iKarua ni Samuela 11:1-27

  • Veibutakoci o Tevita kei Pacisepa (1-13)

  • Veivosakitaka o Tevita me vakamatei o Uraia (14-25)

  • Tauri Pacisepa o Tevita me watina (26, 27)

11  Ena itekitekivu* ni yabaki, na gauna era dau lako kina ena ivalu na tui, e talai Joapi o Tevita, o ira na nona dauveiqaravi kei na mataivalu taucoko ni Isireli mera vakamatei ira na Amoni, era qai viribaiti Rapa+ ni tiko mai Jerusalemi+ o Tevita.  Ena dua na yakavi e duri mai o Tevita ena nona loga qai veilakoyaki voli ena delanivale ni tui. E raica sara mai delanivale e dua na marama ni sili tiko, e marama totoka dina.  E tala o Tevita e dua me taroga na marama qori, e mai tukuna: “Vakaevei, qo na luvei Ilami,+ o Pacisepa+ na wati Uraia+ na Itaiti?”+  Oti oya e tala eso na italai o Tevita mera lai kauti yalewa mai.+ E mani lako yani vua, e mocevata kei koya o Tevita.+ (E yaco qo ni se vakasavasavataki koya tiko o Pacisepa mai na nona dukadukali.*)+ Oti e lesu ina nona vale.  E bukete na yalewa, e vakauta sara na itukutuku vei Tevita: “Au sa bukete.”  E qai vakauitukutuku o Tevita vei Joapi: “Talai Uraia mai na Itaiti vei au.” E talai Uraia sara vei Tevita o Joapi.  Ni lako yani vua o Uraia e taroga sara o Tevita se vakacava tiko o Joapi, o ira na sotia, kei na ka e yaco tiko ena ivalu.  E qai kaya o Tevita vei Uraia: “Lako sobu ina nomu vale lai vakacegu.”* E biubiu mai na valenitui o Uraia, qai vakau yani e muri na nona iloloma* na tui.  Ia e moce ga o Uraia ena matamata ni valenitui kei ira kece na vo ni dauveiqaravi ni nona turaga, e sega ni lako sobu ina nona vale. 10  E tukuni sara vei Tevita: “E sega ni lako sobu ina nona vale o Uraia.” E qai kaya vei Uraia o Tevita: “O se qai lesu ga mai ena dua na ilakolako. Na cava o sega ni lako sobu kina ina nomu vale?” 11  E kaya vei Tevita o Uraia: “E tiko ena valetabanikau na Kato,+ o ira na Isireli, kei ira na Juta, e keba tale tiko ga ena veico na noqu turaga o Joapi kei ira na dauveiqaravi ni noqu turaga. Meu lako vakacava ina noqu vale meu kana, meu gunu, meu mocevata kei watiqu?+ Me vaka ni oni bula dina tiko, au na sega ni cakava na ka qo!” 12  E qai kaya vei Uraia o Tevita: “Mo tiko tale ga eke nikua, au na qai talai iko nimataka.” E mani tiko ga e Jerusalemi o Uraia ena siga oya kei na siga tarava. 13  E qai talatala o Tevita me lako yani me kana me gunu vata kei koya, e vakamatenitaki koya o Tevita. Ia ena yakavi e lai davo o Uraia ena nona imocemoce kei ira na dauveiqaravi ni nona turaga, e sega ni lako sobu ina nona vale. 14  Ena mataka e vola e dua na ivola o Tevita vei Joapi, qai solia ena liga i Uraia me kauta. 15  E vola ena ivola: “Dou biuti Uraia ena iyatu e liu, na vanua e katakata sara tiko ga kina na ivalu. Dou suka tani vua e dakuna, me moku mate.”+ 16  E yadrava vinaka tiko na koro o Joapi, e biuti Uraia ena vanua e kila nira tiko kina na tagane qaqa. 17  Nira lako mai tuba na lewenikoro oya mera vala kei Joapi, era mate kina eso na dauveiqaravi i Tevita, e mate tale ga kina o Uraia na Itaiti.+ 18  E tukuna sara o Joapi vei Tevita na ka kece me baleta na ivalu. 19  E vakarota na italai: “Ni o tukuna oti vua na tui na ka kece me baleta na ivalu, 20  de dua ena cudru na tui qai tukuna vei iko, ‘Na cava oni lai vala volekata kina na koro? Dou sega ni kila nira na vanai kemuni mai na delanibai? 21  O cei e mokuti Apimeleki+ na luvei Jirupeseci?+ Na yalewa e kolotaka vua mai na delanibai na vatuniqaqaqi* qai mate kina e Tipesi? Na cava moni lako volekata kina na bai?’ Mo qai kaya, ‘E mate tale ga na nomuni dauveiqaravi o Uraia na Itaiti.’” 22  E mani lako na italai qai tukuna vei Tevita na ka kece e talai koya kina o Joapi. 23  E tukuna na italai vei Tevita: “Era kaukaua vei keimami na nodra tamata, era lako mai mera valuti keimami ena veico, ia keimami cemuri ira lesu me yaco ina icurucuru ni matamatanikoro. 24  Era vanalaki ira tiko na nomuni dauveiqaravi ena delanibai o ira na dauvana, era mate kina eso na dauveiqaravi ni tui, e mate tale ga kina na nomuni dauveiqaravi o Uraia na Itaiti.”+ 25  E kaya sara o Tevita vua na italai: “Mo tukuna qo vei Joapi: ‘Mo kua ni lomaleqataka na ka qo, ni na veivakamatei ga na iseleiwau. Mo valuta sara vakaukaua na koro, mo vakadruka.’+ Mo vakayaloqaqataki koya.” 26  Ni rogoca na wati Uraia ni sa mate o Uraia na watina, e tagicaki watina sara. 27  Ni oti na gauna ni lolosi, e talatala o Tevita me kau yani na yalewa ina nona vale me watina,+ qai vakasucuma e dua na luvena tagane. Ia e sega ni taleitaka o* Jiova+ na ka e cakava o Tevita.

iVakamacala e ra

Oya ena vulaitubutubu.
Rairai na dukadukali ni nona matenivula.
Ipe., “savata na yavamu.”
Se “na ivotavota ni tui,” oya na ivotavota e solia na itaukeinivale vua na vulagi dokai.
Se “iqaqaqi.”
Ipe., “e ca ena mata i.”