Vei Ira mai Efeso 4:1-32
4 O koya gona au vakamasuti kemuni, o yau au kaivesu+ ena vuku ni Turaga, me rakorako nomuni itovo+ me vaka na ilesilesi oni kacivi kina,
2 oya moni dau yalomalumalumu,+ ni yalomalua, ni vosovoso,+ me laurai tale ga na nomuni loloma ena nomuni dauveivosoti.+
3 Ni gumatua moni maroroya na duavata e vakavuna na yalo tabu, ni oni vauci vata ena veiyaloni.+
4 E dua ga na yago,+ e dua tale ga na yalo tabu+ me vaka ni dua ga na inuinui+ oni kacivi kina,
5 e dua na Turaga,+ e dua na vakabauta, e dua na papitaiso,
6 e dua na Kalou na Tamada kece, o koya e lewa na ka kece, e dusimaki keda kece, e cakacaka e lomada kece.
7 Ia e soli vei keda yadua na loloma soli wale me vaka na ivakarau ni isolisoli e solia wale+ vei keda o Karisito.
8 Ni kaya: “E kauti ira na vesu tu ni cabe cake i lomalagi, e solia na isolisoli tamata.”+
9 Na cava na ibalebale ni matavosa “nona lako cake”? E kena ibalebale ni lako sobu tale ga mai vuravura o koya.
10 O koya ga e lako sobu mai, o koya tale ga ya e lako cake+ me uasivi ira kece na lomalagi+ me vakayacori kina na ka kece.
11 E solia eso mera yapositolo,+ eso mera parofita,+ eso mera vunautaka na itukutuku vinaka,+ eso mera ivakatawa mera qasenivuli tale ga,+
12 mera vakadodonutaki* kina na yalosavasava, me qaravi kina na ivavakoso, me buli cake kina na yago i Karisito,+
13 me rawa nida duavata kece ena vakabauta kei na noda kila dina na Luve ni Kalou, meda tamatabula,+ meda yacova taucoko sara na ivakarau ni bula i Karisito,
14 meda kua kina ni vagonegonea tiko, ya meda kuitaki voli ena biau se veikauyaki ena cagi kece ni ivakavuvuli,+ ena ilawaki ni tamata, kei na nodra ivadi qaseqase mera veivakacalai kina.
15 Ia ena noda tukuna na ka dina, me uqeti keda tiko ga na noda loloma meda tubu cake kina ena ka kece, meda duavata kei koya na uluda, na Karisito.+
16 Era sema vata vei koya na tikiniyago kece+ ra qai vakarautaki mera cakacaka vata na isema yadua. Nira cakava vinaka nodra itavi na veitikiniyago, ena tubu kina na yago taucoko qai vakatubura na loloma.+
17 O koya gona, qo na noqu vosa vei kemuni, au uqeti kemuni tale ga ena mata ni Turaga moni kua ni vakaitovotaki kemuni ena nodra itovo na lewe ni veimatanitu+ ena veika macawa era vakasamataka,+
18 baleta ni butobuto nodra vakasama ra qai yawaka na ivakarau ni bula e vinakata na Kalou ena vuku ni nodra sesewa kei na nodra lomaqa.
19 Ena nodra sa sega tale ni qai kila na madua, era soli ira kina ina ivalavala vakasisila*+ mera vakaitavi ena ka kece e dukadukali ena levu ni nodra kocokoco.
20 Ia e duatani na ka oni vulica vei Karisito,
21 vakavo ke oni a sega ni rogoci koya vinaka ena gauna oni vakavulici kina, me vaka na dina a vakavulica o Jisu.
22 Oni vakavulici moni biuta tani na tamata makawa+ me vaka na nomuni itovo makawa e sa vakaleqai tu ena nomuni gagadre ca,+
23 moni qai vakavoui tiko ga ena igu e lewa na nomuni vakarau ni vakasama,+
24 ni dodonu moni tokara na tamata vou+ e buli me vaka na loma ni Kalou e vauci kina na yalodina kei na yalododonu.
25 O koya gona, ni oni sa biuta tani na veidabui, ni tukuna ga na ka dina vua na kainona,+ nida lewe ni dua ga na yago.+
26 Ni o cudru, mo kua ga ni valavala ca,+ me kua ni dromu na matanisiga o se cudru tiko ga,+
27 kua ni solia e dua na galala vua na Tevoro.+
28 Me muduka nona butako o koya e butako tiko, me cakacaka ga vakaukaua, me vakaitavitaka na ligana ena cakacaka yaga,+ me solia kina e dua na ka vei koya e leqa tu.+
29 Me kua ni lako mai gusumuni e dua na vosa vakasisila,+ na vosa ga e vinaka qai veivakayaloqaqataki ena kena gauna, me vinaka vei ira na rogoca.+
30 Ni kua tale ga ni vakararawataka na yalo tabu ni Kalou,+ oni dregati+ kina me yacova na siga oni sereki kina ena ivoli.+
31 Me kau tani vei kemuni na yaloca,+ na cudrucudru, na yalokatakata, na karakara, na vosavakacaca+ kei na ka ca kece va ya.+
32 Ia moni veilomani, ni veinanumi,+ ni yalorawarawa moni veivosoti me vaka na nona yalorawarawa na Kalou me vosoti kemuni ena vuku i Karisito.+
iVakamacala e ra
^ Se “vakavulici.”
^ Se “ivalavala vakamadua.” Kirisi, a·selʹgei·a. Raica na iVakamacala ni Vosa.
