Tsɔɔmɔ bɔ ni obaasumɔ ni ona niŋmai lɛ oha

Halamɔ wiemɔ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

BUU-MƆƆ (NIKASEMƆ NƆ̃) JULY 2016

Wɔhiɛ Sɔɔ Nyɔŋmɔ Duromɔ Lɛ

Wɔhiɛ Sɔɔ Nyɔŋmɔ Duromɔ Lɛ

“Wɔ fɛɛ wɔná duromɔ po wɔshi duromɔ nɔ.”—YOH. 1:16.

LALAI: 95, 13

1, 2. (a) Gbaa Yesu abɛbua ni kɔɔ wain ŋmɔtsɛ lɛ he lɛ. (b) Mɛni abɛbua nɛɛ tsɔɔ wɔ yɛ ejurɔfeemɔ kɛ mlihilɛ he?

WAIN ŋmɔtsɛ ko tee jara ko nɔ leebi maŋkpa koni eyabɔ nitsulɔi apaa kɛya ewain ŋmɔ lɛ mli. Ekɛ mɛi ni ená lɛ ye naa, ni amɛkpɛlɛ nɔ akɛ amɛbaatsu nii lɛ amɛhã lɛ. Shi akɛni amɛyi faaa hewɔ lɛ, eku esɛɛ etee jara lɛ nɔ shii abɔ eyabɔ nitsulɔi krokomɛi apaa efata amɛhe. Naagbee kwraa lɛ, be ni eshwɛ ŋmɛlɛtswaa kome pɛ ni abaagbe nitsumɔ lɛ fɛɛ naa lɛ, esaa etee jara lɛ nɔ eyatao mɛi ebafata nitsulɔi lɛ ahe. Ehã nitsulɔi lɛ fɛɛ le akɛ, ebaawo amɛ nyɔmɔ bɔ ni sa. Be ni shɛ gbɛkɛ lɛ, ebua nitsulɔi lɛ fɛɛ anaa koni ewo amɛ nyɔmɔ, ni ehã amɛ fɛɛ nyɔmɔwoo kome, ekɔɔɔ he eko ŋmɛlɛtswai abɔ ni amɛkɛtsu nii. Be ni mɛi ni ba leebi maŋkpa lɛ yɔse enɛ lɛ, amɛbɔi tɔkemɔ kɛ ŋmɔtsɛ lɛ woo. Shi ŋmɔtsɛ lɛ here nɔ akɛ: ‘Ani mikɛ nyɛ yeee naa dani mibɔ nyɛ apaa lɛ? Ani mibɛ hegbɛ ni mihãa minitsulɔi lɛ fɛɛ nɔ ni misumɔɔ? Ani nyɛhiŋmɛi miiklɔ amɛ nɔ yɛ ejurɔ ni mifee amɛ lɛ hewɔ?’Mat. 20:1-15, sh. niŋ.

2 Afɔɔ Yehowa “duromɔ” lɛ he wiemɔ yɛ Biblia lɛ mli, ni abɛbua nɛɛ ni Yesu gba lɛ hãa wɔleɔ nɔ ko ni he hiaa waa  yɛ su nɛɛ he. [1] (Kanemɔ 2 Korintobii 6:1.) Ekolɛ mɛi komɛi baasusu akɛ, kulɛ, esaaa akɛ nitsulɔi ni ba sɛɛkpee lɛ kɛ mɛi ni ba klɛŋklɛŋ lɛ fɛɛ náa nyɔmɔwoo kome. Shi ŋmɔtsɛ lɛ jie mlihilɛ kpo etsɔɔ sɛɛkpeebii lɛ, ni enɛ bafee duromɔ kɛhã amɛ. Biblia mli nilelɔ ko wie akɛ, wiemɔ ni atsɔɔ shishi akɛ “duromɔ” lɛ kɔɔ “nɔ ko ni akɛke mɔ ko loo akɛhã lɛ yakatswaa, nɔ ko ni egboko he deŋme, nɔ ko ni esaaa lɛ.”

YEHOWA DUROMƆ LƐ

3, 4. Mɛni ji nibii ni Yehowa eduro wɔ lɛ ateŋ nɔ ni fe fɛɛ? Ni mɛni hewɔ ekɛduro wɔ?

3 Ŋmalɛi lɛ hãa wɔleɔ akɛ, Nyɔŋmɔ duromɔ lɛ ji nikeenii. (Efe. 3:7) Mɛni hewɔ wɔbaanyɛ wɔkɛɛ eji nikeenii lɛ? Wɔ fɛɛ wɔyeee emuu, no hewɔ lɛ, jeee be fɛɛ be wɔnyɛɔ wɔfeɔ nɔ ni Yehowa sumɔɔ. Eji wɔnyɛɔ wɔboɔ Yehowa toi be fɛɛ be kulɛ, awieŋ akɛ eduromɔ lɛ ji nikeenii. Shi taakɛ wɔle lɛ, wɔnyɛɛɛ wɔfee nakai. Maŋtsɛ Solomon ŋma akɛ: “Gbɔmɔ ko bɛ shikpɔŋ lɛ nɔ, ní ji jalɔ, ní feɔ ekpakpa ni efeee esha.” (Jaj. 7:20) Bɔfo Paulo hu wie akɛ: “Mɛi fɛɛ efee esha ni amɛnyɛɛɛ amɛjie Nyɔŋmɔ anunyam lɛ kpo.” Esaa ewie akɛ: “Esha dɛŋ nyɔmɔwoo ji gbele.” (Rom. 3:23; 6:23a) No hewɔ lɛ, kulɛ nɔ pɛ ni sa wɔ ji, gbele.

4 Shi akɛni Yehowa sumɔɔ adesai waa hewɔ lɛ, ehã “e-Bi koome lɛ” kɛ ewala bashã afɔle ehã wɔ. Enɛ ji nibii ni Yehowa ejɛ emlihilɛ kpele lɛ mli eduro wɔ lɛ ateŋ nɔ ni fe fɛɛ. (Yoh. 3:16) Paulo wie yɛ Yesu he akɛ, ‘akɛ anunyam kɛ woo efi lɛ akekere, ejaakɛ ena amanehulu kɛtee gbele mli koni yɛ Nyɔŋmɔ duromɔ naa lɛ esa enaa gbele ehã mɔ fɛɛ mɔ.’ (Heb. 2:9) No hewɔ lɛ, “nɔkeenɔ ni Nyɔŋmɔ kɛhãa ji naanɔ wala kɛtsɔ Kristo Yesu, wɔ-Nuŋtsɔ lɛ nɔ.”Rom. 6:23b.

5, 6. (a) Kɛ́ wɔhã esha ye wɔnɔ lɛ, mɛni jɛɔ mli kɛbaa? (b) Kɛ́ wɔba duromɔ lɛ shishi lɛ, mɛɛ gbɛ nɔ wɔnáa he sɛɛ?

5 Mɛni hewɔ wɔfeɔ esha ni wɔgboiɔ lɛ? Biblia lɛ kɛɔ akɛ: “Mɔ kome tɔmɔ lɛ hewɔ jɛ ni gbele tsɔ nakai mɔ kome lɛ nɔ ye maŋtsɛ.” (Rom. 5:12, 14, 17) Ni tsɔɔ akɛ, Adam shwiei ni wɔji lɛ hewɔ wɔfeɔ esha ni wɔgboiɔ lɛ. Miishɛɛ sane ji akɛ, wɔbaanyɛ wɔkpɛ wɔyiŋ akɛ, wɔhaŋ esha aye wɔnɔ dɔŋŋ. Kɛ́ wɔná hemɔkɛyeli yɛ Kristo kpɔmɔ afɔle lɛ mli lɛ, wɔbaaná Yehowa duromɔ lɛ he sɛɛ. Yɛ mɛɛ gbɛ nɔ? Biblia lɛ kɛɔ akɛ: “He ni esha fa yɛ lɛ, duromɔ fa kɛteke nɔ babaoo yɛ jɛmɛ. Mɛɛ yiŋtoo hewɔ? Koni bɔ nɔŋŋ ni esha kɛ gbele ye maŋtsɛ lɛ, nakai nɔŋŋ duromɔ hu atsɔ jalɛ nɔ aye maŋtsɛ kɛya naanɔ wala mli kɛtsɔ wɔ-Nuŋtsɔ Yesu Kristo nɔ.”Rom. 5:20, 21.

6 Eyɛ mli akɛ eshafeelɔi ji wɔ moŋ, shi esaaa ni wɔŋmɛɔ wɔhe wɔhãa esha. No hewɔ lɛ, kɛ́ wɔfee esha lɛ, esa akɛ wɔbi Yehowa dɛŋ eshaifaa. Paulo bɔ Kristofoi kɔkɔ akɛ: “Esaaa akɛ esha yeɔ nyɛnɔ nuŋtsɔ, ejaakɛ nyɛbɛ mla shishi, shi moŋ duromɔ shishi nyɛyɔɔ.” (Rom. 6:14) Kɛ́ wɔba Yehowa duromɔ lɛ shishi, loo wɔna gbɛi srɔtoi ni etsɔ nɔ ejie mlihilɛ kpele kpo etsɔɔ wɔ lɛ, mɛɛ gbɛ nɔ wɔnáa he sɛɛ? Paulo wie akɛ: “Nyɔŋmɔ duromɔ lɛ . . . tsɔseɔ wɔ koni wɔkwa bu ni abuuu Nyɔŋmɔ kɛ je lɛŋ akɔnɔi, ní wɔkɛ jwɛŋmɔ ni sa kɛ jalɛ kɛ Nyɔŋmɔjamɔ su ahi shi yɛ shihilɛ gbɛjianɔtoo ni yɔɔ amrɔ nɛɛ mli.”Tito 2:11, 12.

NYƆŊMƆ DUROMƆ LƐ “JEƆ KPO YƐ GBƐI SRƆTOI ANƆ”

7, 8. Kɛ́ akɛɛ Yehowa duromɔ lɛ “jeɔ kpo yɛ gbɛi srɔtoi anɔ” lɛ, te atsɔɔ tɛŋŋ? (Kwɛmɔ mfonirii ni yɔɔ nikasemɔ lɛ shishijee lɛ.)

7 Bɔfo Petro ŋma akɛ: “Bɔ ni mɔ fɛɛ mɔ ená nikeenii ko lɛ, nyɛkɛsɔmɔsɔmɔa  nyɛhe akɛ Nyɔŋmɔ duromɔ lɛ ni jeɔ kpo yɛ gbɛi srɔtoi anɔ lɛ anɔkwɛlɔi kpakpai.” (1 Pet. 4:10) Mɛni enɛ tsɔɔ? Etsɔɔ akɛ, Yehowa baaye abua wɔ ni wɔnyɛ wɔdamɔ naagbai fɛɛ ni wɔkɛbaakpe yɛ shihilɛ mli lɛ anaa. (1 Pet. 1:6) No hewɔ lɛ, ekɔɔɔ he eko naagba ni wɔkɛbaakpe lɛ, Yehowa baaduro wɔ nibii ni baaye abua wɔ ni wɔnyɛ wɔdamɔ naa.

8 Bɔfo Yohane ŋma akɛ: “Wɔ fɛɛ wɔná duromɔ po wɔshi duromɔ nɔ kɛjɛ ebɔyimɔ lɛ mli.” (Yoh. 1:16) Akɛni Yehowa duromɔ lɛ jeɔ kpo yɛ gbɛi srɔtoi anɔ hewɔ lɛ, wɔnáa jɔɔmɔi babaoo. Mɛni ji jɔɔmɔi nɛɛ ekomɛi?

9. Mɛɛ gbɛ nɔ wɔnáa kpɔmɔnɔ lɛ ni Yehowa kɛduro wɔ lɛ he sɛɛ? Ni mɛni wɔbaanyɛ wɔfee kɛtsɔɔ akɛ wɔhiɛ sɔɔ duromɔ nɛɛ?

9 Eshaifaa. Yɛ kpɔmɔ afɔleshãa lɛ hewɔ lɛ, Yehowa kɛ wɔhe eshai keɔ wɔ kɛji wɔtɔ̃ enɔ. Shi dani ekɛbaake wɔ lɛ, esa akɛ wɔshwa wɔhe, wɔkwa gbɛ fɔŋ ni wɔkɔ lɛ, ni wɔmia wɔhiɛ wɔwu wɔshi akɔnɔi fɔji. (Kanemɔ 1 Yohane 1:8, 9.) Esa akɛ wɔhiɛ asɔ Yehowa mɔbɔnalɛ lɛ, ni enɛ atsirɛ wɔ ni wɔjie eyi. Bɔfo Paulo kɛɛ Kristofoi ni hi shi yɛ ebeiaŋ lɛ akɛ: “[Yehowa] ejie wɔ kɛjɛ duŋ hewalɛ lɛ mli kɛtee e-Bi ni esumɔɔ lɛ lɛ maŋtsɛyeli lɛ mli, mɔ nɔ ní atsɔ akɛ kpɔmɔnɔ lɛ jie wɔ, no ji akɛ, akɛ wɔhe eshai fa wɔ lɛ.” (Kol. 1:13, 14) Akɛni Yehowa kɛ wɔhe eshai keɔ wɔ hewɔ lɛ, wɔnáa nibii kpakpai krokomɛi ni eto he gbɛjianɔ lɛ ahe sɛɛ.

10. Mɛɛ nɔ kpakpa kroko Yehowa eduro wɔ kɛtsɔ Yesu Kristo nɔ?

10 Wekukpaa kpakpa ni yɔɔ wɔ kɛ Nyɔŋmɔ teŋ. Akɛni wɔyeee emuu hewɔ lɛ, be ni abaafɔ wɔ beebe lɛ, Nyɔŋmɔ henyɛlɔi ji wɔ. Paulo wie akɛ: “Be ni wɔji henyɛlɔi lɛ, atsɔ e-Bi lɛ gbele lɛ nɔ akpãtã wɔ kɛ Nyɔŋmɔ teŋ.” (Rom. 5:10) Kpɔmɔnɔ lɛ hewɔ lɛ, amrɔ nɛɛ wɔbatsɔmɔ Nyɔŋmɔ nanemɛi. Paulo tsɔɔ tsakpaa ni yɔɔ enɛ kɛ Yehowa duromɔ lɛ teŋ. Ekɛɛ enyɛmimɛi Kristofoi ni afɔ amɛ mu lɛ akɛ: “Amrɔ nɛɛ ni atsɔ hemɔkɛyeli nɔ abu wɔ jalɔi lɛ, nyɛhãa wɔhãa toiŋjɔlɛ akãa he ahia wɔ kɛ Nyɔŋmɔ teŋ kɛtsɔ wɔ-Nuŋtsɔ Yesu Kristo nɔ, mɔ nɔ ni wɔtsɔ hemɔkɛyeli nɔ wɔná gbɛ hu kɛba duromɔ ni wɔdamɔ mli amrɔ nɛɛ mli lɛ.” (Rom. 5:1, 2) Mɛɛ jɔɔmɔ po nɛ!

Ehã wɔ hegbɛ ni wɔnu sane kpakpa lɛ (Kwɛmɔ kuku 11)

11. Mɛɛ gbɛ nɔ mɛi ni afɔ amɛ mu lɛ tsɔɔ “gwantɛŋi krokomɛi” lɛ gbɛ kɛyaa jalɛ mli?

11 Nyɔŋmɔ buɔ wɔ jalɔi. Gbalɔ Daniel wie akɛ, yɛ naagbee bei nɛɛ amli lɛ, “mɛi ni le nii” lɛ ‘baatsɔɔ mɛi pii gbɛ kɛaatee jalɛ mli.’ (Kanemɔ Daniel 12:3.) “Mɛi ni le nii” lɛ ji mɛi ni afɔ amɛ mu lɛ, ni kɛtsɔ shiɛmɔ nitsumɔ lɛ nɔ lɛ, amɛtsɔɔ “gwantɛŋi krokomɛi” akpekpei abɔ Yehowa he nii. (Yoh. 10:16) Enɛ hewɔ lɛ, Yehowa duromɔ naa lɛ, abuɔ gwantɛŋi krokomɛi nɛɛ jalɔi. Paulo wie akɛ: “Eji duromɔ keenɔ akɛ abuɔ amɛ jalɔi yɛ eduromɔ lɛ naa, kɛtsɔ kpɔ̃ ni atsɔ kpɔmɔnɔ ni Kristo Yesu wo lɛ nɔ akpɔ̃ amɛ lɛ nɔ.”Rom. 3:23, 24.

Ehã wɔ hegbɛ ni wɔsɔle (Kwɛmɔ kuku 12)

12. Yehowa duromɔ naa lɛ, mɛɛ hegbɛ wɔyɔɔ? Tsɔɔmɔ mli.

12 Wɔnyɛɔ wɔyaa Nyɔŋmɔ hiɛ yɛ sɔlemɔ mli. Yehowa duromɔ naa lɛ, wɔyɛ hegbɛ akɛ wɔsɔleɔ wɔhãa lɛ. Paulo kɛɛ Yehowa sɛi lɛ ji “duromɔ sɛi,” ni ewo wɔ fɛɛ hewalɛ ni wɔkɛ “wiemɔ ni awieɔ kɛ nɔmimaa” abɛŋkɛ sɛi nɛɛ, ni tsɔɔ akɛ, esaaa akɛ wɔshashaooo shi kwraa akɛ wɔbaasɔle. (Heb. 4:16a) Wɔbaanyɛ wɔsɔle wɔhã Yehowa kɛtsɔ Yesu nɔ be fɛɛ be, ni enɛ ji hegbɛ kpele diɛŋtsɛ! Paulo wie akɛ: “Hemɔkɛyeli ni wɔyɔɔ yɛ  Kristo lɛ mli hewɔ lɛ, wɔwieɔ kɛ nɔmimaa, ni wɔnáa gbɛ hu kɛyaa Nyɔŋmɔ ŋɔɔ tswaa kɛ nɔmimaa.”Efe. 3:12.

Eyeɔ ebuaa wɔ yɛ be ni sa mli (Kwɛmɔ kuku 13)

13. Kɛ́ wɔhao loo wɔkɛ naagba ko kpe lɛ, mɛɛ gbɛ nɔ wɔbaanyɛ wɔtsɔ “wɔná duromɔ ni baaye abua wɔ yɛ be ni sa mli”?

13 Wɔnáa yelikɛbuamɔ yɛ be ni sa mli. Paulo wo wɔ hewalɛ ni wɔbɛŋkɛ Yehowa daa yɛ sɔlemɔ mli, “koni wɔnine ashɛ mɔbɔnalɛ nɔ ni wɔná duromɔ ni baaye abua wɔ yɛ be ni sa mli.” (Heb. 4:16b) Be fɛɛ be ni wɔbaahao loo wɔkɛ naagba ko baakpe yɛ shihilɛ mli lɛ, wɔbaanyɛ wɔsɔle wɔkpa Yehowa fai ni ena wɔ mɔbɔ ni eye ebua wɔ. Ejeee Yehowa sɔ̃ akɛ ebo wɔsɔlemɔi lɛ atoi ni ehã wɔ hetoo. Shi akɛni eesumɔ ni “wɔná ekãa babaoo,” ni wɔnyɛ wɔkɛɛ akɛ: “Yehowa ji miyelikɛbualɔ; misheŋ gbeyei. Mɛni gbɔmɔ baanyɛ afee mi?” hewɔ lɛ, eboɔ wɔ toi ni eyeɔ ebuaa wɔ. Ni bei pii lɛ, efeɔ nakai kɛtsɔɔ wɔnyɛmimɛi Kristofoi lɛ anɔ.Heb. 13:6.

14. Kɛ́ wɔhao loo wɔtsui kumɔ lɛ, mɛni Yehowa feɔ ehãa wɔ?

14 Nyɔŋmɔ shɛjeɔ wɔtsuii amii. Jɔɔmɔi ni nɔ bɛ ni Yehowa kɛduroɔ wɔ lɛ ateŋ ekome ji akɛ, eshɛjeɔ wɔmii kɛ́ wɔhao loo wɔtsui kumɔ. (Lala 51:19) Be ni awaa Kristofoi ni yɔɔ Tesalonika lɛ ayi lɛ, Paulo ŋma amɛ akɛ: “Wɔ-Nuŋtsɔ Yesu Kristo diɛŋtsɛ kɛ Nyɔŋmɔ ni ji wɔ-Tsɛ lɛ, mɔ ni sumɔ wɔ ni etsɔ duromɔ lɛ nɔ ehã wɔ naanɔ miishɛjemɔ kɛ hiɛnɔkamɔ kpakpa lɛ, ashɛje nyɛtsuii amii ni ewaje nyɛ.” (2 Tes. 2:16, 17, sh. niŋ.) Le ni wɔle akɛ Yehowa sumɔɔ wɔ ni esusuɔ wɔhe lɛ hãa wɔmii shɛɔ wɔhe waa!

15. Yɛ Yehowa duromɔ lɛ naa lɛ, mɛɛ hiɛnɔkamɔ wɔyɔɔ?

15 Naanɔ wala he hiɛnɔkamɔ lɛ. Eji jeee Yehowa kulɛ, wɔbɛ hiɛnɔkamɔ ko kwraa, ejaakɛ wɔji eshafeelɔi. (Kanemɔ Lala 49:8, 9.) Shi Yehowa ehã wɔ hiɛnɔkamɔ ko ni nɔ bɛ. Yesu wo esɛɛnyiɛlɔi lɛ shi akɛ: “Enɛ ji mi-Tsɛ suɔmɔnaa nii, akɛ  mɔ fɛɛ mɔ ni yɔseɔ Bi lɛ, ni ejieɔ hemɔkɛyeli kpo yɛ emli lɛ aná naanɔ wala.” (Yoh. 6:40) Yehowa duromɔ lɛ pɛ naa wɔyɔɔ hiɛnɔkamɔ akɛ wɔbaanyɛ wɔhi shi kɛya naanɔ. Bɔfo Paulo wie akɛ: “Ajie Nyɔŋmɔ duromɔ lɛ kpo, ni no ehã aahere gbɔmɛi srɔtoi fɛɛ yiwala.”Tito 2:11.

OKƐ NYƆŊMƆ DUROMƆ LƐ AKAJIE ONAA KƐFEE EFƆŊ

16. Mɛni Kristofoi komɛi ni hi shi yɛ blema lɛ fee kɛtsɔɔ akɛ amɛhiɛ esɔɔɔ Nyɔŋmɔ duromɔ lɛ?

16 Wɔnáa Yehowa duromɔ lɛ he sɛɛ waa. Shi esaaa akɛ wɔkɛ eduromɔ lɛ jieɔ wɔnaa kɛfeɔ efɔŋ. Kristofoi ni hi shi yɛ blema lɛ ateŋ mɛi komɛi kɛ ‘Nyɔŋmɔ duromɔ lɛ jie amɛnaa kɛfee efɔŋ kɛ kuɛŋtimɔ.’ (Yuda 4) Eeenyɛ efee akɛ, Kristofoi gbohii nɛɛ yasusu akɛ akɛni Yehowa kɛ eshai keɔ hewɔ lɛ, amɛbaanyɛ amɛtɔ̃ enɔ be fɛɛ be ni amɛsumɔɔ. Nɔ ni ehiii fe fɛɛ lɛ, amɛbɔ mɔdɛŋ akɛ amɛbaagbala nyɛmimɛi krokomɛi amɛwo nifeemɔ gbonyo nɛɛ mli. Amɛkɛ “musubɔɔ wo duromɔ mumɔ lɛ mlifu,” ni nakai nɔŋŋ eji yɛ mɛi fɛɛ ni feɔ nakai ŋmɛnɛ lɛ agbɛfaŋ.Heb. 10:29.

17. Mɛɛ kɔkɔ ni yɔɔ hiɛdɔɔ Petro bɔ Kristofoi?

17 Ŋmɛnɛ lɛ, Satan ehã Kristofoi komɛi ená jwɛŋmɔ lɛ akɛ, amɛbaanyɛ amɛŋmɛɛ amɛhe amɛhã esha, ejaakɛ Yehowa kɛ eshai keɔ. Shi ebɛ lɛ nakai. Eyɛ mli akɛ kɛ́ wɔfee esha ni wɔtsake wɔtsui lɛ, Yehowa kɛbaake wɔ moŋ, shi eekpa gbɛ akɛ wɔbaamia wɔhiɛ wɔwu wɔshi akɔnɔi gbohii, koni wɔkafee esha. Ekɛ emumɔ lɛ tsirɛ Petro ni eŋma akɛ: “Mɛi ni asumɔɔ, nyɛ lɛ, akɛni nyɛle enɛ momo hewɔ lɛ, nyɛkwɛa jogbaŋŋ koni mlatɔlɔi lɛ atɔmɔ lɛ akahã nyɛ kɛ amɛ fɛɛ du gbɛ ni nyɛjɛ nyɛ diɛŋtsɛ nyɛshifimɔ lɛ mli nyɛgbee shi. Dabida, moŋ lɛ, nyɛyaa nɔ nyɛdaraa yɛ wɔ-Nuŋtsɔ kɛ Yiwalaherelɔ Yesu Kristo duromɔ kɛ ehe nilee lɛ mli.”2 Pet. 3:17, 18.

NYƆŊMƆ DUROMƆ LƐ KƐ SƆ̃I NYIƐ

18. Akɛni Yehowa eduro wɔ nibii pii hewɔ lɛ, mɛɛ sɔ̃i jwere wɔnɔ?

18 Wɔhiɛ sɔɔ Yehowa duromɔ lɛ waa. No hewɔ lɛ, esa akɛ wɔkɛ hesai srɔtoi ni ekɛduro wɔ lɛ asɔmɔ lɛ ni wɔkɛye wɔbua mɛi krokomɛi. Mɛɛ gbɛi anɔ wɔbaanyɛ wɔtsɔ wɔfee nakai? Paulo wie akɛ: “Akɛni esoro wɔteŋ mɔ fɛɛ mɔ nikeenii yɛ duromɔ ni akɛduro wɔ lɛ naa hewɔ lɛ, . . . kɛ́ sɔɔmɔ ni lɛ, nyɛhãa wɔhiɛa sɔɔmɔ nɛɛ mli; aloo mɔ ni tsɔɔ nii lɛ, ehiɛ enitsɔɔmɔ lɛ mli; aloo mɔ ni woɔ mɛi hewalɛ lɛ, ehiɛ hewalɛ ní ewoɔ mɛi lɛ mli; . . . mɔ ni naa mɔbɔ lɛ, ekɛ miishɛɛ afee.” (Rom. 12:6-8) Nibii ni Yehowa kɛduro wɔ lɛ ahewɔ lɛ, eji wɔsɔ̃ akɛ wɔkɛ ekãa atsu shiɛmɔ nitsumɔ lɛ, wɔtsɔɔ mɛi krokomɛi Biblia lɛ, wɔwo wɔnyɛmimɛi Kristofoi lɛ hewalɛ, ni wɔkɛ mɛi ni tɔ̃ɔ wɔnɔ lɛ ahe ake amɛ.

19. Mɛɛ sɔ̃ ni kã wɔnɔ he wɔbaasusu yɛ nikasemɔ ni nyiɛ sɛɛ lɛ mli?

19 Nyɔŋmɔ ejɛ esuɔmɔ kpele lɛ mli eduro wɔ nibii pii. Esa akɛ enɛ atsirɛ wɔ ni wɔkɛ wɔnyɛmɔ fɛɛ aye “Nyɔŋmɔ duromɔ lɛ he sane kpakpa lɛ he odase fitsofitso.” (Bɔf. 20:24) Wɔbaasusu sɔ̃ ni kã wɔnɔ nɛɛ he jogbaŋŋ yɛ nikasemɔ ni nyiɛ sɛɛ lɛ mli.

^ [1] (kuku 2) Kwɛmɔ bɔ ni atsɔɔ wiemɔ ni ji “Duromɔ” lɛ mli ahã yɛ “Biblia mli Wiemɔi Titrii Amligbalamɔ” ni yɔɔ Kristofoi A-Hela Ŋmalɛi—Jeŋ Hee Shishitsɔɔmɔ lɛ sɛɛ lɛ.