iMatai ni Tui 15:1-34
15 Ena ika18 ni yabaki ni veiliutaki i Tui Jerepoami+ na luvei Nipati, sa tui e Juta o Epaijami.+
2 E veiliutaki e Jerusalemi me tolu na yabaki. Na yaca i tinana o Meaka+ na makubui Apisalomi.
3 E muria tiko ga na ivalavala ca kece e cakava o tamana e bula e liu vua, e sega ni taucoko* na lomana vei Jiova na nona Kalou me vaka na loma i Tevita na tukana.
4 Ia ena vuku i Tevita+ e solia kina o Jiova na nona Kalou e dua na cina e Jerusalemi+ ni vakatura na luvena tagane me taravi koya me taqomaki Jerusalemi tale ga.
5 Ni cakava o Tevita na ka e donu ena mata i Jiova, e sega ni gole tani ena dua na ka e vakaroti koya kina ena gauna taucoko ni nona bula, vakavo ga na ka e baleti Uraia na Itaiti.+
6 Erau veivaluvaluti o Riopoami kei Jerepoami ena gauna taucoko ni nona bula.+
7 Na vo ni itukutuku me baleti Epaijami, na ka kece a cakava, era volai ena ivola ni itukutuku ni nodra gauna na tui Juta?+ Erau veivaluvaluti tale ga o Epaijami kei Jerepoami.+
8 E qai davo vata kei ira na tukana o Epaijami era buluti koya ena Koro i Tevita, e veiliutaki sara o Esa+ na luvena tagane me sosomitaki koya.+
9 Ena ika20 ni yabaki i Tui Jerepoami e Isireli, e qai veiliutaki o Esa e Juta.
10 E 41 na yabaki na nona veiliutaki e Jerusalemi. Na yaca i buna o Meaka+ na makubui Apisalomi.
11 E cakava o Esa na ka e donu ena mata i Jiova+ me vakataki Tevita na tukana.
12 E cemuri ira na tagane saqamua ni valenisoro mai na vanua,+ e kauta tani na matakau vakasisila* kece era cakava na tukana.+
13 E vakasivoi Meaka+ mada ga na buna mai na nona itutu vakamarama, ni a cakava e dua na matakau velavela me qaravi kina na duru ni sokalou.* E mani musuka o Esa na nona matakau velavela+ qai vakama ena Buca o Kitironi.+
14 E sega ga ni kau tani na vanua cecere.+ Ia e taucoko* tiko ga na loma i Esa vei Jiova ena nona bula taucoko.
15 E kauta ina vale i Jiova na ka rau vakatabuya kei tamana, na siliva, na koula kei na veimataqali iyaya.+
16 Erau dau veivaluvaluti o Esa kei Pasa+ na tui Isireli.
17 E mani lako cake o Tui Pasa e Isireli me valuti Juta, e tekivu tarai* Rama+ me kua ni dua e lako yani se lesu mai* vei Tui Esa e Juta.+
18 E kauta kece o Esa na siliva kei na koula e vo tu ena valeniyau ni vale i Jiova kei na valeniyau ni valenitui me solia vei ira na nona dauveiqaravi. E qai talai ira o Esa vei Penietati na luvei Tapirimoni na luvei Esioni na tui Siria+ e tiko mai Tamasiko, e kaya:
19 “E dua tiko na nodaru veiyalayalati, vaka kina o tamaqu kei tamamu. Au vakauta yani vei iko na iloloma siliva kei na koula. Mo lako mai, mo tinia na nomu veiyalayalati kei Tui Pasa e Isireli, ena lako tani kina vei au o koya.”
20 E vakarorogo o Penietati vei Tui Esa, e talai ira sara na nona iliuliu ni mataivalu mera valuta na koro era tiko e Isireli, era qai mokuti Aijoni,+ o Tani,+ o Epeli-pecimeaka, na vanua taucoko o Kinereci, kei na vanua taucoko o Nafitalai.
21 Ni rogoca ga qori o Pasa, e cegu sara na nona tarai* Rama tiko, e mani tiko ga e Tirisa.+
22 E qai kacivi ira kece mai na Juta o Tui Esa, e sega ni dua e vo, era mani kauta na vatu kei na kau mai Rama e vakayagataka tiko o Pasa, e tarai Kipa+ kina e Penijamini kei Misipa+ o Tui Esa.
23 Na vo ni itukutuku kece i Esa, na nona kaukaua kece, na ka kece a cakava kei na koro kece a tara, era volai ena ivola ni itukutuku ni nodra gauna na tui Juta? Ia ni sa qase, e qai tauva na yavana e dua na mate.+
24 E qai davo vata kei ira na tukana o Esa, e bulu vata kei ira na tukana ena Koro i Tevita na tukana. E veiliutaki sara o Josafati+ na luvena tagane me sosomitaki koya.
25 E tui Isireli o Netapi+ na luvena tagane o Jerepoami ena ikarua ni yabaki i Tui Esa e Juta, e veiliutaki e Isireli me rua na yabaki.
26 E cakava tiko ga na ka ca ena mata i Jiova qai muria tiko ga na ivalavala i tamana+ kei na nona ivalavala ca, e vakavuna mera valavala ca kina na Isireli.+
27 E bukiveretaki koya o Pasa na luvei Eaija ena vuvale i Isakari, e mokuti koya o Pasa mai Kipiconi+ na nodra vanua na kai Filisitia, ni viribaiti Kipiconi tiko o Netapi kei ira kece na Isireli.
28 E vakamatei koya o Pasa ena ikatolu ni yabaki i Tui Esa e Juta, e mani tui o koya me kena isosomi.
29 Ena gauna ga e tui kina, e mokuti ira kece na vuvale i Jerepoami. E sega ni vakavoca e dua me bula tiko vei Jerepoami, e vakarusai ira kece me vaka na vosa i Jiova a tukuna na nona dauveiqaravi o Eaija na turaga ni Sailo.+
30 E cakava qo ena vuku ni ivalavala ca nei Jerepoami e vakavuna mera valavala ca kina na Isireli, qai vakacudrui Jiova vakalevu na Kalou ni Isireli.
31 Na vo ni itukutuku me baleti Netapi, na ka kece e cakava, e volai ena ivola ni itukutuku ni nodra gauna na tui Isireli?
32 Erau dau veivaluvaluti o Esa kei Tui Pasa e Isireli.+
33 Ena ikatolu ni yabaki i Tui Esa e Juta, e tui Isireli taucoko mai Tirisa o Pasa na luvei Eaija me 24 na yabaki.+
34 E cakava tiko ga na ka ca ena mata i Jiova,+ e muria na ivalavala i Jerepoami kei na nona ivalavala ca e vakavuna mera valavala ca kina na Isireli.+
iVakamacala e ra
^ Se “sega ni yalodina vei.”
^ Kena vosa vakaIperiu e rairai veiwekani kei na dua na vosa ni “denimanumanu,” e vosa ni veibeci.
^ Raica na iVakamacala ni Vosa.
^ Se “yalodina.”
^ Se “baitaka, tara tale.”
^ Se “biuta se lakova na vanua nei.”
^ Se “baitaka, tara tale.”
