Petro Klɛŋklɛŋ Wolo Lɛ 4:1-19

  • Hii shi yɛ Nyɔŋmɔ suɔmɔnaa nii anaa, tamɔ bɔ ni Kristo fee lɛ (1-6)

  • Nibii fɛɛ anaagbee eshɛ etã (7-11)

  • Kristofonyo nɔnaa (12-19)

4  Akɛni Kristo na nɔ yɛ heloo mli hewɔ lɛ,+ nyɛ hu nyɛkɛ nakai jwɛŋmɔ* lɛ nɔŋŋ awajea nyɛhe tamɔ tawuu nii; ejaakɛ mɔ ni ena nɔ yɛ heloo mli lɛ, ekpa eshafeemɔ,+  koni be ni eshwɛ ehã lɛ yɛ heloo mli shihilɛ nɛɛ mli lɛ, ekahi shi yɛ nibii ni gbɔmɛi shweɔ lɛ anaa dɔŋŋ,+ shi moŋ yɛ Nyɔŋmɔ suɔmɔnaa nii anaa.+  Ejaakɛ efa hã nyɛ akɛ be ni eho momo lɛ mli lɛ nyɛtsu jeŋmajiaŋbii atsuinaa nii,+ be mli ni nyɛba nyɛjeŋ yɛ jeŋbai gbohii ni efeee mɔ hiɛgbele,* kɛ akɔnɔi ni ayeee nɔ, kɛ dãa ni anuɔ kɛtekeɔ nɔ, kɛ henaabuamɔi* ni yɔɔ hoo, kɛ dãanumɔ mli akaŋshii, kɛ amagajamɔi ni ahiɔ lɛ amli lɛ.+  Efeɔ amɛ naakpɛɛ akɛ nyɛkɛ amɛ shaaa foi kɛyaaa nakai gbɛ gbonyo ni ji jeŋba ni esaaa lɛ nɔŋŋ nɔ dɔŋŋ, ni no hewɔ lɛ amɛwieɔ nyɛhe efɔŋ.+  Shi mɛi nɛɛ baabu akɔntaa amɛhã mɔ ni esaa ehe eto ni baakojo hiɛkãalɔi kɛ gbohii fɛɛ lɛ.+  Anɔkwa, enɛ hewɔ ajaje sane kpakpa lɛ atsɔɔ gbohii lɛ hu lɛ,+ koni amɛhi shi yɛ mumɔ lɛ naa yɛ Nyɔŋmɔ hiɛ, tsɛbelɛ yɛ gbɔmɛi ahiɛ lɛ akojo amɛ yɛ heloo lɛ naa.  Shi nibii fɛɛ anaagbee eshɛ etã. No hewɔ lɛ, nyɛjwɛŋa jogbaŋŋ,+ ni nyɛhiɛ ahia nyɛhe nɔ* yɛ sɔlemɔi agbɛfaŋ.+  Shi titri lɛ, nyɛsumɔsumɔa nyɛhe kɛ suɔmɔ ni mli wa,+ ejaakɛ suɔmɔ haa eshai babaoo anɔ.+  Nyɛteŋ mɔ fɛɛ mɔ afea enyɛmi gbɔ ni mligbigblimɔ akahi mli.+ 10  Bɔ ni mɔ fɛɛ mɔ ená nikeenii ko lɛ, nyɛkɛsɔmɔa nyɛhe akɛ Nyɔŋmɔ dromɔ lɛ ni jeɔ kpo yɛ gbɛi srɔtoi anɔ lɛ anɔkwɛlɔi kpakpai.+ 11  Kɛ́ wiemɔ mɔ ko wieɔ lɛ, ewie akɛ Nyɔŋmɔ wiemɔi; kɛ́ sɔɔmɔ mɔ ko sɔmɔɔ lɛ, esɔmɔ akɛ hewalɛ ni Nyɔŋmɔ hãa lɛ mli ejɛɔ esɔmɔɔ;+ koni atsɔ Yesu Kristo nɔ awo Nyɔŋmɔ hiɛ nyam yɛ nii fɛɛ mli.+ Lɛ enɔ ji anunyam lɛ kɛ hewalɛ lɛ kɛmiiya naanɔi anaanɔ. Amen. 12  Mɛi ni asumɔɔ, nyɛkahãa shihilɛi ni mli wawai ni tamɔ la ni nyɛkɛkpeɔ lɛ feɔ nyɛ naakpɛɛ,+ tamɔ nɔ ni nyɛkɛ nɔ ko srɔto ko miikpe. 13  Shi moŋ babaoo ni nyɛnaa Kristo amanehului lɛ eko lɛ,+ nyɛmii ashɛa nyɛhe daa,+ koni be mli ni ajieɔ enunyam lɛ kpo lɛ, nyɛmii asaa ashɛ nyɛhe ni nyɛmli afili nyɛ.+ 14  Kɛ́ Kristo gbɛ́i lɛ hewɔ ajɛɔ nyɛ lɛ, nyɛyɛ miishɛɛ,+ ejaakɛ anunyam mumɔ lɛ, hɛɛ, Nyɔŋmɔ mumɔ lɛ jɔɔ ehe yɛ nyɛnɔ. 15  Shi nyɛteŋ mɔ ko mɔ ko akana nɔ akɛ gbɔmɔgbelɔ loo julɔ loo efɔŋfeelɔ loo mɔ ni kɛ ehe woɔ mɛi krokomɛi asaji amli.+ 16  Shi kɛ́ mɔ ko miina nɔ akɛ Kristofonyo lɛ, ehiɛ akagbo,+ shi moŋ eya nɔ ewo Nyɔŋmɔ hiɛ nyam be mli ni gbɛ́i nɛɛ kã enɔ lɛ. 17  Ejaakɛ be ni ato ni abaaje kojomɔ shishi kɛjɛ Nyɔŋmɔ shĩa lɛ nɛ.+ Agbɛnɛ, kɛ́ wɔnɔ ejeɔ shishi yɛ lɛ,+ mɛi ni booo Nyɔŋmɔ sane kpakpa lɛ toi lɛ, te amɛnaagbee baafee tɛŋŋ?+ 18  “Ni kɛ́ ekpakpa ko dani abaahere jalɔ yiwala lɛ, belɛ mɛni baaba mɔ ni ebuuu Nyɔŋmɔ kɛ mɔ ni ji eshafeelɔ lɛ nɔ?”+ 19  No hewɔ lɛ, mɛi ni naa nɔ yɛ Nyɔŋmɔ suɔmɔ naa lɛ aya nɔ atu amɛhe* amɛwo Bɔlɔ anɔkwafo lɛ dɛŋ* be mli ni amɛfeɔ ekpakpa lɛ.+

Shishigbɛ Niŋmaa

Loo “faishitswaa; yiŋkpɔŋmɔɔ.”
Loo “nyɛnyɛŋtswibɔi.” Greek wiemɔ ni ji a·selʹgei·a lɛ piifeemɔ. Kwɛmɔ Wiemɔi Titrii Amligbalamɔ lɛ.
Loo “okpɔlɔŋmɛi.”
Loo “nyɛfea klalo; nyɛhiɛ atsɛ̃a.”
Loo “amɛsusumai.”
Loo “aya nɔ ajie amɛhe yi amɛhã Bɔlɔ anɔkwafo lɛ; aya nɔ ajie amɛsusumai ayi amɛhã Bɔlɔ anɔkwafo lɛ.”