Lako Yani 33:1-23
33 E kaya tale o Jiova vei Mosese: “Mo cavutu yani kei ira na tamata o liutaki ira tani mai na vanua o Ijipita. Lako ina vanua au bubuluitaka vei Eparama, Aisake, kei Jekope, niu kaya, ‘Au na solia vei ira na nomu kawa.’+
2 Au na tala e dua na agilosi me liu vei iko,+ qai cemuri ira na kai Kenani, na Amoraiti, na Itaiti, na Perisaiti, na Aivaiti, kei na Jepusaiti.+
3 Lako cake ina vanua e drodro kina na sucu kei na oni.+ Ia au na sega ni lako ena kemuni maliwa, ni oni sa rui tamata yalokaukaua,*+ deu qai vakawabokotaki kemuni e gaunisala.”+
4 Nira rogoca na tamata na vosa kaukaua qo, era tekivu veitagicaki, qai sega ni dua vei ira e dara na nona iukuuku.
5 E tukuna vei Mosese o Jiova: “Kaya vei ira na Isireli, ‘Oni sa rui tamata yalokaukaua.*+ Au rawa ni lako wale sara ga yani qo ena kemuni maliwa meu vakawabokotaki kemuni.+ Ia qo, moni kua ni dara nomuni iukuuku, meu se vakasamataka mada na ka meu na cakava vei kemuni.’”
6 Me tekivu gona mai na Ulu i Orepi, era sega ni dara tale* na nodra iukuuku na Isireli.
7 Ia e kauta na nona valelaca o Mosese, e lai birika ena taudaku ni keba, me yawa toka mai na keba, qai vakatoka o koya me valelaca ni veitavaki. O ira kece era via vakatarogi Jiova,+ era na lako yani ina valelaca ni veitavaki ena taudaku ni keba.
8 Ena gauna ga e lako kina ina valelaca o Mosese, era na duri kece na tamata ra qai tucake tu ga ena icurucuru ni nodra valelaca, era na wanonovi Mosese tu me yacova ni sa curu ina valelaca.
9 Ena gauna ga e curu kina ina valelaca o Mosese,+ ena lako sobu mai na duru o me tu donuya na icurucuru ni valelaca, ni vosa tiko na Kalou vei Mosese.+
10 Nira sa raica na tamata kece na duru o ena icurucuru ni valelaca, era tucake kece qai cuva ena icurucuru ni nodra dui valelaca.
11 Ni dau vosa o Jiova vei Mosese, e vosa sara ga vua e matana,+ me vaka ga ni vosa e dua na tamata vua e dua tale. Ni dau lesu yani ina keba o koya, ena sega ni biuta na valelaca o Josua+ na luvei Nuni, na nona dauveiqaravi kei na nona ivukevuke.+
12 E qai kaya vei Jiova o Mosese: “Raica oni kaya vei au, ‘Liutaki ira cake na tamata qo,’ ia oni sega ni vakatakila vei au se o cei oni na tala kei au. Oni tukuna tale ga, ‘Au kilai iko ena yacamu,* o qai lomani tale ga e mataqu.’
13 Yalovinaka, keu bau nanumi e matamuni, vakatakila vei au na nomuni ivalavala+ meu kilai kemuni kina, meu nanumi tiko ga e matamuni. Moni nanuma tale ga ni matanitu qo era nomuni tamata.”+
14 E qai kaya o koya: “O yau* sara ga na lako kei iko,+ au na qai vakacegui iko.”+
15 E kaya sara vua o Mosese: “Ke oni* na sega ni lako, ni kua ga ni liutaki keimami cake mai ke.
16 Ena qai kilai vakacava niu nanumi e matamuni, o yau kei ira na nomuni tamata? Sega ni nomuni tomani keimami,+ me vakaduiduitaki kina o yau kei ira na nomuni tamata vei ira kece na vo ni matatamata ena dela i vuravura?”+
17 E kaya tale vei Mosese o Jiova: “Au na cakava tale ga na ka o kerea qo, ni o sa nanumi e mataqu, au qai kilai iko ena yacamu.”
18 E qai tukuna o Mosese: “Yalovinaka, ni vakatakila vei au na nomuni lagilagi.”
19 Ia e tukuna o koya: “Au na cakava me tasivi e matamu na noqu vinaka kece, au na qai vakarogoya e matamu na yaca i Jiova,+ au na lomani koya au lomana, au na vakaraitaka na yalololoma vei koya au vakaraitaka kina na yalololoma.”+
20 E tomana: “O sega ni raica rawa na mataqu, ni sega ni dua na tamata e rawa ni raici au qai bula.”
21 E kaya tale o Jiova: “Qo e dua na vanua e voleka vei au. Duri tu ena delanivatu.
22 Ni tasivi tiko na noqu lagilagi, au na biuti iko ena dua na tadrua ni vatu, au na qai taqomaki iko ena ligaqu me yacova niu sa tasivi.
23 Oti oya au na kauta laivi na ligaqu, o na qai raica na dakuqu. Ia na mataqu ena sega ni laurai.”+
iVakamacala e ra
^ Ipe., “domoqa.”
^ Ipe., “domoqa.”
^ Ipe., “luvata laivi.”
^ Se “au sa digitaki iko.”
^ Ipe., “Na mataqu.”
^ Ipe., “Ke matamuni e.”
