Hecho 26:1-32
26 Maʉ̃be Agripaba Pauloa jarasia:
–Ara bʉdjiare idu beɗeabiya.–
Ara maʉ̃da Paulora jʉwa wapeɗa beɗeasia:
2 –Mʉ̃ boro Agripa, mʉ̃ra ɓʉsriɗa ɓʉa iɗi bʉ quĩrãpita ara mʉ̃djiare beɗeai bẽrã. Mʉ̃a cawabiya judiorãba biẽ́ jara panʉmĩna mʉ̃ra beɗeaɗe ɓʉẽ́da.
3 Bʉa bio cawa ɓʉa dadji judiorãra sãwã ɓeabarida idjaɓa cãrẽ cãrẽã caicayabadada. Maʉ̃ bẽrã beɗea djuburiaya mʉ̃ beɗeara sẽẽ́ ũrĩmãrẽã.
4 Jũma judiorãba cawa panʉa mʉ̃ra cũdraeɗa sãwã ɓasida mʉ̃ druaɗe idjaɓa Jerusaleʉ̃ne biɗa.
5 Ãdjirãba cawa panʉa mʉ̃ra pariseoda. Bariduaba maʉ̃da bʉ quĩrãpita jara quĩrĩã ɓʉbʉrʉ jaraida ɓʉa. Bʉa cawa ɓʉa judiorã ley ĩjã oɗi carea pariseorãba quĩrãcuitaara obadada.
6 Baribʉrʉ Ãcõrẽba dadji drõã naẽnabemarãa diai jaraɗada jʉ̃ã ɓʉ carea iɗira ãdjirãba mʉ̃ra biẽ́ jara panʉa.
7 26:7-8 Wãrãda jũma Israel doce warrarãneba yõpeɗaɗarãba ĩjã panʉa Ãcõrẽba dadjirãra ʉ̃rẽbabida. Maʉ̃ carea dadjirãba ãsa, diamasi biɗa Ãcõrẽa bia beɗeabadaa. Mʉ̃ boro Agripa, maʉ̃ ĩjã ɓʉ carea dewara judiorãba mʉ̃ra biẽ́ jara panʉa.–
Maʉ̃ne Pauloba judiorã mama ɓearãa jarasia:
–Ãcõrẽba dadjirãra ʉ̃rẽbabida ĩjã panʉbʉrʉ ¿cãrẽ cãrẽã ĩjãnaẽ́ panʉ idjia beu ɓaɗada aɓa ʉ̃rẽbabisida?–
Mãwã jarapeɗa Agripaa nẽbʉrʉsia:
8 –
9 –Mʉ̃a naẽna crĩcha ɓasia ne jũmada oida ɓʉda ẽberãrãba Jesu Nazareɗebemara ĩjãrãnamãrẽã.
10 Mʉ̃a Jerusaleʉ̃ne wãrãda mãwã osia. Sacerdote bororãba ãdji trʉ̃neba mʉ̃́a idu Jesu ĩjã ɓeara zocãrã preso ɓʉbisiɗaa. Idjaɓa maʉ̃ ẽberãrã beabisiɗaɗe mʉ̃a biɗa bia ɓʉaɗa asia.*
11 Judiorã dji jʉrebada deza mʉ̃a ãdjirãra cawa obibadjia. Ɓarima zocãrã ãdjirãa Jesuɗebemada õgo biẽ́ beɗeabisia. Mʉ̃ra ãdjirã ume bio quĩrũ ɓaɗa bẽrã drua ãĩbema puruɗe biɗa biẽ́ oi carea ẽpẽbadjia.
12 Ewari aɓa sacerdote bororãba mʉ̃ra Damasco puruɗaa diabuesiɗaa ãdji trʉ̃neba Jesu ĩjã ɓeara preso jidacuamãrẽã.
13 Baribʉrʉ, mʉ̃ boro, umatipa oɗe nĩne uruada ʉ̃mãdau cãyãbara dorrodorroara ɓʉda unusia. Maʉ̃ uruaba mʉ̃ra, mʉ̃ ume nĩna siɗa bajãneba jʉ̃rã tẽũsia.
14 Jũma dairãra egode ɓaesiɗaa. Maʉ̃ne mʉ̃a beɗeada ũrĩsia. Maʉ̃ beɗeaba mʉ̃́a hebreoɗe nãwã jarasia: “Saulo, Saulo, ¿cãrẽ cãrẽã mʉ̃ra biẽ́ oi carea ẽpẽ ɓʉ? Ara bʉduɓa puabʉrʉa cũmia ʉ̃rʉ̃ tʉgabʉrʉ quĩrãca.”
15 Maʉ̃ne mʉ̃a iwiɗisia: “Mʉ̃ boro, ¿bʉra cai?” Mʉ̃ Boroba panusia: “Mʉ̃ra Jesua. Bʉa biẽ́ oi carea ẽpẽ ɓʉra mʉ̃́a.
16 Baribʉrʉ piradrʉdua. Ara mʉ̃da bʉ́a unubisia mʉ̃ nezocada ɓʉi carea. Bʉa ununada idjaɓa mʉ̃a unubi siɗa beɗeaida ɓʉa.*
17 26:17-18 Mʉ̃a bʉra bʉ ẽberãrã jʉwaɗebemada idjaɓa judiorãẽ́ jʉwaɗebemada ẽdrʉ edaya. Mʉ̃a bʉra judiorãẽ́maa diabueya mʉ̃ wãrã beɗeara cawaɗamãrẽã.* Maʉ̃ bẽrã pãĩmane duananada ʉ̃naane nĩbaɗia. Diauru jʉwaeɗabemada ẽdrʉɗapeɗa Ãcõrẽmaa zeɗia. Mʉ̃ ĩjãbʉda carea ãdjia cadjirua opeɗaɗara Ãcõrẽba quĩrãdoaya. Idjaɓa Ãcõrẽba ãdjirãra ɓʉya idjia edaɗa puruɗebemarãda ɓeaɗamãrẽã.”
19 Mʉ̃ boro Agripa, Jesuba maʉ̃ ewariɗe mʉ̃́a jaraɗara jũma ĩjã osia.*
20 Mʉ̃a naãrã Damasco puruɗebemarãa jarasia ãdjia cadjirua obadara igaraɗapeɗa Ãcõrẽmaa zeɗamãrẽã. Mãwãnacarea Jerusaleʉ̃ puruɗe, jũma Judea druaɗe, idjaɓa judiorãẽ́ma biɗa aɓarida jarasia. Jũmarãa jarasia bia o panʉneba unubiɗida panʉda ãdjia cadjirua opeɗaɗara wãrãda igarasiɗada.
21 Maʉ̃ careabʉrʉ judiorãba mʉ̃ra Ãcõrẽ de dromane jidaɗapeɗa bea quĩrĩãsiɗaa.
22 Baribʉrʉ Ãcõrẽba maʉ̃ ewariɗeba ʉ̃taa careba ɓʉ bẽrã mʉ̃a dji dromarãa, dji dromarãẽ́a biɗa waɗibiɗa Jesuɗebemada beɗea ɓʉa. Ãcõrẽneba beɗeabadaba, Moise biɗa cãrẽda sãwãida jarasiɗaa. Maʉ̃drʉ mʉ̃a jara ɓʉa.
23 Ãdjirãba jarabadjiɗaa Ãcõrẽba ẽdrʉ edabari diai jaraɗara bia mĩgaida ɓasida idjaɓa beuɗarãnebemada naãrã ʉ̃rẽbaida ɓasida ʉ̃naa dadjirã ẽdrʉɗiɗebemada judiorãa, judiorãẽ́a biɗa jarai carea.–*
24 Pauloba mãwã idjiare beɗea ɓʉɗe Pestoba jĩgua jarasia:
–Paulo, bʉra quĩrãẽ́ ɓʉa. Bʉa jũmawãyã carta cawa ɓʉɗeba quĩrãẽ́ ɓesia.–
25 Baribʉrʉ Pauloba jarasia:
–Dji droma Pesto, mʉ̃ra dji quĩrã biaa. Mʉ̃a jara ɓʉra wãrã bẽrã ariɗe ɓʉa.
26 Mʉ̃ boro Agripaba maʉ̃nebemada cawa ɓʉa. Maʉ̃ bẽrã mʉ̃ra idji quĩrãpita ne wayaa neẽ́ beɗea ɓʉa. Mʉ̃maarã idjia Jesu mãwãnara jũma cawa ɓʉa jũmarãba ebuɗa nẽbʉrʉbada bẽrã.
27 Mʉ̃ boro Agripa, Ãcõrẽneba beɗeabadaba maʉ̃nebema ɓʉpeɗaɗara ¿bʉa ĩjã ɓʉca? Mʉ̃a cawa ɓʉa bʉa ĩjã ɓʉda.–
28 Agripaba Pauloa jarasia:
–¿Bʉa ara naʉ̃da mʉ̃́a Critora ĩjãbica?–*
29 Pauloba jarasia:
–Mʉ̃a Ãcõrẽa iwiɗi ɓʉa dãrãẽ́ne wa dãrãbʉrʉɗe biɗa bʉra idjaɓa jũma za mʉ̃ beɗea ũrĩ duanʉ siɗa mʉ̃ quĩrãca ɓeaɗamãrẽã, baribʉrʉ naʉ̃ carena neẽ́.–
30 Mãwã jaraɗacarea Agripara, Pestora, Berenicera, jũma mama chũmea siɗa piradrʉsiɗaa.
31 Dajadaa wãnapeɗa ãdjirãza jara duanasiɗaa:
–Jãʉ̃ ẽberãba cadjirua oẽ́ ɓʉa idji beaɗi carea wa preso ɓʉɗi carea.–
32 Maʉ̃ne Agripaba Pestoa jarasia:
–Romanebema boroba cawa omãrẽã naʉ̃ ẽberãba iwiɗiɗaẽ́bara, bʉa idjira poya ẽdrʉ ɓʉcasia.–
Beɗea eɗaare
^ 26:10. Hecho 8:1-3.
^ 26:16. Bʉa ununada. Griego beɗeaɗe ʉ̃cʉrʉ cartaɗe ɓʉ́ ɓʉa: “Bʉa mʉ̃neba ununada.”
^ 26:17-18. Mʉ̃ wãrã beɗeara cawaɗamãrẽã. Griego beɗeaɗe ɓʉ́ ɓʉa: “Ãdjirã daura ogaɗamãrẽã.”
^ 26:19. Jesuba maʉ̃ ewariɗe mʉ̃́a jaraɗara. Griego beɗeaɗe ɓʉ́ ɓʉa: “Cãĩmocara quĩrãca ununara.”
^ 26:23. Isaía 42:6-7; 49:6.
^ 26:28. Griego beɗeaɗe maʉ̃ba idjaɓa jara ɓʉa: “Bʉa mʉ̃́a berara crĩchabisia Crito ẽberã baida.”
