Shi kɛya he ni ato saneyitsei lɛ anaa yɛ lɛ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

Buu-Mɔɔ—Nikasemɔ Nɔ  |  July 2016

Mɛni Hewɔ Esa akɛ ‘Wɔya nɔ Wɔbu’?

Mɛni Hewɔ Esa akɛ ‘Wɔya nɔ Wɔbu’?

“Nyɛleee gbi nɔ ni nyɛ-Nuŋtsɔ lɛ baaba.”MAT. 24:42.

LALAI: 136, 129

1. Okɛ nɔkwɛmɔnɔ ko atsɔɔ nɔ hewɔ ni ehe miihia ni wɔhiɛ ahi wɔhe nɔ yɛ be ni wɔyɔɔ mli lɛ kɛ nibii ni yaa nɔ yɛ je lɛ mli lɛ ahe. (Kwɛmɔ mfoniri ni yɔɔ nikasemɔ lɛ shishijee lɛ.)

KƐ́ ESHWƐ fioo ni abaaje kpokpaa wulu nɔ kpee ko shishi lɛ, sɛinɔtalɔ lɛ baa kpoku lɛ nɔ, ehereɔ mɛi fɛɛ ni eba lɛ atuu, ni ekɛɔ amɛ akɛ amɛtara shi ni amɛbo lalai ŋɔɔmɔŋɔɔmɔi ni abaatswa lɛ toi. Shi bei komɛi lɛ, be ni abɔi lala lɛ tswaa lɛ sɛɛ lɛ, obaana ni mɛi nyiɛ kɛmiiya kɛmiiba ni amɛmiigba sane, tamɔ nɔ ni amɛnuko nɔ ni yaa nɔ lɛ po. Amɛtaraaa shi ni amɛbaasaa amɛjwɛŋmɔ kɛhã nibii kpakpai ni baaya nɔ lɛ. Mɛni hewɔ? Ekã shi faŋŋ akɛ, amɛkɛ amɛjwɛŋmɔ eyaaa nɔ ni sɛinɔtalɔ lɛ wie lɛ nɔ, ni amɛhiɛ eje amɛhe nɔ akɛ eshwɛ fioo ni abaaje kpee lɛ shishi. Nɔkwɛmɔnɔ nɛɛ hãa wɔnaa nɔ hewɔ ni esa akɛ wɔhã wɔhiɛ ahi wɔhe nɔ be fɛɛ be lɛ. Kɛji wɔhãaa wɔhiɛ ahi wɔhe nɔ lɛ, wɔhiɛ baaje be ni wɔyɔɔ mli lɛ nɔ, ni wɔkɛ wɔjwɛŋmɔ eyaŋ nibii ni yaa nɔ yɛ je lɛ mli lɛ anɔ. Kɛ́ eba lɛ nakai lɛ, nifeemɔ ko ni ebɛŋkɛ waa, ni he hiaa kwraa fe kpokpaa wulu nɔ kpee ko shishijee lɛ baabati wɔ shi trukaa. Ani ole nifeemɔ ni ji?

2. Mɛni hewɔ Yesu kɛɛ ekaselɔi lɛ akɛ ‘amɛya nɔ amɛbu’ lɛ?

2 Be ni Yesu Kristo kɛ ekaselɔi lɛ wieɔ “shihilɛ gbɛjianɔtoo lɛ  naagbee gbii lɛ” ahe lɛ, ekɛɛ amɛ akɛ: “Nyɛyaa nɔ nyɛkwɛa, nyɛyaa nɔ nyɛshia kpe, ejaakɛ nyɛleee be ni ato lɛ.” No sɛɛ lɛ, ekɛɛ amɛ shii abɔ akɛ: “Nyɛyaa nɔ nyɛbua.” (Mat. 24:3; kanemɔ Marko 13:32-37.) Be ni Mateo bɔɔ sane kome too nɛɛ nɔŋŋ he amaniɛ yɛ ewolo lɛ mli lɛ, ehã wɔle akɛ Yesu bɔ ekaselɔi lɛ kɔkɔ ni amɛhiɛ ahi amɛhe nɔ, ekɛɛ amɛ akɛ: “Nyɛyaa nɔ nyɛbua, ejaakɛ nyɛleee gbi nɔ ni nyɛ-Nuŋtsɔ lɛ baaba.” No sɛɛ lɛ, esaa ewie akɛ: “Nyɛsaa nyɛhe nyɛtoa, ejaakɛ nɔ ŋmɛlɛtswaa ni nyɛsusuuu akɛ no ni lɛ, gbɔmɔ Bi lɛ baaba.” Ewie ekoŋŋ akɛ: “Nyɛyaa nɔ nyɛbua, ejaakɛ nyɛleee gbi lɛ loo ŋmɛlɛtswaa lɛ.”Mat. 24:42-44; 25:13.

3. Mɛni hewɔ wɔbuɔ Yesu kɔkɔbɔɔ lɛ akɛ eji hiɛdɔɔ sane lɛ?

3 Yehowa Odasefoi buɔ Yesu kɔkɔbɔɔ nɛɛ akɛ eji hiɛdɔɔ sane. Wɔle akɛ “naagbee be lɛ” mli wɔyɔɔ lɛ, ni akɛ, etsɛŋ kwraa “amanehulu kpeteŋkpele” lɛ baaje shishi! (Dan. 12:4; Mat. 24:21) Taakɛ Yesu gba lɛ, Yehowa tsuji miishiɛ Maŋtsɛyeli lɛ he sane kpakpa lɛ yɛ shikpɔŋ lɛ nɔ fɛɛ. Yɛ nakai beiaŋ nɔŋŋ lɛ, aawu tai yɛ heihei, ni helai, shikpɔŋhosomɔi, kɛ hɔji miisu mɛi atsui yɛ je lɛŋ he fɛɛ he. Mɛi ajeŋba ekpɔtɔ, ni amale jamɔi kɛ basabasafeemɔ efa. (Mat. 24:7, 11, 12, 14; Luka 21:11) Wɔkɛ miishɛɛ miikpa be ni Yesu baaba lɛ gbɛ, ni wɔle akɛ ebaahã nibii fɛɛ ni Nyɔŋmɔ eto eyiŋ akɛ ebaafee lɛ aba mli.Mar. 13:26, 27.

NAAGBEE LƐ EBƐŊKƐ KPAAKPA!

4. (a) Mɛni hewɔ wɔbaanyɛ wɔkɛɛ akɛ, amrɔ nɛɛ Yesu le be ni Harmagedon ta lɛ baafɛ lɛ? (b) Eyɛ mli akɛ wɔleee be ni amanehulu kpeteŋkpele lɛ baaje shishi moŋ, shi mɛni wɔle?

4 Kɛ́ wɔtee kpokpaa wulu nɔ kpee lɛ, wɔle be ni nifeemɔ lɛ baaje shishi. Shi wɔnyɛŋ wɔle be ni amanehulu kpeteŋkpele lɛ baaje shishi lɛ kɔkɔɔkɔ. Be ni Yesu yɔɔ shikpɔŋ lɛ nɔ lɛ, ewie akɛ: “Nakai gbi lɛ kɛ nakai ŋmɛlɛtswaa lɛ, mɔ ko mɔ ko leee, bɔfoi ni yɔɔ ŋwɛi lɛ tete loo Bi lɛ tete leee, ja Tsɛ lɛ kɛkɛ.” (Mat. 24:36) Shi amrɔ nɛɛ wɔbaanyɛ wɔwie akɛ, Kristo le be ni Harmagedon ta lɛ baaje shishi, ejaakɛ Nyɔŋmɔ ehala lɛ akɛ mɔ ni baanyiɛ hiɛ yɛ ta nɛɛ mli. (Kpoj. 19:11-16) Ni wɔ hu? Kɛbashi ŋmɛnɛ lɛ, wɔleee be lɛ, ni enɛ hewɔ ehe miihia waa ni wɔya nɔ wɔbu lɛ. Yehowa lɛ, kɛjɛ blema tɔ̃ɔ lɛ, ele be ni amanehulu kpeteŋkpele lɛ baaje shishi. Etsɔ hiɛ eto be pɔtɛ̃ɛ ni naagbee lɛ baaba, ni be ni je naa, ni je tsɛreɔ lɛ, be lɛ miibɛŋkɛ. Yehowa kɛɛ “ekpeŋ sɛɛ!” (Kanemɔ Habakuk 2:1-3.) Shi mɛni hewɔ wɔheɔ wɔyeɔ akɛ ebaaye ewiemɔ nɔ lɛ?

5. Okɛ nɔkwɛmɔnɔ ko atsɔɔ nɔ hewɔ ni wɔbaanyɛ wɔwie akɛ, nibii fɛɛ ni Yehowa gbaa lɛ baa mli yɛ amɛbe naa pɛpɛɛpɛ.

5 Yehowa gbalɛi fɛɛ baa mli yɛ be ni eto lɛ naa pɛpɛɛpɛ! Akɛ nɔkwɛmɔnɔ lɛ, susumɔ gbi ni ekpɔ̃ Israelbii lɛ kɛjɛ nyɔŋyeli mli yɛ Ejipt lɛ he okwɛ. Nakai gbi lɛ ji Nisan 14, 1513 D.Ŋ.B. Mose wie yɛ gbi nɛɛ he akɛ: “Yɛ afii ohai ejwɛ kɛ nyɔŋmai etɛ lɛ naagbee mli, nakai gbi lɛ nɔ nɔŋŋ eba mli akɛ Yehowa tai lɛ fɛɛ je Mizraim [loo Ejipt] shikpɔŋ lɛ nɔ.” (2 Mose 12:40-42) Abɔi “afii ohai ejwɛ kɛ nyɔŋmai etɛ” nɛɛ kanemɔ kɛjɛ afi 1943 D.Ŋ.B., ejaakɛ nakai afi lɛ nɔ kpaŋmɔ ni Yehowa kɛ Abraham kpaŋ lɛ bɔi nitsumɔ. (Gal. 3:17, 18) Sɛɛ mli lɛ, Yehowa kɛ Abraham wie, ni ekɛɛ lɛ akɛ: “Ná ole akɛ oseshibii aaatsɔmɔ gbɔi yɛ shikpɔŋ ni jeee amɛnɔ nɔ; ni amɛaasɔmɔ amɛ, ni nomɛi aaawa amɛyi afii ohai ejwɛ.” (1 Mose 15:13; Bɔf. 7:6) Yiwaa “afii ohai ejwɛ” nɛɛ je shishi yɛ afi 1913 D.Ŋ.B., be ni atse Isak fufɔ ni Ishmael bɔi ehe fɛoyeli lɛ, ni eba naagbee  yɛ afi 1513 D.Ŋ.B., be ni Israelbii lɛ shi Ejipt lɛ. (1 Mose 21:8-10; Gal. 4:22-29) Ni tsɔɔ akɛ, Yehowa tsɔ hiɛ eto be ni ebaakpɔ̃ ewebii lɛ, ni efee nakai afii ohai ejwɛ sɔŋŋ dani be lɛ shɛ!

6. Mɛni hewɔ wɔyɔɔ nɔmimaa akɛ Yehowa baabaa ewebii ayi lɛ?

6 Yoshua fata mɛi ni Yehowa kpɔ̃ kɛje Ejipt lɛ ahe. Sɛɛ mli lɛ, ekɛɛ Israelbii lɛ akɛ: “Nyɛle yɛ nyɛtsui mli fɛɛ kɛ nyɛsusuma mli fɛɛ akɛ nibii kpakpai fɛɛ ni Yehowa, nyɛ-Nyɔŋmɔ lɛ, wie yɛ nyɛhewɔ lɛ, emli ekome folo ekaaa shi, fɛɛ eba mli ehã nyɛ, emli ekome folo ekaaa shi.” (Yosh. 23:2, 14) Wɔ hu wɔyɛ nɔmimaa akɛ, Yehowa baabaa ewebii lɛ ayi kɛfo amanehulu kpeteŋkpele lɛ, taakɛ ewo shi akɛ ebaafee lɛ. Shi akɛ aŋkroaŋkroi lɛ, ja wɔtee nɔ wɔbu dani abaahere wɔyiwala.

JA WƆTEE NƆ WƆBU DANI ABAAHERE WƆYIWALA

7, 8. (a) Yɛ blema lɛ, mɛni bulɔi tsuɔ? Ni mɛni wɔkaseɔ yɛ mli? (b) Okɛ nɔkwɛmɔnɔ ko ahã kɛtsɔɔ nɔ hewɔ ni eyɔɔ oshara akɛ bulɔi baawɔ lɛ.

7 Wɔbaanyɛ wɔkase nɔ ko yɛ bulɔi ni bu blema Yerusalem maŋ lɛ kɛ maji krokomɛi ni tamɔ nakai lɛ ahe lɛ adɛŋ. Maji nɛɛ ateŋ babaoo yɛ ni atswa gbogboi ni kwɔlɔ kɛfo amɛhe, bɔ ni afee ni henyɛlɔi akanyɛ amɛbote mli. Akɛni gbogboi nɛɛ kwɔlɔ hewɔ lɛ, maŋ lɛ bulɔi lɛ ateŋ mɛi komɛi damɔɔ nɔ, koni amɛnyɛ amɛna shɔŋŋ. Amɛteŋ mɛi komɛi hu damɔɔ maŋ lɛ geeti lɛ naa. Kɛ́ bulɔi lɛ na ni henyɛlɔ ko miiba ebatutua maŋ lɛ, amɛbɔɔ maŋbii lɛ kɔkɔ. (Yes. 62:6) Bulɔi lɛ le akɛ ehe miihia ni amɛhã amɛhiɛ ahi amɛhe nɔ be fɛɛ be, shwane kɛ nyɔɔŋ fɛɛ, ejaakɛ kɛ́ amɛhiɛ je amɛhe nɔ fioo po lɛ, amɛkɛ mɛi awala baawo oshara mli.Ezek. 33:6.

8 Be ni Yudafoi ayinɔsaneŋmalɔ Josephus gbaa bɔ ni fee ni Roma asraafoi lɛ ŋɔ Yerusalem yɛ afi 70 Ŋ.B. lɛ, ewie akɛ, no mli lɛ bulɔi ni yɔɔ maŋ lɛ geeti lɛ naa he ko ni atsɛɔ lɛ Antonia Mɔɔ lɛ ewɔ! No hewɔ lɛ, Roma asraafoi lɛ tsɔ jɛmɛ kɛbote maŋ lɛ mli, amɛbɔ mɔdɛŋ amɛwo sɔlemɔwe lɛ mli la, ni nakai fee ni akpãtã Yerusalem hiɛ. Enɛ ba yɛ amanehulu ni fe fɛɛ ni Yudafoi lɛ kɛkpe pɛŋ lɛ naagbee gbii lɛ amli.

9. Mɛɛ nifeemɔ ni sa kadimɔ waa kã wɔhiɛ shi mɛi pii ajwɛŋmɔ bɛ nɔ?

9 Ŋmɛnɛ lɛ, maji babaoo hu yɛ asraafoi ni buɔ maŋbii lɛ ahe. Asraafoi nɛɛ damɔɔ hei ni atsɔmɔɔ kɛboteɔ maŋ lɛ mli lɛ, ni amɛkɛ kamerai kɛ ilɛtrɔnik tsɔji krokomɛi tsuɔ nii, bɔ ni afee ni kɛ́ henyɛlɔ ko loo nɔ kroko ni baanyɛ aye maŋ lɛ awui lɛ miiba lɛ, amɛnyɛ amɛna ni amɛtsu he nii. Shi, nɔ ko yɛ ni bulɔi nɛɛ enaaa. Amɛnaaa Nyɔŋmɔ ŋwɛi Maŋtsɛyeli lɛ, kɛ Yesu Kristo, ni ji mɔ ni Nyɔŋmɔ ehala akɛ Maŋtsɛyeli nɛɛ nɔ Maŋtsɛ lɛ. Etsɛŋ kwraa, ŋwɛi Maŋtsɛyeli nɛɛ baafã adesai anɔyelii fɛɛ anɔ ta, ni ebaakpãtã amɛhiɛ butuu. (Yes. 9:5, 6; 56:10; Dan. 2:44) Kɛ́ wɔhã wɔhiɛ hi wɔhe nɔ, wɔtee nɔ wɔpɛi Biblia gbalɛi amli, ni wɔtee nɔ wɔsɔmɔ Yehowa yɛ anɔkwayeli mli lɛ, gbi nɛɛ ebatiŋ wɔ shi trukaa.Lala 130:6.

KAAHÃ NƆ KO NƆ KO GBALA OJWƐŊMƆ

10, 11. (a) Mɛni esa akɛ wɔkwɛ wɔhe nɔ jogbaŋŋ yɛ he? Ni mɛni hewɔ? (b) Mɛni hãa onaa akɛ, Abonsam elaka mɛi koni amɛkanu Biblia mli gbalɛi ashishi?

10 Bulɔi pii nyɛɔ amɛbuɔ nyɔɔŋ fɛɛ ni amɛwɔɔɔ. Shi kɛ́ eshwɛ fioo ni amɛbaakpa lɛ, amɛnuɔ tɔlɛ he waa, ni ewaaa akɛ amɛbaawɔ. Nakai nɔŋŋ ebaanyɛ ewa kɛhã wɔ akɛ wɔbaaya nɔ wɔbu ni wɔhã wɔhiɛ ahi wɔhe nɔ be ni wɔbɛŋkɛɔ shihilɛ gbɛjianɔtoo nɛɛ naagbee lɛ. Kɛ́ wɔhãaa  wɔhiɛ ahi wɔhe nɔ lɛ, oshara baanina wɔ! Nyɛhãa wɔkwɛa nibii etɛ komɛi ni baanyɛ agbala wɔjwɛŋmɔ ni ehã wɔhiɛ aje wɔhe nɔ.

11 Abonsam miilaka mɛi. Be ni eshwɛ fioo ni Yesu baagbo lɛ, ewie “je nɛɛ nɔyelɔ lɛ” he etsɔɔ ekaselɔi lɛ shii etɛ sɔŋŋ. (Yoh. 12:31; 14:30; 16:11) No mli lɛ, Yesu le akɛ Abonsam baalaka mɛi koni amɛkanu Biblia mli gbalɛi ni kɔɔ naagbee gbii lɛ ahe lɛ ashishi, ni amɛkana nɔ hewɔ ni ehe miihia ni amɛhã amɛhiɛ ahi amɛhe nɔ. (Zef. 1:14) Ŋmɛnɛ lɛ, Satan “eshwila mɛi ni heee yeee lɛ ajwɛŋmɔi” kɛtsɔ amale jamɔi anɔ. (2 Kor. 4:3-6) Enɛ hewɔ kɛ́ wɔmiitao wɔtsɔɔ mɛi akɛ Kristo miiye nɔ akɛ Nyɔŋmɔ Maŋtsɛyeli lɛ nɔ Maŋtsɛ, ni akɛ, etsɛŋ jeŋ fɔŋ nɛɛ baaba naagbee lɛ, amɛsumɔɔɔ ni amɛboɔ toi lɛ.

12. Mɛni hewɔ esa akɛ wɔkwɛ wɔhe nɔ jogbaŋŋ koni Abonsam akalaka wɔ lɛ?

12 Esaaa akɛ wɔhãa mɛi ni sumɔɔɔ ni amɛboɔ sane lɛ toi lɛ anifeemɔ jeɔ wɔnijiaŋ wui. Esa akɛ wɔya nɔ wɔbu, ni wɔle nɔ hewɔ ni enɛ he miihia. Paulo ŋma wolo ko eyahã enyɛmimɛi Kristofoi komɛi, ni ekɛɛ amɛ akɛ: “Nyɛ diɛŋtsɛ nyɛle jogbaŋŋ akɛ Yehowa gbi lɛ miiba.” Ewie kɛfata he akɛ, eeba “tamɔ bɔ pɛ ní julɔ baa nyɔɔŋ lɛ.” (Kanemɔ 1 Tesalonikabii 5:1-6.) Yesu hu bɔ wɔ kɔkɔ akɛ: “Nyɛsaa nyɛhe nyɛtoa, ejaakɛ nɔ ŋmɛlɛtswaa ni nyɛhiɛ kãaa nɔ lɛ, gbɔmɔ Bi lɛ baaba.” (Luka 12:39, 40) Etsɛŋ, Satan baalaka mɛi ni ehã amɛnu he akɛ amɛyɛ “toiŋjɔlɛ” ni amɛyɛ “shweshweeshwe.” Amɛbaasusu akɛ nɔ fɛɛ nɔ miiya nɔ jogbaŋŋ yɛ je lɛ mli. Ni wɔ hu? Ani wɔbaaná nakai jwɛŋmɔ lɛ eko? Kɛ́ wɔtee nɔ ‘wɔshi kpe,’ ni wɔhã ‘wɔhiɛ hi wɔhe nɔ lɛ,’ ebaŋ lɛ nakai. Enɛ hewɔ esa akɛ wɔkane Biblia lɛ daa gbi ni wɔjwɛŋ nɔ ni wɔkaneɔ lɛ nɔ lɛ.

13. Mɛɛ gbɛ nɔ je lɛ mumɔ lɛ náa mɛi anɔ hewalɛ ŋmɛnɛ? Ni mɛni baaye abua wɔ koni ekaná wɔnɔ hewalɛ?

13 Je lɛ mumɔ lɛ náa bɔ ni mɛi susuɔ nii ahe amɛhãa lɛ nɔ hewalɛ. Ŋmɛnɛ lɛ, mɛi babaoo nuɔ he akɛ Nyɔŋmɔ he ehiaaa amɛ. (Mat. 5:3) Amɛkɛ amɛbe kɛ amɛhewalɛ fɛɛ tiuɔ ‘nibii ni heloo lɛ shweɔ kɛ nibii ni hiŋmɛii lɛ shweɔ lɛ’ asɛɛ. (1 Yoh. 2:16) Kɛfata he lɛ, akɛni nibii ni mɛi baanyɛ amɛkɛjie amɛhiɛtserɛ lɛ efa babaoo  hewɔ lɛ, mɛi ebasumɔ “shwɛmɔ-kɛ-ŋɔɔmɔ” waa. (2 Tim. 3:4) Nibii nɛɛ fɛɛ baanyɛ ahã wɔhiɛ aje wɔhe nɔ ni wɔkpa Yehowa sɔɔmɔ. Enɛ hewɔ Paulo kɛɛ Kristofoi akɛ ‘amɛkatsɔ hiɛ amɛto gbɛjianɔ kɛhã nibii ni heloo lɛ shweɔ’ lɛ.Rom. 13:11-14.

14. Mɛɛ kɔkɔbɔɔ yɔɔ Luka 21:34, 35 lɛ?

14 Wɔmiisumɔ ni Nyɔŋmɔ mumɔ lɛ akudɔ wɔ, moŋ fe je lɛ mumɔ lɛ, ejaakɛ no nɔ Yehowa tsɔɔ eyeɔ ebuaa wɔ koni wɔnu nibii ni baaba wɔsɛɛ lɛ ashishi. [1] (1 Kor. 2:12) Kɛ̃lɛ, akɛni ewaaa akɛ wɔhiɛ baaje wɔhe nɔ hewɔ lɛ, esa akɛ wɔkwɛ wɔhe nɔ jogbaŋŋ. Nibii komɛi ni wɔfeɔ daa gbi lɛ po baanyɛ agbala wɔjwɛŋmɔ kɛje Yehowa sɔɔmɔ nɔ. (Kanemɔ Luka 21:34, 35.) Ekolɛ mɛi baaye wɔhe fɛo yɛ je lɛ naagbee lɛ ni wɔkɛɔ akɛ ebɛŋkɛ kpaakpa lɛ hewɔ. (2 Pet. 3:3-7) Shi esaaa akɛ wɔhãa amɛwiemɔi kɛ amɛnifeemɔi lɛ jeɔ wɔnijiaŋ wui, ejaakɛ nibii pii yɛ ni hãa wɔnaa faŋŋ akɛ naagbee lɛ ebɛŋkɛ. Kɛ́ wɔmiitao ni Nyɔŋmɔ mumɔ lɛ akudɔ wɔ lɛ, esa akɛ wɔkɛ wɔnyɛmimɛi Kristofoi lɛ abɔ daa, ni wɔya asafoŋ kpeei be fɛɛ be.

Ani oofee bɔ fɛɛ bɔ ni obaanyɛ koni naagbee lɛ akabati bo shi trukaa? (Kwɛmɔ kuku 11-16)

15. Mɛni Petro, Yakobo, kɛ Yohane fee be ni Yesu kɛɛ amɛbu lɛ? Ni mɛni wɔkaseɔ yɛ mli?

15 Emuu ni wɔyeee lɛ baanyɛ ahã ewa kɛhã wɔ akɛ wɔbaaya nɔ wɔhã wɔhiɛ ahi wɔhe nɔ. Yesu le akɛ, emuu ni wɔyeee lɛ hewɔ lɛ, jeee be fɛɛ be wɔnyɛɔ wɔfeɔ nɔ ni ja. Susumɔ nɔ ni ba gbi gbɛkɛ ni enɔ jetsɛremɔ lɛ abaagbe lɛ lɛ he okwɛ. Yesu na akɛ kɛji ebiii e-Tsɛ lɛ dɛŋ yelikɛbuamɔ lɛ, enyɛŋ ekpee kaa ni kã ehiɛ lɛ naa. Enɛ hewɔ lɛ, ekɛɛ Petro, Yakobo, kɛ Yohane akɛ eyaasɔle, no hewɔ lɛ ‘amɛya nɔ amɛbu.’ Shi kaselɔi lɛ enaaa hiɛdɔɔ ni yɔɔ sane lɛ mli, kɛ nɔ hewɔ ni esa akɛ amɛya nɔ amɛbu. No hewɔ lɛ, amɛbɔi wɔɔ, ejaakɛ etɔ amɛ. No mli lɛ, etɔ Yesu hu, shi lɛ lɛ, ewɔɔɔ. Etee nɔ esɔle ehã e-Tsɛ lɛ kɛ hiɛdɔɔ, ni kulɛ, esa akɛ ekaselɔi lɛ hu afee nakai nɔŋŋ.Mar. 14:32-41.

16. Yɛ Yesu wiemɔi ni yɔɔ Luka 21:36 lɛ naa lɛ, mɛni baaye abua wɔ koni gbi lɛ akabati wɔ shi trukaa?

16 Mɛni baaye abua wɔ ni ‘wɔya nɔ wɔbu’ koni Yehowa gbi lɛ akabati wɔ shi trukaa? Esa akɛ wɔná he miishɛɛ akɛ wɔbaafee nɔ ni ja. Shi no pɛ kɛkɛ faaa. Gbii fioo komɛi dani abaagbe Yesu lɛ, ekɛɛ ekaselɔi lɛ akɛ esa akɛ amɛkɛ hiɛdɔɔ asɔle amɛhã Yehowa. (Kanemɔ Luka 21:36.) No hewɔ lɛ, kɛ́ wɔmiitao ni wɔhiɛ ahi wɔhe nɔ daa, koni gbi lɛ akabati wɔ shi trukaa lɛ, esa akɛ wɔsɔle be fɛɛ be.1 Pet. 4:7.

YAA NƆ OBU

17. Mɛni kɛ́ wɔfee lɛ, naagbee lɛ ebatiŋ wɔ shi trukaa?

17 Yesu wie akɛ: “Nɔ ŋmɛlɛtswaa ni nyɛsusuuu akɛ no ni lɛ, gbɔmɔ Bi lɛ baaba.” (Mat. 24:44) Enɛ hewɔ lɛ, esa akɛ wɔhã wɔhiɛ ahi wɔhe nɔ be fɛɛ be. Jeee be nɛɛ ji be ni esa akɛ wɔnyiɛ nibii ni wɔheloo lɛ shweɔ kɛ nibii ni Satan ewo lɛ jara yɛ je lɛ mli lɛ asɛɛ. Nibii nɛɛ yeŋ amɛbuaŋ wɔ yɛ gbɛ ko kwraa nɔ. Yehowa kɛ Yesu etsɔɔ wɔ nibii ni amɛbaafee amɛhã wɔ wɔsɛɛ kɛji wɔtee nɔ wɔhã wɔhiɛ hi wɔhe nɔ. No hewɔ lɛ, nyɛhãa wɔfea nibii ni baahã wekukpaa ni yɔɔ wɔ kɛ Yehowa teŋ lɛ mli awa, ni wɔkɛ Maŋtsɛyeli lɛ aye klɛŋklɛŋ gbɛhe yɛ wɔshihilɛ mli, ni agbɛnɛ hu, wɔhã wɔhiɛ ahi be ni wɔyɔɔ mli lɛ, kɛ nibii ni yaa nɔ yɛ je lɛ mli lɛ anɔ. Kɛ́ wɔfee nakai lɛ, abaabaa wɔyi, ni naagbee lɛ ebatiŋ wɔ shi trukaa.Kpoj. 22:20.

^ [1] (kuku 14) Kwɛmɔ wolo ni ji Nyɔŋmɔ Maŋtsɛyeli lɛ Ebɔi Nɔyeli! yitso 21 lɛ.