Moses ye Aaron ẹma ẹkedọhọ Pharaoh ke Abasi ọdọhọ ete: ‘Edieke afo mûyakke ikọt mi ẹnyọn̄ọ, nyanam okpụm ọyọhọ isọn̄ emi.’ Okpụm ama ọyọhọ kpukpru ufọk nditọ Egypt, edide imọ owo m̀mê ubuene. Edi okpụm ikodụhe ke isọn̄ Goshen emi nditọ Israel ẹkedụn̄de. Ọtọn̄ọde ke ọyọhọ ufen inan̄ emi, nditọ Egypt kpọt ke ufen ekesisịm. Pharaoh ama ọdọhọ Moses ete: ‘Kpe Jehovah ubọk ete anam okpụm ọkpọn̄ nnyịn. Mmọn̄ nyak ikọt mbufo ẹnyọn̄ọ.’ Edi ke Jehovah ama akanam okpụm ọkpọn̄ mmọ, Pharaoh ama esịn ndiyak nditọ Israel ẹnyọn̄ọ. Ndi odu se idinamde Pharaoh akabade esịt?

Jehovah ama ọdọhọ ete: ‘Edieke Pharaoh mîyakke ikọt mi ẹnyọn̄ọ, ufene nditọ Egypt ẹyedọn̄ọ ẹkpan̄a.’ Edem usen oro, ufene ẹma ẹtọn̄ọ ndikpan̄a. Edi ufene nditọ Israel ndomokiet ikakpaha. Kpa ye oro, Pharaoh ikayakke ikọt Jehovah ẹnyọn̄ọ.

Jehovah ama ọdọhọ Moses afiak aka ebịne Pharaoh, okowobi ntọn̄ otop ke enyọn̄. Ntọn̄ oro ama akabade obu ọyọhọ enyọn̄ onyụn̄ odoro nditọ Egypt ke idem. Mbufụt ama ọyọhọ nditọ Egypt ye ufene mmọ idem. Edi Pharaoh ikosụk inyịmeke nditọ Israel ẹnyọn̄ọ.

Jehovah ama afiak ọdọn̄ Moses ọkọdọhọ Pharaoh ete: ‘Usụk unyịmeke ikọt mi ẹnyọn̄ọ? Edịm itiat eyedep ke Egypt n̄kpọn̄.’ Edem usen oro,  Jehovah ama anam edịm itiat emi asan̄ade ye obuma ye ikan̄ edep. Akananam nditọ Egypt ikwe utọ edịm oro. Edịm oro ama obụn̄ kpukpru eto onyụn̄ abiat kpukpru n̄kpọ-in̄wan̄, edi n̄kpọ ikanamke eto ye n̄kpọ-in̄wan̄ ke Goshen. Pharaoh ama ọdọhọ ete: ‘Kpe Jehovah ubọk ete anam edịm itiat emi etre! Mmọn̄ nyak mbufo ẹnyọn̄ọ.’ Edi ndondo oro edịm etrede, esịt ama afiak ọsọn̄ Pharaoh.

Ekem Moses ama ọdọhọ ete: ‘N̄kukun̄kpọyọriyọ ẹyeta se ededi emi edịm itiat mîkabiatke.’ N̄kukun̄kpọyọriyọ ẹma ẹwọrọ ke miliọn ke miliọn ẹdita se ikosụhọde ke eto ye ke in̄wan̄. Pharaoh ama ọdọhọ ete: ‘Kpe Jehovah ubọk ete anam n̄kukun̄kpọyọriyọ ọkpọn̄ nnyịn.’ Edi Pharaoh ikakabakede esịt ke Jehovah ama akanam n̄kukun̄kpọyọriyọ ọkpọn̄ mmọ.

Jehovah ama ọdọhọ Moses emenede ubọk ke enyọn̄. Ndondo oro enye emenerede ubọk, enyọn̄ ama ekịm; ekedi makmak ekịm. Nditọ Egypt ikekemeke ndikụt n̄kpọ ndomokiet ye owo ndomokiet ke ofụri usen ita. Un̄wana okodu ke n̄kan̄ nditọ Israel kpọt.

Pharaoh ama ọdọhọ Moses ete: ‘Mbufo ẹmekeme ndinyọn̄. Edi ẹkûmen ufene mbufo.’ Moses ama ọdọhọ enye ete: ‘Ana imen ufene nnyịn man ikawa inọ Abasi nnyịn.’ N̄kpọ oro ama ayat Pharaoh tutu enye ofiori ete: ‘Daha mi ke iso! N̄kpafiak n̄kụt fi, nyowot fi.’