Hecho 8:1-40
8 8:1-2 Maʉ̃be ʉ̃cʉrʉ Ãcõrẽ waya ɓeaba Estebaʉ̃ra tʉɓarisiɗaa. Idji carea jĩãbi ɓʉga duanesia. Maʉ̃ne Estebaʉ̃ beapeɗaɗara Sauloba bia unusia.
Jesu ĩjã ɓea mĩrũ wãpeɗaɗa
Maʉ̃ ewariɗe ẽberãrãba Jerusaleʉ̃ne Jesu ĩjã ɓeara bio biẽ́ o panesiɗaa. Maʉ̃ carea Jesu ĩjã ɓeara jũma Judea druaɗaa idjaɓa Samaria druaɗaa mĩrũ wãsiɗaa. Jesuba diabueɗarãdrʉ Jerusaleʉ̃ne panesiɗaa.
2 –
3 Maʉ̃ne Sauloba Jesu ĩjã ɓeara biẽ́ obadjia waa ĩjãrãnamãrẽã. Deza wãpeɗa umaquĩrãra, wẽrãrã siɗa jidacuapeɗa preso ɓʉbadamaa erreɓari edebadjia.
Pelipe Samaria druaɗaa wãna
4 Baribʉrʉ Jerusaleʉ̃neba mĩrũ wãpeɗaɗaba ãdji wãbʉdaza beɗea bia Jesucritoɗebemada jarabadjiɗaa.
5 Pelipera Samaria druaɗe puru aɓaʉɗaa wãsia.* Mama jaradiabadjia Jesura Ãcõrẽba ẽdrʉ edabari diai jaraɗada.
6 Pelipeba jara ɓʉda ũrĩsiɗaɗe idjaɓa ne ununaca o ɓʉda unusiɗaɗe jũmarãba quĩrãcuita ũrĩ duanabadjiɗaa.
7 Zocãrã ẽberãrã jai bara ɓeada biacuasiɗaa. Maʉ̃ jairãra ãdji cacuaɗebemada ɓia ẽdrʉcuabadjiɗaa. Idjaɓa zocãrã ɓʉradrʉ ɓeada, jĩrũ biẽ́ ɓea siɗa biacuabadjiɗaa.
8 Maʉ̃ carea maʉ̃ puruɗebemarãra bio ɓʉsriɗa duanasiɗaa.
9 Jãĩbana Simoʉ̃ abadada mama ɓasia. Ara idjida dji dromada crĩchabiɗa bẽrã Samariaɗebemarãra cũrũga eroɓasia.*
10 Idjia jarabʉrʉra ẽberãrã dji eɗaara ɓeaba, dji dromaara ɓea biɗa quĩrãcuita ũrĩbadjiɗaa. Jũmarãba jarabadjiɗaa idjira Ãcõrẽ Ʉɓʉa Droma abadada.
11 Ẽberãrãba maʉ̃ jãĩbanara bio ẽpẽ panasiɗaa idjia o ɓʉɗeba dãrã cũrũga eroɓaɗa bẽrã.
12 Baribʉrʉ Pelipeba beɗea bia Jesucritoɗebemada idjaɓa Ãcõrẽba idji ẽberãrã bia pe eroɓʉɗebemada ãdjirãa jaradia ɓabadjia. Maʉ̃ne zocãrã umaquĩrãrãba, wẽrãrã biɗa ĩjãnapeɗa borocuesiɗaa.
13 Simoʉ̃ biɗa ĩjãsia. Maʉ̃be borocuepeɗa Pelipe ume nĩbaɗe wãsia. Pelipeba ne ununaca waiɓʉa o ɓʉda Simoʉ̃ba unubʉrʉɗe cawa crĩchaẽ́ ɓesia.
14 Maʉ̃ne Jesuba diabueɗarã Jerusaleʉ̃ne ɓeaba ũrĩsiɗaa Samariaɗebemarãba Ãcõrẽ beɗeara ĩjãsiɗada. Maʉ̃ carea Pedroda Juaʉ̃ siɗa ãdjirãmaa diabuesiɗaa.
15 Jũẽnapeɗa Ãcõrẽa iwiɗisiɗaa ãdjirãba Ãcõrẽ Jaureda edaɗamãrẽã.
16 Mãwã osiɗaa Ãcõrẽ Jaurera waɗibiɗa maʉ̃ djabarãmaa zeẽ́ ɓaɗa bẽrã. Aɓabe dadji Boro Jesu trʉ̃neba borocuesiɗaa.
17 Pedroba Juaʉ̃ biɗa Ãcõrẽa iwiɗibʉdaɗe ãdji jʉwara djabarã ʉ̃rʉ̃ ɓʉsiɗaa. Ara maʉ̃da Ãcõrẽ Jaurera edasiɗaa.
18 Maʉ̃ne Simoʉ̃ba unusia Jesuba diabueɗarãba ãdji jʉwa djabarã ʉ̃rʉ̃ ɓʉbʉdaɗe djabarãba Ãcõrẽ Jaurera edasiɗada. Maʉ̃ unusiɗe ãdjía parata diayaɗa asia aɓari quĩrãca poya oi carea.
19 Nãwã jarasia:
–Jãʉ̃ ʉɓʉada mʉ̃́a diaɗadua, mʉ̃a biɗa mʉ̃ jʉwa baridua ʉ̃rʉ̃ ɓʉbʉrʉɗe Ãcõrẽ Jaure edamãrẽã.–
20 Baribʉrʉ Pedroba jarasia:
–¿Mãwãra bʉa crĩcha ɓʉca Ãcõrẽba bari dia ɓʉra nẽdobadada? ¡Bʉdji parata ume tʉbʉ uruaɗaa wãdua!
21 Bʉ sora Ãcõrẽ quĩrãpita jipaẽ́ ɓʉ bẽrã naʉ̃ trajura dairã ume ocara ɓʉa.
22 Maʉ̃ crĩcha cadjiruara igaradua. Ãcõrẽa quĩrã djuburiada iwiɗidua. Ãĩbẽrã maʉ̃ crĩcha cadjirua bʉ soɗe ɓʉra idjia quĩrãdoaisicada.
23 Mʉ̃a unu ɓʉa bʉra daiba o panʉ carea bio sobiẽ́ ɓʉda. Cadjiruaba bʉra preso eroɓʉa.–
24 Maʉ̃ne Simoʉ̃ba jarasia:
–Mʉ̃ carea dadjirã Boroa iwiɗiɗadua bãrãba jarapeɗaɗara mãwãrãmãrẽã.–
25 Pedroba Juaʉ̃ biɗa beɗea dadjirã Boro Jesuɗebemada jaraɗapeɗa Jerusaleʉ̃naa jẽda wãsiɗaa. Wãbʉdaɗe Samaria druaɗe zocãrã puru ɓeaɗe maʉ̃ beɗea biara jara wãsiɗaa.
Pelipe Etiopíaɗebema ume beɗeaɗa
26 Mãwãnacarea dadji Boro nezoca bajãnebemada aɓa Pelipemaa zepeɗa nãwã jarasia:
–¡Piradrʉdua! Jerusaleʉ̃neba Gaza puruɗaa wãbada oɗaa wãdua.– (Maʉ̃ ora ẽjũã põãsa ewaraga ɓʉɗe wã ɓʉa.)*
27 Ara maʉ̃da Pelipera wãsia. Oɗe nĩne ẽberã Etiopía druaɗebemada unusia. Maʉ̃ ẽberãra Etiopíaɗebema boro nezoca droma basía.* Dji borora wẽrã basía.* Maʉ̃ nezocaba dji boro paratara jũma wagabadjia. Idjira Jerusaleʉ̃naa wã ɓasia Ãcõrẽa bia beɗeai carea.
28 Idji druaɗaa jẽda wãbʉrʉɗe idji carretaɗe Ãcõrẽneba beɗeabari Isaía cartada acʉ chũmasia.
29 Mãwã ɓʉɗe Ãcõrẽ Jaureba Pelipea jarasia: “Jari ɓʉ carreta caita nĩbaɗe wãdua.”
30 Ara maʉ̃da araa pira wãpeɗa ũrĩsia dji nezocaba Isaía cartada jĩgua le chũmʉda. Maʉ̃ne Pelipeba iwiɗisia:
–¿Bʉa le ɓʉra cawa ɓʉca?–
31 Idjia panusia:
–Ni aɓaʉba jaradiaẽ́bʉrʉ mʉ̃a ¿sãwã cawai?–
Maʉ̃ne idjia Pelipea jarasia ɓadopeɗa idji caita chũmemãrẽã.
32 Idjia Ãcõrẽ Beɗeaɗe le ɓaɗara naʉ̃gʉ basía:
Oveja beabadamaa edebada quĩrãca idjira beaɗe edesiɗaa.
Dji cara tʉbarima ɓʉɗe oveja chupea ɓabari quĩrãca chupea ɓesia.
33 Idji carea ipiɗaɗapeɗa jipa cawa oɗaẽ́ basía. Beapeɗaɗa bẽrã ¿caiba idji warrarãnebemada poya nẽbʉrʉi?*
34 Maʉ̃be Etiopíaɗebema nezoca dromaba Pelipea iwiɗisia:
–Ãcõrẽneba beɗeabariba nama ¿caiɗebemada ɓʉsi? ¿Ara idjiɗebemada ɓʉsica wa dewaraɗebemada ɓʉsi? Mʉ̃ djuburia jaradua.–
35 Ara maʉ̃da Pelipeba maʉ̃ beɗeaɗeba beɗea bia Jesuɗebemada jaradia ɓesia.
36 Mãwã panʉne baido ɓʉma jũẽne wãsiɗaa. Maʉ̃ne nezoca dromaba jarasia:
–Acʉdua. Nama baidoda ɓʉa. Mʉ̃ra ¿borocueiẽ́ ɓʉca?–
[
37 Pelipeba jarasia:
–Bʉa Jesura Ãcõrẽ Warrada wãrãda soɗeba ĩjã ɓʉbʉrʉ, borocueida ɓʉa.–
Maʉ̃ne nezoca dromaba panusia:
–Mʉ̃a wãrãda ĩjã ɓʉa Jesucritora Ãcõrẽ Warrada.–]*
38 Ara maʉ̃da idji carretara nũmebisia. Ãdji umena doeɗaa wãnapeɗa Pelipeba idjira borocuesia.
39 Drua zebʉdaɗe dadjirã Boro Jaureba Pelipera ãyã edesia. Nezoca dromaba idjira waa unuẽ́ basía, baribʉrʉ oɗe ɓʉsriɗa wãsia.
40 Maʉ̃ne Pelipera Azoto puruɗe odjasia. Maʉ̃be puruza beɗea bia Jesuɗebemada jara wãsia aɓa Cesarea puruɗe jũẽbʉrʉɗaa.*
Beɗea eɗaare
^ 8:5. Hecho 6:5.
^ 8:9. Griego beɗeaɗe maʉ̃ versículoba idjaɓa jara ɓʉa: “Maʉ̃ Simoʉ̃ba o ɓʉ carea Samariaɗebemarãba bio cawa crĩchaɗaẽ́ basía. Maʉ̃ne ara idjida dji dromada jarabadjia.”
^ 8:26. Maʉ̃ ora ẽjũã põãsa ewaraga ɓʉɗe wã ɓʉa. Griego beɗeaɗe maʉ̃ra ebuɗa ɓʉẽ́a. Ãĩbẽrã jara ɓʉsicada “Maʉ̃ oɗe naʉ̃ ewariɗe wãnacaa” wa “Gaza puru drõãne ẽberãrãra ɓeaɗacaa.”
^ 8:27. Nezoca droma. Cãpũrĩã beɗeaɗe ɓʉ́ ɓʉa “eunuco.” Maʉ̃ba jara ɓʉa idjira cãrãta ja ɓasida wẽrã nezoca bẽrã.
^ 8:27. Dji borora wẽrã basía. Idjira “ãdji Candace” abadjiɗaa.
^ 8:33. Isaía 53:7-8.
^ 8:37. Griego beɗeaɗe zocãrã cartaɗe maʉ̃ versículora neẽ́a.
^ 8:40. Maʉ̃ Azoto purura Antiguo Testamentoɗe “Asdo” ɓʉ́ ɓʉa. Pilisteorã puru basía. 1 Samuel 5:1-6. Pelipera Azotoɗeba Cesarea puruɗaa wãi carea noventa kilómetro jĩrũba wãida ɓasia Mediterraneo pusa icawa.
