Yohane Klɛŋklɛŋ Wolo Lɛ 3:1-24

  • Nyɔŋmɔ bii ji wɔ (1-3)

  • Nyɔŋmɔ bii kɛ Abonsam bii (4-12)

    • Yesu baakpãtã Abonsam nitsumɔi lɛ ahiɛ (8)

  • Nyɛsumɔsumɔa nyɛhe (13-18)

  • Nyɔŋmɔ da fe wɔtsuii (19-24)

3  Nyɛkwɛa suɔmɔ sɔŋŋ ni Tsɛ lɛ kɛsumɔɔ wɔ,+ akɛ atsɛ wɔ Nyɔŋmɔ bii!+ Ni nakai wɔji. No hewɔ ni je lɛ leee wɔ lɛ,+ ejaakɛ je lɛ leko Nyɔŋmɔ.+  Mɛi ni asumɔɔ, amrɔ nɛɛ Nyɔŋmɔ bii ji wɔ,+ shi ajieko nɔ ni wɔbaatsɔmɔ lɛ kpo.+ Wɔle akɛ, kɛ́ ajie lɛ kpo lɛ wɔbaatamɔ lɛ, ejaakɛ wɔbaana lɛ bɔ ni eyɔɔ lɛ nɔŋŋ.  Ni mɔ fɛɛ mɔ ni yɔɔ nɛkɛ hiɛnɔkamɔ nɛɛ yɛ emli lɛ feɔ lɛ diɛŋtsɛ ehe krɔŋŋ+ tamɔ bɔ ni nakai mɔ lɛ yɔɔ krɔŋŋ lɛ.  Mɔ fɛɛ mɔ ni yaa nɔ efeɔ esha lɛ, eetɔ̃ mla hu, ni esha lɛ mlatɔmɔ ni.  Nyɛle hu akɛ ajie lɛ kpo koni ewó wɔhe eshai lɛ kɛya,+ ni esha ko bɛ emli.  Mɔ fɛɛ mɔ ni yaa nɔ ekɛ lɛ feɔ ekome lɛ, eyaaa nɔ efeee esha;+ mɔ fɛɛ mɔ ni yaa nɔ efeɔ esha lɛ, enako lɛ ni eleko lɛ hu.  Bii bibii, nyɛkahãa mɔ ko lakaa nyɛ; mɔ ni feɔ jalɛ nii lɛ, jalɔ ji lɛ, tamɔ bɔ ni nakai mɔ lɛ hu ji jalɔ lɛ.  Mɔ ni yaa nɔ efeɔ esha lɛ, ejɛ Abonsam mli, ejaakɛ Abonsam feɔ esha kɛjɛ shishijee beebe.*+ Nɔ hewɔ ni ajie Nyɔŋmɔ Bi lɛ kpo nɛ, koni efite Abonsam nitsumɔi lɛ.*+  Mɔ fɛɛ mɔ ni ajɛ Nyɔŋmɔ mli afɔ lɛ lɛ eyaaa nɔ efeee esha,+ ejaakɛ Nyɔŋmɔ dumɔwu* lɛ yaa nɔ ehiɔ mɔ nɛɛ mli, ni enyɛŋ eya nɔ efee esha, ejaakɛ Nyɔŋmɔ mli ajɛ afɔ lɛ.+ 10  Anɔkwa sane ni hãa anaa Nyɔŋmɔ bii lɛ kɛ Abonsam bii lɛ nɛ: Mɔ fɛɛ mɔ ni efeee jalɛ nii lɛ, ejɛɛɛ Nyɔŋmɔ mli, nakai nɔŋŋ ji mɔ ni sumɔɔɔ enyɛmi hu.+ 11  Ejaakɛ enɛ ji sane ni nyɛnu kɛjɛ shishijee lɛ, akɛ wɔsumɔsumɔɔ wɔhe;+ 12  jeee tamɔ Kain, mɔ ni jɛ mɔ fɔŋ lɛ mli ni egbe enyɛmi lɛ.+ Ni mɛni hewɔ egbe lɛ? Ejaakɛ lɛ diɛŋtsɛ enitsumɔi lɛ, nitsumɔi fɔji ni,+ shi enyɛmi lɛ nɔ lɛ, jalɛ nitsumɔi ni.+ 13  Nyɛmimɛi, nyɛkahãa efea nyɛ naakpɛɛ akɛ je lɛ nyɛɔ nyɛ.+ 14  Wɔle akɛ wɔfo mli kɛjɛ gbele mli kɛtee wala mli,+ ejaakɛ wɔsumɔɔ nyɛmimɛi lɛ.+ Mɔ ni sumɔɔɔ mɔ lɛ eyaa nɔ ehiɔ gbele mli.+ 15  Mɔ fɛɛ mɔ ni nyɛɔ enyɛmi lɛ, gbɔmɔgbelɔ ji lɛ,+ ni nyɛle akɛ gbɔmɔgbelɔ ko gbɔmɔgbelɔ ko bɛ naanɔ wala yɛ emli.+ 16  Enɛ wɔkɛnaa nɔ ni suɔmɔ ji, ejaakɛ ekɛ ewala* fɔ̃ shi ehã wɔ,+ ni sɔ̃ kã wɔ hu wɔnɔ akɛ wɔkɛ wɔwala* afɔ̃ shi ahã wɔnyɛmimɛi lɛ.+ 17  Shi mɔ fɛɛ mɔ ni yɔɔ je nɛŋ nibii, ni enaa akɛ efi enyɛmi shi ejieee musuŋtsɔlɛ kpo etsɔɔɔ lɛ lɛ, ani Nyɔŋmɔ suɔmɔ lɛ yɛ emli?+ 18  Bii bibii, esaaa akɛ wɔsumɔɔ mɛi yɛ wiemɔ mli loo lilɛi nɔ,+ shi moŋ yɛ nifeemɔ+ kɛ anɔkwale mli.+ 19  Ni enɛ wɔkɛaale akɛ wɔjɛ anɔkwale lɛ mli, ni wɔbaatsɛ wɔtsuii wɔŋmɛ wɔmli* yɛ ehiɛ 20  yɛ nɔ fɛɛ nɔ ni wɔtsuii baabu wɔ fɔ yɛ mli lɛ gbɛfaŋ, ejaakɛ Nyɔŋmɔ da fe wɔtsuii, ni ele nɔ fɛɛ nɔ.+ 21  Mɛi ni asumɔɔ, kɛ́ wɔtsuii ebuuu wɔ fɔ lɛ, wɔbaanyɛ wɔwie kɛ nɔmimaa yɛ Nyɔŋmɔ hiɛ;+ 22  ni nɔ fɛɛ nɔ ni wɔbiɔ lɛ wɔnine shɛɔ nɔ kɛjɛɔ edɛŋ,+ ejaakɛ wɔyeɔ ekitãi lɛ anɔ ni wɔfeɔ nii ni sa ehiɛ. 23  Anɔkwa, ekitã lɛ nɛ: akɛ wɔhe e-Bi Yesu Kristo gbɛ́i lɛ nɔ wɔye+ ni wɔsumɔsumɔɔ wɔhe+ tamɔ bɔ ni ewo wɔ kitã lɛ. 24  Agbɛnɛ hu, mɔ ni yeɔ ekitãi lɛ anɔ lɛ yaa nɔ ekɛ lɛ feɔ ekome, ni lɛ hu ekɛ mɔ nɛɛ feɔ ekome.+ Ni wɔtsɔɔ mumɔ ni ehã wɔ lɛ nɔ wɔleɔ akɛ ekɛ wɔ efee ekome.+

Shishigbɛ Niŋmaa

Loo “kɛjɛ be ni eje shishi.”
Loo “koni ekpãtã Abonsam nitsumɔi lɛ ahiɛ.”
Ni ji, dumɔwu ni nyɛɔ ekwɛ̃ɔ, loo ewoɔ yibii.
Loo “esusuma.”
Loo “wɔsusumai.”
Loo “wɔɔhã wɔyiŋ atsɔ; wɔɔná nɔmimaa.”