Tsɔɔmɔ bɔ ni obaasumɔ ni ona niŋmai lɛ oha

Halamɔ wiemɔ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

BUU-MƆƆ (NIKASEMƆ NƆ̃) JULY 2016

Sanebimɔi ni Jɛ Kanelɔi Adɛŋ

Sanebimɔi ni Jɛ Kanelɔi Adɛŋ

Ezekiel yitso 37 lɛ wie tsei enyɔ komɛi ni afee amɛ ekome lɛ he. Mɛni tsei enyɔ nɛɛ damɔ shi kɛhã, ni mɛni wɔkaseɔ yɛ mli?

Yehowa tsɔ gbalɔ Ezekiel nɔ egba akɛ, kɛ́ Israelbii lɛ ku amɛsɛɛ kɛba Shiwoo Shikpɔŋ lɛ nɔ lɛ, amɛbaafee ekome akɛ maŋ kome. Nakai gbalɛ lɛ kɔɔ mɛi ni jáa Nyɔŋmɔ yɛ naagbee gbii nɛɛ amli lɛ hu ahe. Yehowa kɛɛ ebaahã amɛ hu amɛfee ekome.

Yehowa kɛɛ Ezekiel ni eŋmala nii yɛ tsei srɔtoi enyɔ anɔ. Ekɛɛ lɛ akɛ eŋma yɛ tso kome nɔ akɛ, “Yuda kɛ Israelbii ní fata ehe lɛ anɔ,” ni eŋma yɛ ekroko lɛ nɔ akɛ, “Yosef nɔ, Efraim kɛ Israel we lɛ fɛɛ ní fata ehe lɛ tso.” Tsei srɔtoi enyɔ nɛɛ baatsɔ “tso kome” yɛ Ezekiel dɛŋ.Ezek. 37:15-17.

Namɛi “Efraim” damɔ shi kɛhã? Efraim akutso lɛ ji akutsei nyɔŋma ni feɔ Israel kooyigbɛ maŋtsɛyeli lɛ ateŋ nɔ ni ehe gbɛ́i fe fɛɛ. Akutso nɛɛ mli Yeroboam, ni ji klɛŋklɛŋ maŋtsɛ ni ye  nɔ yɛ nakai maŋtsɛyeli lɛ mli lɛ jɛ. (5 Mose 33:13, 17; 1 Maŋ. 11:26) Amɛji Yosef binuu Efraim seshibii. (4 Mose 1:32, 33) Dani Yakob baagbo lɛ, ejɔɔ ebi Yosef yɛ gbɛ krɛdɛɛ nɔ. No hewɔ lɛ, eja gbɛ akɛ akɛ tso ni aŋma “Efraim” yɛ nɔ lɛ baafee kooyigbɛ akutsei nyɔŋma maŋtsɛyeli lɛ he mfoniri. Be ni Ezekiel ŋma gbalɛ nɛɛ lɛ, no mli lɛ Asiriabii lɛ eŋɔ Israel kooyigbɛ maŋtsɛyeli lɛ nom jeeŋmɔ. Amɛŋɔ amɛ nom yɛ afi 740 D.Ŋ.B. (2 Maŋ. 17:6) Afii komɛi asɛɛ lɛ, Babilonbii lɛ ye Asiriabii lɛ anɔ kunim, no hewɔ lɛ be ni Ezekiel gbaa gbalɛ nɛɛ lɛ, no mli lɛ Israelbii ni aŋɔ amɛ nom lɛ ateŋ mɛi babaoo egbɛ eshwã Babilon Maŋtsɛyeli lɛ mli fɛɛ.

Yɛ afi 607 D.Ŋ.B. lɛ, Babilonbii lɛ ye Israel wuoyigbɛ akutsei enyɔ maŋtsɛyeli lɛ nɔ kunim, ni amɛŋɔ amɛ nom kɛtee Babilon. Eeenyɛ efee akɛ, kooyigbɛ maŋtsɛyeli lɛ mli bii komɛi ni shwɛ be ni Asiriabii lɛ ŋɔ amɛ nom lɛ fata mɛi ni Babilonbii lɛ ŋɔ amɛ nom lɛ ahe. Wuoyigbɛ maŋtsɛyeli lɛ nɔ maŋtsɛmɛi lɛ jɛ Yuda akutso lɛ mli. Osɔfoi lɛ hu hi Yuda, bɔ ni afee ni amɛnyɛ amɛsɔmɔ yɛ sɔlemɔwe lɛ yɛ Yerusalem. (2 Kron. 11:13, 14; 34:30) No hewɔ lɛ, eja gbɛ akɛ akɛ tso ni aŋma “Yuda” yɛ nɔ lɛ baafee wuoyigbɛ akutsei enyɔ maŋtsɛyeli lɛ he mfoniri.

Mɛɛ be afee tsei enyɔ lɛ ekome? Afee amɛ ekome yɛ afi 537 D.Ŋ.B., be ni Israelbii lɛ ku amɛsɛɛ kɛjɛ nomŋɔɔ mli koni amɛbama sɔlemɔwe ni yɔɔ Yerusalem lɛ ekoŋŋ lɛ. Israelbii ni ku amɛsɛɛ lɛ ateŋ mɛi komɛi jɛ wuoyigbɛ maŋtsɛyeli lɛ mli, ni amɛteŋ mɛi komɛi hu jɛ kooyigbɛ maŋtsɛyeli lɛ mli. Shi amɛ fɛɛ amɛfee ekome kɛsɔmɔ Yehowa akɛ maŋ kome, taakɛ eji be ko ni eho lɛ. (Ezek. 37:21, 22) Gbalɔ Yesaia kɛ Yeremia hu gba akɛ Israelbii lɛ baafee ekome.Yes. 11:12, 13; Yer. 31:1, 6, 31.

Mɛni gbalɛ nɛɛ tsɔɔ wɔ yɛ mɛi ni jáa Yehowa lɛ ahe? Etsɔɔ wɔ akɛ, Yehowa baahã mɛi fɛɛ ni jáa lɛ lɛ ‘afee ekome.’ (Ezek. 37:18, 19) Ani gbalɛ nɛɛ eba mli yɛ wɔbei nɛɛ amli? Hɛɛ, eba mli, ni eje shishi kɛjɛ afi 1919. Mɛni hewɔ wɔkɛɔ nakai? Ejaakɛ yɛ nakai afi lɛ mli lɛ, ebafee faŋŋ akɛ mɔdɛŋ fɛɛ ni Satan ebɔ akɛ ebaafite amɛteŋ lɛ yeko omanye. Kɛjɛ nakai be lɛ kɛbaa nɛɛ lɛ, Yehowa etee nɔ eto ewebii lɛ ahe gbɛjianɔ jogbaŋŋ koni amɛfee ekome kɛjá lɛ.

Yɛ nakai beiaŋ lɛ, Nyɔŋmɔ webii lɛ ateŋ mɛi babaoo yɛ hiɛnɔkamɔ akɛ amɛkɛ Yesu baaye nɔ akɛ maŋtsɛmɛi kɛ osɔfoi yɛ ŋwɛi. (Kpoj. 20:6) Amɛtamɔ Yuda tso lɛ. Shi amɛteŋ mɛi fioo komɛi hu yɛ ni amɛ lɛ, amɛhiɛnɔkamɔ ji akɛ amɛbaahi shikpɔŋ lɛ nɔ kɛya naanɔ. Sɛɛ mli lɛ, mɛi ni yɔɔ hiɛnɔkamɔ akɛ amɛbaahi shikpɔŋ lɛ nɔ lɛ ayi bafa. (Zak. 8:23) Yɛ gbɛ ko nɔ lɛ, amɛtamɔ Yosef tso lɛ.

Ŋmɛnɛ lɛ, kui enyɔ nɛɛ efee ekome kɛmiisɔmɔ Yehowa. Ni amɛyɛ Maŋtsɛ kome ni yeɔ amɛ nɔ, lɛ ji Yesu Kristo. Lɛ ji mɔ ni awie ehe yɛ Ezekiel gbalɛ lɛ mli akɛ “mitsulɔ David” lɛ. (Ezek. 37:24, 25) Yesu sɔle ni esɛɛnyiɛlɔi lɛ ‘afee ekome, tamɔ bɔ ni e-Tsɛ lɛ kɛ lɛ efee ekome, ni lɛ hu ekɛ e-Tsɛ lɛ efee ekome lɛ.’ * (Yoh. 17:20, 21) Kɛfata he lɛ, egba akɛ esafoku bibioo lɛ, ni ji esɛɛnyiɛlɔi ni afɔ amɛ mu lɛ, kɛ ‘egwantɛŋi krokomɛi’ lɛ baafee ekome. “Amɛbaatsɔ tooku kome yɛ tookwɛlɔ kome shishi.” (Yoh. 10:16) Ŋmɛnɛ lɛ, eyɛ mli akɛ Yehowa webii lɛ yɛ hiɛnɔkamɔi srɔtoi moŋ, shi amɛfee ekome, taakɛ Yesu wie lɛ pɛpɛɛpɛ!

^ kk. 6 Yesu gba abɛbuai srɔtoi ni kɔɔ be ni eba lɛ he okadi lɛ he, ni bɔ ni eto abɛbuai nɛɛ anaa ehã lɛ sa kadimɔ waa. Klɛŋklɛŋ abɛbua ni egba lɛ kɔɔ “nyɔŋ anɔkwafo kɛ hiɛshikalɔ lɛ,” ni ji nyɛmimɛi hii ni afɔ amɛ mu lɛ ateŋ mɛi fioo komɛi ni baafee ekome akɛ kuu kɛnyiɛ Nyɔŋmɔ webii lɛ ahiɛ lɛ he. (Mat. 24:45-47) No sɛɛ lɛ, egba abɛbuai ni kɔɔ mɛi fɛɛ ni yɔɔ hiɛnɔkamɔ akɛ amɛbaaya ŋwɛi lɛ ahe titri. (Mat. 25:1-30) Naagbee lɛ, egba abɛbua ko ni kɔɔ mɛi ni baafi Kristo nyɛmimɛi lɛ asɛɛ lɛ ahe. Mɛi nɛɛ ji mɛi ni yɔɔ hiɛnɔkamɔ akɛ amɛbaahi shi kɛya naanɔ yɛ shikpɔŋ lɛ nɔ lɛ. (Mat. 25:31-46) Enɛ kɛ bɔ ni Ezekiel gbalɛ lɛ baa mli ehãa yɛ wɔbei nɛɛ amli lɛ nyiɛ waa. Klɛŋklɛŋ lɛ, gbalɛ lɛ wie mɛi ni yɔɔ hiɛnɔkamɔ akɛ amɛbaaya ŋwɛi lɛ ahe. Ni eyɛ mli akɛ afɔɔɔ wiemɔ akɛ akutsei nyɔŋma maŋtsɛyeli lɛ feɔ mɛi ni yɔɔ hiɛnɔkamɔ akɛ amɛbaahi shikpɔŋ lɛ nɔ kɛya naanɔ lɛ ahe mfoniri moŋ, shi gbalɛ lɛ kaiɔ wɔ ekomefeemɔ ni yɔɔ mɛi ni yɔɔ hiɛnɔkamɔ nɛɛ kɛ mɛi ni yɔɔ hiɛnɔkamɔ akɛ amɛbaaya ŋwɛi lɛ ateŋ.