Lako Yani 14:1-31
14 E kaya vei Mosese o Jiova:
2 “Tukuna vei ira na Isireli mera lesu mera lai keba ena mata i Pieiroci, ena kedrau maliwa o Mikitoli kei na wasawasa, donui Peali-sifoni.+ Moni qara e kea ni oni keba volekata na wasawasa.
3 Ena qai kaya o Fero me baleti ira na Isireli, ‘Era sa lako sese voli ena vanua. Sa sogolati ira na vanua talasiga.’
4 Au na vakalaiva me kaukaua na loma i Fero,+ ena cicimuri ira o koya, au na qai vakalagilagi au ena vuku i Fero kei na nona mataivalu kece,+ era na qai kila dina na kai Ijipita ni o yau o Jiova.”+ Qori sara ga na ka era cakava.
5 Oti e qai tukuni vua na tui Ijipita nira sa dro na tamata. E totolo ga na veisau ni loma i Fero kei ira na nona dauveiqaravi,+ era mani kaya: “Na cava mada eda cakava kina qo, da qai sereki ira na Isireli mai na nodra qaravi keda tiko vakabobula?”
6 E vakarautaka na nona qiqinivalu qai kauti ira na nona tamata o koya.+
7 E kauta e 600 na qiqi digitaki kei na qiqi kece tale eso ni Ijipita, qai vodo ena qiqi yadua na tamataivalu.
8 E qai vakalaiva o Jiova me kaukaua na loma i Fero na tui Ijipita, e qai cicimuri ira na Isireli o koya, ia era lako tiko yani ena yalodei*+ na Isireli.
9 Era lako yani na kai Ijipita mera cicimuri ira,+ ra qai toso tiko ga yani na ose ni qiqinivalu kece i Fero, na nona sotia dauvodo ose, kei na nona mataivalu, mera toboki ira, nira se keba volekata na wasawasa, donui Pieiroci, nira qara tu i Peali-sifoni.
10 Ni sa voleka yani o Fero, era tacake na Isireli, ra qai raica ni sa cicimuri ira yani na kai Ijipita. Dua na ka na nodra domobula na Isireli, era tagi sara vei Jiova.+
11 Era kaya vei Mosese: “Vakaevei e sega na ibulubulu e Ijipita mo kauti keimami mai kina eke, me keimami mate ena vanua talasiga?+ Na cava o sa cakava qo vei keimami, mo liutaki keimami tani mai Ijipita?
12 Sega ni ka ga qo keimami tukuna vei iko mai Ijipita ni keimami kaya, ‘Laivi keimami me keimami qaravi ira na kai Ijipita’? Ni vinaka cake me keimami qaravi ira na kai Ijipita, mai na neimami mate ena vanua talasiga.”+
13 E qai kaya o Mosese vei ira na tamata: “Ni kua ni rere.+ Ni tudei qai raica na veivakabulai i Jiova, na ka ena vakayacora o koya ena vukumuni nikua.+ Ni o ira na kai Ijipita oni raica nikua, oni na sega sara ga ni raica tale vakadua.+
14 O Jiova sara ga ena vala ena vukumuni,+ ia oni na galu voli ga.”
15 E qai kaya vei Mosese o Jiova: “Na cava o vuki tagi tiko kina vei au? Tukuna vei ira na Isireli mera tokitaka nodra keba.
16 Ia o iko, mo laveta na nomu ititoko qai dodoka yani na ligamu i wasawasa qai wasea, mera lakova kina na Isireli na qele mamaca e loma ni wasawasa.
17 Ia o yau, au sa vakalaiva me kaukaua na lomadra na kai Ijipita, mera cicimuri ira yani i loma, au na qai vakalagilagi au ena vuku i Fero, kei ira kece na nona mataivalu, na nona qiqinivalu, kei na nona sotia dauvodo ose.+
18 Era na qai kila sara ga na kai Ijipita ni o yau ga o Jiova, ena gauna au vakalagilagi au kina ena vuku i Fero, na nona qiqinivalu, kei ira na nona sotia dauvodo ose.”+
19 Sa qai biubiu na agilosi ni Kalou dina+ e dau liu tiko ena nodra keba na Isireli me lai tu mai dakudra, na duru o e dau tu e matadra e toso tale ga e dakudra, qai lai tu e muri.+
20 Oti sa mai tu sara ena maliwa ni nodra keba na kai Ijipita kei na nodra keba na Isireli.+ E o loaloa ena dua na yasana. Ena yasana adua e rarama tiko ga na bogi.+ E sega kina ni veivolekati na keba ruarua ena bogi taucoko.
21 E dodoka yani na ligana o Mosese i wasawasa,+ sa qai tosoya i muri na wasawasa o Jiova ena dua na cagi kaukaua mai na tokalau ena bogi taucoko, e vukica na botonisauloa me qele mamaca,+ e qai tawase na wai.+
22 Era mani lakova yani na qele mamaca+ na Isireli ena loma ni wasawasa, ia na wai e lalaga tu ena ligadra imatau kei na nodra imawi.+
23 Era cemuri ira yani na kai Ijipita, era tekivu muri ira e loma ni wasawasa+ na ose kece nei Fero, nona qiqinivalu, kei na nona sotia dauvodo ose.
24 Ni sa gauna ni yadra ena mataka,* e rai mai o Jiova mai na loma ni duru bukawaqa kei na o+ me raica na nodra keba na kai Ijipita, e qai vakavuna mera veilecayaki na keba ni kai Ijipita.
25 E luvaluvata na yava ni nodra qiqinivalu me dredre kina nodra vakauta, nira kaya tiko na kai Ijipita: “Meda dro, meda kua sara ga ni veitaratara kei ira na Isireli, ni vala tiko ena vukudra o Jiova, me valuti ira na kai Ijipita.”+
26 E qai kaya o Jiova vei Mosese: “Dodoka yani na ligamu i wasawasa me suka mai na wai me luvuci ira na kai Ijipita, na nodra qiqinivalu, kei na nodra sotia dauvodo ose.”
27 E dodoka sara yani o Mosese na ligana i wasawasa, e suka na wai me vaka ga e liu ni sa kida mai na mataka. Nira dro tiko na kai Ijipita, e qai kolotaki ira laivi o Jiova i loma ni wasawasa.+
28 E suka na wai ra qai luvu kece na qiqinivalu, na sotia dauvodo ose, kei ira kece na mataivalu i Fero era muri ira yani e wasawasa.+ E sega ni vakalaiva me bula tiko e dua tale vei ira.+
29 Ia o ira na Isireli era taubale ena qele mamaca e loma ni botonisauloa,+ ia na wai sa qai lalaga tu ena ligadra imatau kei na nodra imawi.+
30 E vakabulai ira gona na Isireli o Jiova ena siga oya mai na ligadra na kai Ijipita,+ era qai raica na Isireli nira sa mate tu e matasawa na kai Ijipita.
31 Era raica tale ga na lsireli na kaukaua* levu i Jiova vei ira na kai Ijipita, era tekivu rerevaki Jiova tale ga na tamata, ra qai vakabauti Jiova kei Mosese na nona dauveiqaravi.+
iVakamacala e ra
^ Ipe., “ni lave tu na ligadra.”
^ Oya rauta na 2 na kaloko ina 6 na kaloko ena mataka.
^ Ipe., “liga.”
