Hecho 18:1-28
18 Mãwãnacarea Paulora Atena puruɗeba Corinto puruɗaa wãsia.
2 18:2-3 Mama judio Aquila abadada unusia. Maʉ̃ Aquilara Ponto druaɗebema basía.* Dji quima Priscila ume Italia druaɗeba jũẽpeɗaɗada dãrãẽ́ ɓasia. Italiaɗeba ẽdrʉsiɗaa Romanebema boro Claudioba jũma judiorã Romane ɓeara ãyã wãbiɗa bẽrã.* Corintoɗe Paulora ãdjimaa wãsia ãdji quĩrãca wua deda o cawa ɓʉ bẽrã. Maʉ̃be ãdji ume ɓesia ãbaa trajai carea.
3 –
4 Ʉ̃nãũbada ewariza Paulora judiorã dji jʉrebada deɗe beɗea ɓabadjia judiorãba, griegorã biɗa Jesura ĩjãnamãrẽã.
5 Mãwã ɓʉɗe Silara, Timoteo siɗa Macedonia druaɗeba jũẽsiɗaa. Mamaʉba ʉ̃taa Pauloba ewariza Ãcõrẽ beɗeada jaradia ɓabadjia. Idjia judiorãa jarabadjia Jesura wãrãda Ãcõrẽba ẽdrʉ edabari diai jaraɗada.
6 Baribʉrʉ idjia jara ɓʉra ãdjirãba igarasiɗaa. Idjaɓa idjiɗebemada biẽ́ beɗeabadjiɗaa. Maʉ̃ carea Pauloba cacuaɗe jʉ̃ ɓʉra jãrãpetapeɗa jarasia:
–Bãrãba maʉ̃ beɗea igara panʉ carea Ãcõrẽba cawa obʉrʉɗe mʉ̃ra beɗeaɗe ɓaẽ́a. Maʉ̃gʉra ara bãdjiɗe ɓʉa. Namaʉba ʉ̃taa mʉ̃ra judiorãẽ́maa wãya.–
7 Ara maʉ̃da judiorã dji jʉrebada deɗe jaradia ɓaɗada Ticio Justo deɗe jaradiaɗe wãsia. Maʉ̃ ẽberãba Ãcõrẽra waya ɓasia. Idji dera judiorã dji jʉrebada de orrocawa ɓasia.*
8 Judiorã dji jʉrebada deɗebema borora Crispo abadjiɗaa.* Maʉ̃ Crispoba, jũma idji ẽberãrã biɗa dadji Borora ĩjãsiɗaa. Maʉ̃ awara zocãrã Corintoɗebemarãba ũrĩsiɗaa Pauloba Jesuɗebema jaradia ɓʉda. Ĩjãnapeɗa borocuesiɗaa.
9 Ewari aɓa diamasi Pauloba cãĩmocara quĩrãca unusia dadji Boroba idjía nãwã jarabʉrʉda: “Ne wayarãdua. Jaradia ɓadua. Chupearãdua.
10 Mʉ̃ra bʉ ume ɓʉa. Ni aɓaʉba bʉra poya biẽ́ oɗaẽ́a, mʉ̃a ẽberãrã zocãrã naʉ̃ puruɗe eroɓʉ bẽrã.”
11 Maʉ̃ bẽrã Pauloba poa aɓa ẽsidra Ãcõrẽ beɗeara mama jaradia ɓesia.
12 Galioʉ̃ abada Acaya druaɗebema boroda ɓesiɗe judiorãra beɗea ausiɗaa Paulo biẽ́ oɗi carea.* Idjira maʉ̃ Galioʉ̃maa jida edesiɗaa.
13 Ãdjirãba jarasiɗaa:
–Za ɓʉba ẽberãrãa jara ɓʉa Ãcõrẽra wayaɗida panʉda baribʉrʉ dadji romanorã leyba jara ɓʉ quĩrãca jaradiacaa.–
14 Paulo beɗeabʉrʉ basiɗe Galioʉ̃ba judiorãa jarasia:
–Naʉ̃ ẽberãba biẽ́ oɗabara wa cadjirua dromada oɗabara mʉ̃a bãrã beɗeara sẽẽ́ ũrĩcasia.
15 Baribʉrʉ bãrãba aɓabe beɗea carea, bãrã ãcõrẽ trʉ̃ carea, bãrã ley carea biɗa ijara panʉa. Maʉ̃ bẽrã ara bãduɓa cawa oɗadua. Mʉ̃a maʉ̃gʉɗebemada cawa oi carea ɓʉẽ́a.–
16 Mãwã jarapeɗa ãyã jʉrecuasia.
17 Maʉ̃ne jũmarãba judiorã dji jʉrebada deɗebema boro Sosteneda jidaɗapeɗa ara mama puosiɗaa.* Baribʉrʉ Galioʉ̃ba maʉ̃ carea crĩchaẽ́ basía.
Paulo jẽda Antioquíaɗaa wãna
18 Paulora Corinto puruɗe dãrã ɓasia. Maʉ̃ne djabarã ãbaa jʉrepeɗa wãyana asia. Barcoɗe ɓadoi naẽna Paulora Cencrea puruɗe boroɓichia tʉbisia Ãcõrẽ itea ne oi jaraɗara jũma oɗa bẽrã.* Maʉ̃bebʉrʉ Siria druaɗaa wãsia. Aquilara dji quima Priscila siɗa idji ume wãsiɗaa.
19 Wãbʉdaɗe Epeso puruɗe jũẽsiɗaa. Mama Paulora Aquila, Priscila ume ɓaɗada awara wãsia. Maʉ̃ne judiorã dji jʉrebada deɗaa wãpeɗa judiorã ume Jesuɗebemada beɗeasia.
20 Ãdjirãba idjía beɗea djuburiasiɗaa mama dãrã ɓemãrẽã, baribʉrʉ ɓe quĩrĩãẽ́ basía.
21 Ãtebʉrʉ wãbʉrʉɗe nãwã jarasia:
–Ãcõrẽba quĩrĩãsira mʉ̃ra waya bãrã acʉɗe zeya.–*
Maʉ̃be barcoɗe ɓadopeɗa Epesoɗeba wãsia.
22 Cesarea puruɗe jũẽpeɗa Paulora Jerusaleʉ̃naa djabarã acʉɗe wãsia. Mamaʉba Antioquía puruɗaa wãsia.
Apolo Epesoɗaa zeɗa
23 Paulo mama dãrã ɓaɗacarea Galacia druaɗe, Prigia druaɗe biɗa pʉrrʉa wãsia. Puruza Jesu ĩjã ɓeaa jaradiasia biara ĩjãnamãrẽã.
24 Maʉ̃misa judio Apolo abadada Epeso puruɗe jũẽsia. Maʉ̃ Apolora Alejandría puruɗebema basía. Idjira bia beɗeabadjia idjaɓa Ãcõrẽ carta siɗa bio cawa ɓasia.
25 Apoloba dadji Boro Jesu Ora dewaraɗeba cawasia. Jesuɗebemada bio ɓʉsriɗa beɗeabadjia idjaɓa ariɗe jaradia ɓabadjia. Baribʉrʉ borocueiɗebemada aɓabe Juaʉ̃ba jaradia ɓaɗadrʉ cawa ɓasia.*
26 Maʉ̃ne Apoloba judiorã dji jʉrebada deɗe ne wayaa neẽ́ jaradia ɓasia. Idjia jaradia ɓʉra Aquilaba, Priscila biɗa ũrĩsiɗaa. Maʉ̃ carea idjira ãyã edeɗapeɗa Ãcõrẽ Oɗebemada biara jaradiasiɗaa.
27 Mãwãnacarea Apolora Acaya druaɗaa wã quĩrĩã ɓasia. Maʉ̃ carea djabarã Epesoɗebemaba idjira wãida bio bia ɓʉaɗa asiɗaa. Cartada ɓʉsiɗaa Jesu ĩjã ɓeaba idjira mama bia edaɗamãrẽã. Acayaɗe jũẽsiɗe Apoloba djabarã Ãcõrẽ biaɗeba Jesu ĩjãpeɗaɗada bio carebasia.
28 Idjia jaradia ɓʉɗe judiorãba sewaaɗa abʉdaza jũmarã quĩrãpita ebuɗa cawabibadjia ãdjia Jesuɗebemada ãĩ crĩcha panʉda. Ãcõrẽ Beɗeaɗeba cawabibadjia Jesura wãrãda Ãcõrẽba ẽdrʉ edabari diai jaraɗada.
Beɗea eɗaare
^ 18:2-3. Ponto druara idjaɓa Bitinia abadjiɗaa. Hecho 16:7.
^ 18:2-3. Claudioba mãwã osia poa 49ɗe.
^ 18:7. Ticio Justo. Griego beɗeaɗe zocãrã cartaɗe aɓabe “Justo” ɓʉ́ ɓʉa. Ʉ̃cʉrʉba crĩcha panʉa maʉ̃ Justora Pauloba “Gayo” trʉ̃ jarabadjida. Romano 16:23; 1 Corinto 1:14.
^ 18:8. Maʉ̃ Crispoɗebemada Pauloba ɓʉsia 1 Corinto 1:14ɗe.
^ 18:12. Maʉ̃ Galioʉ̃ra Acayaɗebema boroda ɓesia poa 51ɗe.
^ 18:17. Jũmarãba. Griego beɗeaɗe zocãrã cartaɗe ɓʉ́ ɓʉa: “Griegorãba.”
^ 18:18. Numero 6:1-21.
^ 18:21. Griego beɗeaɗe ʉ̃cʉrʉ cartaɗe naʉ̃ siɗa ɓʉ́ ɓʉa: “Mʉ̃ra Jerusaleʉ̃ne ewari droma zebʉrʉra báɗe wãida ɓʉa.”
^ 18:25. Marco 1:1-8.
