Hecho 4:1-37
4 Pedro, Juaʉ̃ siɗa ẽberãrã ume waɗi beɗea panʉne sacerdoterãda, Ãcõrẽ de dromanebema zarrarã boroda, saduceorã siɗa ãdjimaa zesiɗaa.
2 Maʉ̃ne Pedroba Juaʉ̃ biɗa ẽberãrãa jaradia panasiɗaa Jesu ʉ̃rẽbaɗa quĩrãca ẽberãrã siɗa ʉ̃rẽbaɗida. Maʉ̃ carea dji bororãra quĩrũsiɗaa.
3 Pedrora, Juaʉ̃ siɗa jidaɗapeɗa queuboɗo bẽrã aɓa nurẽma preso ɓʉsiɗaa.
4 Baribʉrʉ Pedroba jaradia ɓaɗa ũrĩ panana zocãrãba Jesura ĩjãsiɗaa. Maʉ̃rã bara Jesu ĩjã ɓeara dji umaquĩrãrã awa mil juesuma panasiɗaca ɓʉa.
5 Nurẽma judiorã dji bororãda, dji drõãrãda, ãdji ley jaradiabadarã siɗa Jerusaleʉ̃ne ãbaa dji jʉresiɗaa.
6 Sacerdote dji droma Anáda arima ɓasia. Idjaɓa idji ẽberãrãda zocãrã panasiɗaa: Caipáda, Juaʉ̃da, Alejandroda, dewararã siɗa.*
7 Maʉ̃ne ãdjirãba Pedrora Juaʉ̃ siɗa enebisiɗaa. Ãdjirã quĩrãpita nũmʉnapeɗa nãwã iwiɗisiɗaa:*
–Jãʉ̃ ẽberã jĩrũ biẽ́ ɓaɗara bãrãba ¿cai ʉɓʉaɗeba biabisiɗa? ¿Cai trʉ̃neba jãwã osiɗa?–
8 Maʉ̃ne Pedroba Ãcõrẽ Jaureɗeba nãwã panusia:
–Dadji puruɗebema bororã, Israelɗebema drõãrã dji dromarã:
9 iɗi bãrãba daira cawa obʉdaa ẽberã jĩrũ biẽ́ ɓaɗa carebapeɗaɗa carea. Iwiɗi panʉa idjira sãwã biasida.
10 Mãẽteara daiba ebuɗa panunia bãrãba, jũma israelerã biɗa bio cawaɗamãrẽã. Naʉ̃gʉ ẽberã bãrã quĩrãpita nũmʉra Jesucrito Nazareɗebema ʉɓʉaɗeba biasia.* Maʉ̃ Jesucritora bãrãba cruɗe cachi beasiɗaa, baribʉrʉ Ãcõrẽba idjira ʉ̃rẽbabisia.
11 Ãcõrẽ cartaɗe ɓʉ́ ɓʉa: “De obadaba mõgara igarapeɗaɗara dji biara ɓʉda ɓesia.”* Jesura maʉ̃ mõgara quĩrãca ɓʉa. Bãrã dji de obada quĩrãca panʉba idjira igarasiɗaa. Baribʉrʉ Ãcõrẽba idjira dji biara ɓʉda ɓʉsia.
12 Aɓa idjiabʉrʉ dadjirãra poya ẽdrʉ edaya. Idji awara Ãcõrẽba ni aɓaʉda naʉ̃ ẽjũãne ɓʉẽ́ basía ẽberãrã ẽdrʉ edamãrẽã.–
13 Dji bororãba Pedro, Juaʉ̃ siɗa ne wayaa neẽ́ beɗea panʉda unusiɗaɗe cawa crĩchaɗaẽ́ basía. Ãdjirãba cawa panasiɗaa Pedrora Juaʉ̃ siɗa mãcua carta cawa panʉẽ́da. Maʉ̃ awara cawasiɗaa ãdjira Jesu ume nĩbabadjiɗada.
14 Baribʉrʉ dji ẽberã biaɗara ãdji ume nũmʉ bẽrã ãdjira poya biẽ́ jaraɗaẽ́ basía.
15 Maʉ̃ne dji bororãba Pedroa, Juaʉ̃a biɗa jarasiɗaa dajadaa jʉ̃ãne wãnamãrẽã. Maʉ̃be ara ãdjiduɓa beɗeasiɗaa.
16 Nãwã jarasiɗaa:
–Jãʉ̃ ẽberãrãra ¿sãwã oɗi? Ãdjia maʉ̃ ne ununaca oɗapeɗaɗara jũma Jerusaleʉ̃nebemarãba cawa panʉa. Dadjia poya sewaaɗa aɗaẽ́a.
17 Baribʉrʉ maʉ̃nebemada dewararãa idu cawabiɗa amaaba jãʉ̃ Jesuare panʉrãa waragaɗia idji trʉ̃neba waa beɗearãnamãrẽã.–
18 Ara maʉ̃da Pedrora Juaʉ̃ siɗa waya trʉ̃napeɗa ebuɗa jarasiɗaa ni maãrĩ biɗa Jesuɗebemada beɗearãnamãrẽã idjaɓa jaradiarãnamãrẽã.
19 Baribʉrʉ Pedroba, Juaʉ̃ biɗa jarasiɗaa:
–Bio crĩchaɗadua. ¿Biara ɓʉca Ãcõrẽda ĩjãnida wa bãrãba jara panʉda ĩjãnida? Daimaarã biara ɓʉa Ãcõrẽdrʉ ĩjãnida.
20 Daiba unupeɗaɗada, ũrĩpeɗaɗa siɗa jaradia panania. Poya chupeaɗaẽ́a.–
21 Maʉ̃be dji bororãba wetara waragaɗapeɗa Pedrora Juaʉ̃ siɗa ẽdrʉ ɓʉsiɗaa. Puruda waya panʉ bẽrã cawaɗaẽ́ basía sãwã cawa oɗida. Dji ẽberã biaɗa carea jũmarãda Ãcõrẽa bia beɗea duanasiɗaa.
22 Maʉ̃ ẽberã ne ununacaɗeba biaɗara cuarenta poa auɗu ɓasia.
Jesu ĩjã ɓeaba sozarrada iwiɗipeɗaɗa
23 Pedrora Juaʉ̃ siɗa preso pananada ẽdrʉɗapeɗa waabema Jesu ĩjã ɓea ãbaa duanʉmaa wãsiɗaa. Maʉ̃be sacerdote bororãba, drõãrã dji dromarã biɗa ãdjía jarapeɗaɗada jũma nẽbʉrʉsiɗaa.
24 Maʉ̃ ũrĩsiɗaɗe jũma ãbaa Ãcõrẽa iwiɗisiɗaa:
–Dai Boro jũma poya ɓʉ, bʉabʉrʉ bajãra, naʉ̃ ẽjũãra, pusara, jũma ãdjiɗe nũmʉ siɗa osia.
25 Bʉ Jaureɗeba bʉ nezoca Davia nãwã jarabisia:*
¿Cãrẽ cãrẽã judiorãẽ́ puru ɓeara quĩrũ duanʉ? ¿Cãrẽ cãrẽã puru ɓeara ãdji quĩrĩãbe beɗea au panʉ djõni carea?
26 Druazabema bororãda dji dromarã ume ãbaa dji jʉresiɗaa dadji Ãcõrẽ ume, idjia ɓʉɗa Boro ume biɗa djõni carea.*
27 4:27-28 Ara maʉ̃ quĩrãca naʉ̃ puruɗe Herodeda, Poncio Pilatoda, judiorãẽ́da, dadji Israel puru siɗa dji jʉreɗapeɗa beɗea ausiɗaa bʉ nezoca jipa ɓʉ Jesu beaɗi carea.* Bʉa idjira dadjirã Boroda ɓʉɗamĩna ãdjia mãwã osiɗaa bʉa naẽna crĩcha ɓaɗa quĩrãca. Bʉra bio ʉɓʉa ɓʉ bẽrã naẽna ɓʉsia ãdjia mãwã oɗamãrẽã.
29 Dai Boro, acʉdua sãwã ãdjirãba dairãra waraga panʉda. Sozarrada dairã bʉ nezocarãa diadua bʉ beɗeara ne wayaa neẽ́ jaraɗi carea.
30 Bʉ ʉɓʉa siɗa diadua cacua biẽ́ ɓeara biabiɗi carea idjaɓa bʉ nezoca jipa ɓʉ Jesu trʉ̃neba ne ununacada oɗi carea.–
31 Ãcõrẽa iwiɗipeɗaɗacarea ãdji duanʉ dera uresia. Maʉ̃ne jũmarãda Ãcõrẽ Jaureɗeba duanesiɗaa. Maʉ̃ba Ãcõrẽ beɗeara ne wayaa neẽ́ jara duanesiɗaa.
Ananía Sapira siɗa beupeɗaɗa
32 Maʉ̃ ewariɗe Jesu ĩjã ɓeara aɓari crĩchaɗeba, aɓari soɗeba ãbaa bia duanasiɗaa. Ni aɓaʉba jaraɗaca basía idjia ne eroɓʉra aɓabe idjiɗeda, ãtebʉrʉ ãdjia eroɓeaba dji carebabadjiɗaa.
33 Jesuba diabueɗarãba Ãcõrẽ ʉɓʉaɗeba dadji Boro Jesu ʉ̃rẽbaɗaɗebemada ebuɗa jaradiabadjiɗaa. Idjaɓa Ãcõrẽba idji biaɗeba djabarãra bio carebabadjia.*
34 4:34-35 Maʉ̃ bẽrã ãdjirã tãẽna ne neẽ́ ɓeara neẽ́ basía. Ẽjũã eroɓeaba ãdji ẽjũãra nẽdobuebadjiɗaa idjaɓa de eroɓeaba ãdji dera nẽdobuebadjiɗaa. Nẽdobueɗapeɗa dji paratara Jesuba diabueɗarãmaa edebadjiɗaa cawa jeɗecaɗamãrẽã. Djaba aɓa ne neẽ́ ɓebʉrʉɗe parata diabadjiɗaa.
36 Maʉ̃ne ẽberã Jose abadada ãdjirã ume ɓasia. Jesuba diabueɗarãba idjira trʉ̃ ɓʉsiɗaa Bernabe. (Bernabe trʉ̃ba jara ɓʉa “Sobiabibari Warra.”) Idjira Leviɗeba yõna basía. Chipre druaɗe tosiɗaa.
37 Maʉ̃ Bernabeba ẽjũãda nẽdobuepeɗa dji paratara Jesuba diabueɗarãba cawa jeɗecaɗamãrẽã edesia.
Beɗea eɗaare
^ 4:6. Maʉ̃ ewariɗe Caipára sacerdote dji droma basía baribʉrʉ idji zãwãrẽ Anára maʉ̃ naẽna sacerdote dji droma baɗa bẽrã idjira waɗibiɗa mãwã trʉ̃ jarabadjiɗaa.
^ 4:7. Luca 12:11-12.
^ 4:10. Jesucrito Nazareɗebema ʉɓʉaɗeba. Griego beɗeaɗe “Jesucrito Nazareɗebema trʉ̃neba” ɓʉ́ ɓʉa.
^ 4:11. Salmo 118:22; Luca 20:9-19.
^ 4:25. Bʉ Jaureɗeba. Griego beɗeaɗe ʉ̃cʉrʉ cartaɗe maʉ̃ra neẽ́a. Bʉ nezoca Davi. Griego beɗeaɗe ʉ̃cʉrʉ cartaɗe idjaɓa “dai drõãenabema” ɓʉ́ ɓʉa.
^ 4:25-26. Salmo 2:1-2. Idjia dadjirã Boroda ɓʉɗa. Maʉ̃gʉba jara ɓʉa “idji Crito.”
^ 4:27-28. Herode. Maʉ̃ Herodera Antipa trʉ̃ jarabadjiɗaa. Nezoca. Maʉ̃ beɗeaba idjaɓa jara ɓʉa “Warra.”
^ 4:33. Ãcõrẽba idji biaɗeba djabarãra bio carebabadjia. Maʉ̃ beɗeaba idjaɓa jara ɓʉa “jũma ẽberãrãba Jesu ĩjã ɓeara wayabadjiɗaa.”
