Hecho 22:1-30
22 Pauloba jarasia:
–Mʉ̃ djabarã, mʉ̃ bororã, ũrĩnadua. Ara mʉ̃djiɗebemada jaraya.–
2 Idjira hebreoɗe beɗea ɓʉda ũrĩsiɗa bẽrã ãdjirãra chupea duanesiɗaa. Maʉ̃ne Pauloba jarasia:
3 –Mʉ̃ra judioa. Cilicia druaɗe Tarso puruɗe tosiɗaa. Baribʉrʉ mʉ̃ra nama Jerusaleʉ̃ne warisia. Jaradiabari Gamalielba mʉ̃́a jũma dadji drõã naẽnabemarã leyba jara ɓʉra bio jaradiasia.* Mʉ̃a Ãcõrẽra bio ẽpẽ ɓabadjia bãrãba ẽpẽbada quĩrãca.
4 Maʉ̃ba O Djiwiɗi ĩjã ɓeada biẽ́ oi carea mʉ̃a ẽpẽbadjia. Umaquĩrãrãda, wẽrãrã siɗa preso ɓʉcuabisia. Idjaɓa ʉ̃cʉrʉ beabisia.
5 Maʉ̃gʉra sacerdote dji dromaba, jũma judio drõãrã dji dromarã biɗa cawa panʉa. Ãdjia mʉ̃́a cartada diasiɗaa judiorã Damascoɗebemaba cawaɗamãrẽã O Djiwiɗi ẽpẽ ɓeara mʉ̃a jidaida ɓʉda. Maʉ̃ba mʉ̃ra Damascoɗaa wãsia ãdjirã naʉ̃ Jerusaleʉ̃naa jida enepeɗa dji bororãba cawa oɗamãrẽã.
6 Baribʉrʉ Damascoɗe jũẽboɗoɗe umatipa basica ɓʉa. Maʉ̃ne cawaẽ́ne bajãneba uruada mʉ̃ma jʉ̃rã tẽũsia.
7 Mʉ̃ egode ɓaesiɗe beɗeada ũrĩsia. Maʉ̃ beɗeaba mʉ̃́a jarasia: “Saulo, Saulo, ¿cãrẽ cãrẽã mʉ̃ra biẽ́ oi carea ẽpẽ ɓʉ?”
8 Mʉ̃a iwiɗisia: “Mʉ̃ boro, ¿bʉra cai?” Idjia panusia: “Mʉ̃ra Jesu Nazareɗebemaa. Bʉa biẽ́ oi carea ẽpẽ ɓʉra mʉ̃́a.”
9 Mʉ̃ ume nĩnaba maʉ̃ urua unusiɗaɗe dauperasiɗaa, baribʉrʉ mʉ̃ ume beɗeabʉrʉra ũrĩnaẽ́ basía.*
10 Maʉ̃ne mʉ̃a iwiɗisia: “Mʉ̃ Boro, ¿bʉa cãrẽda quĩrĩã ɓʉ mʉ̃a oida?” Dadji Boroba panusia: “Piradrʉpeɗa Damascoɗaa wãdua. Mʉ̃a jãma jaraya cãrẽda oida ɓʉda.”
11 Maʉ̃ urua jʉ̃rã tẽũbʉrʉba mʉ̃ra dauɓerreasia. Maʉ̃ bẽrã mʉ̃ ume nĩnaba mʉ̃ jʉwaɗe jidaɗapeɗa Damascoɗaa edesiɗaa.
12 Mama ẽberã Ananía abadada ɓasia. Maʉ̃ Ananíaba Ãcõrẽda waya ɓʉ bẽrã dadjirã leyra bio ĩjã o ɓasia. Jũma judiorã Damascoɗebemaba idjiɗebemada bia beɗeabadjiɗaa.
13 Maʉ̃ Ananíaba mʉ̃ra acʉɗe wãsia. Caita wãpeɗa jarasia: “Djaba Saulo, wayacusa bʉ dauba unu ɓedua.” Ara maʉ̃da mʉ̃ daura biapeɗa idjira unusia.
14 Maʉ̃be Ananíaba jarasia: “Ãcõrẽ dadji drõã naẽnabema ume ɓaɗaba bʉra edasia idjia quĩrĩã ɓʉda cawamãrẽã, dji Jipa Ɓʉda unumãrẽã, idjaɓa idji beɗeabʉrʉda ũrĩmãrẽã.
15 Jũma bʉa ununada, ũrĩna siɗa jũmarãa jaraya.
16 ¡Waa jʉ̃ãrãdua! Piradrʉpeɗa borocuedua. Idjía iwiɗidua. Bʉa cadjirua oɗara idjia jũma quĩrãdoaya.”
17 22:17-18 Mãwãnacarea mʉ̃ra jẽda Jerusaleʉ̃naa zesia. Ewari aɓa Ãcõrẽ de dromanaa wãpeɗa idjía iwiɗi ɓasia. Maʉ̃ne mʉ̃a cãĩmocara quĩrãca dadji Boroda unusia. Idjia mʉ̃́a jarasia: “Jerusaleʉ̃neba isabe ãyã wãdua. Bʉa mʉ̃nebema jara ɓʉra namabemarãba ĩjãnaẽ́a.”
19 Ĩjãnida crĩcha ɓaɗa bẽrã mʉ̃a nãwã jarasia: “Mʉ̃ Boro, ãdjirãba bio cawa panʉa naẽna mʉ̃ra judiorã dji jʉrebada deza wãpeɗa bʉ ĩjã ɓeara jidapeɗa puobadjida idjaɓa preso ɓʉbadjida.
20 Bʉɗebema beɗea ɓʉ carea Estebaʉ̃ beasiɗaɗe mʉ̃ siɗa arima ɓasia. Idji beabʉdada mʉ̃a bia unusia. Maʉ̃ awara ãdjia ʉ̃rʉ̃ jʉ̃badara mʉ̃a waga ɓasia.”
21 Baribʉrʉ dadji Boroba mʉ̃́a jarasia: “Wãdua. Mʉ̃a bʉra tʉmʉ judiorãẽ́maa diabueya.”–
Romanorãba Paulo soaba uɗia panana
22 Pauloba jara ɓʉra judiorãba chupea ũrĩ duanasiɗaa. Baribʉrʉ Ãcõrẽba idjira judiorãẽ́maa diabueyaɗa asiɗe jĩgua jara duanesiɗaa:
–¡Jãʉ̃ ẽberãra zocai ɓacara ɓʉa! ¡Beaɗadua!–
23 Mãwã ɓia duanʉne ãdjia ʉ̃rʉ̃ jʉ̃badara quĩrũbiɗeba jãrãpe duanesia idjaɓa egoro porara ʉ̃taa jãmãposiɗaa.
24 Maʉ̃ bẽrã sordaorã boro dji dromaba jarasia Paulora sordaorã duanabada deɗe eɗa edeɗapeɗa soaba uɗamãrẽã. Mãwã obisia Pauloba jaramãrẽã cãrẽ cãrẽã judiorãra idji ume quĩrũ duanʉda.
25 Baribʉrʉ idji uɗi carea jʉ̃bʉdaɗe Pauloba sordaorã boro arima ɓʉ́a jarasia:
–¿Bãrãba romanoda uɗida panʉca idji cawa oɗi naẽna?–
26 Maʉ̃ ũrĩsiɗe sordaorã borora dji dromamaa wãpeɗa jarasia:
–¿Bʉa cawa ɓʉca cãrẽda obʉrʉda? Jãʉ̃ ẽberãra romanoa.–
27 Maʉ̃be sordaorã boro dji dromara Paulomaa wãpeɗa iwiɗisia:
–¿Wãrãda bʉra romanoca?–
Pauloba panusia:
–Mãẽ, mʉ̃ra romanoa.–
28 Sordaorã boro dji dromaba jarasia:
–Romano bai carea mʉ̃a paratada waiɓʉa diasia.–
Pauloba jarasia:
–Mʉ̃ra toɗaɗeba romanoa.–
29 Ara maʉ̃da Paulo uɗi carea pananaba idu ɓʉsiɗaa. Sordaorã boro dji dromaba Paulora romanoda cawasiɗe bio ne wayasia romanoda ubi carea jʉ̃biɗa bẽrã.
Paulo judio dji droma ɓearã quĩrãpita ɓaɗa
30 Nurẽma sordaorã boro dji dromaba waɗibiɗa cawa quĩrĩã ɓasia cãrẽ cãrẽã judiorãba Paulora biẽ́ jara panasiɗada. Maʉ̃ carea idjira carenaba jʉ̃ ɓaɗada ẽrã ɓʉsia.* Maʉ̃be sacerdote bororãda, jũma judiorã dji dromarã siɗa ãbaa jʉresia. Maʉ̃ne Paulora enepeɗa ãdjirã quĩrãpita ɓʉsia.
