Akɛmaje Hebribii Lɛ 10:1-39

  • Kooloi afɔlei lɛ nyɛŋ ajie eshai kɛya (1-4)

    • Mla lɛ, mfoniri kɛkɛ ni (1)

  • Kristo kɛ ehe hã shi kome nyɔŋlo (5-18)

  • Gbɛ hee ni hiɛ kã (19-25)

    • Wɔkakwa kpe ni wɔkpeɔ kutuu lɛ (24, 25)

  • Abɔ kɔkɔ ashi esha ni ajeɔ gbɛ afeɔ (26-31)

  • Ebiɔ ekãa kɛ hemɔkɛyeli dani abaanyɛ afi shi (32-39)

10  Ni akɛni Mla lɛ ji nibii kpakpai ni baaba lɛ ahe mfoniri* kɛkɛ,+ shi jeee nibii lɛ diɛŋtsɛ ni hewɔ lɛ, Mla lɛ nyɛŋ ekɛ* nakai afɔlei lɛ nɔŋŋ ni ayaa nɔ akɛhãa daa afi lɛ ahã mɛi ni bɛŋkɛɔ Nyɔŋmɔ lɛ aye emuu kɔkɔɔkɔ.+  Jeee nakai kulɛ, ani akpaŋ afɔlei lɛ kɛhãmɔ? Ejaakɛ mɛi ni kɛ sɔɔmɔ krɔŋŋ hãa lɛ, eji aná atsuu amɛhe shi kome pɛ kulɛ, amɛleŋ eshai dɔŋŋ.*  Shi afɔlei nɛɛ ni ashãa daa afi lɛ kaiɔ amɛ akɛ esha yɛ amɛhe,+  ejaakɛ anyɛŋ akɛ tsinahii kɛ abotiai alá ajie eshai kɛya.  No hewɔ lɛ, be ni Kristo baa je lɛ mli lɛ, ekɛɛ: “‘Afɔle kɛ nikeenii lɛ osumɔɔɔ, shi gbɔmɔtso osaa ohã mi.  Onáaa shãa afɔlei kɛ esha he afɔlei ahe miishɛɛ.’+  Kɛkɛ ni mikɛɛ: ‘Naa! miba (aŋma mihe sane yɛ wolokpo* lɛ mli) Ao Nyɔŋmɔ, koni mibafee bo, osuɔmɔnaa nii.’”+  Be ni ekɛɛ klɛŋklɛŋ akɛ: “Osumɔɔɔ, ni onáaa afɔlei kɛ nikeenii kɛ shãa afɔlei kɛ esha he afɔlei ahe miishɛɛ” lɛ—afɔlei ni akɛhãa yɛ Mla lɛ naa lɛ—  no sɛɛ lɛ ekɛɛ: “Naa! miba koni mibafee osuɔmɔnaa nii.”+ Ejie klɛŋklɛŋ nɔ lɛ, bɔ ni afee ni enyɛ eto nɔ ni ji enyɔ lɛ shishi. 10  Nɛkɛ ‘suɔmɔnaa nii’+ nɛɛ naa lɛ, atsɔ Yesu Kristo gbɔmɔtso lɛ ni ekɛhã shi kome nyɔŋlo lɛ nɔ afee wɔ krɔŋkrɔŋ.+ 11  Agbɛnɛ hu, osɔfo fɛɛ osɔfo lɛ, gbi fɛɛ gbi lɛ, edamɔɔ egbɛhe koni ekɛ sɔɔmɔ krɔŋkrɔŋ ahã*+ ni eshã nakai afɔlei lɛ nɔŋŋ shii abɔ,+ afɔlei ni nyɛŋ ajie eshai kɛya kwraa lɛ.+ 12  Shi nuu nɛɛ kɛ eshai ahe afɔle kome hã shi kome nyɔŋlo, ni eyata Nyɔŋmɔ ninejurɔ nɔ,+ 13  kɛjɛ no nɔ kɛbaa lɛ, eemɛ kɛyashi be ni akɛ ehenyɛlɔi lɛ baafee enajiashi sɛi.+ 14  Ejaakɛ etsɔ afɔle kome ni ekɛhã lɛ nɔ ehã mɛi ni afee amɛ krɔŋkrɔŋ* lɛ ye emuu+ shi kome nyɔŋlo. 15  Agbɛnɛ hu, mumɔ krɔŋkrɔŋ lɛ hu yeɔ wɔ odase, ejaakɛ ekɛɛ akɛ: 16  “‘Kpaŋmɔ ni mikɛ amɛ baakpaŋ yɛ nakai gbii lɛ asɛɛ lɛ nɛ,’ Yehowa* kɛɛ. ‘Mikɛ mimlai lɛ baawo amɛtsuii amli, ni maŋma mawo amɛjwɛŋmɔi amli.’”+ 17  Ni no sɛɛ lɛ, ekɛɛ: “Mikaiŋ amɛhe eshai lɛ kɛ amɛnifeemɔi ni mla eŋmɛɛɛ gbɛ lɛ dɔŋŋ.”+ 18  Agbɛnɛ, he ni akɛ enɛɛmɛi eke yɛ lɛ, eshai ahe afɔleshaa ko bɛ jɛmɛ dɔŋŋ. 19  No hewɔ lɛ, nyɛmimɛi, akɛni Yesu lá lɛ hewɔ lɛ, wɔyɛ ekãa* ni wɔkɛaatsɔ gbɛ ni yaa he krɔŋkrɔŋ lɛ mli lɛ nɔ hewɔ lɛ,+ 20  gbɛ ni egbele* ehã wɔ akɛ gbɛ hee ni hiɛ kã kɛtsɔ pateeshɛŋ lɛ,+ ni ji eheloo lɛ mli lɛ, 21  ni akɛni wɔyɛ osɔfo kpele yɛ Nyɔŋmɔ shĩa lɛ nɔ hewɔ lɛ,+ 22  nyɛhãa wɔkɛ tsui krɔŋŋ kɛ hemɔkɛyeli ni ama nɔ mi kɛmɔ shi abɛŋkɛa Nyɔŋmɔ, be mli ni akɛ nii eshwã wɔtsuii anɔ* ni ehe etse ni ebɛ henilee fɔŋ ko,+ ni wɔgbɔmɔtsei lɛ hu, akɛ nu ni mli tse eju he lɛ.+ 23  Nyɛhãa wɔhiɛa wɔhiɛnɔkamɔ ni wɔjajeɔ wɔtsɔɔ lɛ mli kpɛŋŋ ni wɔkahoso,+ ejaakɛ mɔ ni wo shi lɛ, anɔkwafo ni. 24  Ni nyɛhãa wɔteŋ mɔ fɛɛ mɔ asusua enyɛmi he* bɔ ni afee ni wɔteŋ mɔ fɛɛ mɔ akanya enyɛmi* koni wɔjie suɔmɔ kpo ni wɔtsu nitsumɔi kpakpai,+ 25  ni wɔkakpa kpe ni wɔkpeɔ kutuu lɛ,+ tamɔ bɔ ni eji mɛi komɛi asu lɛ, shi moŋ wɔteŋ mɔ fɛɛ mɔ awo enyɛmi hewalɛ,+ ni titri lɛ, akɛni nyɛmiina akɛ gbi lɛ miibɛŋkɛ nɛɛ.+ 26  Ejaakɛ kɛ́ wɔjeɔ gbɛ wɔfeɔ esha ni wɔkpaaa, be ni wɔná anɔkwale lɛ he nilee krɔŋŋ lɛ sɛɛ lɛ,+ belɛ eshai ahe afɔle ko bɛ dɔŋŋ,+ 27  shi moŋ kojomɔ gbɛkwɛmɔ ni yɔɔ gbeyei, kɛ mlifu ni miitso tamɔ la ni baashã shiteekɛwolɔi lɛ ji nɔ ni yɔɔ.+ 28  Mɔ fɛɛ mɔ ni kuɔ ehiɛ efɔ̃ɔ Mose Mla lɛ nɔ lɛ, adamɔɔ mɛi enyɔ loo mɛi etɛ odaseyeli nɔ agbeɔ lɛ ni anaaa lɛ mɔbɔ.+ 29  No hewɔ lɛ, kɛ́ mɔ ko naanaa Nyɔŋmɔ Bi lɛ nɔ ni ebu kpaŋmɔ lɛ lá+ lɛ ni akɛfee lɛ krɔŋkrɔŋ lɛ akɛ nɔ ko ni sɛɛnamɔ bɛ he, ni ekɛ jɛmɔi wo dromɔ mumɔ lɛ mlifu lɛ, te nyɛsusuɔ akɛ toigbalamɔ ni sa lɛ lɛ mli baawa ahã tɛŋŋ?+ 30  Ejaakɛ wɔle mɔ ni kɛɛ akɛ: “Minɔ ji oweletɔɔ lɛ; mi mato najiaŋ” lɛ. Kɛ agbɛnɛ hu: “Yehowa* baakojo emaŋ lɛ.”+ 31  Eyɛ gbeyei waa akɛ mɔ aaagbee Nyɔŋmɔ hiɛkãalɔ lɛ dɛŋ. 32  Shi nyɛyaa nɔ nyɛkaia gbii ni eho lɛ, be ni la lɛ tso yɛ nyɛnɔ lɛ,+ bɔ ni nyɛfi shi yɛ nɔmɔ kpele kɛ amanehului amli lɛ. 33  Nakai bei lɛ amli lɛ, bei komɛi lɛ, ajɛɔ nyɛ ni ahãa nyɛnaa amanehului hu yɛ mɛi ahiɛ,* ni bei komɛi hu lɛ, nyɛyeɔ nyɛbuaa mɛi ni tsɔmɔɔ shihilɛi ni tamɔ nɛkɛ amli lɛ.* 34  Ejaakɛ nyɛmusuŋ shã nyɛ yɛ mɛi ni awo amɛ tsuŋ lɛ ahewɔ, ni nyɛkɛ miishɛɛ kpɛlɛ nyɛnii ni ashɔ̃ yɛ nyɛdɛŋ lɛ hu nɔ,+ akɛni nyɛle akɛ nyɛyɛ jwetri ni hi fe no ni hiɔ shi daa lɛ hewɔ.+ 35  No hewɔ lɛ, nyɛkashɛa ekãa ni nyɛyɔɔ* lɛ nyɛfɔ̃a, ejaakɛ ebaahã nyɛná jweremɔnɔ babaoo.+ 36  Ejaakɛ shifimɔ he ehia nyɛ,+ koni be ni nyɛfee Nyɔŋmɔ suɔmɔnaa nii nyɛgbe naa lɛ, nyɛnine ashɛ shiwoo lɛ mlibaa lɛ nɔ. 37  Ejaakɛ “be fioo kɛkɛ eshwɛ”+ ni “mɔ ni baa lɛ baaba, ni esɛɛ etsɛŋ.”+ 38  “Shi mitsulɔ jalɔ lɛ, ebaaya nɔ ehi shi yɛ hemɔkɛyeli hewɔ,”+ ni “kɛ́ etee sɛɛsɛɛ lɛ, mináŋ* ehe miishɛɛ.”+ 39  Shi wɔ lɛ, jeee mɛi ni yaa sɛɛsɛɛ kɛyaa hiɛkpatamɔ mli lɛ ateŋ mɛi komɛi ji wɔ,+ shi moŋ wɔji mɛi ni yɔɔ hemɔkɛyeli ni hãa abaa amɛwala yi* lɛ ateŋ mɛi komɛi.

Shishigbɛ Niŋmaa

Loo “ahɔɔŋ; asusuma.”
Shishitsɔɔmɔi komɛi kɛɔ akɛ, “gbɔmɛi nyɛŋ amɛkɛ.”
Loo “amɛnuŋ he dɔŋŋ akɛ esha yɛ amɛhe.”
Wolo kakadaŋŋ ni akotaa awoɔ tso he.
Loo “ekɛ sɔɔmɔ ni asɔmɔɔ yɛ mɛi krokomɛi ahilɛkɛhamɔ hewɔ ahã.”
Loo “asaa amɛ ato ahã Nyɔŋmɔ.”
Loo “nɔmimaa.”
Greek sht. ŋm., “eto shishi.”
Ni tsɔɔ akɛ, akɛ lá eshwã wɔtsuii anɔ.
Loo “ajwɛŋa enyɛmi he jogbaŋŋ; jwɛŋmɔ ahia enyɛmi nɔ.”
Loo “awo enyɛmi hewalɛ.”
Greek sht. ŋm., “oookɛɛ akɛ nyɛ miitsɔɔ yɛ nikwɛmɔhe.”
Loo “nyɛdamɔ mɛi ni tsɔmɔɔ shihilɛi ni tamɔ nɛkɛ amli lɛ amasɛi kpaakpa.”
Greek sht. ŋm., “wiemɔ ni nyɛwieɔ kɛ nɔmimaa.”
Loo “misusuma náŋ.”
Loo “amɛsusumai ayi.”