Hecho 6:1-15
6 Maʉ̃ ewariɗe Jesu ĩjã ɓeara auɗuara yõ wãsiɗaa. Maʉ̃ne griego beɗeaɗe beɗeabadaba hebreo beɗeaɗe beɗeabadara biẽ́ jara panesiɗaa. Jarasiɗaa djabarãba pẽdra wẽrãrã ewariza carebabʉdaɗe ãdji pẽdra wẽrãrãda carebaɗacada.
2 Maʉ̃ carea Jesuba diabueɗa doce panʉba jũma Jesu ĩjã ɓeara ãbaa jʉreɗapeɗa nãwã jarasiɗaa:
–Bia ɓʉẽ́a dairãba Ãcõrẽ beɗea jaradia panʉra idu ɓʉɗida aɓabe pẽdra wẽrãrã carebaɗi carea.*
3 Maʉ̃ bẽrã djabarã, bãrãnebema siete ẽberãrã jipa ɓeada edaɗadua. Ãdjira Ãcõrẽ Jaureɗeba ɓeaɗida panʉa idjaɓa crĩcha cawa ɓeaɗida panʉa. Maʉ̃gʉrãra dairãba ɓʉɗia pẽdra wẽrãrã, dewararã siɗa carebaɗamãrẽã.
4 Mãwã osiɗara dairãba poya biara Ãcõrẽa iwiɗi panania idjaɓa idji beɗeara jaradia panania.–
5 Ãdjia jarapeɗaɗara jũmarãba bia ũrĩsiɗaa. Maʉ̃ bẽrã Estebaʉ̃da edasiɗaa. Maʉ̃ Estebaʉ̃ba Jesura bio ĩjã ɓasia; Ãcõrẽ Jaureɗeba ɓasia. Idji awara Pelipeda, Procoroda, Nicanorda, Timoʉ̃da, Parmenada, idjaɓa Nicolá Antioquía puruɗebemada edasiɗaa.* Maʉ̃ Nicolára griego basía baribʉrʉ judio quĩrãca ɓabadjia.
6 Djabarãba maʉ̃gʉrãra Jesuba diabueɗarãmaa edesiɗaa. Maʉ̃be Jesuba diabueɗarãba Ãcõrẽa iwiɗibʉdaɗe jʉwada ãdjirã ʉ̃rʉ̃ ɓʉsiɗaa Ãcõrẽba quĩrĩã ɓʉda oɗamãrẽã.
7 Maʉ̃ne djabarãba beɗea dadji Boro Jesuɗebemada auɗuara jarasiɗaa.* Mãwã Jesu ĩjã ɓeara Jerusaleʉ̃ne auɗuara yõsiɗaa. Maʉ̃ awara zocãrã sacerdoterã biɗa ĩjãsiɗaa.
Estebaʉ̃ dji bororãmaa edepeɗaɗa
8 Ãcõrẽba idji biaɗeba Estebaʉ̃ra bio careba ɓasia. Idji ʉɓʉara Estebaʉ̃a diasia ne ununaca waiɓʉada ẽberãrã tãẽna o ɓamãrẽã.
9 Maʉ̃ne ʉ̃cʉrʉ judiorã Cirene druaɗebemada idjaɓa Alejandría puruɗebemada panasiɗaa. Ãdjirã dji jʉrebada dera “Nezoca Ẽdrʉpeɗaɗarã” abadjiɗaa. Dewara judiorã Cilicia druaɗebemada idjaɓa Asia druaɗebema siɗa panasiɗaa. Jũma maʉ̃ judiorãra Estebaʉ̃ ume caicaya duanesiɗaa.
10 Baribʉrʉ ãdjirãba Estebaʉ̃ra poyaɗaẽ́ basía, idjira Ãcõrẽ Jaure necawaaɗeba beɗeabadji bẽrã.
11 Maʉ̃ carea ãdjirãba ʉ̃cʉrʉ ẽberãrãa paratada diasiɗaa nãwã sewa oɗamãrẽã:
–Daiba ũrĩsiɗaa jãʉ̃ ẽberãba Moiseɗebemada, Ãcõrẽnebema siɗa biẽ́ beɗea ɓʉda.–
12 Mãwã ãdjirãba puruda, judio dji dromarãda, judiorã ley jaradiabada siɗa quĩrũbigasiɗaa. Maʉ̃ carea Estebaʉ̃ra jidaɗapeɗa judiorã dji bororã ãbaa jʉre duanʉmaa edesiɗaa.
13 Maʉ̃ne sewa jaraɗamãrẽã ʉ̃cʉrʉ ẽberãda mamaa edesiɗaa. Maʉ̃gʉrãba nãwã jarasiɗaa:
–Jãʉ̃ ẽberãba Ãcõrẽ de dromanebemada, dadjirã leyɗebema siɗa biẽ́ beɗea ɓabaria.
14 Idjia jarasia Jesu Nazareɗebemaba Ãcõrẽ de dromara ãrĩda idjaɓa Moiseba jaradia ɓaɗara quĩrã awara oida. Idjira mãwã beɗea ɓʉda daiba ũrĩsiɗaa.–
15 Jũma dji bororã mama chũmeaba Estebaʉ̃ acʉbʉdaɗe unusiɗaa idji quĩrãra bajãnebema nezoca quĩrãdarra quĩrãca ɓʉda.
Beɗea eɗaare
^ 6:2. Pẽdra wẽrãrã carebaɗi carea. Griego beɗeaɗe ɓʉ́ ɓʉa: “Djãrã ne cobigaɗi carea” wa “parata cawa jeɗecaɗi carea.”
^ 6:5. Maʉ̃ Pelipeɗebemada unubadaa Hecho 8:4-13, 26-40ɗe, 21:8-9ɗe biɗa. Idjira Jesuba diabueɗaẽ́ basía. Idjira biara trʉ̃ jarabadjiɗaa “Griego Pelipe” wa “Pelipe, beɗea bia jarabari.”
^ 6:7. Beɗea dadji Boro Jesuɗebema. Griego beɗeaɗe ɓʉ́ ɓʉa “Ãcõrẽ beɗea.”
