Tsɔɔmɔ bɔ ni obaasumɔ ni ona niŋmai lɛ oha

Halamɔ wiemɔ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

BUU-MƆƆ (NIKASEMƆ NƆ̃) JULY 2016

Shiɛmɔ Nyɔŋmɔ Duromɔ lɛ He Sane Kpakpa Lɛ

Shiɛmɔ Nyɔŋmɔ Duromɔ lɛ He Sane Kpakpa Lɛ

‘Ye Nyɔŋmɔ duromɔ lɛ he sane kpakpa lɛ he odase fitsofitso.’BƆF. 20:24.

LALAI: 101, 84

1, 2. Mɛni bɔfo Paulo fee kɛtsɔɔ akɛ ehiɛ sɔɔ Nyɔŋmɔ duromɔ lɛ?

BƆFO Paulo wie akɛ: “[Nyɔŋmɔ duromɔ] ni eduro mi lɛ efeee yaka.” Ni esane ja. (Kanemɔ 1 Korintobii 15:9, 10.) Paulo diɛŋtsɛ le akɛ, kulɛ, esaaa mɔ ni Nyɔŋmɔ naa lɛ mɔbɔ, ejaakɛ be ko ni eho lɛ, ewa Kristofoi ayi.

2 Be ni eshwɛ fioo ni Paulo baagbo lɛ, ekɛɛ Timoteo akɛ: “Miida wɔ-Nuŋtsɔ Kristo Yesu, mɔ ni hã mi hewalɛ lɛ shi, ejaakɛ ebu mi anɔkwafo, ni eŋɔ sɔɔmɔ ewo midɛŋ.” (1 Tim. 1:12-14) Mɛɛ sɔɔmɔ he Paulo wieɔ lɛ? Bɔfo Paulo tsɔɔ asafoŋ onukpai ni yɔɔ Efeso lɛ nɔ ni sɔɔmɔ nɛɛ ji. Ekɛɛ amɛ akɛ: “Mibuuu mi diɛŋtsɛ miwala akɛ nɔ ko ni he hiaa mi, kɛ́ no baahã magbe mifoidamɔ kɛ sɔɔmɔ ni miná kɛjɛ Nuŋtsɔ Yesu dɛŋ, akɛ miye Nyɔŋmɔ duromɔ lɛ he sane kpakpa lɛ he odase fitsofitso lɛ naa.”Bɔf. 20:24.

3. Mɛɛ sɔɔmɔ krɛdɛɛ Yesu kɛwo Paulo dɛŋ? (Kwɛmɔ mfoniri ni yɔɔ nikasemɔ lɛ shishijee lɛ.)

3 Mɛɛ “sane kpakpa” Paulo shiɛ, ni mɛɛ gbɛ nɔ sane kpakpa  nɛɛ hã mɛi na Nyɔŋmɔ duromɔ lɛ? Paulo kɛɛ Kristofoi ni yɔɔ Efeso lɛ akɛ: “Nyɛnu Nyɔŋmɔ duromɔ lɛ he shĩakwɛmɔ nitsumɔ ni aŋɔhã mi yɛ nyɛhewɔ lɛ he.” (Efe. 3:1, 2) Yesu kɛɛ Paulo akɛ eyashiɛ sane kpakpa lɛ ehã mɛi ni jeee Yudafoi, koni amɛ hu amɛnyɛ amɛfata Kristo, ni ji Mesia lɛ he kɛye nɔ yɛ e-Maŋtsɛyeli lɛ mli. (Kanemɔ Efesobii 3:5-8.) Paulo hiɛ sɔ Nyɔŋmɔ duromɔ lɛ waa, no hewɔ lɛ ekɛ hiɛdɔɔ shiɛ. Paulo hãaa Nyɔŋmɔ duromɔ ni ekɛduro lɛ lɛ ‘afee yaka,’ ni enɛ ji nɔkwɛmɔnɔ kpakpa kɛhã Kristofoi ni yɔɔ ŋmɛnɛ lɛ.

NƆ NI WƆBAANYƐ WƆFEE KƐTSƆƆ AKƐ WƆHIƐ SƆƆ NYƆŊMƆ DUROMƆ LƐ

4, 5. Mɛni hewɔ wɔbaanyɛ wɔkɛɛ akɛ “Maŋtsɛyeli lɛ he sane kpakpa lɛ” nɔŋŋ ji “Nyɔŋmɔ duromɔ lɛ he sane kpakpa lɛ”?

4 Yɛ naagbee gbii nɛɛ amli lɛ, Yehowa efã ewebii lɛ akɛ amɛshiɛ “Maŋtsɛyeli lɛ he sane kpakpa nɛɛ yɛ shikpɔŋ lɛ nɔ fɛɛ koni akɛye jeŋmaji lɛ fɛɛ odase.” (Mat. 24:14) Maŋtsɛyeli lɛ he sane kpakpa lɛ nɔŋŋ ji “Nyɔŋmɔ duromɔ lɛ he sane kpakpa lɛ.” Mɛni hewɔ? Ejaakɛ eji jeee Yehowa duromɔ lɛ kulɛ, wɔnine shɛŋ jɔɔmɔi ni Maŋtsɛyeli lɛ kɛbaaba lɛ anɔ. (Efe. 1:3) Paulo kɛ hiɛdɔɔ shiɛ waa, ni ekɛtsɔɔ akɛ ehiɛ sɔɔ Yehowa duromɔ lɛ. Ani ookase lɛ?Kanemɔ Romabii 1:14-16.

5 Yɛ nikasemɔ ni tsɔ hiɛ lɛ mli lɛ, wɔna akɛ, yɛ eshafeelɔi ni wɔji lɛ fɛɛ sɛɛ lɛ, wɔnáa Yehowa mlihilɛ lɛ he sɛɛ yɛ gbɛi srɔtoi anɔ. Enɛ hewɔ lɛ, eji wɔsɔ̃ akɛ wɔtsɔɔ mɛi fɛɛ gbɛi srɔtoi ni Yehowa tsɔɔ nɔ ejieɔ esuɔmɔ lɛ kpo etsɔɔ adesai, kɛ bɔ ni amɛbaafee amɛná he sɛɛ. Mɛɛ gbɛ nɔ wɔbaanyɛ wɔye wɔbua mɛi ni amɛhiɛ asɔ Nyɔŋmɔ duromɔ lɛ?

SHIƐMƆ KPƆMƆNƆ LƐ HE SANE KPAKPA LƐ

6, 7. Kɛ́ wɔtsɔɔ mɛi nɔ ni kpɔmɔnɔ lɛ ji kɛ bɔ ni amɛbaafee amɛná he sɛɛ lɛ, mɛni hewɔ wɔbaanyɛ wɔkɛɛ akɛ “Nyɔŋmɔ duromɔ lɛ he sane kpakpa lɛ” wɔshiɛɔ lɛ?

6 Ŋmɛnɛ lɛ, mɛi babaoo nuuu fɔyeli he kɛ́ amɛfee esha, no hewɔ lɛ, amɛnuuu he akɛ kpɔmɔ he miihia adesai. Yɛ nakai beiaŋ nɔŋŋ lɛ, mɛi babaoo miina akɛ, bɔ ni amɛhiɔ shi amɛhãa lɛ hãaa amɛná miishɛɛ. Ja amɛkɛ Yehowa Odasefoi egba sane, dani amɛbaale nɔ ni esha ji, bɔ ni enáa wɔnɔ hewalɛ ehãa, kɛ nɔ ni esa akɛ amɛfee koni amɛye amɛhe kɛjɛ esha nyɔŋyeli shishi. Sɛɛ mli kɛ́ amɛná amɛle nɔ ni esha ji lɛ, amɛteŋ mɛi ni hiɛ tsui krɔŋŋ lɛ náa miishɛɛ waa akɛ Yehowa tsu e-Bi lɛ kɛba shikpɔŋ lɛ nɔ koni ebakpɔ wɔ kɛjɛ esha kɛ gbele dɛŋ. Yehowa duromɔ lɛ kɛ esuɔmɔ kpele lɛ hewɔ eto kpɔmɔnɔ lɛ he gbɛjianɔ ehã wɔ.1 Yoh. 4:9, 10.

7 Kadimɔ nɔ ni Paulo wie yɛ Nyɔŋmɔ suɔmɔ Bi, ni ji Yesu Kristo lɛ he. Ewie akɛ: “Atsɔ mɔ nɛɛ lá lɛ nɔ awo kpɔmɔnɔ lɛ kɛjie wɔ, hɛɛ, akɛ wɔtɔmɔi lɛ faa wɔ, yɛ Nyɔŋmɔ duromɔ babaoo lɛ naa.” (Efe. 1:7) Kpɔmɔnɔ lɛ ji nibii ni Yehowa efee kɛtsɔɔ akɛ esumɔɔ wɔ lɛ ateŋ nɔ ni fe fɛɛ, ni ehãa wɔnaa akɛ, eduromɔ lɛ fa babaoo diɛŋtsɛ. Eŋɔɔ wɔnaa waa akɛ, kɛ́ wɔhe Yesu kpɔmɔ afɔle lɛ nɔ wɔye lɛ, Nyɔŋmɔ kɛ wɔhe eshai baake wɔ, ni wɔbaaná henilee ni he tse! (Heb. 9:14) Enɛ ji sane kpakpa, ni esa akɛ wɔhã mɛi fɛɛ ale!

 YE OBUA MƐI NI AMƐBATSƆMƆ NYƆŊMƆ NANEMƐI

8. Mɛni hewɔ esa akɛ akpãtã eshafeelɔi kɛ Yehowa teŋ lɛ?

8 Yehowa naa mɔ fɛɛ mɔ ni heee Yesu kpɔmɔ afɔle lɛ nɔ eyeee lɛ akɛ ehenyɛlɔ. No hewɔ lɛ, sɔ̃ kã wɔnɔ akɛ wɔtsɔɔ mɛi bɔ ni amɛbaafee amɛkɛ Yehowa abɔ naanyo. Bɔfo Yohane ŋma akɛ: “Mɔ ni jieɔ hemɔkɛyeli kpo yɛ Bi lɛ mli lɛ yɛ naanɔ wala; mɔ ni gboɔ Bi lɛ nɔ toi lɛ, enáŋ wala, shi moŋ Nyɔŋmɔ mlifu hiɔ enɔ.” (Yoh. 3:36) Eji miishɛɛ sane akɛ kɛtsɔ kpɔmɔnɔ lɛ nɔ lɛ, mɛi baanyɛ abatsɔmɔ Nyɔŋmɔ nanemɛi. Paulo wie akɛ: “Nyɛ ni tsutsu ko lɛ, nyɛtse nyɛhe ni nyɛji henyɛlɔi akɛni nyɛjwɛŋmɔi yɛ nitsumɔi fɔji anɔ hewɔ lɛ, amrɔ nɛɛ etsɔ nakai mɔ lɛ heloo gbɔmɔtso lɛ gbele lɛ nɔ ekpãtã ekɛ nyɛ teŋ.”Kol. 1:21, 22.

9, 10. (a) Mɛɛ nitsumɔ Kristo etuu ewo enyɛmimɛi ni afɔ amɛ mu lɛ adɛŋ? (b) Mɛni “gwantɛŋi krokomɛi” lɛ feɔ kɛyeɔ amɛbuaa amɛnyɛmimɛi ni afɔ amɛ mu lɛ?

9 Kristo etuu “kpatamɔ sɔɔmɔ lɛ” ewo enyɛmimɛi ni afɔ amɛ mu ni yɔɔ shikpɔŋ lɛ nɔ lɛ adɛŋ. Paulo kɛɛ Kristofoi ni afɔ amɛ mu ni hi shi yɛ blema lɛ akɛ: “Nibii fɛɛ jɛ Nyɔŋmɔ ŋɔɔ, lɛ ji mɔ ni tsɔ Kristo nɔ ekpãtã wɔ kɛ lɛ teŋ ni ehã wɔ kpatamɔ sɔɔmɔ lɛ, no ji akɛ, Nyɔŋmɔ miitsɔ Kristo nɔ eekpãtã jeŋ ko kɛ lɛ teŋ, ni ebuuu amɛtɔmɔi lɛ ahe akɔntaa eshiii amɛ, ni etu kpatamɔ lɛ he sane lɛ ewo wɔdɛŋ. No hewɔ lɛ, wɔji maŋ bɔfoi yɛ Kristo najiaŋ, tamɔ akɛ, Nyɔŋmɔ miitsɔ wɔnɔ eekpa mɛi fai. Akɛ Kristo najiaŋdamɔlɔi lɛ, wɔkpaa fai akɛ: ‘Nyɛhãa akpãtãa nyɛ kɛ Nyɔŋmɔ teŋ.’”2 Kor. 5:18-20.

10 Eji hegbɛ ni “gwantɛŋi krokomɛi” lɛ ená akɛ amɛ hu amɛbaasɔmɔ akɛ Kristo bɔfoi, ni amɛye amɛbua amɛnyɛmimɛi ni afɔ amɛ mu lɛ yɛ sɔɔmɔ nitsumɔ nɛɛ mli. (Yoh. 10:16) Yɛ anɔkwale mli lɛ, gwantɛŋi krokomɛi lɛ titri ni tsuɔ shiɛmɔ nitsumɔ lɛ. Amɛtsɔɔ mɛi Biblia lɛ mli anɔkwalei lɛ, ni amɛyeɔ amɛbuaa amɛ ni amɛbatsɔmɔ Nyɔŋmɔ nanemɛi ni bɛŋkɛ lɛ kpaakpa. Enɛ ji Nyɔŋmɔ duromɔ lɛ he sane kpakpa lɛ fã ko ni he hiaa waa.

HÃ MƐI FƐƐ ALE AKƐ NYƆŊMƆ BOƆ SƆLEMƆI ATOI

11, 12. Mɛni hewɔ esa akɛ wɔtsɔɔ mɛi akɛ Yehowa boɔ sɔlemɔi atoi lɛ?

11 Ŋmɛnɛ lɛ, mɛi babaoo sɔleɔ, tsɛbelɛ amɛheee amɛyeee akɛ Mɔ ko yɛ ni boɔ sɔlemɔi atoi. Mɛi ni tamɔ nakai lɛ naa sɔlemɔ akɛ eji nɔ ko ni mɛi feɔ koni amɛjwɛŋmɔŋ akã amɛ shi kɛkɛ. Esa akɛ wɔye wɔbua amɛ ni amɛle akɛ, Mɔ ko yɛ ni boɔ sɔlemɔi atoi, ni lɛ ji Yehowa. Lalatsɛ David ŋma akɛ: “Bo ni oboɔ sɔlemɔ toi, bo oŋɔɔ heloo fɛɛ baa. Nishaianii miiye minɔ; wɔnɔtɔmɔi lɛ, bo okɛaafa.”Lala 65:3, 4.

12 Yesu kɛɛ ekaselɔi lɛ akɛ: “Kɛ́ nyɛbi nɔ ko yɛ migbɛ́i mli lɛ, mafee.” (Yoh. 14:14) Ekã shi faŋŋ akɛ, esa akɛ nɔ ni wɔbaabi lɛ kɛ Yehowa suɔmɔnaa nii akpã gbee. Yohane ŋma akɛ: “Enɛ ji ekãa ni wɔyɔɔ yɛ ehiɛ lɛ, akɛ nɔ fɛɛ nɔ ni wɔbiɔ ní kɛ esuɔmɔnaa nii kpãa gbee lɛ, eboɔ wɔ toi.” (1 Yoh. 5:14) Esa akɛ wɔye wɔbua mɛi ni amɛna akɛ, sɔlemɔ jeee nɔ ko ni hãa mɔ jwɛŋmɔŋ kãa lɛ shi kɛkɛ, shi moŋ eji gbɛ ni atsɔɔ nɔ abɛŋkɛɔ Yehowa “duromɔ sɛi lɛ.” (Heb. 4:16) Kɛ́ wɔtsɔɔ mɛi bɔ ni asɔleɔ ahãa, Mɔ ni esa akɛ amɛsɔle amɛhã, kɛ nibii ni amɛbaanyɛ amɛsɔle yɛ he lɛ, ebaaye  ebua amɛ ni amɛbatsɔmɔ Nyɔŋmɔ nanemɛi, ni Yehowa baashɛje amɛmii kɛ́ amɛhao.Lala 4:2; 145:18.

BƆ NI WƆBAANÁ YEHOWA DUROMƆ LƐ HE SƐƐ YƐ SHIHILƐ GBƐJIANƆTOO NI BAABA LƐ MLI

13, 14. (a) Wɔsɛɛ lɛ, mɛɛ hegbɛ kpele mɛi ni afɔ amɛ mu lɛ baaná? (b) Mɛni mɛi ni afɔ amɛ mu lɛ baafee amɛhã adesai?

13 Yɛ “shihilɛi agbɛjianɔtoi ni baaba lɛ amli” lɛ, wɔbaaná Yehowa duromɔ lɛ he sɛɛ waa fe bɔ ni wɔfeɔ bianɛ lɛ po. Mɛni hewɔ wɔkɛɔ nakai? Yɛ mɛi 144,000 lɛ agbɛfaŋ lɛ, Yehowa baaduro amɛ hegbɛ kpele ko. Amɛbaafata Yesu he kɛye nɔ akɛ maŋtsɛmɛi yɛ ŋwɛi. Paulo ŋma akɛ: “Shi Nyɔŋmɔ lɛ, akɛni emɔbɔnalɛ lɛ fa babaoo hewɔ lɛ, etsɔ esuɔmɔ kpele ni ekɛsumɔ wɔ lɛ nɔ ehã wɔ kɛ Kristo lɛ fɛɛ hiɛ kamɔ, be mli ni wɔgboi yɛ tɔmɔi amli po lɛ—atsɔ duromɔ nɔ ahere nyɛyiwala. Kɛfata he lɛ, etee wɔ kɛ lɛ fɛɛ shi ni eŋɔ wɔ kɛ lɛ fɛɛ eta ŋwɛiniiaŋ yɛ ekome ní wɔ kɛ Kristo Yesu efee lɛ hewɔ, koni yɛ shihilɛi agbɛjianɔtoi ni baaba lɛ amli lɛ, ejie eduromɔ babaoo ni nɔ bɛ lɛ kpo yɛ emlihilɛ ní ejieɔ lɛ kpo etsɔɔ wɔ akɛni wɔ kɛ Kristo Yesu efee ekome lɛ hewɔ lɛ mli.”Efe. 2:4-7.

14 Wɔjwɛŋmɔ nyɛŋ akpele nibii ni Yehowa esaa eto Kristofoi ni afɔ amɛ mu lɛ he. Kɛ́ amɛkɛ Yesu bɔi nɔyeli yɛ ŋwɛi lɛ, Yehowa baaduro amɛ nibii kpakpai babaoo. (Luka 22:28-30; Fil. 3:20, 21; 1 Yoh. 3:2) Amɛbaaná “eduromɔ babaoo ni nɔ bɛ” lɛ he sɛɛ yɛ gbɛ krɛdɛɛ nɔ. Amɛji mɛi ni baafee “Yerusalem Hee lɛ,” ni ji Kristo ayemforo lɛ. (Kpoj. 3:12; 17:14; 21:2, 9, 10) Amɛkɛ Yesu baafee ekome ni ‘amɛtsa jeŋmaji lɛ.’ Ni tsɔɔ akɛ, amɛbaaye amɛbua mɛi fɛɛ ni boɔ Yehowa toi lɛ ni amɛye amɛhe kɛjɛ esha kɛ gbele dɛŋ, koni amɛye emuu.Kanemɔ Kpojiemɔ 22:1, 2, 17.

15, 16. Wɔsɛɛ lɛ, mɛɛ gbɛ nɔ “gwantɛŋi krokomɛi” lɛ baaná Yehowa duromɔ lɛ he sɛɛ?

15 Efesobii 2:7 lɛ hãa wɔleɔ akɛ, Yehowa baajie eduromɔ lɛ kpo “yɛ shihilɛi agbɛjianɔtoi ni baaba lɛ mli.” Mɛi fɛɛ ni baahi shikpɔŋ lɛ nɔ yɛ Yehowa shihilɛ gbɛjianɔtoo hee lɛ mli lɛ baaná “eduromɔ babaoo ni nɔ bɛ” lɛ he sɛɛ. (Luka 18:29, 30) Nibii kpakpai ni Yehowa baafee kɛtsɔɔ akɛ emli hi lɛ ateŋ ekome ni sa kadimɔ waa ji akɛ, ebaatee gbohii ashi. (Hiob 14:13-15; Yoh. 5:28, 29) Yehowa baatee hii kɛ yei anɔkwafoi ni gboi dani Kristo gbo lɛ, kɛ “gwantɛŋi krokomɛi” lɛ ateŋ mɛi ni baaye lɛ anɔkwa kɛyashi gbele mli yɛ naagbee gbii nɛɛ amli lɛ ashi kɛba wala mli ekoŋŋ, ni amɛbaaya nɔ amɛsɔmɔ lɛ.

16 Yehowa baatee mɛi akpekpei abɔ ni náaa amɛle lɛ dani amɛgboi lɛ hu shi. Yohane ŋma akɛ: “Mina gbohii lɛ, mɛi wuji kɛ mɛi bibii, damɔ maŋtsɛ sɛi lɛ hiɛ, ni agbele wolokpoi anaa. Shi agbele wolokpo kroko naa; no ji wala wolokpo lɛ. Adamɔ nibii ni aŋmala yɛ wolokpoi lɛ amli lɛ anɔ akojo gbohii lɛ yɛ amɛnifeemɔi lɛ anaa. Ni ŋshɔ lɛ jie gbohii ni yɔɔ emli lɛ ehã, ni gbele kɛ Gbonyo Bu lɛ jie gbohii ni yɔɔ amɛmli lɛ amɛhã, ni akojo amɛteŋ mɔ fɛɛ mɔ yɛ enifeemɔi lɛ anaa.” (Kpoj. 20:12, 13) Mɛi ni abaatee amɛ shi lɛ baaná hegbɛ amɛkase Yehowa he nii, ni amɛba amɛhe shi amɛhã lɛ. Amɛbaakase Biblia lɛ mli shishitoo mlai lɛ kɛ gbɛtsɔɔmɔi hei ni Yehowa kɛbaahã yɛ “wolokpoi lɛ” amli lɛ, ni amɛkɛtsu nii. Gbɛtsɔɔmɔi  hei nɛɛ baafee gbɛ kroko ni Yehowa baatsɔ nɔ ehã wɔná eduromɔ lɛ he sɛɛ.

YAA NƆ OSHIƐ SANE KPAKPA LƐ

17. Be fɛɛ be ni wɔbaaya shiɛmɔ lɛ, mɛni esa akɛ wɔhã ehi wɔjwɛŋmɔŋ?

17 Akɛni naagbee lɛ ebɛŋkɛ kpaakpa hewɔ lɛ, ehe miihia waa ni wɔkɛ ekãa ashiɛ Maŋtsɛyeli lɛ he sane kpakpa lɛ. (Mar. 13:10) Be fɛɛ be ni wɔbaaya shiɛmɔ lɛ, esa akɛ wɔhã ehi wɔjwɛŋmɔŋ akɛ, oti ni ma wɔhiɛ ji ni wɔwo Yehowa hiɛ nyam. Nɔ ni baaye abua wɔ ni wɔshɛ oti nɛɛ he ji, ni wɔbaahã mɛi ale akɛ, Yehowa mli hi waa, ni no hewɔ ebaafee nibii kpakpai fɛɛ ni ewo shi akɛ ebaafee yɛ jeŋ hee lɛ mli lɛ.

Ani okɛ ekãa miisɔmɔ akɛ ‘Nyɔŋmɔ duromɔ lɛ nɔkwɛlɔ kpakpa’?”1 Pet. 4:10 (Kwɛmɔ kuku 17-19)

18, 19. Mɛni wɔbaanyɛ wɔfee kɛtsɔɔ akɛ wɔmiijie Yehowa yi yɛ eduromɔ lɛ hewɔ?

18 Kɛ́ wɔmiishiɛ wɔmiihã mɛi lɛ, wɔbaanyɛ wɔhã amɛle akɛ, yɛ Nyɔŋmɔ Maŋtsɛyeli lɛ shishi lɛ, adesai baaná kpɔmɔnɔ lɛ he sɛɛ kɛmɔ shi, ni fiofio lɛ, amɛbaaye emuu. Biblia lɛ kɛɔ akɛ: “Abaahã bɔɔ nii lɛ diɛŋtsɛ hu aye amɛhe kɛjɛ fitemɔ nyɔŋyeli mli ní amɛná Nyɔŋmɔ bii lɛ anunyam heyeli lɛ.” (Rom. 8:21) Yehowa mli hi waa. Eji jeee nakai kulɛ, etoŋ gbɛjianɔ ni tamɔ nɛkɛ ehaŋ adesai.

19 Eji hegbɛ ni wɔná akɛ, wɔbaahã mɛi ale Yehowa shiwoo ni bɛ ni yɔɔ Kpojiemɔ 21:4, 5 lɛ. Jɛmɛ kɛɔ akɛ: “Ni [Nyɔŋmɔ baatsumɔ] amɛhiŋmɛiiaŋ yaafonui fɛɛ, ni gbele bɛ dɔŋŋ, asaŋ awerɛhoyeli ko loo yarawoo ko loo hejaramɔ ko hu bɛ dɔŋŋ. Tsutsu nibii lɛ eho etee.” Ni Yehowa, ni ji mɔ ni ta maŋtsɛ sɛi lɛ nɔ lɛ kɛɛ: “Naa! Miifee nibii fɛɛ ehee.” Esaa ekɛɛ: “Ŋmaa, ejaakɛ wiemɔi nɛɛ yɛ mli, ni anɔkwale ni.” Kɛ́ wɔkɛ ekãa shiɛ sane kpakpa nɛɛ wɔhã mɛi krokomɛi lɛ, no tsɔɔ akɛ, wɔmiijie Yehowa yi yɛ eduromɔ lɛ hewɔ!