Nɔ Ni Yohane Ŋma 10:1-42

  • Tookwɛlɔ lɛ kɛ toi atsũi lɛ (1-21)

    • Yesu ji tookwɛlɔ kpakpa lɛ (11-15)

    • “Miyɛ gwantɛŋi krokomɛi” (16)

  • Yudafoi kɛ Yesu taa naa yɛ Nɔjɔɔmɔ Gbi Jurɔ lɛ shishi (22-39)

    • Yudafoi babaoo heee amɛyeee (24-26)

    • “Migwantɛŋi lɛ boɔ migbee toi” (27)

    • Bi lɛ kɛ Tsɛ lɛ efee ekome (30, 38)

  • Mɛi babaoo ni yɔɔ Yordan sɛɛ lɛ he amɛye (40-42)

10  “Lɛɛlɛŋ, lɛɛlɛŋ, miikɛɛ nyɛ akɛ, mɔ ni tsɔɔɔ shinaa lɛ mli kɛboteee toi atsũ lɛ mli, shi moŋ etsɔɔ he kroko ekwɔɔ kɛboteɔ mli lɛ, nakai mɔ lɛ, julɔ kɛ mɔ ni shɔ̃ɔ mɛi anii ji lɛ.+  Shi mɔ ni tsɔɔ shinaa lɛ mli kɛboteɔ mli lɛ, lɛ ji gwantɛŋi lɛ akwɛlɔ.+  Shinaanaakwɛlɔ lɛ gbeleɔ ehãa mɔ nɛ,+ ni gwantɛŋi lɛ boɔ egbee toi.+ Ekɛ lɛ diɛŋtsɛ egwantɛŋi lɛ agbɛ́ii tsɛɔ amɛ, ni enyiɛɔ amɛhiɛ kɛjeɔ kpo.  Kɛ́ ejie lɛ diɛŋtsɛ egwantɛŋi lɛ fɛɛ kɛje kpo lɛ, enyiɛɔ amɛhiɛ, ni gwantɛŋi lɛ nyiɛɔ esɛɛ, ejaakɛ amɛle egbee.  Amɛnyiɛŋ mɔkpɔŋ sɛɛ kɔkɔɔkɔ, shi amɛbaajo foi kɛje emasɛi, ejaakɛ amɛleee mɛikpɔji agbee.”  Yesu bu amɛ abɛ nɛɛ, shi amɛ lɛ, amɛnuuu nɔ ni ekɛɔ amɛ lɛ shishi.  No hewɔ lɛ, Yesu saa ekɛɛ: “Lɛɛlɛŋ, lɛɛlɛŋ, miikɛɛ nyɛ akɛ, miji shinaa kɛhã gwantɛŋi lɛ.+  Mɛi fɛɛ ni baa ni amɛbakɛɔ akɛ amɛji mi lɛ, julɔi kɛ mɛi ni shɔ̃ɔ mɛi anii ji amɛ; shi gwantɛŋi lɛ booo amɛ toi.  Miji shinaa lɛ; mɔ fɛɛ mɔ ni tsɔɔ mimli kɛboteɔ mli lɛ, abaahere eyiwala, ni nakai mɔ lɛ baabote mli, ni ebaaje kpo, ni ebaaná niyenii.+ 10  Julɔ baaa efolo, shi ebaa koni ebaju, ni egbe, ni ekpãtã hiɛ.+ Miba koni amɛná wala ni amɛná ni eteke nɔ. 11  Miji tookwɛlɔ kpakpa lɛ;+ tookwɛlɔ kpakpa lɛ kɛ ewala* fɔ̃ɔ shi ehãa gwantɛŋi lɛ.+ 12  Apaafonyo, ni jeee tookwɛlɔ ni, ni gwantɛŋi lɛ hu jeee enɔ lɛ, naa akɛ ŋa mli gbee miiba ni ejoɔ foi eshiɔ gwantɛŋi lɛ—ni ŋa mli gbee lɛ bamɔmɔɔ amɛ ni egbɛɔ amɛ eshwãa— 13  ejaakɛ abɔ lɛ apaa, ni ejwɛŋŋ gwantɛŋi lɛ ahe. 14  Miji tookwɛlɔ kpakpa lɛ. Mile migwantɛŋi lɛ, ni migwantɛŋi lɛ hu le mi,+ 15  tamɔ bɔ ni Tsɛ lɛ le mi ni mi hu mile Tsɛ lɛ;+ ni mikɛ miwala* fɔ̃ɔ shi mihãa gwantɛŋi lɛ.+ 16  “Ni miyɛ gwantɛŋi krokomɛi ni jɛɛɛ toi atsũ nɛɛ mli;+ esa akɛ mikɛ amɛ hu aba mli, ni amɛbaabo migbee toi, ni amɛbaatsɔ tooku kome yɛ tookwɛlɔ kome shishi.+ 17  Enɛ hewɔ ni Tsɛ lɛ sumɔɔ mi lɛ,+ ejaakɛ mikɛ miwala* fɔ̃ɔ shi,+ koni minine ashɛ nɔ ekoŋŋ. 18  Mɔ ko mɔ ko shɔ̃ɔɔ yɛ midɛŋ, shi mi diɛŋtsɛ mikɛfɔ̃ɔ shi. Miyɛ hegbɛ akɛ mikɛfɔ̃ɔ shi, ni miyɛ hegbɛ akɛ minine shɛɔ nɔ ekoŋŋ.+ Miná kitã nɛɛ kɛjɛ mi-Tsɛ ŋɔɔ.” 19  Yudafoi lɛ amli gbála ekoŋŋ+ yɛ wiemɔi nɛɛ ahewɔ. 20  Amɛteŋ mɛi babaoo kɛɛ akɛ: “Eyɛ daimonio, ni eye sɛkɛ. Mɛni hewɔ nyɛboɔ lɛ toi?” 21  Mɛi komɛi hu kɛɛ: “Jeee mɔ ni yɔɔ daimonio wiemɔi nɛ. Ani daimonio ko baanyɛ agbele shwilafoi ahiŋmɛii?” 22  Nakai be lɛ mli lɛ, aaye Nɔjɔɔmɔ Gbi Jurɔ lɛ yɛ Yerusalem. Fɛ̃i be mli ni, 23  ni Yesu nyiɛ sɔlemɔ shĩa lɛ yɛ Solomon ablanaa lɛ nɔ.+ 24  Kɛkɛ ni Yudafoi lɛ gbá kɛbɔle lɛ, ni amɛbɔi lɛ kɛɛmɔ akɛ: “Bei enyiɛ kwraa obaahã wɔmɛ* kɛyashi? Kɛ́ bo ji Kristo lɛ, kɛɛmɔ wɔ faŋŋ.” 25  Yesu hã amɛ hetoo akɛ: “Mikɛɛ nyɛ, shi nyɛheee nyɛyeee. Nitsumɔi ni mitsuɔ yɛ mi-Tsɛ gbɛ́i mli lɛ, nomɛi yeɔ mihe odase.+ 26  Shi nyɛheee nyɛyeee, ejaakɛ nyɛjeee migwantɛŋi.+ 27  Migwantɛŋi lɛ boɔ migbee toi, ni mile amɛ, ni amɛnyiɛɔ misɛɛ.+ 28  Mihãa amɛ naanɔ wala,+ ni akpãtãŋ amɛhiɛ kɔkɔɔkɔ, ni mɔ ko mɔ ko shɔ̃ŋ amɛ yɛ midɛŋ.+ 29  Nɔ ni mi-Tsɛ kɛhã mi lɛ fe nibii krokomɛi fɛɛ, ni mɔ ko mɔ ko nyɛŋ ashɔ̃ amɛ yɛ Tsɛ lɛ dɛŋ.+ 30  Mi kɛ Tsɛ lɛ fɛɛ lɛ, ekome ni.”*+ 31  Yudafoi lɛ kɔlɔ tɛi ekoŋŋ akɛ amɛkɛbaatswia lɛ. 32  Yesu here amɛ nɔ akɛ: “Mijie nitsumɔi kpakpai pii ni jɛ Tsɛ lɛ ŋɔɔ lɛ kpo mitsɔɔ nyɛ. Te nakai nitsumɔi lɛ ateŋ nɔ hewɔ ni nyɛbaatswia mi tɛi nɛɛ?” 33  Yudafoi lɛ hã hetoo akɛ: “Jeee nitsumɔ kpakpa lɛ hewɔ wɔbaatswia bo tɛi lɛ, shi moŋ wiemɔ fɔŋ ni owie lɛ* hewɔ;+ ejaakɛ bo ni oji gbɔmɔ lɛ, oofee ohe nyɔŋmɔ ko.” 34  Yesu hã amɛ hetoo akɛ: “Ani aŋmako yɛ nyɛ-Mla lɛ mli akɛ, ‘Mikɛɛ akɛ, “nyɔŋmɔi ji nyɛ”’?*+ 35  Kɛ́ etsɛ mɛi ni Nyɔŋmɔ wiemɔ lɛ wie eshi amɛ lɛ ‘nyɔŋmɔi,’+—ni kɛ̃lɛ anyɛŋ agu ŋmalɛ lɛ— 36  ani nyɛmiikɛɛ mi mɔ ni Tsɛ lɛ efee mi krɔŋkrɔŋ, ni etsu mi kɛba je lɛ mli lɛ akɛ, ‘Owie wiemɔ fɔŋ,’* akɛni mikɛɛ akɛ, ‘Nyɔŋmɔ Bi ji mi’ lɛ hewɔ?+ 37  Kɛ́ mitsuuu mi-Tsɛ nitsumɔi lɛ, nyɛkahea mi nyɛyea. 38  Shi kɛ́ miitsu, ni kɛ̃lɛ nyɛheee mi nyɛyeee po lɛ, nyɛhea nitsumɔi lɛ nyɛyea,+ koni nyɛbale ni nyɛya nɔ nyɛle akɛ Tsɛ lɛ kɛ mi efee ekome, ni mi hu mi kɛ Tsɛ lɛ efee ekome.”+ 39  No hewɔ lɛ, amɛka ekoŋŋ akɛ amɛbaamɔ lɛ, shi eje amɛdɛŋ. 40  Ni eyafo Yordan ekoŋŋ kɛtee he ni Yohane baptisiɔ yɛ tsutsu lɛ,+ ni eyahi jɛmɛ. 41  Ni mɛi babaoo ba eŋɔɔ, ni amɛbɔi kɛɛmɔ akɛ: “Yohane efeee okadi ko moŋ, shi nibii fɛɛ ni Yohane wie yɛ nuu nɛɛ he lɛ, anɔkwale ni.”+ 42  Ni mɛi babaoo ná hemɔkɛyeli yɛ emli yɛ jɛmɛ.

Shishigbɛ Niŋmaa

Loo “esusuma.”
Loo “misusuma.”
Loo “misusuma.”
Loo “wɔsusumai amɛ.”
Loo “Mi kɛ Tsɛ lɛ efee ekome.”
Loo “shi moŋ musubɔɔ.”
Loo “nyɛtamɔ nyɔŋmɔi.”
Loo “Obɔ musu.”