Wolo Ni Akɛmaje Efesobii Lɛ 1:1-23

  • Ŋamɔ (1, 2)

  • Mumɔŋ jɔɔmɔi (3-7)

  • Aabua nibii fɛɛ anaa yɛ Kristo lɛ mli (8-14)

    • “Gbɛjianɔtoo ko” yɛ bei ni ato lɛ mli (10)

    • Akɛ mumɔ lɛ sɔo amɛnaa akɛ ‘gboshinii lɛ he nɔmimaa’ (13, 14)

  • Paulo da Nyɔŋmɔ shi yɛ Efesobii lɛ ahemɔkɛyeli lɛ hewɔ, ni esɔle ehã amɛ (15-23)

1  Paulo, Kristo Yesu bɔfo yɛ Nyɔŋmɔ suɔmɔ naa, ŋma kɛyahã mɛi krɔŋkrɔŋi ni yɔɔ Efeso+ ni ji anɔkwafoi ni kɛ Kristo Yesu efee ekome lɛ:  Dromɔ kɛ toiŋjɔlɛ ni jɛ Nyɔŋmɔ, wɔ-Tsɛ lɛ, kɛ Nuŋtsɔ Yesu Kristo dɛŋ lɛ ahã nyɛ.  Ajie wɔ-Nuŋtsɔ Yesu Kristo Nyɔŋmɔ lɛ kɛ e-Tsɛ lɛ yi, ejaakɛ yɛ ekome ni wɔ kɛ Kristo efee lɛ hewɔ lɛ, ejɔɔ wɔ kɛ mumɔŋ jɔɔmɔ fɛɛ jɔɔmɔ yɛ ŋwɛiniiaŋ,+  tamɔ bɔ ni ehala wɔ dani ato je lɛ shishi,* ni wɔ kɛ lɛ* afee ekome koni wɔfee krɔŋkrɔŋ ni kpa ko akahi wɔhe+ yɛ ehiɛ yɛ suɔmɔ mli lɛ.  Ejaakɛ ekpɛ mli eto akɛ ebaatsɔ Yesu Kristo nɔ eŋɔ wɔ+ akɛ lɛ diɛŋtsɛ ebii,+ bɔ ni sa ehiɛ kɛ agbɛnɛ hu, yɛ esuɔmɔ naa,+  koni ajie eyi yɛ edromɔ ni yɔɔ nyam+ ni ejɛ mlihilɛ mli etsɔ mɔ ni esumɔɔ lɛ+ lɛ nɔ ekɛdro wɔ lɛ hewɔ.  Atsɔ mɔ nɛɛ lá lɛ nɔ awo kpɔmɔnɔ lɛ kɛjie wɔ,+ hɛɛ, akɛ wɔtɔmɔi lɛ keɔ wɔ,+ yɛ Nyɔŋmɔ dromɔ babaoo lɛ naa.  Ehã nɛkɛ dromɔ nɛɛ eteke nɔ ehã wɔ yɛ hiɛshikamɔ kɛ niiashishinumɔ* fɛɛ mli  kɛtsɔ esuɔmɔnaa nii lɛ he teemɔŋ sane krɔŋkrɔŋ+ lɛ ni ehã wɔle lɛ nɔ. Lɛ diɛŋtsɛ ekpɛ eyiŋ yɛ no he bɔ ni sa ehiɛ 10  kɛhã gbɛjianɔtoo ko* yɛ bei ni ato lɛ naagbee, koni ebua nibii fɛɛ anaa yɛ Kristo lɛ mli, nii ni yɔɔ ŋwɛi kɛ nii ni yɔɔ shikpɔŋ lɛ nɔ lɛ.+ Hɛɛ, yɛ lɛ 11  mɔ ni wɔ kɛ lɛ efee ekome ni ahala wɔ kɛ lɛ hu akɛ niyelɔi lɛ mli,+ ejaakɛ mɔ ni tsuɔ nibii fɛɛ ni ekpɛɔ eyiŋ yɛ he lɛ ahe nii yɛ esuɔmɔ naa lɛ, tsɔ hiɛ ehala wɔ yɛ eyiŋtoo lɛ naa, 12  koni atsɔ wɔ mɛi ni wɔná hiɛnɔkamɔ yɛ Kristo lɛ mli klɛŋklɛŋ lɛ nɔ ajie Nyɔŋmɔ yi ni awo ehiɛ nyam. 13  Shi nyɛ hu, be ni nyɛnu anɔkwale wiemɔ lɛ, ni ji nyɛyiwalaheremɔ lɛ he sane kpakpa lɛ, nyɛná hiɛnɔkamɔ yɛ emli. Be ni nyɛhe nyɛye sɛɛ lɛ, atsɔ enɔ akɛ mumɔ krɔŋkrɔŋ ni awo he shi lɛ sɔo nyɛnaa,+ 14  ni no ji wɔgboshinii lɛ he nɔmimaa*+ kɛ yiŋtoo akɛ atsɔ kpɔmɔnɔ+ ko nɔ ajie Nyɔŋmɔ diɛŋtsɛ webii* lɛ,+ koni akɛjie eyi ni akɛwo ehiɛ nyam. 15  Enɛ hewɔ ni mi hu, kɛjɛ be ni minu hemɔkɛyeli ni nyɛyɔɔ yɛ Nuŋtsɔ Yesu mli, kɛ suɔmɔ kpo ni nyɛjieɔ nyɛtsɔɔ mɛi krɔŋkrɔŋi lɛ fɛɛ lɛ he lɛ, 16  mikpaaa shidaa yɛ nyɛhewɔ lɛ. Miyaa nɔ mitsĩɔ nyɛtã yɛ misɔlemɔi amli, 17  koni wɔ-Nuŋtsɔ Yesu Kristo Nyɔŋmɔ lɛ, anunyam Tsɛ lɛ, ahã nyɛ hiɛshikamɔ kɛ kpojiemɔ mumɔ yɛ ehe nilee krɔŋŋ lɛ mli.+ 18  Ehã nyɛtsui hiŋmɛii anɔ etse, koni nyɛle hiɛnɔkamɔ ni etsɛ nyɛ kɛba mli lɛ, kɛ anunyam babaoo ni eyɔɔ akɛ gboshinii kɛhã mɛi krɔŋkrɔŋi lɛ,+ 19  kɛ bɔ ni ehewalɛ kpele lɛ tekeɔ nɔ babaoo kɛhãa wɔ mɛi ni wɔheɔ Nuŋtsɔ lɛ nɔ wɔyeɔ lɛ.+ Anaa hewalɛ kpele nɛɛ yɛ bɔ ni ekɛ enyɛmɔ kpele lɛ tsu nii 20  yɛ Kristo gbɛfaŋ lɛ mli, be ni etee lɛ shi kɛjɛ gbohii ateŋ, ni ekɛ lɛ ta eninejurɔ nɔ+ yɛ ŋwɛiniiaŋ lɛ, 21  ni ehã enɔ kwɔ kwraa fe nɔyeli fɛɛ nɔyeli, kɛ hegbɛ fɛɛ hegbɛ, kɛ hewalɛ fɛɛ hewalɛ, kɛ onukpayeli fɛɛ onukpayeli, kɛ gbɛ́i fɛɛ gbɛ́i ni awo,+ jeee yɛ je nɛɛ* mli kɛkɛ, shi moŋ yɛ nɔ ni baaba lɛ hu mli. 22  Agbɛnɛ hu, Nyɔŋmɔ kɛ nibii fɛɛ ewo Kristo najiashi,+ ni ekɛ lɛ efee nibii fɛɛ yitso ehã asafo lɛ,+ 23  ni ji egbɔmɔtso+ lɛ ni ebɔyimɔ lɛ woɔ nibii fɛɛ obɔ yɛ gbɛ fɛɛ gbɛ nɔ lɛ.

Shishigbɛ Niŋmaa

Greek sht. ŋm., “dani ashɛ (dumɔwu) afɔ̃ shi,” ni ji, dani Adam kɛ Hawa bɔi amɛbii lɛ ahɔŋɔɔ.
Ni ji, wɔ kɛ Kristo.
Loo “jwɛŋmɔ kpakpa.”
Loo “koni eto nibii ahe gbɛjianɔ.”
Loo “shiŋmɛɛnɔ (shika ni akɛfɔ̃ɔ shi kɛtsɔɔ akɛ abaahé nɔ ko lɛɛlɛŋ); nɔ ni baaba lɛ he shiwoo.”
Greek sht. ŋm., “nii.”
Loo “yinɔ nɛɛ; shihilɛ gbɛjianɔtoo nɛɛ.” Kwɛmɔ Wiemɔi Titrii Amligbalamɔ lɛ.