Nɔ Ni Yohane Ŋma 1:1-51

  • Wiemɔ lɛ batsɔ heloo (1-18)

  • Odase ni Yohane Baptisilɔ lɛ ye (19-28)

  • Yesu, Nyɔŋmɔ Gwantɛŋbi lɛ (29-34)

  • Yesu klɛŋklɛŋ kaselɔi lɛ (35-42)

  • Filipo kɛ Natanael (43-51)

1  Shishijee lɛ mli lɛ Wiemɔ+ lɛ yɛ, ni Wiemɔ lɛ kɛ Nyɔŋmɔ yɔɔ,+ ni Wiemɔ lɛ nyɔŋmɔ ko ni.*+  Mɔ nɛ kɛ Nyɔŋmɔ yɔɔ yɛ shishijee lɛ mli.  Nibii fɛɛ tsɔ enɔ kɛba shihilɛ mli,+ ni nɔ kome folo po bɛ ni jeee enɔ etsɔ kɛba shihilɛ mli. Nɔ ni eba shihilɛ mli  kɛtsɔ enɔ lɛ ji wala, ni wala lɛ ji gbɔmɛi ala lɛ.+  Ni la lɛ miikpɛ yɛ duŋ lɛ mli,+ shi duŋ lɛ yeko enɔ.  Nuu ko ba, ni atsu lɛ akɛ Nyɔŋmɔ najiaŋdamɔlɔ; atsɛɔ lɛ Yohane.+  Nuu nɛɛ ba akɛ odasefonyo, bɔ ni afee ni ebaye la lɛ he odase,+ koni mɛi srɔtoi fɛɛ atsɔ enɔ ahe aye.  Jeee lɛ ji nakai la lɛ,+ shi moŋ eba koni ebaye nakai la lɛ he odase.  No mli lɛ, anɔkwa la lɛ ni hãa gbɔmɛi srɔtoi fɛɛ la lɛ miihe aba je lɛ mli.+ 10  No mli lɛ, eyɛ je lɛ mli,+ ni je lɛ ba shihilɛ mli kɛtsɔ enɔ,+ shi je lɛ leee lɛ. 11  Eba lɛ diɛŋtsɛ emaŋ, shi lɛ diɛŋtsɛ emaŋbii lɛ hereee lɛ. 12  Shi mɛi fɛɛ ni here lɛ lɛ, ehã amɛ hegbɛ koni amɛtsɔmɔ Nyɔŋmɔ bii,+ ejaakɛ amɛheɔ egbɛ́i lɛ nɔ amɛyeɔ.*+ 13  Ni jeee lá loo heloo ko suɔmɔnaa, loo nuu ko suɔmɔnaa ajɛ afɔ amɛ, shi moŋ Nyɔŋmɔ mli ajɛ.+ 14  No hewɔ lɛ, Wiemɔ lɛ batsɔ heloo,+ ni ehi shi yɛ wɔteŋ, ni wɔna enunyam lɛ, anunyam ni tamɔ nɔ ni tsɛ ko kɛhãa ebi koome lɛ;+ ni Nyɔŋmɔ dromɔ kɛ anɔkwale eyi lɛ obɔ. 15  (Yohane ye ehe odase, hɛɛ, ebo ekɛɛ: “Mɔ nɛ ji mɔ ni miwie yɛ ehe akɛ, ‘Mɔ ni baa yɛ misɛɛ lɛ etsɔ mihiɛ, ejaakɛ eyɛ shihilɛ mli dani miba’ lɛ.”)+ 16  Akɛni dromɔ kɛ anɔkwale eyi lɛ obɔ hewɔ lɛ, wɔ fɛɛ wɔnáa dromɔ wɔshiɔ dromɔ nɔ. 17  Akɛni atsɔ Mose nɔ akɛ Mla lɛ hã hewɔ lɛ,+ dromɔ+ lɛ kɛ anɔkwale lɛ ba kɛtsɔ Yesu Kristo nɔ.+ 18  Gbɔmɔ ko enako Nyɔŋmɔ pɛŋ;+ Nyɔŋmɔ bi koome*+ ni yɔɔ Tsɛ lɛ masɛi* lɛ,+ lɛ etsɔɔ mɔ ni Tsɛ lɛ ji.+ 19  Odase ni Yohane ye be ni Yudafoi lɛ tsu osɔfoi kɛ Levibii kɛjɛ Yerusalem koni amɛbabi lɛ akɛ: “Namɔ ji bo?” lɛ nɛ.+ 20  Ni ejooo sanebimɔ lɛ naa foi, shi moŋ ewie faŋŋ ekɛɛ: “Jeee miji Kristo lɛ.” 21  Ni amɛbi lɛ akɛ: “Namɔ ji bo mɔ? Ani bo ji Elia?”+ Ehere nɔ akɛ: “Jeee mi ni.” “Ani bo ji Gbalɔ lɛ?”+ Ni ehã hetoo akɛ: “Dabi!” 22  No hewɔ lɛ, amɛkɛɛ lɛ akɛ: “Namɔ ji bo? Kɛɛmɔ wɔ koni wɔná hetoo wɔhã mɛi ni tsu wɔ lɛ. Mɛni okɛɔ yɛ bo diɛŋtsɛ ohe?” 23  Ekɛɛ: “Miji mɔ ni anuɔ egbee yɛ ŋa lɛ nɔ ni boɔ akɛ, ‘Nyɛfea Yehowa* gbɛ lɛ trɔmɔɔ,’+ tamɔ bɔ ni gbalɔ Yesaia kɛɛ lɛ.”+ 24  Mɛi ni atsu lɛ jɛ Farisifoi lɛ ateŋ. 25  No hewɔ lɛ, amɛbi lɛ akɛ: “No hewɔ lɛ, kɛjeee bo ji Kristo lɛ loo Elia loo Gbalɔ lɛ, mɛni hewɔ obaptisiɔ mɛi mɔ?” 26  Yohane hã amɛ hetoo akɛ: “Mi lɛ, mibaptisiɔ yɛ nu mli. Shi mɔ ko damɔ nyɛteŋ ni nyɛleee lɛ, 27  mɔ ni baa yɛ misɛɛ lɛ, misaaa mɔ ni fɛneɔ etokota naa kpãa.”+ 28  Nibii nɛɛ tee nɔ yɛ Betania, yɛ Yordan sɛɛ, he ni Yohane baptisiɔ yɛ lɛ.+ 29  Enɔ jetsɛremɔ lɛ, ena Yesu miiba eŋɔɔ ni ekɛɛ: “Naa, Nyɔŋmɔ Gwantɛŋbi+ ni wóɔ je lɛ he esha+ lɛ kɛyaa lɛ!+ 30  Mɔ nɛ ji mɔ ni miwie yɛ ehe akɛ: ‘Nuu ko miiba yɛ misɛɛ, ni etsɔ mihiɛ, ejaakɛ eyɛ shihilɛ mli dani miba’ lɛ.+ 31  Mi po mileee lɛ, shi yiŋtoo hewɔ ni miba koni mibabaptisi mɛi yɛ nu mli lɛ ji, koni ajie lɛ kpo atsɔɔ Israel.”+ 32  Yohane ye odase hu ekɛɛ: “Mina mumɔ lɛ miikpeleke shi tamɔ okpo kɛmiijɛ ŋwɛi, ni ebahi enɔ.+ 33  Mi po mileee lɛ, shi mɔ tuuntu ni tsu mi akɛ mibabaptisi yɛ nu mli lɛ kɛɛ mi akɛ: ‘Mɔ fɛɛ mɔ ni obaana akɛ mumɔ lɛ miikpeleke shi kɛmiiba enɔ, ni ehiɔ enɔ lɛ,+ mɔ nɛ ji mɔ ni baptisiɔ yɛ mumɔ krɔŋkrɔŋ mli lɛ.’+ 34  Ni mina, ni miye he odase akɛ mɔ nɛ ji Nyɔŋmɔ Bi lɛ.”+ 35  Enɔ jetsɛremɔ ekoŋŋ lɛ, Yohane kɛ ekaselɔi lɛ ateŋ mɛi enyɔ damɔ shi, 36  ni be ni Yesu nyiɛ kɛhoɔ lɛ, ekwɛ lɛ ni ekɛɛ: “Naa, Nyɔŋmɔ Gwantɛŋbi+ lɛ!” 37  Be ni kaselɔi enyɔ lɛ nu nɔ ni ewie lɛ, amɛnyiɛ Yesu sɛɛ. 38  Kɛkɛ ni Yesu tsɔ ehe ni ena akɛ amɛnyiɛ esɛɛ, ni ebi amɛ akɛ: “Mɛni nyɛtaoɔ?” Amɛbi lɛ akɛ: “Rabi (eshishi ji, “Tsɔɔlɔ”), nɛgbɛ oyɔɔ?” 39  Ekɛɛ amɛ akɛ: “Nyɛbaa, ni nyɛbaana.” No hewɔ lɛ, amɛtee ni amɛyana he ni eyɔɔ lɛ, ni amɛkɛ lɛ hi shi nakai gbi lɛ; no mli lɛ eshɛ aaafee ŋmɛlɛtswaa ni ji nyɔŋma* lɛ nɔ. 40  Mɛi enyɔ lɛ ni nu nɔ ni Yohane wie ni amɛnyiɛ Yesu sɛɛ lɛ ateŋ mɔ kome ji Andrea,+ Simon Petro nyɛmi nuu lɛ. 41  Eyana lɛ diɛŋtsɛ enyɛmi nuu Simon klɛŋklɛŋ, ni ekɛɛ lɛ akɛ: “Wɔna Mesia lɛ”+ (eshishi ji, “Kristo” lɛ), 42  ni enyiɛ ehiɛ kɛtee Yesu ŋɔɔ. Be ni Yesu kwɛ lɛ lɛ, ekɛɛ: “Bo ji Simon,+ Yohane binuu lɛ; abaatsɛ bo Kefa” (eshishi ji, “Petro”).+ 43  Enɔ jetsɛremɔ lɛ, no mli lɛ Yesu miitao eshi kɛya Galilea. Ni ena Filipo+ ni ekɛɛ lɛ akɛ: “Baatsɔ misɛɛnyiɛlɔ.” 44  Filipo jɛ Betsaida, Andrea kɛ Petro maŋ lɛ mli. 45  Filipo na Natanael+ ni ekɛɛ lɛ akɛ: “Wɔna mɔ ni Mose ŋma ehe sane yɛ Mla lɛ mli, ni Gbalɔi lɛ hu ŋma ehe sane lɛ: Yesu, Yosef+ binuu ni jɛ Nazaret lɛ.” 46  Shi Natanael kɛɛ lɛ akɛ: “Ani nɔ ko kpakpa ko baanyɛ ajɛ Nazaret?” Filipo kɛɛ lɛ akɛ: “Ba ni obakwɛ.” 47  Yesu na Natanael miiba eŋɔɔ ni ekɛɛ yɛ ehe akɛ: “Naa, Israelnyo ni ekã shi faŋŋ akɛ, lakamɔ ko bɛ emli.”+ 48  Natanael bi lɛ akɛ: “Te fee tɛŋŋ ole mi?” Yesu hã lɛ hetoo akɛ: “Dani Filipo tsɛ bo lɛ, be mli ni oyɔɔ agbami tso lɛ shishi lɛ, mina bo.” 49  Natanael here nɔ ekɛɛ: “Rabi, bo ji Nyɔŋmɔ Bi lɛ, bo ji Israel Maŋtsɛ lɛ.”+ 50  Yesu kɛɛ lɛ akɛ: “Akɛni mikɛɛ bo akɛ mina bo yɛ agbami tso lɛ shishi lɛ hewɔ ohe oye lɛ? Obaana nibii wuji fe enɛɛmɛi.” 51  Ni ekɛɛ lɛ akɛ: “Lɛɛlɛŋ, lɛɛlɛŋ, miikɛɛ nyɛ akɛ, nyɛbaana ni agbele ŋwɛi naa ni Nyɔŋmɔ bɔfoi lɛ miikwɔ ni amɛmiikpeleke shi kɛmiiba gbɔmɔ Bi lɛ ŋɔɔ.”+

Shishigbɛ Niŋmaa

Loo “hiɛ Nyɔŋmɔ su.”
Loo “ejaakɛ amɛjie hemɔkɛyeli kpo yɛ egbɛ́i lɛ mli.”
Loo “bi koome ni Nyɔŋmɔ bɔ lɛ tɛ̃ɛ ni hiɛ Nyɔŋmɔ su lɛ.”
Loo “ni kã Tsɛ lɛ miinaa.” Enɛ tsɔɔ akɛ eyɛ gbɛhe ni tsɔɔ akɛ adro lɛ babaoo.
Ni ji, aaafee gbɛkɛnaashi ŋmɛji 4.