Hecho 20:1-38
20 Mãwã quĩrũ duananacarea Pauloba Jesu ĩjã ɓeara trʉ̃cuapeɗa ãdjirã ume beɗeasia dadjirã Borora biara ĩjãnamãrẽã. Maʉ̃be wãyaana apeɗa ojũẽcuapeɗa Macedonia druaɗaa wãsia.*
2 Jũma maʉ̃ druaɗe pʉrrʉa nĩbasiɗe djabarãda carebabadjia dadjirã Borora biara ĩjãnamãrẽã.* Maʉ̃bebʉrʉ Grecia druaɗe jũẽsia.
3 Mama jeɗeco ũbea ɓasia. Paulo Siria druaɗaa barcoɗe wãi basiɗe cawasia judiorãba idji biẽ́ oɗi carea beɗea ausiɗada. Maʉ̃ carea Macedonia druaareba wãsia.
4 Pirro warra Sopater Berea puruɗebemada, Segundo idjaɓa Aristarco Tesalonica puruɗebemada, Gayo Derbe puruɗebemada, Tiquico idjaɓa Tropimo Asia druaɗebemada, Timoteo siɗa idji ume Asia druaɗaa wãsiɗaa.*
5 Maʉ̃ djabarãra dai na wãnapeɗa Troa puruɗe jʉ̃ã panasiɗaa.
6 Paʉ̃ ẽsãbari neẽ́ ɓʉ cobada ewari baɗacarea daira Pilipo puruɗeba barcoɗe wãsiɗaa. Ewari juesumane ãdji ume Troaɗe dji unusiɗaa. Mama siete ewari panesiɗaa.
Troa puruɗe duanana
7 Maʉ̃be nabema ewari domiane Jesu ĩjã ɓea ume ãbaa dji jʉresiɗaa Jesu quĩrãnebaɗi carea cobadara coɗi carea.* Maʉ̃ne Pauloba jaradia ɓasia. Nurẽma wãida ɓʉ bẽrã waɗi ariquẽtra beɗea ɓasia.
8 Dairãra ʉ̃taarebema dejãne ãbaa dji jʉre panasiɗaa. Ĩbĩrãda zocãrã coa nũmeasia.
9 Maʉ̃ne cũdra Eutico abadada dajadaa acʉbadaɗe chũmasia. Paulora dãrã beɗea ɓʉ bẽrã maʉ̃ cũdrara daupeaba cãĩ dogosia. Mãwã ɓʉɗe dejã ũbeaɗeba uɗu wãsia. Idjira jaiɗaɗada ẽberãrãba bara edasiɗaa.
10 Paulora uɗaa zepeɗa dji cũdra ʉ̃rʉ̃ ɓarru coɓepeɗa bʉrʉsia. Maʉ̃ne jarasia:
–Dauperarãnadua. Idjira zocai ɓʉa.–
11 Paulora wayacusa deɗe eɗa wãpeɗa Jesu quĩrãnebaɗi carea cobadada ãdjirã ume cosia. Maʉ̃be waɗibiɗa beɗea ɓʉɗe ʉ̃nadrʉpeɗa wãsia.
12 Dji cũdrara diguiɗaa zocai edesiɗaa. Maʉ̃ carea jũmarãda ɓʉsriɗa duanesiɗaa.
Troaɗeba Mileto puruɗaa wãpeɗaɗa
13 Paulora Asoʉ̃ puruɗaa óare wã quĩrĩãsia. Baribʉrʉ daira barcoɗe na wãbisia. Mama idjira ɓadoyaɗa asia. Daira ara maʉ̃da wãsiɗaa.
14 Asoʉ̃ne Paulo ume dji ununapeɗa barcoɗe ɓadosia. Maʉ̃be Mitilené puruɗaa wãsiɗaa.
15 Mamaʉba wãnapeɗa nurẽma Quío morro quĩrãpe jũẽne wãsiɗaa. Nurẽma Samo puruɗe wiɓarisiɗaa. Maʉ̃be Trogilioɗe wiɓariɗapeɗa nurẽma Mileto puruɗe jũẽsiɗaa.*
16 Paulora Asia druaɗe dãrã ɓa amaaba Epeso puruɗe wiɓariẽ́ wãyã wãsia. Idjira isabe Jerusaleʉ̃ne jũẽ quĩrĩã ɓasia. Idjia crĩchasia poya jũẽibʉrʉ Pentecoste ewariɗe mama ɓaida.
Pauloba djabarã Epesoɗebemarãa beɗeaɗa
17 Mileto puruɗe ɓʉɗe Pauloba Epesoɗebema djabarã wagabadada trʉ̃bisia.
18 Idjima jũẽsiɗaɗe Pauloba jarasia:
–Bãrãba cawa panʉa mʉ̃ naʉ̃ Asia druaɗe jũẽnaneba aɓa wãbʉrʉɗaa sãwã bãrã tãẽna nĩbabadjida.
19 Mʉ̃ra dji dromada crĩchaẽ́ dadjirã Boroba quĩrĩã ɓʉra o ɓasia. Eɗauɗe jĩã ɓabadjia idjaɓa judiorãba mʉ̃ra biẽ́ o quĩrĩã panana bẽrã bia mĩga ɓabadjia.
20 Mãwãmĩna mʉ̃a jũmarã quĩrãpita, bãrã deza biɗa bãrã carebai carea jaradia ɓabadjia. Ni maãrĩ biɗa jaradia ama ɓaca basía.
21 Judiorãa, judiorãẽ́a biɗa mʉ̃a jarasia cadjirua obadara igaraɗapeɗa Ãcõrẽmaa zeɗamãrẽã idjaɓa dadjirã Boro Jesucritora ĩjãnamãrẽã.
22 Jãʉ̃be Ãcõrẽ Jaureba mʉ̃ra wãbi ɓʉ bẽrã Jerusaleʉ̃naa wãya.* Baribʉrʉ mʉ̃a adua ɓʉa jãma cãrẽda sãwãida.
23 Aɓabe cawa ɓʉa Ãcõrẽ Jaureba mʉ̃́a puruza ebuɗa jarabarida mʉ̃ra bia mĩga ɓaida idjaɓa preso ɓaida.
24 Baribʉrʉ maʉ̃nebemada mʉ̃a jũmawãyã crĩchacaa, mʉ̃ bia ɓaira jʉrʉẽ́ ɓʉ bẽrã. Aɓabe dadjirã Boro Jesuba mʉ̃́a obi ɓʉra pãrã quĩrĩã ɓʉa. Maʉ̃ bẽrã beɗea bia Ãcõrẽba idji biaɗeba careba ɓʉɗebemada mʉ̃a jara ɓaya.
25 Ãcõrẽba idji ẽberãrã bia pe eroɓʉɗebemada mʉ̃a bãrãa jara ɓabadjia. Baribʉrʉ iɗi cawa ɓʉa bãrãba mʉ̃ra waa ununaẽ́da.
26 20:26-27 Mʉ̃a ne wayaa neẽ́ Ãcõrẽba bãrã itea o quĩrĩã ɓʉda jũma ebuɗa jara ɓabadjia. Maʉ̃ carea iɗi mʉ̃a jaraya: aɓaʉda aduaibʉrʉ, mʉ̃ra beɗeaɗe ɓʉẽ́a.
28 Ãcõrẽba idji Warra oaɗeba ẽberãrãra idji itea edasia.* Ãcõrẽ Jaureba bãrãra ɓʉcãrĩa djabarãra waga pananamãrẽã. Maʉ̃ bẽrã ara bãduɓa bio quĩrãcuita ɓeaɗadua idjaɓa Ãcõrẽ warrarã siɗa jũma waga pananadua.
29 Mʉ̃a cawa ɓʉa mʉ̃ wãnacarea ẽberã cadjiruarãda usa cadrʉa quĩrãca bãrã tãẽna zeɗida djabarã jũma ãrĩni carea.
30 Ara bãdjiɗebemarã biɗa sewada jaradiaɗia Jesu ĩjã ɓearãba ẽpẽnamãrẽã.
31 Maʉ̃ carea quĩrãcuita ɓeaɗadua. Quĩrãnebaɗadua mʉ̃a poa ũbea ãsa, diamasi biɗa jĩã ɓʉba bãdjiza sãwã nĩbaɗida panʉda jaradia ɓasida.
32 Jãʉ̃be djabarã, mʉ̃a bãrãra Ãcõrẽ jʉwaɗe ɓʉya. Idji biaɗeba dadjirã careba ɓʉɗebema beɗeara quĩrãnebaɗadua. Idji biaɗeba ʉɓʉada diabaria bãrãba biara ĩjãnamãrẽã. Idjia diai jaraɗara idji biaɗeba bãrãba edaɗia. Jũma idji itea bia ɓʉɗarãba maʉ̃ra edaɗia.
33 Mʉ̃a djãrã paratada, oroda, cacuaɗe jʉ̃bari siɗa ara mʉ̃dji itea awuaẽ́ basía.
34 Bãrãba bio cawa panʉa ara mʉ̃dji jʉwaba trajasida mʉ̃a eroɓaida ɓʉra edai carea idjaɓa mʉ̃ ume nĩnaa diai carea.
35 Jũma mʉ̃a oɗaɗeba bãrãa cawabisia ʉɓʉa traja panʉneba dji poya trajaɗaẽ́ queɗeada carebaɗida panʉda. Quĩrãnebaɗida panʉa dadjirã Boro Jesuba nãwã jarasida: “Djãrãa ne dia ɓʉra Ãcõrẽ quĩrãpita biara ɓʉa djãrãneba ne eda ɓʉ cãyãbara.”–
36 Mãwã jaraɗacarea Paulora chĩrãboroɗe coɓepeɗa jũma ãdjirã ume Ãcõrẽa iwiɗisia.
37 Maʉ̃be bia wãbiɗi carea jũmarã bio jĩã panʉba Paulora ojũẽnapeɗa isõsiɗaa.
38 Bio sopuasiɗaa waa ununaẽ́ana aɗa bẽrã. Maʉ̃be idjira barcoɗaa diaɗe wãsiɗaa.
Beɗea eɗaare
^ 20:1. Ojũẽcuapeɗa. Griego beɗeaɗe zocãrã cartaɗe maʉ̃ra neẽ́a.
^ 20:2. Paulora poa aɓa ẽsadra Macedonia druaɗe ɓasia. Maʉ̃ne carta 2 Corinto abadada ɓʉsia.
^ 20:4. Asia druaɗaa. Griego beɗeaɗe ʉ̃cʉrʉ cartaɗe maʉ̃ra neẽ́a.
^ 20:7. Jesu quĩrãnebaɗi carea cobadada coɗi carea. Griego beɗeaɗe ɓʉ́ ɓʉa “paʉ̃ cõrãcuaɗapeɗa cosiɗaa.” Luca 22:19-20; Hecho 2:42; 1 Corinto 11:23-26.
^ 20:15. Trogilioɗe wiɓariɗapeɗa. Griego beɗeaɗe zocãrã cartaɗe maʉ̃ra neẽ́a.
^ 20:22. Ãcõrẽ Jaureba mʉ̃ra wãbi ɓʉ bẽrã. Griego beɗeaɗe maʉ̃ba idjaɓa jara ɓʉa: “Mʉ̃ jaureɗe wãida ɓʉda cawa ɓʉ bẽrã.”
^ 20:28. Ãcõrẽba idji Warra oaɗeba. Griego beɗeaɗe ʉ̃cʉrʉ cartaɗe ɓʉ́ ɓʉa: “Dadji Boroba ara idji oaɗeba.”
