Hiob 2:1-13

  • Satan wie eshi yiŋtoo hewɔ ni Hiob yeɔ anɔkwa lɛ ekoŋŋ (1-5)

  • Aŋmɛ Satan gbɛ koni eta Hiob gbɔmɔtso he (6-8)

  • Hiob ŋa lɛ kɛɛ akɛ: “Lomɔmɔ Nyɔŋmɔ ni ogbo!” (9, 10)

  • Hiob nanemɛi etɛ lɛ bashɛ shi (11-13)

2  Enɛ sɛɛ lɛ, gbi ko bashɛ, ni anɔkwa Nyɔŋmɔ lɛ bihii*+ lɛ tee ni amɛyadamɔ Yehowa hiɛ,+ ni Satan hu futu amɛ kɛyadamɔ Yehowa hiɛ.+  Kɛkɛ ni Yehowa bi Satan akɛ: “Nɛgbɛ ojɛ obaa nɛɛ?” Satan hã Yehowa hetoo akɛ: “Mijɛ shikpɔŋ lɛ nɔ shikpaa kɛ enɔ shisharamɔ.”+  Ni Yehowa kɛɛ Satan akɛ: “Ani ogbala ojwɛŋmɔ kɛtee* mitsulɔ Hiob nɔ? Mɔ ko mɔ ko bɛ ni tamɔ lɛ yɛ shikpɔŋ lɛ nɔ. Eji nuu ni ja ni yeɔ anɔkwa,*+ esheɔ Nyɔŋmɔ gbeyei, ni etsiɔ ehe kɛjeɔ nɔ fɔŋ he. Eyɛ mli akɛ oka akɛ obaahã mate shi mawo lɛ+ koni makpãtã ehiɛ* yakatswaa moŋ, shi ehiɛ enɔkwayeli lɛ mli kpɛŋŋ lolo.”+  Shi Satan hã Yehowa hetoo akɛ: “Akɛ hewolo hãa yɛ hewolo najiaŋ. Gbɔmɔ kɛ nɔ fɛɛ nɔ ni eyɔɔ baahã yɛ ewala* hewɔ.  Shi kɛ́ oosumɔ lɛ, kpã onine mli ni ota ewu kɛ eheloo he,* ni bɔ fɛɛ bɔ ni fee lɛ, ebaalomɔ bo yɛ ohiɛ.”+  Kɛkɛ ni Yehowa kɛɛ Satan akɛ: “Naa! Mikɛ lɛ ewo odɛŋ! Ewala* kɛkɛ okaŋɔ!”  No hewɔ lɛ, Satan je Yehowa hiɛ etee, ni ehã asanei* ni waa mɔ he waa tsɛ̃rɛ̃ Hiob+ kɛjɛ enane shishi aahu kɛyashi epampam.  Ni Hiob kɔ gbɛ́ko koni ekɛwamɔ ehe, ni eho eta lamulu mli.+  Naagbee lɛ, eŋa kɛɛ lɛ akɛ: “Ohiɛ onɔkwayeli lɛ mli kpɛŋŋ lolo? Lomɔmɔ Nyɔŋmɔ ni ogbo!” 10  Shi ekɛɛ eŋa lɛ akɛ: “Oowie tamɔ yei ni bɛ jwɛŋmɔ lɛ eko wieɔ lɛ. Ani nɔ kpakpa pɛ esa akɛ wɔhe yɛ anɔkwa Nyɔŋmɔ lɛ dɛŋ, shi nɔ gbonyo lɛ, wɔkahe?”+ Enɛ fɛɛ mli lɛ, Hiob kɛ enaabu efeee esha.+ 11  Hiob nanemɛi etɛ komɛi* nu amanehului fɛɛ ni eba enɔ lɛ he, ni amɛteŋ mɔ fɛɛ mɔ jɛ he ni eyɔɔ kɛba—Elifaz,+ Temannyo lɛ, kɛ Bildad,+ Shuanyo+ lɛ, kɛ Zofar,+ Naamanyo lɛ. No hewɔ lɛ, amɛkpɛ mli akɛ amɛbaakpe ni amɛya amɛyaye Hiob ŋkɔmɔ, ní amɛshɛje emii. 12  Be ni amɛna lɛ kɛjɛ shɔŋŋ lɛ, amɛyooo lɛ. Kɛkɛ ni amɛbɔi yaafo waa, ni amɛgbála amɛhe atadei, ni amɛfɔ̃ mulu amɛwo kɔɔyɔɔ lɛ mli kɛ amɛyiteŋ.+ 13  Kɛkɛ ni amɛtara emasɛi yɛ shikpɔŋ jetsɛremɔ kɛ jenamɔ gbii kpawo. Mɔ ko mɔ ko kɛ lɛ ewieee wiemɔ ko, ejaakɛ amɛna akɛ eepiŋ waa diɛŋtsɛ.+

Shishigbɛ Niŋmaa

Eji Hebri fɔŋwiemɔ ni damɔ shi kɛhã ŋwɛibɔfoi lɛ.
Hebri sht. ŋm., “Ani okɛ otsui efɔ̃.”
Loo “nuu ni shwamɔ ko bɛ ehe ni ja.”
Hebri sht. ŋm., “koni mami lɛ.”
Loo “esusuma.”
Loo “ni otswia ewu kɛ eheloo nii.”
Loo “Esusuma.”
Loo “faji.”
Loo “Mɛi etɛ komɛi ni Hiob le amɛ.”