1-2. Me vaka eda raica ena ivakaraitaki nei Angelito, na cava meda cakava?

ERAU ivakadinadina i Jiova na nomu itubutubu? Ke vaka kina, mo nanuma tiko ni nomu veivolekati kei Jiova e sega ni vakatau vei rau. Ke rau qaravi Jiova na noda itubutubu se sega, e noda itavi yadua meda bucina noda veiwekani kei Jiova.

² Meda dikeva mada na nona ivakaraitaki o Angelito, e dua na tacida tagane. E susu ena dina. Ia ni se cauravou lailai, e vakila ni sega ni veivolekati kei na Kalou. E kaya, “Au qaravi Jiova ga niu via muri ratou e vale.” Na cava e qai cakava o Angelito? E vakayagataka e levu nona gauna me wilika na iVolatabu, vakasamataka vakatitobu, e tekivu masu wasoma tale ga vei Jiova. E yaga vakacava? E kaya, “Au vulica ni sala duadua ga au na veivolekati kina kei na Tamaqu dauloloma o Jiova, oya meu kilai koya vinaka.” Na ka e cakava o Angelito eda vakasamataka kina eso na taro bibi: Na cava na kedrau duidui ni tukuni meda kilai Jiova tu ga kei na noda kilai koya vinaka? Eda na kilai Jiova vinaka vakacava?

3. Na cava na duidui ni noda kilai Jiova kei na noda kilai koya vinaka?

³ Eda rawa ni kaya ni dua e kilai Jiova, qori e dusia ni kila vinaka na yacana, se kila vinaka eso na ka e cakava se tukuna. Ia e levu tale na ka e okati kina. E bibi me tiko na  gauna meda vulici Jiova kina kei na nona itovo totoka. Qori na sala eda na kila kina na vuna e dau cakava se tukuna kina e dua na ka. Eda na kila tale ga ke vakadonuya na ka eda vakasamataka, noda vakatulewa, kei na ka eda cakava. Nida kila vinaka na ka e vinakata o Jiova, meda muria sara na ka eda vulica.

4. E yaga vakacava nida dikeva eso na ivakaraitaki vakaivolatabu?

⁴ Era na vakalialiai keda eso nida via qaravi Jiova. De dua era tusaqati keda nida tekivu veimaliwai kei ira na nona tamata. Ia ke da nuitaki Jiova, ena sega vakadua ni biuti keda. Eda sa bucina tiko na noda veiwekani kei na Kalou me tawamudu. Vakacava eda rawa ni kilai Jiova vinaka? Io, e rawa! Eda vakadinadinataka qori ena ivakaraitaki i Mosese kei Tui Tevita. Erau vakataki keda ga, ia erau kilai Jiova vinaka. Nida vulica tiko na nodrau ivakaraitaki, eda na sauma e rua na taro qo: Erau mai kilai Jiova vakacava? Na cava eda vulica vei rau?

5. Na cava e digia o Mosese?

⁵ E digia o Mosese me qarava na Kalou. Ni sa rauta ni yabaki 40 o Mosese, e digia me veimaliwai kei ira na Iperiu, era tamata ni Kalou. Ia e sega ni via vakatokai “me luvena na raluve ni Ijipita.” (Iper. 11:24) E sega ni vinakata o Mosese me rogo. E kila vinaka ni na cudru o Fero ke tokoni ira na Isireli era vesu tu e Ijipita. Ni tui qaqa o Fero, era raici koya na kai Ijipita me kalou. Ia e vakaraitaka o Mosese ena ituvaki qori ni kaukaua na nona vakabauta! E nuitaki Jiova. Qori na vuna e veitokani voleka kina kei Jiova ena nona bula taucoko.—Vkai. 3:5.

6. Na cava eda vulica vei Mosese?

⁶ Na cava eda vulica? Me vakataki Mosese, e vinakati meda vakatulewa: Vakacava eda na digia meda qaravi Jiova, meda maliwai ira tale ga na nona tamata? De dua eda vakuai keda ena levu na ka meda qaravi Jiova, eda kila tale ga nira na tusaqati keda o ira na sega ni qaravi Jiova. Ia ke da nuitaka na Tamada vakalomalagi, eda nuidei ni na tokoni keda!

7-8. Na cava e vulica tiko ga o Mosese?

⁷ E vulica tiko ga o Mosese na itovo i Jiova, e cakava tale ga na nona inaki. Kena ivakaraitaki, ni kerei Mosese o Jiova me sereki ira na Isireli, e sega ni nuidei, vakavica nona tukuna vei Jiova ni sega ni ganiti koya na itavi qori. E vosa vua o Jiova ena yalololoma, e vukei koya. (Lako 4:10-16) E rawa kina ni lai tukuna na itukutuku ni veilewai warumisa vei Fero. E qai raica o Mosese na kaukaua i Jiova ni vakarusai Fero kei na nona mataivalu ena Wasa Damudamu me vakabulai ira na Isireli.—Lako 14:24-28; Same 136:15.

⁸ Nira sere mai Ijipita na Isireli, era vosakudrukudru tiko ga. Ia e raica o Mosese na levu ni vosovoso i Jiova vei ira na nona tamata era sereki mai vakabobula. (Same 78:40-43) O Jiova e via vakarusai ira na Isireli, ia e kerei koya o Mosese me kua ni cakava. E mani rogoca o Jiova na nona vakamamasu. E vulica i keri o Mosese na levu ni yalomalumalumu i Jiova.—Lako 32:9-14.

9. Eda kila vakacava ena Iperiu 11:27 na nodrau veivolekati o Mosese kei Jiova?

 ⁹ Nira biubiu mai Ijipita na Isireli, e vakila o Mosese ni rau sa qai veivolekati ga kei Jiova. E vaka ga e raica tiko na Tamana vakalomalagi. (Wilika Iperiu 11:27.) Na levu ni nodrau veivolekati, e kaya na iVolatabu: “Ni dau vosa o Jiova vei Mosese, e vosa sara ga vua e matana, me vaka ga ni vosa e dua na tamata vua e dua tale.”—Lako 33:11.

10. Na cava meda cakava meda kilai Jiova vinaka kina?

¹⁰ Na cava eda vulica? Eda na kilai Jiova vinaka nida cakava sara ga na lomana, sega nida kila ga na nona itovo. E loma i Jiova “me bula na tamata kece ga, mera mai kila vinaka na ka dina.” (1 Tim. 2:3, 4) Dua na sala eda cakava kina na lomana oya nida vakavulica eso tale ena veika me baleti koya.

11. Nida vakavulica eso tale me baleti Jiova, eda na kilai koya vinaka vakacava?

¹¹ Levu na gauna, eda na qai kilai Jiova vinaka nida vakavulica eso tale me baleti koya. Kena ivakaraitaki, eda raica na levu ni nona yalololoma ni dusimaki keda vei ira na yalomalumalumu. (Joni 6:44; Caka. 13:48) Eda vakadinata na kaukaua ni Vosa ni Kalou nira veisautaka na noda vuli iVolatabu na nodra itovo ca mera sulumaka na itovo vou. (Kolo. 3:9, 10) Eda raica tale ga na levu ni nona vosovoso o Jiova ni solia tu na gauna vei ira ena yalava mera vulici koya, mera vakabulai tale ga.—Roma 10:13-15.

12. Na cava e kerea o Mosese ena Lako Yani 33:13? Na vuna?

¹² E mareqeta o Mosese na nona veiwekani kei Jiova. Levu na cakamana veivakurabuitaki e cakava o Mosese ni tokoni koya o Jiova. Ia se kerea tiko ga ena veidokai me rau veikilai vinaka. (Wilika Lako Yani 33:13.) A kerea qori ni yabaki 80 vakacaca, e kila gona ni se levu na ka me vulica me baleta na Tamana vakalomalagi.

13. Eda na mareqeta vakacava na noda veiwekani kei Jiova?

¹³ Na cava eda vulica? Se mani vakacava na dede ni noda qaravi Jiova, meda mareqeta tiko ga na noda veiwekani kei koya. Dua na sala bibi eda na vakaraitaka kina qori, oya nida vosa vua ena masu.

14. Na cava e bibi kina na masu meda kilai Jiova vinaka?

¹⁴ Ke da vinakata me dei noda veitokani kei na dua, e bibi meda veitalanoa vakalevu. Mo toro voleka gona vei Jiova ni o masu wasoma, kua vakadua ni rere ni talaucaka vua na lomamu kei na ka o vakasamataka. (Efeso 6:18) E kaya e dua na tacida yalewa mai Taki o Krista: “Niu talaucaka na lomaqu vei Jiova qai raica nona vukei au, au lomani koya vakalevu, au nuitaki koya tale ga. Ni dau sauma o Jiova na noqu masu, au raici koya me Tamaqu, me noqu iTokani.”

15. E vakamacalataki Tui Tevita vakacava o Jiova?

¹⁵ Ena gauna e sucu kina o Tui Tevita, rau sa qaravi Jiova tu na nona itubutubu kei ira ena gauna ya. Ia e sega ni vakamumuri tu ga, e sasagataka me veivolekati kei na Kalou. E lomani koya vakalevu o Jiova. E vakamacalataki  koya ni “donu e loma[na].” (Caka. 13:22) Erau veivolekati vakacava o Tevita kei Jiova?

16. Na cava e vulica o Tevita ni raica na ibulibuli i Jiova?

¹⁶ E vulica o Tevita na veika e bulia o Jiova. Ni se gone, levu na gauna e dau tu e tautuba o Tevita me vakaraica na sipi nei tamana. De dua qori sara ga na gauna e tekivu vakasamataka kina vakatitobu na ibulibuli i Jiova. Kena ivakaraitaki, ni rai i lomalagi ena bogi, e raica e levu sara na kalokalo. Ena kila vinaka kina o Tevita na nona itovo na Dauveibuli. Sa rauta me vola: “Na lomalagi e tukuna na lagilagi ni Kalou, na maliwalala e cake e vakarogoya na cakacaka ni ligana.” (Same 19:1, 2) Ni vakasamataka o Tevita na vakatubuqoroqoro ni noda buli, e vakadinadinataka na levu ni vuku i Jiova. (Same 139:14) Ni vakananuma na ka kece e bulia o Jiova, e kila ni ka somidi sara ni vakatauvatani kei na Dauveibuli.—Same 139:6.

17. Na cava eda vulica nida vakasamataka vakatitobu na ibulibuli i Jiova?

¹⁷ Na cava eda vulica? Mo dau kauaitaka na ibulibuli i Jiova. Mo kua ni raica wale tu ga na veika e bulia o Jiova, ia mo qoroya na we ni ligana! Mo vakasamataka vakatitobu e veisiga na ka o vulica me baleti Jiova ena ka era tu wavoliti iko me vaka na kau, manumanu kei na tamata. Qori na sala o na kila kina e levu na ka me baleta na Tamamu dauloloma. (Roma 1:20) Ni o cakava qori, o na lomani koya vakalevu e veisiga.

18. Na cava e vakadinata o Tevita ena Same 18?

¹⁸ E vakadinata o Tevita ni vukei koya o Jiova. Kena ivakaraitaki, e kila o Tevita ni tokoni koya o Jiova me vakamatea na manumanu rerevaki me vaka na laione kei na bea, me taqomaka na sipi nei tamana. Ni qaqa vua na tuawa levu o Koliaci, e vakadinata ni o Jiova ga e tokoni koya. (1 Sam. 17:37) Ni drovaki Saula na tui e dauvuvu, e vakadinata tale ga o Tevita ni o Jiova e vakabulai koya. (Ulu ni Same 18) Vakasamataka mada ke dokadoka o Tevita, ena rawa ni kaya ni rawata kece qori ena nona kaukaua ga. Ia ni yalomalumalumu, e vakadinata ni tokoni koya o Jiova.—Same 138:6.

19. Na cava eda vulica vei Tevita?

¹⁹ Na cava eda vulica? Meda kua wale ga ni kerea na veivuke i Jiova, e bibi meda kila tale ga na gauna kei na sala e vukei keda kina. Ke da yalomalumalumu, eda kila ni vakaiyalayala ga na ka eda rawa ni cakava. Eda na vakadinata tale ga ni o Jiova e tokoni keda tiko. Na gauna kece eda raica kina na veivuke i Jiova, eda na volekati koya vakalevu. Qori na ka e vakadinadinataka e dua na tacida e Viti o Isaac. E kaya: “Niu vakasamataka lesu noqu bula, au vakadinadinataka nona vukei au o Jiova mai na gauna au vulica kina na iVolatabu me yacova mai nikua. Au vakila niu volekati koya sara ga.”

20. Na cava eda vulica ena nodrau veitokani o Jiova kei Tevita?

²⁰ E vakatotomuria o Tevita na itovo i Jiova. E buli keda o Jiova me rawa nida vakatotomuria na nona itovo. (Vkte. 1:26) Na levu ga ni noda vulica na itovo i Jiova, eda na vakatotomuri koya vakavinaka. E kilai Tamana vakalomalagi  vinaka o Tevita, e rawa kina ni vakatotomuria na nona itovo vei ira eso tale. Dikeva mada e dua na ivakaraitaki. E dau vakatotomuria o Tevita na yalololoma i Jiova. Sa rauta me yalololoma tale ga vua o Jiova ena gauna e valavala ca kina ni veibutakoci kei Pacisepa, qai tuvanaka me vakamatei Uraia na watina. (2 Sam. 11:1-4, 15) Ni rau veitokani voleka o Tevita kei Jiova, era taleitaki koya kina vakalevu na Isireli, e vakayagataki koya tale ga o Jiova me ivakaraitaki vei ira na vo ni tui e Isireli.—1 Tui 15:11; 2 Tui 14:1-3.

21. Me vaka e tukuni ena Efeso 4:24 kei na 5:1, na cava na yaga ni noda “vakatotomuria na Kalou”?

²¹ Na cava eda vulica? E vinakati meda “vakatotomuria na Kalou.” Nida cakava qori, ena yaga vei keda, eda na kilai Jiova vinaka tale ga. Nida vakatotomuria na nona itovo, eda vakaraitaka nida luvena.—Wilika Efeso 4:24; 5:1.

22-23. Na cava ena yaco nida muria na ka eda vulica me baleti Jiova?

²² Me vaka eda sa dikeva mai, o Jiova e vakatakilai koya vei keda ena ka e bulia kei na nona Vosa na iVolatabu. E tu ena nona Vosa e levu na kedra italanoa na nona dausokalou yalodina meda vakatotomuria, me vakataki Mosese kei Tevita. Sa cakava o Jiova na nona itavi. E vinakati tale ga meda cakava na noda itavi nida vulica e levu tale na ka me baleti koya.

²³ Ena sega ni oti rawa na noda vulica na veika me baleti Jiova. (Dauv. 3:11) Na ka ga e bibi oya meda muria na ka eda vulica me baleti koya, me kua ni levu wale tu ga na ka eda kila. Ke da muria na ka eda vulica da qai vakatotomuria na Tamada dauloloma, ena toro volekati keda tiko ga. (Jeme. 4:8) Eda kila ena nona Vosa ni na sega vakadua ni biuti ira na vakasaqarai koya.