Hecho 14:1-28
14 Iconio puruɗe ãdjia obada quĩrãca Paulora Bernabe siɗa judiorã dji jʉrebada deɗe eɗaa wãsiɗaa. Ãdjia jaradia panʉ carea zocãrã judiorãba griegorã biɗa Jesura ĩjãsiɗaa.
2 Baribʉrʉ judiorã Jesu ĩjãẽ́ ɓeaba judiorãẽ́a djabarãnebemada biẽ́ crĩchabisiɗaa.
3 Mãwãmĩna Paulora Bernabe siɗa mama dãrã panasiɗaa. Dadjirã Boroba careba ɓʉda soɗeba ĩjã panʉ bẽrã idjiɗebemada ne wayaa neẽ́ jaradiabadjiɗaa. Maʉ̃ne dadjirã Boroba ãdjía ʉɓʉada diasia ne ununacada oɗamãrẽã. Mãwã cawabisia idji biaɗebema ãdjia jaradia panʉra wãrãda.
4 Baribʉrʉ maʉ̃ puruɗebemarãba awara awara crĩcha ɓeasia. Ʉ̃cʉrʉ Pauloare, Bernabeare biɗa panasiɗaa, maʉ̃ne ʉ̃cʉrʉ judiorãare panasiɗaa.
5 Maʉ̃ne judiorãda, judiorãẽ́ siɗa dji puruɗebema bororã ume beɗea ausiɗaa Paulo, Bernabe siɗa mõgaraba taɓari beaɗi carea.
6 Baribʉrʉ Pauloba, Bernabe biɗa maʉ̃ cawasiɗaɗe Licaonia druaɗaa mĩrũ wãsiɗaa. Listra puruɗaa, Derbe puruɗaa biɗa wãsiɗaa. Jũma maʉ̃ Licaonia druaɗe pʉrrʉa wãsiɗaa.
7 Mama ãdjia beɗea bia Jesuɗebemada jarabadjiɗaa.
Listra puruɗe panana
8 Listra puruɗe ẽberã jĩrũ biẽ́ ɓʉda ɓasia. Mãwã topeɗaɗa bẽrã poya nĩbaca basía.
9 Maʉ̃ ẽberãba ũrĩ chũmasia Pauloba Jesuɗebema beɗea ɓʉda. Pauloba idjimaa acʉbʉrʉɗe cawasia idjia wãrãda ĩjã ɓʉda Jesuba idjira poya biabida.
10 Maʉ̃ bẽrã Pauloba idjía jĩgua jarasia:
–¡Piradrʉdua! ¡Ʉ̃ta nũmedua!–
Ara maʉ̃da idjira ʉ̃tʉ jʉ̃drʉpeɗa nĩbaɗe wãsia.
11 Pauloba oɗa unusiɗaɗe maʉ̃ puruɗebemarãba licaonia beɗeaɗe jĩgua jara duanesiɗaa:
–¡Ãcõrẽda umé dadjirãmaa ẽberã quĩrãca eɗaa zesiɗaa!–
12 Ãdjirãba jarasiɗaa Bernabera ãdji ãcõrẽ droma Zeuda idjaɓa Paulora ãdji ãcõrẽ Hermeda, idjira dji beɗea jarabari bẽrã.*
13 Listra puru quĩrãpe ãdji ãcõrẽ Zeu de dromada ɓasia. Mamaʉba Zeu sacerdoteba pacada, nepõnõ siɗa dji puruɗe eɗa wãbadamaa enesia. Idjia, puru ume Pauloa, Bernabea biɗa maʉ̃ pacara babue dia quĩrĩã panasiɗaa.
14 Baribʉrʉ Jesuba diabueɗa Bernabeba, Paulo biɗa maʉ̃ cawasiɗaɗe ãdjia cacuaɗe jʉ̃ panʉra cõãcuaɗapeɗa ẽberãrã tãẽna pira wãnapeɗa nãwã jĩgua jarasiɗaa:
16 Naẽna Ãcõrẽba idji adua ɓea purua ara ãdjia o quĩrĩã panʉda idu obibadjia.
17 Mãwãmĩna ewariza bia o ɓʉɗeba idjia cawabi ɓʉa idjira wãrãda ɓʉda. Idjia bajãneba cueda zebibaria idjaɓa néuda zaubibaria. Mãwã idjia dadjirãra jãwũã ne cobibaria idjaɓa soɗe ɓʉsriɗabibaria.–
18 Pauloba Bernabe biɗa mãwã jara panasiɗamĩna maʉ̃ ẽberãrãba berara ãdjía pacara babue diasiɗaa.
19 Listraɗe panʉne ʉ̃cʉrʉ judiorã Antioquía puruɗebemada, Iconio puruɗebema siɗa jũẽsiɗaa.* Ãdjirãba Listraɗebemarãa Pauloɗebemada biẽ́ crĩchabisiɗaa. Maʉ̃ carea jũmarãba Paulora mõgaraba taɓari jidasiɗaa. Idjira beusida crĩchasiɗa bẽrã erreɓari edeɗapeɗa puru dajada ɓatabuesiɗaa.*
20 Maʉ̃be Jesu ĩjã ɓeaba Paulora jũrãnapeɗa acʉ panasiɗaa. Mãwã panʉne idjira piradrʉsia. Piradrʉpeɗa jẽda puruɗaa wãsia. Nurẽma Bernabe ume Derbe puruɗaa wãsiɗaa.
Siria druaɗe ɓʉ Antioquíaɗaa jẽda wãna
21 Derbe puruɗe Pauloba, Bernabe biɗa beɗea bia Jesuɗebema jarasiɗaɗe zocãrãba ĩjãsiɗaa. Mãwãnacarea Listra puruɗaa, Iconio puruɗaa, Pisidia druaɗe ɓʉ Antioquíaɗaa biɗa jẽda wãsiɗaa.
22 Puruza djabarãra carebabadjiɗaa Jesuda biara ĩjãnamãrẽã. Ãdjia Jesu ĩjã panʉra igararãnamãrẽã nãwã jarabadjiɗaa: “Ãcõrẽda dadjirã Boroda ɓʉɗibʉrʉ naʉ̃ ẽjũãne bio bia mĩgaɗia.”
23 Puruza djabarã tãẽna ʉ̃cʉrʉ ɓʉsiɗaa dji bororãda ɓeaɗamãrẽã. Maʉ̃be Ãcõrẽa iwiɗiɗapeɗa, ne coɗaca ewarida oɗapeɗa dadjirã Boro ĩjã panʉra idji jʉwaɗe ɓʉsiɗaa.
24 Mãwãnacarea Pisidia druaɗeba Panpilia druaɗe jũẽne wãsiɗaa.
25 Ãcõrẽ beɗea Pergue puruɗe jaradiaɗapeɗa Atalia puruɗaa wãsiɗaa.
26 Mamaʉba barcoɗe Siria druaɗe ɓʉ Antioquíaɗaa jẽda wãsiɗaa ãdjia oɗe wãpeɗaɗara jũma opeɗaɗa bẽrã. Maʉ̃gʉ puruɗeba djabarãba ãdjira naãrã diabuesiɗaa Ãcõrẽba quĩrĩã ɓʉra oɗamãrẽã idjaɓa Ãcõrẽ jʉwaɗe ɓʉsiɗaa idji biaɗeba carebamãrẽã.
27 Jũẽnapeɗa djabarã ume ãbaa dji jʉresiɗaa. Maʉ̃ne nẽbʉrʉsiɗaa jũma Ãcõrẽba ãdjiɗeba oɗada. Jarasiɗaa sãwã Ãcõrẽba osida judiorãẽ́ biɗa Jesura ĩjãnamãrẽã.
28 Mama Jesu ĩjã ɓea ume dãrã panesiɗaa.
Beɗea eɗaare
^ 14:12. Zeu, Herme. Latiʉ̃ beɗeaɗe ãdji ãcõrẽ Zeura Júpiter abadaa. Ãdji ãcõrẽ Hermera Mercurio abadaa. Griegorã crĩchaɗe maʉ̃ Hermera ãdji ãcõrẽ ɓea carea dji beɗea jarabari basía.
^ 14:19. Maʉ̃ Antioquíara Pisidia druaɗe ɓʉa. Hecho 13:44-51ɗe. Iconio. Hecho 14:1-6ɗe.
^ 14:19. 2 Corinto 11:25.
