshi’ ko ni Satan baatswa enanetsitsi nɔ̃ lɛ ni eha efee faŋŋ lɛ nɔ. Shi nakai shiwoo Seshi lɛ nanetsitsi  pilamɔ lɛ baahi, ni lɛ hu ‘ebaatswa Satan yitso nɔ̃’ yɛ sɛɛ mli. (1 Mose 3:15) Biblia lɛ ma sane nɛɛ nɔ mi beni ewie kɛkɔ Yesu Kristo he akɛ: “Enɛ hewɔ Nyɔŋmɔ bi lɛ jie ehe kpo, koni efite abonsam nitsumɔi lɛ.” (1 Yoh. 3:8) Shi mɛɛ gbɛ nɔ bɔ ni Yesu hi shi eha lɛ, kɛ agbɛnɛ egbele lɛ ha Nyɔŋmɔ jalɛ lɛ fee faŋŋ?

Nɔ ni Yesu Baptisimɔ lɛ Tsɔɔ

6. Te wɔfeɔ tɛŋŋ wɔleɔ akɛ Adam esha lɛ tsɛŋeee Yesu?

⁶ Beni Yesu da ni ebatsɔ onukpa lɛ, akɛ lɛ ye Adam ni kulɛ eye emuu lɛ najiaŋ. (Rom. 5:14; 1 Kor. 15:45) Enɛ tsɔɔ akɛ esa akɛ afɔ́ Yesu akɛ mɔ ko ni eye emuu. Shi te aaafee tɛŋŋ eba lɛ nakai? Bɔfo Gabriel kɛ mligbalamɔ ni mli kã shi faŋŋ nɛɛ ha Yesu nyɛ Maria akɛ: “Mumɔ krɔŋkrɔŋ aaaba onɔ, ni Ŋwɛinyo lɛ hewalɛ aaabaha onɔ, no hewɔ lɛ nakai bi krɔŋkrɔŋ lɛ hu ní ooofɔ́ lɛ, aaatsɛ́ lɛ Nyɔŋmɔ bi.” (Luka 1:35) Eeenyɛ efee akɛ Maria ha Yesu le saji komɛi ni kɔɔ efɔmɔ he lɛ yɛ egbekɛbiiashi. No hewɔ lɛ, be ko beni Maria kɛ Yosef, mɔ ni ŋɔ Yesu akɛ ebi lɛ na Yesu yɛ Nyɔŋmɔ sɔlemɔwe lɛ, gbekɛ lɛ bi amɛ akɛ: “Ani nyɛleee akɛ esa mi akɛ mihiɔ shi yɛ nii ni ji mitsɛ nɔ̃ lɛ mli?” (Luka 2:49) Ekã shi faŋŋ akɛ Yesu le kɛjɛ egbekɛbiiashi tɔ̃ɔ akɛ eji Nyɔŋmɔ Bi. No hewɔ lɛ, Nyɔŋmɔ jalɛ lɛ ni eeeha efee faŋŋ lɛ ji sane ko ni he hiaa lɛ waa.

7. Mɛɛ nibii ni jara wa Yesu yɔɔ beni eji adesa lɛ?

⁷ Yesu tsɔɔ akɛ enyaa mumɔŋ nibii ahe waa kɛtsɔ kpeei kɛha jamɔ ni efɔɔ yaa lɛ nɔ. Akɛni ejwɛŋmɔ eye emuu hewɔ lɛ, enu saji fɛɛ ni ekane kɛjɛ Hebri Ŋmalɛi lɛ amli kɛ nɔ ni mɛi kane kɛjɛ mli ni enu lɛ shishi jogbaŋŋ. (Luka 4:16) Agbɛnɛ hu eyɛ nɔ kroko ni jara wa—gbɔmɔtso ni eye emuu ni abaanyɛ akɛshã afɔle kɛha adesai. Beni abaptisi Yesu lɛ, esɔle, ni eeenyɛ efee akɛ esusu gbalɛ wiemɔi ni yɔɔ Lala 40:7-9 lɛ he.—Luka 3:21; nyɛkanea Hebribii 10:5-10. *

8. Mɛni hewɔ Yohane Baptisilɔ lɛ sumɔɔɔ akɛ ebaptisiɔ Yesu lɛ?

⁸ Kulɛ Yohane Baptisilɔ lɛ sumɔɔɔ akɛ ebaptisiɔ Yesu. Mɛni hewɔ? Ejaakɛ Yohane miimii Yudafoi lɛ anu akɛ amɛtsuitsakemɔ kɛjɛ esha mli yɛ Mla lɛ shishi lɛ he okadi. Akɛni Yohane ji Yesu wekunyo kpaakpa hewɔ lɛ, ele akɛ Yesu ji jalɔ, ni tsuitsakemɔ he ehiaaa lɛ. Shi Yesu ma nɔ mi eha Yohane akɛ esa akɛ ebaptisi lɛ Yesu lɛ. Yesu tsɔɔ  mli akɛ: “Nɛkɛ sa akɛ wɔgbeɔ jalɛ fɛɛ naa.”—Mat. 3:15.

9. Mɛni Yesu baptisimɔ lɛ fee he okadi?

⁹ Akɛni Yesu ji adesa ni eye emuu tamɔ Adam hewɔ lɛ, kulɛ ebaanyɛ emu sane naa akɛ ebaanyɛ ewo shwiei ni eye emuu. Shi Yesu naaa shwelɛ ni tamɔ nakai ejaakɛ jeee no ji Yehowa suɔmɔnaa nii kɛha lɛ. Nyɔŋmɔ tsu Yesu kɛba shikpɔŋ lɛ nɔ koni ebawo nitsumɔ ni shiwoo Seshi lɛ loo Mesia lɛ baatsu lɛ obɔ. Nɔ ni fata enɛ he ji Yesu adesa gbɔmɔtso ni eye emuu lɛ ni ekɛbaashã afɔle lɛ. (Nyɛkanea Yesaia 53:5, 6, 12.) Anɔkwa sane ji akɛ, esoro Yesu baptisimɔ lɛ yɛ wɔnɔ lɛ he. Ebiii ni Yesu ajɔɔ ehe nɔ eha Yehowa, akɛni ejɛ Israel maŋ ni ejɔɔ ehe nɔ eha Nyɔŋmɔ momo lɛ mli lɛ hewɔ. Yesu baptisimɔ lɛ fee ehe ni ekɛha koni etsu nitsumɔ ni Nyɔŋmɔ eto akɛ Mesia lɛ baatsu taakɛ atsĩ tã yɛ Ŋmalɛi lɛ amli lɛ he okadi.

10. Mɛni ji Nyɔŋmɔ suɔmɔnaa nii kɛha Mesia lɛ ekomɛi, ni te Yesu nu he eha tɛŋŋ yɛ enɛ he?

¹⁰ Yehowa suɔmɔnaa nii kɛha Yesu lɛ ekomɛi ji Nyɔŋmɔ Maŋtsɛyeli lɛ he sanekpakpa lɛ shiɛmɔ, kaselɔi ni eeefee, kɛ kaselɔi nɛɛ ni eeetsɔse amɛ koni amɛ hu amɛfee mɛi kaselɔi. Kɛfata he lɛ, Yesu he ni ekɛha lɛ tsɔɔ akɛ eesumɔ ni efĩ shi yɛ yiwaa mli ni agbe lɛ musuŋshãa naa ni ekɛfĩ Yehowa Nyɔŋmɔ nɔyeli ni ja lɛ sɛɛ. Akɛni Yesu miisumɔ eŋwɛi Tsɛ lɛ lɛɛlɛŋ hewɔ lɛ, ená he miishɛɛ akɛ eeefee Nyɔŋmɔ suɔmɔnaa nii, ni etsui nyɔ emli waa akɛ ekɛ egbɔmɔtso lɛ ha ni akɛshã afɔle. (Yoh. 14:31) Agbɛnɛ hu, le ni ele akɛ abaanyɛ akɛ ewala ni eye emuu lɛ jara lɛ aha Nyɔŋmɔ akɛ kpɔ̃mɔnɔ ni akɛhé wɔ kɛjɛ esha kɛ gbele nyɔŋyeli mli lɛ ha ená miishɛɛ. Ani Nyɔŋmɔ kpɛlɛ Yesu he ni ekɛha koni etsu nitsumɔi kpelei nɛɛ nɔ? Hɛɛ, efee nakai!

11. Mɛɛ gbɛ nɔ Yehowa tsɔɔ akɛ ekpɛlɛɔ Yesu nɔ akɛ shiwoo Mesia lɛ loo Kristo?

¹¹ Mɛi ejwɛ ni ŋmala Sanekpakpai lɛ fɛɛ bɔ amaniɛ akɛ beni Yesu je kpo kɛjɛ Yordan Faa lɛ mli lɛ, Yehowa Nyɔŋmɔ kɛ wiemɔi ni mli kã shi faŋŋ tsu nii kɛtsɔɔ akɛ ekpɛlɛɔ Yesu nɔ. Yohane Baptisilɔ lɛ bɔ amaniɛ akɛ: “Mina Mumɔ lɛ yi shi kɛjɛ ŋwɛi tamɔ okpo, ni ebahi [Yesu] nɔ . . . Ni mina, ni miye he odase akɛ Nyɔŋmɔ bi lɛ nɛ.” (Yoh. 1:32-34) Kɛfata he lɛ, Yehowa jaje yɛ nakai beaŋ akɛ: “Mɔnɛ ji misuɔmɔ bi ní mináa ehe tsui lɛ.”—Mat. 3:17; Mar. 1:11; Luka 3:22.

Eye Anɔkwa Kɛtee Gbele Mli

12. Yɛ Yesu baptisimɔ lɛ sɛɛ afii etɛ kɛ fã lɛ, mɛni efee?

¹² Yesu baptisimɔ lɛ sɛɛ lɛ, ekɛ afii etɛ kɛ fã tuu ehe fɛɛ eha kɛtsɔɔ mɛi e-Tsɛ lɛ he nii, ni agbɛnɛ hu lɛ etsɔɔ mɛi akɛ Nyɔŋmɔ nɔyeli lɛ ja. Akɛni enyiɛ kɛkpa Shiwoo Shikpɔŋ lɛ nɔ fɛɛ hewɔ lɛ, etɔ lɛ waa, shi nɔ ko kwraa bɛ ni tsĩ enaa koni ekaye anɔkwale lɛ he odase. (Yoh. 4:6, 34; 18:37) Yesu tsɔɔ mɛi Nyɔŋmɔ Maŋtsɛyeli lɛ he nii. Yesu ha ana nɔ ni Maŋtsɛyeli lɛ baatsu kɛha adesai kɛtsɔ naakpɛɛ gbɛ nɔ ni etsɔ etsa helai, asafoi babaoo ni elɛ, kɛ gbohii ashi ni etee lɛ nɔ.—Mat. 11:4, 5.

13. Mɛni Yesu tsɔɔ yɛ sɔlemɔ he?

¹³ Yɛ nɔ najiaŋ ni Yesu aaaŋɔ yijiemɔ eha lɛ diɛŋtsɛ ehe yɛ enitsɔɔmɔi lɛ kɛ naakpɛɛ gbɛ nɔ ni etsɔ etsa helai lɛ hewɔ lɛ, ejɛ heshibaa mli ekɛ yijiemɔ lɛ fɛɛ ha Yehowa, ni ekɛ enɛ fee nɔkwɛmɔnɔ ni nɔ bɛ. (Yoh. 5:19; 11:41-44) Agbɛnɛ hu Yesu ha ana saji ni he hiaa fe fɛɛ ni esa akɛ wɔsɔle yɛ he lɛ. Esa akɛ kɛ́ wɔmiisɔle lɛ, wɔbi ni “atse” Nyɔŋmɔ gbɛ́i ni ji Yehowa lɛ “he,” ni wɔbi ni akɛ Nyɔŋmɔ nɔyeli ni ja lɛ aye Satan nɔyeli fɔŋ lɛ najiaŋ koni ‘afee nɔ ni Nyɔŋmɔ sumɔɔ yɛ shikpɔŋ lɛ nɔ, taakɛ afeɔ yɛ ŋwɛi lɛ.’ (Mat. 6:9, 10)  Kɛfata he lɛ, Yesu wo wɔ hewalɛ ni wɔhi shi yɛ sɔlemɔi nɛɛ anaa kɛtsɔ ‘Nyɔŋmɔ maŋtsɛyeli lɛ kɛ ejalɛ lɛ tsutsu ni wɔɔtao’ lɛ nɔ.—Mat. 6:33.

14. Eyɛ mli akɛ Yesu eye emuu moŋ, shi mɛni hewɔ ebi ni emia ehiɛ koni enyɛ etsu gbɛfaŋnɔ ni etsuɔ yɛ Nyɔŋmɔ yiŋtoo mli lɛ he nii lɛ?

¹⁴ Beni be ni Yesu baagbo kɛshã afɔle lɛ bɛŋkɛɔ lɛ, sɔ̃ ni tsĩi ni esa akɛ etsu he nii lɛ bafee faŋŋ kɛha lɛ. Ehe bahia ni Yesu afĩ shi beni ayeɔ esane yɛ gbɛ ni ejaaa nɔ lɛ, ni agbɛnɛ hu egbo musuŋshãa gbele bɔni afee ni e-Tsɛ lɛ yiŋtoo lɛ aba mli, ni etse e-Tsɛ lɛ gbɛ́i lɛ he. Gbii enumɔ dani Yesu baagbo lɛ esɔle akɛ: ‘Agbɛnɛ misusuma miihao, ni mɛni makɛɛ? Ataa, heremɔ mi yɛ ŋmɛlɛtswaa nɛɛ mli. Tsɛbelɛ enɛ hewɔ nɔŋŋ miba yɛ ŋmɛlɛtswaa nɛɛ mli.’ Beni Yesu wie wiemɔi nɛɛ kɛtsɔɔ bɔ ni enuɔ he ehaa akɛ adesa lɛ sɛɛ lɛ, efooo lɛ pɛ enɔ mli, shi moŋ egbala ejwɛŋmɔ kɛtee sane ni he hiaa titri lɛ nɔ, ni esɔle ekɛɛ: “Ataa, wo ogbɛ́i lɛ hiɛ nyam!” Nɔŋŋ kɛkɛ ni Yehowa to he akɛ: “Miná miwo ehiɛ nyam, ni masaa mawo ehiɛ nyam ekoŋŋ.” (Yoh. 12:27, 28) Hɛɛ, Yesu miisumɔ ni etsɔ anɔkwayeli he kaa ni fe fɛɛ ni adesa ko baanyɛ atsɔ mli lɛ mli. Ŋwanejee ko bɛ he akɛ, beni Yesu nu wiemɔi ni eŋwɛi Tsɛ lɛ wie lɛ, no ha ená hekɛnɔfɔɔ ni mli wa waa akɛ ebaawo Yehowa nɔyeli lɛ hiɛ nyam ni eha ana akɛ Yehowa nɔyeli lɛ ja. Ni nakai pɛpɛɛpɛ eba lɛ!

Nɔ ni Yesu Gbele lɛ Tsu

15. Beni eshwɛ fioo ni Yesu baagbo lɛ, mɛni hewɔ ekɛɛ akɛ: “Ágbe naa” lɛ?

¹⁵ Beni Yesu tsotsoro sɛŋmɔtso lɛ nɔ kɛ piŋmɔ ni emumɔ miihe ata lɛ ekɛɛ akɛ: “Ágbe naa!” (Yoh. 19:30) Yɛ Yesu baptisimɔ lɛ sɛɛ afii etɛ kɛ fã kɛyashi egbele mli lɛ, kwɛ nii wuji ni Nyɔŋmɔ ye ebua lɛ ni enyɛ efee! Beni Yesu gbo lɛ shikpɔŋ hoso waa, ni enɛ tsirɛ Roma asraafoi anukpa ni kwɛ ni agbe lɛ lɛ ni ekɛɛ akɛ: “Lɛɛlɛŋ, Nyɔŋmɔ bi nɛ!” (Mat. 27:54) Eeenyɛ efee akɛ asraafonyo nɛɛ na beni ayeɔ Yesu he fɛo yɛ Nyɔŋmɔ Bi ni ekɛɛ eji lɛ hewɔ lɛ. Yɛ nibii nɛɛ amli ni Yesu tsɔ lɛ fɛɛ sɛɛ lɛ, etee nɔ ehiɛ enɔkwayeli lɛ mli ni eha ana akɛ Satan ji ablatsɛ kpanaku. Satan tswa mɛi fɛɛ ni fiɔ Nyɔŋmɔ nɔyeli lɛ sɛɛ lɛ mpoa akɛ: “Nɔ fɛɛ nɔ ní mɔ ko yɔɔ lɛ eŋɔhaa yɛ ewala hewɔ!” (Hiob 2:4) Yesu tsɔ enɔkwa ni eye lɛ nɔ eha ana akɛ kulɛ Adam kɛ Hawa baanyɛ aye anɔkwa yɛ kaa ni kɛ́ akɛto Yesu nɔ̃ lɛ he lɛ eyɔɔ mlɛo kwraa lɛ mli. Nɔ ni fe fɛɛ lɛ, Yesu tsɔ bɔ ni ehi shi eha lɛ, kɛ egbele lɛ nɔ etsɔɔ akɛ efĩɔ Yehowa nɔyeli lɛ sɛɛ, ni eha efee faŋŋ hu akɛ Yehowa nɔyeli lɛ ja. (Nyɛkanea Abɛi 27:11.) Ani Yesu gbele lɛ miitsu nɔ kroko yɛ enɛ sɛɛ? Hɛɛ!

16, 17. (a) Mɛni hewɔ Yehowa nyɛ ebu edasefoi ni hi shi dani Kristo ba lɛ jalɔi lɛ? (b) Mɛɛ gbɛ nɔ Yehowa juro e-Bi lɛ yɛ e-Bi lɛ anɔkwayeli lɛ hewɔ, ni mɛni Nuŋtsɔ Yesu Kristo yaa nɔ efeɔ lolo?

¹⁶ Yehowa tsuji babaoo hi shi dani Yesu ba shikpɔŋ lɛ nɔ. Nyɔŋmɔ bu amɛ akɛ jalɔi, ni eha amɛná gbohiiashitee he hiɛnɔkamɔ. (Yes. 25:8; Dan. 12:13) Shi yɛ mla naa lɛ, mɛni Yehowa ni ji Nyɔŋmɔ ni yɔɔ krɔŋkrɔŋ lɛ baanyɛ adamɔ nɔ ejɔɔ adesai ni afɔ́ amɛ yɛ esha mli lɛ yɛ gbɛ ni nɔ bɛ ni tamɔ nɛkɛ nɔ? Biblia lɛ gbála mli akɛ: “[Yesu Kristo] ji mɔ ni Nyɔŋmɔ jie to akɛ kpatamɔ nɔ̃ kɛtsɔ elá lɛ nɔ hemɔkɛyeli nɔ, koni ejie ejalɛ lɛ kpo, yɛ ehiɛ ní eku efɔ̃ eshai ní afee sá lɛ anɔ yɛ Nyɔŋmɔ tsuishiŋmɛɛ mli lɛ hewɔ; koni ejie ejalɛ lɛ etsɔɔ yɛ benɛbe nɛɛ mli, ní eye bem ní ebu mɔ ni heɔ Yesu nɔ yeɔ lɛ hu bem.”—Rom. 3:25, 26. *

 ¹⁷ Yehowa tee Yesu shi, ni eha lɛ hegbɛ ni nɔ kwɔ fe nɔ ni eyɔɔ dani eba shikpɔŋ lɛ nɔ lɛ, ni ekɛ nakai feemɔ juro Yesu. Amrɔ nɛɛ Yesu ji mumɔŋ bɔɔ nɔ ni awo ehiɛ nyam ni gbele nyɛŋ aná enɔ hewalɛ. (Heb. 1:3) Ákɛ Osɔfonukpa kɛ Maŋtsɛ lɛ, Nuŋtsɔ Yesu Kristo miiya nɔ eeye eebua esɛɛnyiɛlɔi lɛ koni amɛha Nyɔŋmɔ jalɛ lɛ afee faŋŋ. Ni kwɛ bɔ ni wɔdaa Yehowa ni ji wɔŋwɛi Tsɛ lɛ shi waa, ejaakɛ lɛ ji mɛi fɛɛ ni feɔ enɛ ni amɛkaseɔ e-Bi lɛ kɛtsɔ anɔkwa ni amɛyaa nɔ amɛyeɔ Nyɔŋmɔ lɛ nɔ lɛ Anyɔmɔwolɔ!—Nyɛkanea Lala 34:4; Hebribii 11:6.

18. Mɛni he abaasusu yɛ nikasemɔ ni nyiɛ sɛɛ lɛ mli?

¹⁸ Akɛni adesai anɔkwafoi ni ehi shi pɛŋ ni Habel fata he lɛ jie hemɔkɛyeli kpo ni amɛná hekɛnɔfɔɔ yɛ shiwoo Seshi lɛ mli hewɔ lɛ, amɛná amɛkɛ Yehowa teŋ wekukpãa ni mli wa. Yehowa le akɛ e-Bi lɛ baahiɛ enɔkwayeli lɛ mli kɛwula shi, ni ákɛ egbele lɛ baatsimɔ “je lɛ he esha” lɛ nɔ kwraa. (Yoh. 1:29) Adesai ni yɔɔ ŋmɛnɛ lɛ hu náa Yesu gbele lɛ he sɛɛ. (Rom. 3:26) Belɛ, mɛɛ jɔɔmɔi Kristo kpɔ̃mɔnɔ lɛ baanyɛ aha onine ashɛ nɔ? No ji nɔ ni abaasusu he yɛ nikasemɔ ni nyiɛ sɛɛ lɛ mli lɛ.

[Shishigbɛ niŋmai]

Te Obaaha Hetoo Oha Tɛŋŋ?

• Mɛɛ gbɛ nɔ awie ashi Nyɔŋmɔ jalɛ lɛ?

• Mɛni Yesu baptisimɔ lɛ fee he okadi?

• Mɛni Yesu gbele lɛ tsu?

[Nikasemɔ lɛ he Sanebimɔi]

[Mfoniri ni yɔɔ baafa 9]

Ani ole nɔ ni Yesu baptisimɔ lɛ fee he okadi?