Nodra Cakacaka na Yapositolo 13:1-52
13 Era tiko ena ivavakoso e Anitioki eso na parofita kei na qasenivuli,+ o Panapasa kei Simioni e vakatokai me o Niqa, o Lusiu mai Kirini, o Menani erau vuli vata kei Eroti* na iliuliu ni yasana, kei Saula.
2 Nira qaravi Jiova* tiko ra qai lolo, e kaya sara na yalo tabu: “Me rau lesi o Panapasa kei Saula+ ena cakacaka au kacivi rau kina.”+
3 Ni oti nodra lolo kei na masu, era mani tabaki rau e ligadra rau sa qai lako.
4 E dusimaki rau na tagane qo na yalo tabu me rau lako sobu i Selusia, mai kea rau sa qai soko sara i Saipurusi.
5 Ni rau yaco yani i Salamisa, rau vunautaka sara na vosa ni Kalou ena nodra valenilotu na Jiu. E tomani rau tale ga o Joni, me dau vukei rau.+
6 Eratou wavokita na yanuyanu me yaco sara i Pafo, ratou sotava sara e dua na tagane daucakaisausau, e Jiu, e parofita lasu, na yacana o Pa-Jisu.
7 E tiko kei na mata ni yasana,* o Serikiu Paula, e turaga vuku. E kacivi Panapasa sara kei Saula na turaga qo ni via rogoca na vosa ni Kalou.
8 Ia e tusaqati ratou o Elima na daucakaisausau (qori sara ga na ibalebale ni yacana), e saga me kua ni vakabauta na mata ni yasana.
9 E sobuti Saula na yalo tabu, e kilai tale ga me o Paula, e wanonovi Elima
10 qai kaya: “Tamata lawaki ca, torosobu, luve ni Tevoro,+ meca ni ka vinaka kece, o na tinia enaica nomu vakatanitaka tiko na sala dodonu i Jiova?*
11 Raica, ena tau vei iko na liga i Jiova,* o na mataboko, o na sega toka mada ni raica na rarama.” Vakasauri ga e buawa qai butobuto vua na ka kece. Sa qai vakayayamo voli ni vaqara e dua me tuberi koya.
12 Ni raica na mata ni yasana na ka e yaco, e vakabauta sara ga. E kurabuitaka na veika e vulica me baleti Jiova.*
13 Eratou sa qai biubiu mai Pafo o Paula kei rau na nona itokani me ratou soko i Perika mai Pamifilia. Ia e biuti rau o Joni+ qai lesu i Jerusalemi.+
14 Oti rau biuti Perika me rau lako i Anitioki e Pisitia, rau lai curu sara ina valenilotu+ ena Siga ni Vakacecegu, rau mani dabe toka kina.
15 Ni sa wiliki oti na Lawa+ kei na nodra ivola na Parofita, era talatala sara vei rau na ivakatawa ni valenilotu, era kaya: “Kemudrau na veitacini, ke tiko vei kemudrau e dua na vosa ni veivakauqeti vei ira na lewe ni ivavakoso, mo drau tukuna.”
16 E mani tucake o Paula, e vakatabataba qai kaya:
“Kemuni na Isireli kei kemuni na rerevaka na Kalou, ni rogoca mada.
17 Na nodra Kalou na Isireli a digitaki ira na tukada, e vakacerecerei ira ena nodra tiko vulagi ena vanua o Ijipita, qai sereki ira mai ena ligana kaukaua.+
18 E vosota na nodra ivalavala ena rauta ni 40 na yabaki ena vanua talasiga.+
19 Ni vakawabokotaka oti e vitu na matanitu ena vanua o Kenani, sa qai solia na nodra vanua me ivotavota.+
20 E yaco na ka kece ya ena rauta ni 450 na yabaki.
“Oti ya e qai lesia vei ira eso na dauveilewai me yacova na gauna i Samuela na parofita.+
21 Era cikeva sara me dua na nodra tui.+ E qai soli Saula vei ira na Kalou. O Saula qo na luvei Kisi, e dua na tagane ena yavusa i Penijamini.+ E veiliutaki o koya me 40 na yabaki.
22 Ni sa biuti koya tani, e qai vakaduri Tevita me nodra tui.+ E tukuna me baleti koya: ‘Au sa raici Tevita na luvei Jese,+ e donu e lomaqu o koya,+ ena vakayacora na ka kece au vinakata.’
23 Me vaka a yalataka na Kalou, e basika ena nona kawa na nodra ivakabula na Isireli, o Jisu.+
24 Ni bera ni yaco mai o koya, sa vunautaka o Joni vei ira na lewenivanua e Isireli mera papitaiso me ivakaraitaki ni nodra veivutuni.+
25 Ia ni vakayacora tiko o Joni na nona itavi, e dau kaya: ‘O cei oni nanuma ni o yau? Sega ni o yau o koya oni nanuma tiko. Ia raica! Ena muri au mai e dua, ena sega mada ga ni ganiti au meu sereka na wa ni nona ivava.’+
26 “Raveitacini, kemuni na kawa ni vuvale i Eparama kei kemuni na dau rerevaka na Kalou, sa vakatakilai vei keda na itukutuku ni veivakabulai.+
27 Era sega ni kilai koya na lewe i Jerusalemi kei ira na nodra iliuliu, ia nira veilewaitaki koya era sa vakayacora kina na ka era dau kaya na Parofita,+ na ka e dau wiliki vakadomoilevu ena siga ni vakacecegu kece.
28 Dina nira sega ni raica e dua na yavu me mate kina,+ ra cikevi Pailato ga me vakamatei.+
29 Nira sa cakava kece na ka e volai me baleti koya, era kauti koya sobu mai na kau* ra vakadavori koya sara ena ibulubulu.*+
30 Ia na Kalou e qai vakaturi koya mai na mate.+
31 E vica vata na siga nona rairai vei ira na lako vata mai Kalili i Jerusalemi, o ira qo era mai tukuni koya vei ira na lewenivanua.+
32 “O koya gona, keirau sa tukuna tiko qo vei kemuni na itukutuku vinaka a yalataki vei ira na qase.
33 Sa mai vakayacora taucoko na Kalou vei keda na luvedra ena nona vakaturi Jisu,+ me vaka ga e volai ena ikarua ni same: ‘O iko na luvequ, nikua au sa na wili meu tamamu.’+
34 Na nona vakaturi koya me kua tale ni vuca, e kaya va qo, ‘Au na dina ena noqu vakaraitaka vei kemuni na loloma e dei au a yalataka vei Tevita.’+
35 E kaya ena dua tale na same: ‘Oni na sega ni laiva me vuca na yagona na nomuni tamata yalodina.’+
36 Ia a vakayacora sara ga o Tevita na loma ni Kalou a vakamatatataki vua ena nona itabagauna ni bera ni moce, oya ni sa mate. E qai vakadavori vata kei ira na nona qase, mani vuca na yagona.+
37 Ena yasana adua, o koya e vakatura cake na Kalou a sega sara ni vuca na yagona.+
38 “Moni kila raveitacini, ena vuku i koya qo e mai vunautaki kina vei kemuni na vosoti ni ivalavala ca.+
39 Ena vukuna tale ga, ena vakadonui kina o ira kece era vakabauta,+ na ka oni sega ni rawata ena nomuni muria na Lawa e vola o Mosese.+
40 Moni qarauna gona me kua ni yaco vei kemuni na ka era cavuta na Parofita:
41 ‘Ni raica, o kemuni na dauveivakalialiai, ni kidroa, ni yavu yani, niu sa cakava tiko e dua na cakacaka ena nomuni gauna. Ke dua mada ga e vakamacalataka vakavinaka vei kemuni na cakacaka au cakava tiko qo, oni na sega ga ni vakabauta.’”+
42 Ni rau vakarau curu i tuba o Paula kei Panapasa, era vakamasuti rau na lewe ni ivavakoso ke rawa ni tokaruataki ena Siga ni Vakacecegu e tarava na ka era rogoca ya.
43 Nira veisukayaki na tiko e valenilotu, era muri Paula kei Panapasa e levu na Jiu kei ira na tavuki ina lotu vakaJiu era dau qarava na Kalou. Ni rau vosa, erau vakauqeti ira mera tiko ga ena loloma soli wale ni Kalou.+
44 Ena Siga ni Vakacecegu e tarava, era voleka ni soqo vata yani na lewenikoro kece mera rogoca na vosa i Jiova.*
45 Nira raici ira na ilala levu qo na Jiu, dua na ka na nodra vuvu. Era mani vosabeci Paula, ra vakalewa tale ga na ka e tukuna.+
46 Erau qai kaya ena doudou o Paula kei Panapasa: “E dodonu me vunautaki e liu vei kemuni na vosa ni Kalou.+ Ia ni oni sega ni taleitaka, oni vakatulewataka ni sega ni ganiti kemuni na bula tawamudu, raica! keimami sa na golevi ira na lewe ni veimatanitu.+
47 O Jiova* mada ga sa vakaroti keimami ena vosa qo: ‘Au sa lesi kemuni moni nodra rarama na veimatanitu, moni tukuna yani ina iyalayala kei vuravura na noqu veivakabulai.’”+
48 Era marau sara ga na lewe ni veimatanitu nira rogoca qo, era vakalagilagia na vosa i Jiova,* era mai vakabauta o ira na yalomalumalumu era muria na sala mera bula tawamudu kina.
49 Kena ikuri, e kacivaki yani ena yasayasa taucoko ya na vosa i Jiova.*
50 Era qai vakacuruvosa na Jiu vei ira na marama kilai levu era dau rerevaka na Kalou kei ira na turaga dokai ena koro, ra qai bukana na nodrau vakacacani+ o Paula kei Panapasa, qai kolotaki rau ena taudaku ni nodra koro.
51 Erau mani kuretaka tani na kuvu mai yavadrau,* rau gole sara i Ikoniona.+
52 Era vakila tu ga na marau na tisaipeli,+ e sobuti ira tale ga na yalo tabu.
iVakamacala e ra
^ Na kovana ni dua na yasana e Roma. Raica na iVakamacala ni Vosa.
^ Se “na vunikau.”
^ Se “ena ibulubulu nanumi.”
